ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಮತ್ತು ಮುಂಬೈ ಮಾಧ್ಯಮದ ಕ್ಯಾಮೆರಾಮೆನ್‌ಗಳ (ಪಾಪರಾಜಿಗಳು) ನಡುವಿನ ಮುನಿಸು ಈಗ ಸುಖಾಂತ್ಯ ಕಂಡಿದೆ. ಆಸ್ಪತ್ರೆಯ ಆವರಣದಲ್ಲಿ ತಮಗೆ ಕಿರಿಕಿರಿ ಉಂಟುಮಾಡಿದ ಮಾಧ್ಯಮದವರ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದ್ದ ಸಲ್ಮಾನ್ ಖಾನ್, ಮರುದಿನವೇ ಅವರ ಕ್ಷಮಾಪಣೆಯನ್ನು ಸ್ವೀಕರಿಸುವ ಮೂಲಕ ಮತ್ತೊಮ್ಮೆ ಸುದ್ದಿಯಾಗಿದ್ದಾರೆ.
ಆಸ್ಪತ್ರೆಯ ಬಳಿ ನಡೆದಿದ್ದೇನು? ಮಂಗಳವಾರ ತಡರಾತ್ರಿ ಸಲ್ಮಾನ್ ಖಾನ್ ಅವರು ಮುಂಬೈನ ಖಾಸಗಿ ಆಸ್ಪತ್ರೆಯೊಂದಕ್ಕೆ ಆಪ್ತರನ್ನು ಭೇಟಿ ಮಾಡಲು ತೆರಳಿದ್ದರು. ಈ ವೇಳೆ ಅಲ್ಲಿಗೆ ಧಾವಿಸಿದ ಕ್ಯಾಮೆರಾಮೆನ್‌ಗಳು ಸಲ್ಮಾನ್ ಅವರ ಹೆಸರನ್ನು ಜೋರಾಗಿ ಕೂಗುತ್ತಾ, ಅವರ ಮುಂಬರುವ ಸಿನಿಮಾ ‘ಮಾತೃಭೂಮಿ’ ಬಗ್ಗೆ ಪ್ರಶ್ನೆ ಕೇಳಲು ಆರಂಭಿಸಿದರು. ಆಸ್ಪತ್ರೆಯಂತಹ ಸೂಕ್ಷ್ಮ ಜಾಗದಲ್ಲಿ ಮಾಧ್ಯಮದವರ ಈ ವರ್ತನೆ ಸಲ್ಮಾನ್ ಖಾನ್ ಅವರನ್ನು ತೀವ್ರ ಕೆರಳಿಸಿತ್ತು.
ಇದಾದ ಬೆನ್ನಲ್ಲೇ ತಮ್ಮ ಸೋಶಿಯಲ್ ಮೀಡಿಯಾ ಖಾತೆಗಳಲ್ಲಿ ಸರಣಿ ಪೋಸ್ಟ್‌ಗಳನ್ನು ಹಾಕಿದ್ದ ಸಲ್ಮಾನ್, ಜನರ ಕಷ್ಟದ ಸಂದರ್ಭವನ್ನು ಹಣ ಗಳಿಕೆಗೆ ಬಳಸಿಕೊಳ್ಳಬೇಡಿ ಎಂದು ತರಾಟೆಗೆ ತೆಗೆದುಕೊಂಡಿದ್ದರು. ನನಗೆ 60 ವರ್ಷ ವಯಸ್ಸಾಗಿದ್ದರೂ ಹೋರಾಡುವುದನ್ನು ಮರೆತಿಲ್ಲ ಎಂದು ಎಚ್ಚರಿಕೆ ನೀಡಿದ್ದ ಪೋಸ್ಟ್‌ಗಳು ಇಂಟರ್ನೆಟ್‌ನಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ದವು.
ಜೋರಾಗಿ ಸಾರಿ ಹೇಳಿ ಎಂದ ನಟ ಈ ಘಟನೆ ನಡೆದ ಮರುದಿನವೇ, ಅಂದರೆ ಬುಧವಾರ ರಾತ್ರಿ ಮರಾಠಿ ಸಿನಿಮಾ ‘ರಾಜಾ ಶಿವಾಜಿ’ ಯಶಸ್ಸಿನ ಸಂಭ್ರಮಾಚರಣೆ ಕಾರ್ಯಕ್ರಮಕ್ಕೆ ಸಲ್ಮಾನ್ ಖಾನ್ ಆಗಮಿಸಿದ್ದರು. ಈ ಚಿತ್ರದಲ್ಲಿ ಅವರು ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಕಾರ್ಯಕ್ರಮದ ವೇದಿಕೆ ಬಳಿ ಸಲ್ಮಾನ್ ಬರುತ್ತಿದ್ದಂತೆ, ಹಿಂದಿನ ದಿನದ ತಪ್ಪು ಅರಿತುಕೊಂಡ ಕ್ಯಾಮೆರಾಮೆನ್‌ಗಳು ಒಟ್ಟಾಗಿ, ನಿನ್ನೆ ನಡೆದ ಘಟನೆಗೆ ಕ್ಷಮಿಸಿ ಭಾಯ್ ಎಂದು ಕೇಳಿಕೊಂಡರು.
ಇದಕ್ಕೆ ನಗುತ್ತಲೇ ಪ್ರತಿಕ್ರಿಯಿಸಿದ ಸಲ್ಮಾನ್ ಖಾನ್, ಸಿನಿಮಾ ಕಾರ್ಯಕ್ರಮಗಳನ್ನು ತೋರಿಸಿ ಸಿನಿಮಾ ಬಗ್ಗೆ ಕೇಳಲು ಇದು ಸರಿಯಾದ ಜಾಗ ಎಂದು ಮಾರ್ಮಿಕವಾಗಿ ನುಡಿದರು. ಅಷ್ಟಕ್ಕೇ ನಿಲ್ಲಿಸದ ಅವರು, ಪಕ್ಕದಲ್ಲೇ ಇದ್ದ ನಟ ಮತ್ತು ನಿರ್ದೇಶಕ ರಿತೇಶ್ ದೇಶ್‌ಮುಖ್ ಸಮ್ಮುಖದಲ್ಲೇ ಕ್ಯಾಮೆರಾಮೆನ್‌ಗಳನ್ನು ರೇಗಿಸುತ್ತಾ, ಎಲ್ಲರೂ ಜೋರಾಗಿ ಒಟ್ಟಿಗೆ ಸಾರಿ ಹೇಳಿ ಎಂದು ತಮಾಷೆ ಮಾಡಿದರು. ಮಾಧ್ಯಮದವರು ಕೂಡ ತಕ್ಷಣವೇ ಜೋರಾಗಿ ಕ್ಷಮೆ ಕೇಳಿದಾಗ ಅಲ್ಲಿ ನೆರೆದಿದ್ದವರು ನಗೆಗಡಲಲ್ಲಿ ತೇಲಿದರು. ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ.
ಇದಕ್ಕೂ ಮುನ್ನ ಸಲ್ಮಾನ್ ಖಾನ್ ಅವರು ಹಂಚಿಕೊಂಡಿದ್ದ ಒಂಟಿತನದ ಬಗೆಗಿನ ಪೋಸ್ಟ್ ಕೂಡ ಅಭಿಮಾನಿಗಳಲ್ಲಿ ಸಾಕಷ್ಟು ಕುತೂಹಲ ಮೂಡಿಸಿತ್ತು. ಸದ್ಯ ಸಲ್ಮಾನ್ ಖಾನ್ ಅವರ ಈ ನಡೆ ಮತ್ತು ಮಾಧ್ಯಮದವರ ನಡೆ ಬಾಲಿವುಡ್ ಅಂಗಳದಲ್ಲಿ ಪ್ರಮುಖ ಚರ್ಚೆಯ ವಿಷಯವಾಗಿದೆ.
