ನವದೆಹಲಿ: ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಸಂಚಲನ ಹಾಗೂ ಸರಣಿ ಮೀಮ್‌ಗಳಿಗೆ ಕಾರಣವಾಗಿದ್ದ ವ್ಯಂಗ್ಯಭರಿತ (Satirical) ಆನ್‌ಲೈನ್ ವೇದಿಕೆ ಕಾಕ್ರೋಚ್ ಜನತಾ ಪಾರ್ಟಿ (CJP) ಯ ಅಧಿಕೃತ ‘X’ (ಟ್ವಿಟರ್) ಖಾತೆಯನ್ನು ಭಾರತದಲ್ಲಿ ಕೇಂದ್ರ ಸರ್ಕಾರ ಅಮಾನತುಗೊಳಿಸಿದೆ. ಈ ನಿರ್ಬಂಧವನ್ನು ಪ್ರಶ್ನಿಸಿ ಪಕ್ಷದ ಸಂಸ್ಥಾಪಕ ಅಭಿಜೀತ್ ದಿಪ್ಕೆ ಈಗ ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿದ್ದು, ಅರ್ಜಿಯ ವಿಚಾರಣೆಯು ಇದೇ ವಾರ ನಡೆಯುವ ಸಾಧ್ಯತೆಯಿದೆ.
ರಾಷ್ಟ್ರೀಯ ಭದ್ರತೆಯ ಕಾರಣಗಳನ್ನು ನೀಡಿ ಕೇಂದ್ರ ಸರ್ಕಾರ ಈ ಕ್ರಮ ಕೈಗೊಂಡಿದ್ದು, ಮತ್ತೊಂದೆಡೆ ಇದೇ ವಿವಾದಕ್ಕೆ ಸಂಬಂಧಿಸಿದಂತೆ ಸುಪ್ರೀಂ ಕೋರ್ಟ್‌ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಗಳು (PIL) ಸಲ್ಲಿಕೆಯಾಗಿವೆ.
ಐಟಿ ಕಾಯ್ದೆ ಸೆಕ್ಷನ್ 69(A) ಅಡಿ ಎಕ್ಸ್ ಖಾತೆಗೆ ಮುದ್ರೆ
ಇಂಟೆಲಿಜೆನ್ಸ್ ಬ್ಯೂರೋ (IB) ನೀಡಿದ ಇನ್‌ಪುಟ್‌ಗಳ ಆಧಾರದ ಮೇಲೆ ರಾಷ್ಟ್ರೀಯ ಭದ್ರತಾ ಕಾಳಜಿಗಳನ್ನು ಉಲ್ಲೇಖಿಸಿ, ಕೇಂದ್ರ ಸರ್ಕಾರದ ನಿರ್ದೇಶನದ ಮೇರೆಗೆ ಮೇ 21 ರಂದು ಭಾರತದಲ್ಲಿ ಈ ಎಕ್ಸ್ ಖಾತೆಯನ್ನು ತಡೆಹಿಡಿಯಲಾಗಿತ್ತು. ದೇಶದ ಸಾರ್ವಭೌಮತ್ವ, ಭದ್ರತೆ ಹಾಗೂ ಸಾರ್ವಜನಿಕ ಸುವ್ಯವಸ್ಥೆಯ ಹಿತದೃಷ್ಟಿಯಿಂದ ಮಾಹಿತಿ ತಂತ್ರಜ್ಞಾನ ಕಾಯ್ದೆ, 2000 ರ ಸೆಕ್ಷನ್ 69(A) ಅಡಿಯಲ್ಲಿ ಸಿಜೆಪಿ ಖಾತೆಯನ್ನು ತಡೆಹಿಡಿಯುವಂತೆ ಐಟಿ ಸಚಿವಾಲಯವು (MeitY) ‘X’ ಸಂಸ್ಥೆಗೆ ಸೂಚಿಸಿತ್ತು. ಸದ್ಯ ಈ ಖಾತೆಯು ಭಾರತದ ಹೊರಗಿನ ಸ್ಥಳಗಳಿಂದ ಮಾತ್ರ ಪ್ರವೇಶಿಸಲು ಲಭ್ಯವಿದೆ.
ಭಾವನಾತ್ಮಕವಾಗಿ ತೆಗೆದುಕೊಳ್ಳಬೇಡಿ: ಸಿಜೆಐ ಸೂರ್ಯ ಕಾಂತ್
ಸುಪ್ರೀಂ ಕೋರ್ಟ್ ಮುಖ್ಯ ನ್ಯಾಯಮೂರ್ತಿಗಳ (CJI) ಜಿರಳೆ ಹೇಳಿಕೆಯನ್ನು ಮುಂದಿಟ್ಟುಕೊಂಡು ನ್ಯಾಯಾಂಗದ ತೇಜೋವಧೆ ಮಾಡಲು ಸೋಷಿಯಲ್ ಮೀಡಿಯಾದಲ್ಲಿ ವಿಕೃತ ಮತ್ತು ದುರುದ್ದೇಶಪೂರಿತ ನ್ಯಾರೇಟಿವ್ ಮುಂದುವರಿಸಲಾಗುತ್ತಿದೆ ಎಂದು ವಕೀಲ ಎನ್.ಕೆ. ಗೋಸ್ವಾಮಿ ಪಿಐಎಲ್ ಉಲ್ಲೇಖಿಸಿದಾಗ, ಭಾರತದ ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್ ಅವರು, ಇದನ್ನು ಅಷ್ಟೊಂದು ಭಾವನಾತ್ಮಕವಾಗಿ ತೆಗೆದುಕೊಳ್ಳಬೇಡಿ ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.
ತುರ್ತು ವಿಚಾರಣೆ ನಿರಾಕರಿಸಿದ ಸುಪ್ರೀಂ ಪೀಠ
ಸಿಜೆಐ ಸೂರ್ಯ ಕಾಂತ್, ನ್ಯಾಯಮೂರ್ತಿಗಳಾದ ಜಾಯ್‌ಮಾಲ್ಯ ಬಾಗ್ಚಿ ಮತ್ತು ವಿ.ಎಂ. ಪಾಂಚೋಲಿ ಅವರನ್ನೊಳಗೊಂಡ ಪೀಠವು ಈ ಅರ್ಜಿಗಳ ತುರ್ತು ವಿಚಾರಣೆಯನ್ನು ನಿರಾಕರಿಸಿದೆ. ಇದರಲ್ಲಿ ಅಂತಹ ಗಂಭೀರ ತುರ್ತು ಪರಿಸ್ಥಿತಿ ಏನೂ ಇಲ್ಲ ಮತ್ತು ಸೂಕ್ತ ಸಮಯದಲ್ಲಿ ಇದನ್ನು ಪರಿಶೀಲಿಸಲಾಗುವುದು ಎಂದು ಪೀಠ ಸ್ಪಷ್ಟಪಡಿಸಿದೆ.
ಸಿಬಿಐ ತನಿಖೆಗೆ ಒತ್ತಾಯ ಹಾಗೂ ವಾಣಿಜ್ಯಿಕ ಬಳಕೆ ವಿರೋಧ
ನ್ಯಾಯಾಲಯದಲ್ಲಿ ಇಬ್ಬರು ವಕೀಲರು ಪ್ರತ್ಯೇಕ ಅರ್ಜಿಗಳನ್ನು ಪ್ರಸ್ತಾಪಿಸಿದರು:
ಸಿಬಿಐ ತನಿಖೆಗೆ ಆಗ್ರಹ: ಕಾಕ್ರೋಚ್ ಜನತಾ ಪಾರ್ಟಿ ಚಟುವಟಿಕೆಗಳು ನ್ಯಾಯಾಂಗದ ಇಮೇಜ್‌ಗೆ ಧಕ್ಕೆ ತರುತ್ತಿದ್ದು, ಇದರ ಬಗ್ಗೆ ಸಿಬಿಐ ತನಿಖೆ ನಡೆಸಬೇಕೆಂದು ಒಂದು ಅರ್ಜಿ ಕೋರಿದೆ.
ಕೋರ್ಟ್ ಕಲಾಪಗಳ ಮಾನಿಟೈಸೇಶನ್ ತಡೆ: ವಕೀಲ ರಾಜಾ ಚೌಧರಿ ಸಲ್ಲಿಸಿದ ಮತ್ತೊಂದು ಅರ್ಜಿಯು, ನಕಲಿ ವಕೀಲರ ಪದವಿಗಳ ದಂದೆಯ ತನಿಖೆಗೆ ಒತ್ತಾಯಿಸಿದೆ. ಜೊತೆಗೆ ಸುಪ್ರೀಂ ಕೋರ್ಟ್ ಕಲಾಪದ ಮೌಖಿಕ ಸಂಭಾಷಣೆಗಳನ್ನು ಹಣಗಳಿಕೆಯ (Monetization) ಉದ್ದೇಶಕ್ಕಾಗಿ ಮತ್ತು ವಾಣಿಜ್ಯಿಕವಾಗಿ ಬಳಸಿಕೊಳ್ಳುವುದರ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿದೆ.
ಏನಿದು ಜಿರಳೆ ವಿವಾದ?
ವಕೀಲರೊಬ್ಬರಿಗೆ ಹಿರಿಯ ವಕೀಲ ಹುದ್ದೆಯ ಪದನಾಮ ನೀಡುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯ ಸಂದರ್ಭದಲ್ಲಿ ಸಿಜೆಐ ಸೂರ್ಯ ಕಾಂತ್ ಅವರು ಆಡಿದ್ದ ಮೌಖಿಕ ಕಾಮೆಂಟ್‌ನಿಂದ ಈ ಇಡೀ ವಿವಾದ ಆರಂಭವಾಗಿತ್ತು. ನಕಲಿ ಕಾನೂನು ಪದವಿ ಹೊಂದಿರುವವರ ಬಗ್ಗೆ ಕಳಕಳಿ ವ್ಯಕ್ತಪಡಿಸಿದ್ದ ಸಿಜೆಐ, ಕೆಲಸ ಸಿಗದೆ ಸೋಷಿಯಲ್ ಮೀಡಿಯಾ, ಆರ್‌ಟಿಐ ಹಾಗೂ ವಿವಿಧ ಮಾಧ್ಯಮಗಳ ಮೂಲಕ ಆಕ್ಟಿವಿಸ್ಟ್‌ಗಳಾಗಿ ಬದಲಾಗಿ ವ್ಯವಸ್ಥೆಯ ಮೇಲೆ ದಾಳಿ ಮಾಡುವವರನ್ನು “ಜಿರಳೆಗಳಿಗೆ” ಮತ್ತು ಪರಾವಲಂಬಿಗಳಿಗೆ (Parasites) ಹೋಲಿಸಿದ್ದರು.
ತಮ್ಮ ಪದವಿಗಳ ಬಗ್ಗೆ ತೀವ್ರ ಅನುಮಾನವಿರುವ, ಕಪ್ಪು ಕೋಟ್ ಧರಿಸಿರುವ ಸಾವಿರಾರು ವಂಚಕ ಜನರಿದ್ದಾರೆ. ಇಂತಹವರ ಪರವಾಗಿ ನ್ಯಾಯಾಂಗ ನಿಂದನೆ ಅರ್ಜಿಗಳನ್ನು ಸಲ್ಲಿಸಲಾಗುತ್ತಿದೆ” ಎಂದು ಸಿಜೆಐ ಕಾವೇರಿದ ಮೌಖಿಕ ಅವಲೋಕನ ಮಾಡಿದ್ದರು. ಸಿಜೆಐ ಅವರ ಈ ಹೇಳಿಕೆಯನ್ನೇ ಅಸ್ತ್ರವಾಗಿಸಿಕೊಂಡು ನೆಟ್ಟಿಗರು ಇಂಟರ್ನೆಟ್‌ನಲ್ಲಿ “ಕಾಕ್ರೋಚ್ ಜನತಾ ಪಾರ್ಟಿ (CJP) ಎಂಬ ವ್ಯಂಗ್ಯಭರಿತ ಅಭಿಯಾನ ಹಾಗೂ ಪೇಜ್‌ಗಳನ್ನು ಸೃಷ್ಟಿಸಿದ್ದರು.
