ಭಾರತದ ಎರಡನೇ ಅತಿದೊಡ್ಡ ಐಟಿ ಸಂಸ್ಥೆಯಾದ ಇನ್ಫೋಸಿಸ್, ಸೋಮವಾರ ಉದ್ಯೋಗಿಗಳಿಗೆ ಪರ್ಫಾರ್ಮೆನ್ಸ್ ಬೋನಸ್ (ವೇರಿಯೇಬಲ್ ಪೇ) ಘೋಷಿಸಿದೆ. 2025-26ನೇ ಆರ್ಥಿಕ ವರ್ಷದ ಕೊನೆಯ ತ್ರೈಮಾಸಿಕಕ್ಕೆ ಸಂಬಂಧಿಸಿದಂತೆ ಸರಾಸರಿ 70 ಪ್ರತಿಶತದಷ್ಟು ಪರ್ಫಾರ್ಮೆನ್ಸ್ ಬೋನಸ್ ನೀಡುತ್ತಿರುವುದಾಗಿ ಕಂಪನಿ ತಿಳಿಸಿದೆ. ಆದರೆ, ಇದು ಹಿಂದಿನ ಅಕ್ಟೋಬರ್-ಡಿಸೆಂಬರ್ ತ್ರೈಮಾಸಿಕಕ್ಕೆ ಹೋಲಿಸಿದರೆ ತೀರಾ ಕಡಿಮೆ. ಮೂರನೇ ತ್ರೈಮಾಸಿಕದಲ್ಲಿ (Q3) ಕಂಪನಿಯು ಸರಾಸರಿ 85 ಪ್ರತಿಶತದಷ್ಟು ವೇರಿಯೇಬಲ್ ಪೇ ನೀಡಿತ್ತು. ಹಿಂದಿನ ಅವಧಿಯಲ್ಲಿ ಉತ್ತಮ ವ್ಯಾಪಾರ ಪ್ರದರ್ಶನ ಮತ್ತು ದೊಡ್ಡ ಮಟ್ಟದ ಡೀಲ್‌ಗಳು ಬಂದಿದ್ದರಿಂದ ಹೆಚ್ಚಿನ ಬೋನಸ್ ನೀಡಲಾಗಿತ್ತು. ಆದರೆ, ಪ್ರಸ್ತುತ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಐಟಿ ಕ್ಷೇತ್ರದಲ್ಲಿನ ಅನಿಶ್ಚಿತತೆ ಮತ್ತು ಎಐ (AI) ಟೂಲ್‌ಗಳಿಂದಾಗಿ ಕಂಪನಿಯ ಲಾಭದ ಮೇಲೆ ಪರಿಣಾಮ ಬೀರಿದೆ. ಈ ಹಿನ್ನೆಲೆಯಲ್ಲಿ ವೇರಿಯೇಬಲ್ ಪೇ ಅನ್ನು ಗಣನೀಯವಾಗಿ ತಗ್ಗಿಸಲಾಗಿದೆ ಎಂದು ತಿಳಿದುಬಂದಿದೆ.
ಕಳೆದ ಆರ್ಥಿಕ ವರ್ಷದ ಕೊನೆಯ ತ್ರೈಮಾಸಿಕದಲ್ಲಿ ಉದ್ಯೋಗಿಗಳಿಗೆ ಕನಿಷ್ಠ 63 ಪ್ರತಿಶತದಿಂದ ಗರಿಷ್ಠ 82 ಪ್ರತಿಶತದವರೆಗೆ ಬೋನಸ್ ನೀಡಲಾಗಿದೆ. ಉದ್ಯೋಗಿಯ ಕೆಲಸದ ಪ್ರದರ್ಶನ ಮತ್ತು ಅವರು ಕೆಲಸ ಮಾಡುವ ವಿಭಾಗದ ಆಧಾರದ ಮೇಲೆ ಇದು ಬದಲಾಗುತ್ತದೆ. ಉತ್ತಮ ಸಾಧನೆ ಮಾಡಿದ ಉದ್ಯೋಗಿಗಳಿಗೆ ಹೆಚ್ಚಿನ ಬೋನಸ್ ದೊರೆತಿದೆ ಎಂದು ಮಾಹಿತಿ ಇದೆ.
ಜೆಎಲ್ (JL) 6 ಹಂತದ ಉದ್ಯೋಗಿಗಳಿಗೆ ಹೋಲಿಸಿದರೆ, ಜೆಎಲ್ 4 ಮತ್ತು 5 ಹಂತದವರಿಗೆ ತುಸು ಹೆಚ್ಚಿನ ಬೋನಸ್ ನೀಡಲಾಗಿದೆ. ಜೆಎಲ್ 4 ಮತ್ತು 5ರಲ್ಲಿ ಅತ್ಯುತ್ತಮ ಸಾಧನೆ ಮಾಡಿದವರಿಗೆ ಕ್ರಮವಾಗಿ 82 ಪ್ರತಿಶತ ಮತ್ತು 79 ಪ್ರತಿಶತ ಬೋನಸ್ ಸಿಕ್ಕಿದೆ. ಜೆಎಲ್ 6 ಹಂತದಲ್ಲಿ ಅತ್ಯುತ್ತಮ ಸಾಧನೆ ಮಾಡಿದವರಿಗೆ ಗರಿಷ್ಠ 77 ಪ್ರತಿಶತ ಬೋನಸ್ ನೀಡಲಾಗಿದೆ. ಕಂಪನಿಯಲ್ಲಿ ಒಟ್ಟು 3,28,594 ಮಂದಿ ಉದ್ಯೋಗಿಗಳಿದ್ದಾರೆ. ಇದೇ ಹಾದಿಯಲ್ಲಿ ಇತರ ಐಟಿ ಕಂಪನಿಗಳು ಕೂಡ ಇದೇ ರೀತಿಯ ಬೋನಸ್ ಘೋಷಿಸಬಹುದು ಎಂಬ ಆತಂಕದಲ್ಲಿ ಉದ್ಯೋಗಿಗಳಿದ್ದಾರೆ.
ಇನ್ಫೋಸಿಸ್ ಕ್ಯೂ4 (Q4) ಫಲಿತಾಂಶಗಳು: ಇನ್ಫೋಸಿಸ್ ಇತ್ತೀಚೆಗೆ ಜನವರಿ-ಮಾರ್ಚ್ ತ್ರೈಮಾಸಿಕದ ಫಲಿತಾಂಶಗಳನ್ನು ಪ್ರಕಟಿಸಿದೆ. ಏಕೀಕೃತ ಆಧಾರದ ಮೇಲೆ ನಿವ್ವಳ ಲಾಭವು ವಾರ್ಷಿಕವಾಗಿ 21 ಪ್ರತಿಶತದಷ್ಟು ಏರಿಕೆಯಾಗಿ 8,501 ಕೋಟಿ ರೂಪಾಯಿಗಳಿಗೆ ತಲುಪಿದೆ. ಆದರೆ, ವಾರ್ಷಿಕ ಆದಾಯದ ಬೆಳವಣಿಗೆಯು ನಿರೀಕ್ಷೆಯನ್ನು ತಲುಪಿಲ್ಲ. ಇದೀಗ ಬೋನಸ್ ಘೋಷಣೆಯಾಗಿದ್ದು, ಉದ್ಯೋಗಿಗಳು ವೇತನ ಹೆಚ್ಚಳಕ್ಕಾಗಿ (Salary Hike) ಕಾಯುತ್ತಿದ್ದಾರೆ. ಕಳೆದ ವರ್ಷ ಸರಾಸರಿ 5-8 ಪ್ರತಿಶತದಷ್ಟು ವೇತನ ಹೆಚ್ಚಳವಾಗಿತ್ತು.
ಟಿಸಿಎಸ್ (TCS) ವೇತನ ಹೆಚ್ಚಳ: ಮತ್ತೊಂದೆಡೆ, ಭಾರತದ ಅತಿದೊಡ್ಡ ಐಟಿ ಸಂಸ್ಥೆಯಾದ ಟಿಸಿಎಸ್, ಇತ್ತೀಚೆಗೆ ವೇತನ ಹೆಚ್ಚಳವನ್ನು ಘೋಷಿಸಿದೆ. ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಬಹಳ ಕಡಿಮೆ ಅಂದರೆ ಸರಾಸರಿ 5 ಪ್ರತಿಶತ ಮಾತ್ರ ಹೆಚ್ಚಿಸಲಾಗಿದೆ ಎಂದು ವರದಿಯಾಗಿದೆ. ಕೆಲವು ಉದ್ಯೋಗಿಗಳ ವೇತನದಲ್ಲಿ ಕಡಿತ ಮತ್ತು ವೇತನ ಪ್ಯಾಕೇಜ್‌ನಲ್ಲಿ ಬದಲಾವಣೆಗಳಾಗಿವೆ ಎಂದು ಆಂಗ್ಲ ಪತ್ರಿಕೆಗಳು ತಿಳಿಸಿವೆ. ಟಿಸಿಎಸ್ ಈಗಾಗಲೇ ತನ್ನ ಬೋನಸ್ ಅನ್ನು ಉದ್ಯೋಗಿಗಳ ಕಚೇರಿ ಹಾಜರಾತಿಯೊಂದಿಗೆ ಲಿಂಕ್ ಮಾಡಿದೆ.
