ಸಮಾಜದಲ್ಲಿ ಆಸ್ತಿ ಹಂಚಿಕೆ ಮತ್ತು ವಾರಸುದಾರಿಕೆ ಕುರಿತು ಆಗಾಗ ಚರ್ಚೆಗಳು ನಡೆಯುತ್ತಲೇ ಇರುತ್ತವೆ. ವಿಶೇಷವಾಗಿ ತಂದೆಯ ಆಸ್ತಿಯಲ್ಲಿ ಪುತ್ರರಿಗೆ ಇರುವ ಹಕ್ಕುಗಳ ಬಗ್ಗೆ ಬಹುತೇಕರಿಗೆ ತಿಳಿದಿರುತ್ತದೆ. ಆದರೆ ಪುತ್ರಿಯರ ಹಕ್ಕುಗಳ ವಿಷಯದಲ್ಲಿ ಇನ್ನೂ ಸಾಕಷ್ಟು ಗೊಂದಲಗಳಿವೆ.ಒಂದು ವೇಳೆ ತಂದೆ ತನ್ನ ಆಸ್ತಿಯನ್ನು ಯಾರಿಗೆ ನೀಡಬೇಕು ಎಂಬುದರ ಬಗ್ಗೆ ಯಾವುದೇ ವಿಲ್ (Will) ಬರೆಯದೇ ಮೃತಪಟ್ಟರೆ, ಮದುವೆಯಾದ ಮಗಳಿಗೆ ಆ ಆಸ್ತಿಯಲ್ಲಿ ಪಾಲು ಸಿಗುತ್ತದೆಯೇ? ಸಿಕ್ಕರೆ ಅದನ್ನು ಹೇಗೆ ಕಾನೂನುಬದ್ಧವಾಗಿ ಪಡೆಯಬಹುದು? ಎಂಬ ಪ್ರಶ್ನೆಗಳು ಅನೇಕರನ್ನು ಕಾಡುತ್ತವೆ.
2005ರ ತಿದ್ದುಪಡಿ: ಪುತ್ರಿಯರಿಗೂ ಸಮಾನ ಹಕ್ಕು
Hindu Succession Act, 1956 ಪ್ರಕಾರ ಹಿಂದಿನ ದಿನಗಳಲ್ಲಿ ಆಸ್ತಿ ಹಂಚಿಕೆಯಲ್ಲಿ ಪುತ್ರರಿಗೆ ಹೆಚ್ಚಿನ ಪ್ರಾಮುಖ್ಯತೆ ಇತ್ತು. ಆದರೆ 2005ರಲ್ಲಿ ಕೇಂದ್ರ ಸರ್ಕಾರ ಮಹತ್ವದ ತಿದ್ದುಪಡಿ ತಂದಿದ್ದು, ತಂದೆಯ ಆಸ್ತಿಯಲ್ಲಿ ಮಗನಿಗೆ ಇರುವಷ್ಟೇ ಹಕ್ಕು ಮಗಳಿಗೂ ಇದೆ ಎಂದು ಸ್ಪಷ್ಟಪಡಿಸಿತು.ಮಗಳಿಗೆ ಮದುವೆಯಾಗಿದೆ ಅಥವಾ ಇಲ್ಲ ಎಂಬುದು ಇಲ್ಲಿ ಮುಖ್ಯವಲ್ಲ. ಮದುವೆಯಾದ ಬಳಿಕವೂ ತಂದೆಯ ಆಸ್ತಿಯಲ್ಲಿ ಆಕೆ ತನ್ನ ಹಕ್ಕಿನ ಪಾಲನ್ನು ಕಾನೂನುಬದ್ಧವಾಗಿ ಕೇಳಬಹುದು.
2020ರಲ್ಲಿ Supreme Court of India ನೀಡಿದ ಮಹತ್ವದ ತೀರ್ಪಿನಲ್ಲಿ, 2005ರ ತಿದ್ದುಪಡಿ ಕಾನೂನು ಜಾರಿಯಾದ ವೇಳೆಗೆ ತಂದೆ ಜೀವಂತವಾಗಿದ್ದರೂ ಅಥವಾ ಇಲ್ಲದಿದ್ದರೂ, ಪುತ್ರಿಯರಿಗೆ ಜನ್ಮಸಿದ್ಧ ಹಕ್ಕು ಇರುತ್ತದೆ ಎಂದು ಸ್ಪಷ್ಟಪಡಿಸಿದೆ.
ತಂದೆ ವಿಲ್ ಬರೆಯದೇ ಮೃತಪಟ್ಟರೆ ಏನಾಗುತ್ತದೆ?
ಒಬ್ಬ ವ್ಯಕ್ತಿ ತನ್ನ ಸ್ವಂತ ಸಂಪಾದಿತ ಆಸ್ತಿ ಅಥವಾ ಪಿತ್ರಾರ್ಜಿತ ಆಸ್ತಿಯನ್ನು ಯಾರಿಗೆ ಹಂಚಬೇಕು ಎಂಬ ಬಗ್ಗೆ ವಿಲ್ ಬರೆಯದೇ ಮೃತಪಟ್ಟರೆ, ಅದನ್ನು ಕಾನೂನು ಭಾಷೆಯಲ್ಲಿ ಇಂಟೆಸ್ಟೇಟ್ (Intestate) ಎಂದು ಕರೆಯಲಾಗುತ್ತದೆ.ಇಂತಹ ಸಂದರ್ಭಗಳಲ್ಲಿ ಹಿಂದೂ ವಾರಸುದಾರಿಕೆ ಕಾನೂನಿನ ಪ್ರಕಾರ ಆಸ್ತಿ ಮೊದಲು ಕ್ಲಾಸ್-1 ವಾರಸುದಾರರಿಗೆ ಸೇರುತ್ತದೆ.
ಕ್ಲಾಸ್-1 ವಾರಸುದಾರರು ಯಾರು?
- ಪತ್ನಿ
- ಪುತ್ರರು
- ಪುತ್ರಿಯರು
ಆಸ್ತಿ ಸಮಾನ ಹಂಚಿಕೆ
ತಂದೆ ವಿಲ್ ಬರೆಯದೇ ಮೃತಪಟ್ಟಿದ್ದರೆ, ಆಸ್ತಿಯನ್ನು ಕ್ಲಾಸ್-1 ವಾರಸುದಾರರ ನಡುವೆ ಸಮಾನವಾಗಿ ಹಂಚಬೇಕು.
ಉದಾಹರಣೆಗೆ, ಒಬ್ಬ ವ್ಯಕ್ತಿಗೆ ಪತ್ನಿ, ಒಬ್ಬ ಮಗ ಮತ್ತು ಒಬ್ಬ ಮಗಳು ಇದ್ದರೆ, ಆಸ್ತಿಯನ್ನು ಮೂರು ಸಮಾನ ಭಾಗಗಳಾಗಿ ವಿಂಗಡಿಸಿ ಮೂವರಿಗೂ ನೀಡಬೇಕು. ಮದುವೆಯಾದ ಮಗಳಿಗೂ ಮಗನಷ್ಟೇ ಸಮಾನ ಪಾಲು ದೊರೆಯುತ್ತದೆ.
ಮದುವೆಯಾದ ಮಗಳು ತನ್ನ ಪಾಲನ್ನು ಹೇಗೆ ಪಡೆಯಬಹುದು?
ಕುಟುಂಬದವರು ಅಥವಾ ಸಹೋದರರು ಆಸ್ತಿ ನೀಡಲು ನಿರಾಕರಿಸಿದರೆ, ಮಗಳು ಈ ಕೆಳಗಿನ ಕ್ರಮಗಳನ್ನು ಅನುಸರಿಸಬಹುದು:
1. ಕಾನೂನುಬದ್ಧ ವಾರಸುದಾರರ ಪ್ರಮಾಣಪತ್ರ (Legal Heir Certificate)
ಮೊದಲು ತಂದೆಯ ಮರಣ ಪ್ರಮಾಣಪತ್ರ ಪಡೆದು, ತಹಶೀಲ್ದಾರ್ ಕಚೇರಿಯಿಂದ ಕುಟುಂಬದ ಎಲ್ಲ ಸದಸ್ಯರ ಹೆಸರಿರುವ ಲೀಗಲ್ ಹೆರ್ ಸರ್ಟಿಫಿಕೇಟ್ ಪಡೆಯಬೇಕು. ಇದರಲ್ಲಿ ಮಗಳ ಹೆಸರೂ ಇರಬೇಕು.
2. ವಿಭಜನೆ ದಾವೆ (Partition Suit)
ಕುಟುಂಬ ಸದಸ್ಯರು ಸೌಹಾರ್ದಯುತವಾಗಿ ಆಸ್ತಿ ಹಂಚಿಕೆಗೆ ಒಪ್ಪದಿದ್ದರೆ, ಮಗಳು ಸಿವಿಲ್ ನ್ಯಾಯಾಲಯದಲ್ಲಿ ವಿಭಜನೆ ದಾವೆ ಹೂಡಬಹುದು. ನ್ಯಾಯಾಲಯ ಕಾನೂನುಬದ್ಧ ದಾಖಲೆಗಳನ್ನು ಪರಿಶೀಲಿಸಿ ಆಕೆಗೆ ಸಲ್ಲುವ ಪಾಲನ್ನು ನೀಡುವಂತೆ ಆದೇಶಿಸಬಹುದು.
ಪ್ರಮುಖ ವಿನಾಯಿತಿ
ಇಲ್ಲಿ ಒಂದು ಮಹತ್ವದ ಅಂಶವನ್ನು ಗಮನಿಸಬೇಕು.ತಂದೆಯು ತನ್ನ ಸ್ವಂತ ಸಂಪಾದಿತ ಆಸ್ತಿ ಮೇಲೆ ಸಂಪೂರ್ಣ ಹಕ್ಕು ಹೊಂದಿರುತ್ತಾನೆ. ಜೀವಂತವಾಗಿರುವಾಗಲೇ ತನ್ನ ಆಸ್ತಿಯನ್ನು ಮಗನಿಗೆ ಅಥವಾ ಬೇರೆ ಯಾರಿಗಾದರೂ ನೀಡುವಂತೆ ಸರಿಯಾದ ವಿಲ್ ಬರೆದು ನೋಂದಣಿ ಮಾಡಿಸಿದ್ದರೆ, ಆ ಸಂದರ್ಭದಲ್ಲಿ ಮಗಳು ಆ ವಿಲ್ ಅನ್ನು ಸಾಮಾನ್ಯವಾಗಿ ಪ್ರಶ್ನಿಸಲು ಸಾಧ್ಯವಾಗುವುದಿಲ್ಲ.ಆದರೆ ತಂದೆ ವಿಲ್ ಬರೆಯದೇ ಮೃತಪಟ್ಟಿದ್ದರೆ, ಮಗಳಿಗೆ ಸಮಾನ ಪಾಲು ದೊರೆಯುತ್ತದೆ. ಇನ್ನು ಪಿತ್ರಾರ್ಜಿತ (ಪೂರ್ವಿಕರ) ಆಸ್ತಿ ಆಗಿದ್ದರೆ, ಮಗಳಿಗೆ ಜನ್ಮಸಿದ್ಧ ಹಕ್ಕು ಇರುತ್ತದೆ. ತಂದೆ ವಿಲ್ ಬರೆದಿದ್ದರೂ ಅಥವಾ ಬರೆಯದೇ ಇದ್ದರೂ, ಕಾನೂನಿನ ಪ್ರಕಾರ ಆಕೆ ತನ್ನ ಪಾಲನ್ನು ಪಡೆಯಲು ಅರ್ಹಳಾಗಿರುತ್ತಾಳೆ.
