ಬಾಲಿವುಡ್ನ ಸ್ಟಾರ್ ಜೋಡಿಗಳಾದ ಕತ್ರಿನಾ ಕೈಫ್ ಮತ್ತು ವಿಕಿ ಕೌಶಲ್ ಸದ್ಯ ಪೋಷಕತ್ವದ ಸುಂದರ ದಿನಗಳನ್ನು ಆನಂದಿಸುತ್ತಿದ್ದಾರೆ. ಮೇ 16 ರಂದು ನಟ ವಿಕಿ ಕೌಶಲ್ ತಮ್ಮ 38ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದು, ಈ ಸಂದರ್ಭದಲ್ಲಿ ಪತ್ನಿ ಕತ್ರಿನಾ ಕೈಫ್ ಹಂಚಿಕೊಂಡಿರುವ ವಿಶೇಷ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. ಈ ಪೋಸ್ಟ್ ಮೂಲಕ ಕತ್ರಿನಾ ತಮ್ಮ ಮುದ್ದಾದ ಮಗ ವಿಹಾನ್ ಅವರ ಮೊದಲ ಸಾರ್ವಜನಿಕ ಝಲಕ್ ಅನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದ್ದಾರೆ.
ಅಪ್ಪನ ಹುಟ್ಟುಹಬ್ಬಕ್ಕೆ ಮಗನ ಮೊದಲ ದರ್ಶನ
ವಿಕಿ ಕೌಶಲ್ ತಂದೆಯಾದ ಬಳಿಕ ಆಚರಿಸಿಕೊಳ್ಳುತ್ತಿರುವ ಮೊದಲ ಹುಟ್ಟುಹಬ್ಬ ಇದಾಗಿದ್ದು, ಕತ್ರಿನಾ ಹಂಚಿಕೊಂಡಿರುವ ಫೋಟೋಗಳು ನೆಟ್ಟಿಗರ ಗಮನ ಸೆಳೆದಿವೆ. ಫೋಟೋಗಳಲ್ಲಿ ಕತ್ರಿನಾ ಮತ್ತು ವಿಕಿ ತೋಟವೊಂದರಲ್ಲಿ ಮಗ ವಿಹಾನ್ನನ್ನು ಎದೆಗೆ ಅಪ್ಪಿಕೊಂಡು ಮುದ್ದಾಡುತ್ತಿರುವುದನ್ನು ಕಾಣಬಹುದು. ಮಗುವಿಗೆ ಬೂದು ಬಣ್ಣದ ಫರ್ ಬಾಡಿಸೂಟ್ ಧರಿಸಲಾಗಿದ್ದು, ಮುಖವನ್ನು ಬಹಿರಂಗಪಡಿಸದಿದ್ದರೂ ಮಗನೊಂದಿಗೆ ದಂಪತಿ ಇರುವ ಮೊದಲ ಅಧಿಕೃತ ಚಿತ್ರ ಇದಾಗಿದೆ. ಇದರೊಂದಿಗೆ ‘ಹ್ಯಾಪಿ ಬರ್ತ್ಡೇ ಪಾಪ’ ಎಂದು ಬರೆದಿರುವ ವಿಶೇಷ ಕೇಕ್ನ ಫೋಟೋವನ್ನೂ ಅವರು ಹಂಚಿಕೊಂಡಿದ್ದಾರೆ.
ಎರಡು ವರ್ಷಗಳಲ್ಲಿ ಎಲ್ಲವೂ ಬದಲಾಗಿದೆ: ಕತ್ರಿನಾ ಭಾವುಕ ನುಡಿ
ಫೋಟೋಗಳ ಜೊತೆಗೆ ಕತ್ರಿನಾ ತಮ್ಮ ಪತಿಗಾಗಿ ಹೃದಯಸ್ಪರ್ಶಿ ಸಾಲುಗಳನ್ನು ಬರೆದುಕೊಂಡಿದ್ದಾರೆ. “ಹುಟ್ಟುಹಬ್ಬದ ಹಾರ್ದಿಕ ಶುಭಾಶಯಗಳು. ಎರಡು ವರ್ಷಗಳ ಹಿಂದೆ ಇದೇ ಜಾಗದಲ್ಲಿದ್ದೆವು, ಆದರೆ ಈಗ ನಮ್ಮ ಜೀವನ ಎಷ್ಟು ಬದಲಾಗಿದೆ ನೋಡಿ. ಪ್ರಾರ್ಥನೆ, ತಾಳ್ಮೆ ಮತ್ತು ನಂಬಿಕೆ ಇಂದು ನಮ್ಮ ಪುಟ್ಟ ದೇವತೆಯೊಂದಿಗೆ ನಿಮ್ಮ ಜನ್ಮದಿನವನ್ನು ಅತ್ಯಂತ ಸಂತೋಷದಿಂದ ಆಚರಿಸುವಂತೆ ಮಾಡಿದೆ. ನನ್ನ ಹೃದಯ ಈಗ ಸಂಪೂರ್ಣ ಕೃತಜ್ಞತೆಯಿಂದ ತುಂಬಿದೆ” ಎಂದು ಬರೆದಿದ್ದಾರೆ.
ಮುಂದುವರಿದು ವಿಕಿ ಅವರ ತಾಳ್ಮೆಯನ್ನು ಶ್ಲಾಘಿಸಿರುವ ಕತ್ರಿನಾ, “ಕಳೆದ ಕೆಲವು ವರ್ಷಗಳಿಂದ ನೀವು ನನ್ನ ಶಕ್ತಿಯ ಆಧಾರಸ್ತಂಭವಾಗಿದ್ದೀರಿ. ಶೇಕಡಾ 99 ರಷ್ಟು ಸಮಯ ನೀವು ಸಂತರಂತೆ ತಾಳ್ಮೆ ಕಾಯ್ದುಕೊಳ್ಳುತ್ತೀರಿ. ನಿಮಗೆ ಉತ್ತರ ಗೊತ್ತಿಲ್ಲದ ವಿಷಯಗಳ ಬಗ್ಗೆ ನಾನು ಕೇಳುವ ಅಂತ್ಯವಿಲ್ಲದ ಪ್ರಶ್ನೆಗಳಿಗೆ ನೀವು ನೀಡುವ ಪ್ರತಿಕ್ರಿಯೆ ನನಗೆ ಇಷ್ಟ. ಪುರಾಣ, ಎಐ, ವಾಟರ್ ಪ್ರೂಫಿಂಗ್, ಮೇಕಪ್, ಹೆಲ್ತ್, ಬಿಸಿನೆಸ್ ಹೀಗೆ ಎಲ್ಲಾ ವಿಷಯಗಳಲ್ಲೂ ನೀವೀಗ ಎಕ್ಸ್ಪರ್ಟ್ ಆಗಿಬಿಟ್ಟಿದ್ದೀರಿ” ಎಂದು ತಮಾಷೆಯಾಗಿ ಬರೆದುಕೊಂಡಿದ್ದಾರೆ.
ಬಾಲಿವುಡ್ ಸೆಲೆಬ್ರಿಟಿಗಳ ಹಾರೈಕೆ
ಕತ್ರಿನಾ ಅವರ ಈ ಪೋಸ್ಟ್ಗೆ ಬಾಲಿವುಡ್ನ ಪ್ರಮುಖ ತಾರೆಯರಾದ ಪ್ರಿಯಾಂಕಾ ಚೋಪ್ರಾ, ಕರೀನಾ ಕಪೂರ್, ಸೋನಾಕ್ಷಿ ಸಿನ್ಹಾ ಸೇರಿದಂತೆ ಹಲವರು ಕಮೆಂಟ್ ಮಾಡಿ ವಿಕಿಗೆ ಶುಭ ಕೋರಿದ್ದಾರೆ ಹಾಗೂ ಈ ಸುಂದರ ಕುಟುಂಬಕ್ಕೆ ಸದಾ ಸಂತೋಷವಾಗಿರುವಂತೆ ಹಾರೈಸಿದ್ದಾರೆ. 2021 ರ ಡಿಸೆಂಬರ್ನಲ್ಲಿ ರಾಜಸ್ಥಾನದಲ್ಲಿ ಅದ್ಧೂರಿಯಾಗಿ ವಿವಾಹವಾಗಿದ್ದ ಈ ಜೋಡಿ, 2025 ರ ನವೆಂಬರ್ನಲ್ಲಿ ಗಂಡು ಮಗುವನ್ನು ಬರಮಾಡಿಕೊಂಡಿದ್ದರು. ಇತ್ತೀಚೆಗಷ್ಟೇ ಮಗನಿಗೆ ‘ವಿಹಾನ್ ಕೌಶಲ್’ ಎಂದು ನಾಮಕರಣ ಮಾಡಿರುವುದಾಗಿ ತಿಳಿಸಿದ್ದರು.
