ಬೆಂಗಳೂರು: ಮನೆಯಲ್ಲಿ ಏನಾದರೂ ಶುಭಕಾರ್ಯ ದೇವಸ್ಥಾನದ ಪೂಜೆ, ಮದುವೆ ಅಥವಾ ದೂರದ ಪ್ರಯಾಣ ಇಷ್ಟಿದ್ದರೆ ಸಾಕು, ಮಹಿಳೆಯರಿಗೆ ಮೊದಲಿಗೆ ಕಾಡುವ ದೊಡ್ಡ ಚಿಂತೆ ಅಂದರೆ ಅದು ಪೀರಿಯಡ್ಸ್ (ಋತುಸ್ರಾವ). ಈ ಸಮಸ್ಯೆಯಿಂದ ಸುಲಭವಾಗಿ ಪಾರಾಗಲು ಹಲವರು ತಕ್ಷಣ ಮೆಡಿಕಲ್ ಶಾಪ್‌ಗೆ ಹೋಗಿ ಪೀರಿಯಡ್ಸ್ ಮುಂದೂಡುವ (Periods Postponement Pills) ಮಾತ್ರೆಗಳನ್ನು ಕೊಂಡು ನುಂಗಿಬಿಡುತ್ತಾರೆ.
ಆದರೆ, ನಿಸರ್ಗದ ನಿಯಮಕ್ಕೆ ವಿರುದ್ಧವಾಗಿ ಮಾಡುವ ಈ ಸಣ್ಣ ಕೆಲಸ ದೇಹಕ್ಕೆ ಎಷ್ಟು ದೊಡ್ಡ ಮಟ್ಟದ ಹಾನಿ ಉಂಟುಮಾಡುತ್ತದೆ ಎಂದು ಎಂದಾದರೂ ಯೋಚಿಸಿದ್ದೀರಾ? ವೈದ್ಯರ ಸಲಹೆ ಇಲ್ಲದೆ ಇಷ್ಟಬಂದಂತೆ ಬಳಸುವ ಈ ಹಾರ್ಮೋನ್ ಮಾತ್ರೆಗಳು ಕೇವಲ ಮುಂದಿನ ತಿಂಗಳ ಮುಟ್ಟಿನ ಚಕ್ರವನ್ನು ಏರುಪೇರು ಮಾಡುವುದು ಮಾತ್ರವಲ್ಲ, ಪ್ರಾಣಕ್ಕೇ ಕುತ್ತು ತಂದ ಉದಾಹರಣೆಗಳು ಇವೆ!
ಇತ್ತೀಚೆಗೆ ಮನೆಯಲ್ಲಿ ಶುಭಕಾರ್ಯವಿದೆ ಎಂದು ಪೀರಿಯಡ್ಸ್ ಮುಂದೂಡುವ ಮಾತ್ರೆ ತಿಂದ ಮಹಿಳೆಯೊಬ್ಬರಿಗೆ, ಕೆಲವೇ ಹೊತ್ತಿನಲ್ಲಿ ಕಾಲಿನಲ್ಲಿ ತೀವ್ರವಾದ ನೋವು ಮತ್ತು ಬಾವು ಕಾಣಿಸಿಕೊಂಡು, ನಂತರ ಆಕೆ ಮೃತಪಟ್ಟ ಘಟನೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ಈ ಹಿನ್ನೆಲೆಯಲ್ಲಿ, ಅಸಲು ಈ ಮಾತ್ರೆಗಳ ಬಳಕೆಯ ಬಗ್ಗೆ ಆರೋಗ್ಯ ತಜ್ಞರು ಏನು ಹೇಳುತ್ತಾರೆ ಎಂಬ ಕಂಪ್ಲೀಟ್ ರಿಪೋರ್ಟ್ ಇಲ್ಲಿದೆ.
ಪೀರಿಯಡ್ಸ್ ಮುಂದೂಡಲು ಬಳಸುವ ಮಾತ್ರೆಗಳಲ್ಲಿ ಪ್ರಮುಖವಾಗಿ ಪ್ರೊಜೆಸ್ಟರಾನ್ (Progesterone) ಎಂಬ ಹಾರ್ಮೋನ್ ಇರುತ್ತದೆ. ನೈಸರ್ಗಿಕವಾಗಿ ದೇಹದಲ್ಲಿ ಈ ಹಾರ್ಮೋನ್ ಮಟ್ಟ ಕಡಿಮೆಯಾದಾಗ ಗರ್ಭಾಶಯದ ಒಳಪದರವು ಕರಗಿ ಋತುಸ್ರಾವ ಆರಂಭವಾಗುತ್ತದೆ. ಆದರೆ ನೀವು ಮಾತ್ರೆಗಳನ್ನು ತಿಂದಾಗ ಕೃತಕವಾಗಿ ಈ ಹಾರ್ಮೋನ್ ಮಟ್ಟ ಹೆಚ್ಚಾಗಿ ಪೀರಿಯಡ್ಸ್ ನಿಲ್ಲುತ್ತದೆ. ಮಾತ್ರೆ ನಿಲ್ಲಿಸಿದ ತಕ್ಷಣ ಆ ಹಾರ್ಮೋನ್ ಮಟ್ಟ ಒಮ್ಮೆಲೇ ಕುಸಿದುಬಿಡುತ್ತದೆ. ಇದು ದೇಹಕ್ಕೆ ತಕ್ಷಣದ ದೊಡ್ಡ ಶಾಕ್ ನೀಡುತ್ತದೆ.
ಈ ಮಾತ್ರೆಗಳಿಂದ ಎದುರಾಗುವ 5 ಅಪಾಯಗಳು:
1.ರಕ್ತ ಹೆಪ್ಪುಗಟ್ಟುವುದು (Blood Clots) – ಪ್ರಾಣಕ್ಕೆ ಸಂಚಕಾರ
ಈ ಮಾತ್ರೆಗಳಿಂದ ಎದುರಾಗುವ ಅತ್ಯಂತ ದೊಡ್ಡ ಅಪಾಯ ಇದು. ಇವು ರಕ್ತನಾಳಗಳಲ್ಲಿ ರಕ್ತ ಹೆಪ್ಪುಗಟ್ಟುವ ಅಪಾಯವನ್ನು ಹೆಚ್ಚಿಸುತ್ತವೆ. ಆ ರಕ್ತದ ಗಡ್ಡೆಗಳು ಹೃದಯ, ಶ್ವಾಸಕೋಶ ಅಥವಾ ಮೆದುಳಿಗೆ ತಲುಪಿದರೆ ಹಾರ್ಟ್ ಅಟ್ಯಾಕ್ ಅಥವಾ ಪಾರ್ಶ್ವವಾಯು (Strokes) ಬರುವ ಸಾಧ್ಯತೆ ಇರುತ್ತದೆ. ಇದು ನೇರವಾಗಿ ಪ್ರಾಣಕ್ಕೇ ಸಂಚಕಾರ ತರಬಲ್ಲದು.
2.ಹಾರ್ಮೋನ್‌ಗಳ ಭಾರಿ ಏರುಪೇರು (Hormonal Imbalance)
ಈ ಮಾತ್ರೆಗಳ ಬಳಕೆಯಿಂದ ಮಹಿಳೆಯರ ನೈಸರ್ಗಿಕ ಹಾರ್ಮೋನ್ ಬ್ಯಾಲೆನ್ಸ್ ಸಂಪೂರ್ಣವಾಗಿ ಹದಗೆಡುತ್ತದೆ. ಇದರ ಪರಿಣಾಮವಾಗಿ ಮುಂದಿನ ತಿಂಗಳುಗಳಲ್ಲಿ ಪೀರಿಯಡ್ಸ್ ಸರಿಯಾದ ಸಮಯಕ್ಕೆ ಬಾರದಿರುವುದು, ವಿಪರೀತ ಕಿರಿಕಿರಿ, ಮೂಡ್ ಸ್ವಿಂಗ್ಸ್ ಮತ್ತು ತೀವ್ರ ಮಾನಸಿಕ ಒತ್ತಡ ಕಾಡಬಹುದು.
3.ಸಂತಾನಹೀನತೆ ಸಮಸ್ಯೆ (Fertility Issues)
ಪದೇ ಪದೇ ಈ ಮಾತ್ರೆಗಳನ್ನು ಬಳಸುವುದರಿಂದ ಅಂಡಾಶಯದಿಂದ ಅಂಡಾಣು ಬಿಡುಗಡೆಯಾಗುವ ನೈಸರ್ಗಿಕ ಪ್ರಕ್ರಿಯೆಗೆ ಧಕ್ಕೆಯಾಗುತ್ತದೆ. ದೀರ್ಘಕಾಲದಲ್ಲಿ ಇದು ಗರ್ಭಧರಿಸಲು ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಬಹುದು.
4.ನರಕಯಾತನೆ ನೀಡುವ ವಿಪರೀತ ರಕ್ತಸ್ರಾವ
ಮಾತ್ರೆಯ ಪ್ರಭಾವ ಮುಗಿದ ನಂತರ ಬರುವ ಪೀರಿಯಡ್ಸ್ ತೀವ್ರವಾದ ಹೊಟ್ಟೆನೋವಿನಿಂದ ಕೂಡಿರುತ್ತದೆ. ಕೆಲವರಲ್ಲಿ ಮಾತ್ರೆ ನಿಲ್ಲಿಸಿದ ಮೇಲೂ ವಾರಗಟ್ಟಲೆ ರಕ್ತಸ್ರಾವ ನಿಯಂತ್ರಣಕ್ಕೆ ಬಾರದೆ ವಿಪರೀತ ಸುಸ್ತು ಕಾಣಿಸಿಕೊಳ್ಳುತ್ತದೆ.
5.ಲಿವರ್ ಮತ್ತು ಕಿಡ್ನಿಗಳ ಮೇಲೆ ತೀವ್ರ ಒತ್ತಡ
ನೀವು ತೆಗೆದುಕೊಳ್ಳುವ ಈ ಕೃತಕ ಹಾರ್ಮೋನ್ ಮಾತ್ರೆಗಳನ್ನು ಕರಗಿಸಲು ಲಿವರ್ (ಯಕೃತ್ತು) ಮತ್ತು ಕಿಡ್ನಿಗಳು ಹೆಚ್ಚುವರಿ ಶ್ರಮ ಹಾಕಬೇಕಾಗುತ್ತದೆ. ನಿಮಗೆ ಮೊದಲೇ ಏನಾದರೂ ಸಣ್ಣ ಆರೋಗ್ಯ ಸಮಸ್ಯೆಗಳಿದ್ದರೆ ಇದು ಪರಿಸ್ಥಿತಿಯನ್ನು ಮತ್ತಷ್ಟು ಬಿಗಡಾಯಿಸುತ್ತದೆ.
ಈ ಲಕ್ಷಣಗಳು ಕಂಡರೆ ಅಪ್ಪಿತಪ್ಪಿಯೂ ನಿರ್ಲಕ್ಷಿಸಬೇಡಿ
ಈ ಮಾತ್ರೆಗಳನ್ನು ಬಳಸಿದ ನಂತರ ಅಥವಾ ನಿಲ್ಲಿಸಿದ ಬಳಿಕ ಕೆಳಗಿನ ಲಕ್ಷಣಗಳು ಕಂಡುಬಂದರೆ ತಕ್ಷಣ ತುರ್ತಾಗಿ ವೈದ್ಯರನ್ನು ಸಂಪರ್ಕಿಸಿ:
ಹಠಾತ್ತಾಗಿ ಎದೆಯಲ್ಲಿ ತೀವ್ರವಾದ ನೋವು ಅಥವಾ ಉಸಿರಾಟದ ತೊಂದರೆ.
ಕಾಲುಗಳಲ್ಲಿ ವಿಪರೀತ ನೋವು ಅಥವಾ ಬಾವು (ಊತ) ಕಾಣಿಸಿಕೊಳ್ಳುವುದು.
ತಡೆದುಕೊಳ್ಳಲು ಸಾಧ್ಯವಾಗದ ತಲೆನೋವು ಮತ್ತು ಕಣ್ಣು ಮಂಜಾಗುವುದು
