ನೇಪಾಳದ ಸಾಂಪ್ರದಾಯಿಕ ಅಡುಗೆಗಳು ತಮ್ಮ ವಿಶಿಷ್ಟ ರುಚಿ ಮತ್ತು ಸರಳತೆಗೆ ಹೆಸರುವಾಸಿಯಾಗಿವೆ. ಅಂತಹ ಅತ್ಯಂತ ಜನಪ್ರಿಯ ಮತ್ತು ವಿಭಿನ್ನವಾದ ಸೈಡ್ ಡಿಶ್‌ಗಳಲ್ಲಿ ‘ಚುಕಾನಿ’ ಪ್ರಮುಖವಾದದ್ದು. ಬೇಯಿಸಿದ ಆಲೂಗಡ್ಡೆ, ಮೊಸರು ಮತ್ತು ಸಾಸಿವೆ ಎಣ್ಣೆಯ ಒಗ್ಗರಣೆಯೊಂದಿಗೆ ತಯಾರಾಗುವ ಈ ಖಾದ್ಯವು ಊಟಕ್ಕೆ ಒಂದು ಮಸ್ತ್ ಟ್ವಿಸ್ಟ್ ನೀಡುತ್ತದೆ. ಮೃದುವಾದ ಆಲೂಗಡ್ಡೆ ಮತ್ತು ಹುಳಿ ಮೊಸರಿನ ಈ ಮಿಶ್ರಣವು ನಾಲಿಗೆಗೆ ಹೊಸ ರುಚಿಯನ್ನು ಪರಿಚಯಿಸುತ್ತದೆ. ನೇಪಾಳದಲ್ಲಿ ಹಬ್ಬ ಹರಿದಿನಗಳು ಹಾಗೂ ಕೌಟುಂಬಿಕ ಸಮಾರಂಭಗಳಲ್ಲಿ ಇದನ್ನು ವಿಶೇಷವಾಗಿ ಸಿದ್ಧಪಡಿಸಲಾಗುತ್ತದೆ. ಇದನ್ನು ಅನ್ನದೊಂದಿಗೆ ಸವಿಯಲು ಅತ್ಯುತ್ತಮವಾಗಿದ್ದು, ಅತ್ಯಂತ ಕಡಿಮೆ ಸಮಯದಲ್ಲಿ ಸುಲಭವಾಗಿ ಮಾಡಬಹುದು.
ಚುಕಾನಿ ವಿಶೇಷತೆ ಏನು
ಸಾಮಾನ್ಯವಾಗಿ ಮಾಡುವ ಆಲೂಗಡ್ಡೆ ರೆಸಿಪಿಗಳಿಗಿಂತ ಇದು ಸಂಪೂರ್ಣ ವಿಭಿನ್ನವಾಗಿದೆ. ಇದರಲ್ಲಿ ಬಳಸುವ ಸಾಸಿವೆ ಎಣ್ಣೆಯು ಹಿಮಾಲಯದ ಸಾಂಪ್ರದಾಯಿಕ ಅಡುಗೆಯ ಪರಿಮಳವನ್ನು ನೀಡುತ್ತದೆ. ಇದು ಆರೋಗ್ಯಕ್ಕೆ ಲಘುವಾಗಿದ್ದು, ಮಸಾಲೆ ಪದಾರ್ಥಗಳ ಸಮತೋಲನವನ್ನು ಕಾಯ್ದುಕೊಳ್ಳುತ್ತದೆ. ಖಾರವಾದ ಸಾಂಬಾರ್ ಅಥವಾ ಮಸಾಲೆಯುಕ್ತ ಸಾರಿಗೆ ಇದು ಅತ್ಯುತ್ತಮ ಸೈಡ್ ಡಿಶ್ ಆಗಿದೆ.
ಬೇಕಾಗುವ ಸಾಮಗ್ರಿಗಳು
- ಬೇಯಿಸಿದ ಆಲೂಗಡ್ಡೆ – ೩
- ಗಟ್ಟಿ ಮೊಸರು – ೨ ಕಪ್
- ಸಣ್ಣಗೆ ಹೆಚ್ಚಿದ ಈರುಳ್ಳಿ – ೧
- ಹಸಿರು ಮೆಣಸಿನಕಾಯಿ – ೨
- ಹುರಿದ ಜೀರಿಗೆ ಪುಡಿ – ೧ ಚಮಚ
- ಸಾಸಿವೆ ಎಣ್ಣೆ – ೧ ದೊಡ್ಡ ಚಮಚ
- ಸಾಸಿವೆ – ಅರ್ಧ ಚಮಚ
- ಕರಿಬೇವು – ೬ ರಿಂದ ೮ ಎಸಳು
- ಕಸೂರಿ ಮೇತಿ – ೧ ಚಮಚ
- ಅಚ್ಚಖಾರದ ಪುಡಿ – ಒಂದು ಚಿಟಿಕೆ
- ರುಚಿಗೆ ತಕ್ಕಷ್ಟು ಉಪ್ಪು
- ಕೊತ್ತಂಬರಿ ಸೊಪ್ಪು ಸ್ವಲ್ಪ
ತಯಾರಿಸುವ ವಿಧಾನ
ಮೊದಲು ಬೇಯಿಸಿದ ಆಲೂಗಡ್ಡೆಯ ಸಿಪ್ಪೆ ಸುಲಿದು ಮಧ್ಯಮ ಗಾತ್ರದ ಚೌಕಾಕಾರದ ತುಂಡುಗಳಾಗಿ ಕತ್ತರಿಸಿ ಒಂದು ದೊಡ್ಡ ಪಾತ್ರೆಗೆ ಹಾಕಿಟ್ಟುಕೊಳ್ಳಿ. ನಂತರ ಗಟ್ಟಿ ಮೊಸರನ್ನು ಗಂಟಿಲ್ಲದಂತೆ ಚೆನ್ನಾಗಿ ಫೆಟಾಯಿಸಿ, ಕತ್ತರಿಸಿದ ಆಲೂಗಡ್ಡೆ ತುಂಡುಗಳ ಮೇಲೆ ಸಮನಾಗಿ ಸುರಿಯಿರಿ. ಇದಕ್ಕೆ ಹೆಚ್ಚಿದ ಈರುಳ್ಳಿ, ಹಸಿರು ಮೆಣಸಿನಕಾಯಿ, ಜೀರಿಗೆ ಪುಡಿ, ಉಪ್ಪು ಮತ್ತು ಅಚ್ಚಖಾರದ ಪುಡಿಯನ್ನು ಸೇರಿಸಿ ಹಗುರವಾಗಿ ಕೈಯಾಡಿಸಿ.
ಈಗ ಒಗ್ಗರಣೆ ಪಾತ್ರೆಯಲ್ಲಿ ಸಾಸಿವೆ ಎಣ್ಣೆಯನ್ನು ಬಿಸಿ ಮಾಡಿ. ಎಣ್ಣೆ ಕಾದ ನಂತರ ಸಾಸಿವೆ, ಕರಿಬೇವು ಮತ್ತು ಕಸೂರಿ ಮೇತಿ ಹಾಕಿ ಚಟಪಟ ಸಿಡಿಯಲು ಬಿಡಿ. ಈ ಬಿಸಿ ಒಗ್ಗರಣೆಯನ್ನು ಸಿದ್ಧಪಡಿಸಿಟ್ಟುಕೊಂಡ ಮೊಸರು ಹಾಗೂ ಆಲೂಗಡ್ಡೆ ಮಿಶ್ರಣಕ್ಕೆ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಕೊನೆಯಲ್ಲಿ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ, ಗಟ್ಟಿ ಮೊಸರು ಮತ್ತು ಆಲೂಗಡ್ಡೆಯ ಕಾಂಬಿನೇಷನ್ ನ ನೇಪಾಳಿ ಚುಕಾನಿ ಸವಿಯಲು ಸಿದ್ಧ. ಇದನ್ನು ಕೊಂಚ ಸಮಯ ಫ್ರಿಡ್ಜ್ ನಲ್ಲಿಟ್ಟು ತಣ್ಣಗಾದ ಮೇಲೆಯೂ ಅನ್ನ ಮತ್ತು ಬೇಳೆ ಸಾರಿನ ಜೊತೆ ಸವಿಯಬಹುದು.
