ಪಶ್ಚಿಮ ಏಷ್ಯಾದ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ “ಒಂದು ವರ್ಷ ಚಿನ್ನ ಖರೀದಿಸಬೇಡಿ” ಎಂಬ ಪ್ರಧಾನಿ ನರೇಂದ್ರ ಮೋದಿ ಅವರ ಮನವಿಯು ಆಭರಣ ಉದ್ಯಮದ ಮೇಲೆ ದೊಡ್ಡ ಮಟ್ಟದ ಪರಿಣಾಮ ಬೀರಬಹುದು ಎಂದು ಅಖಿಲ ಭಾರತ ರತ್ನ ಮತ್ತು ಆಭರಣ ದೇಶೀಯ ಮಂಡಳಿ (GJC) ಆತಂಕ ವ್ಯಕ್ತಪಡಿಸಿದೆ.
ಆಭರಣ ಉದ್ಯಮವು ನೇರವಾಗಿ 1 ಕೋಟಿಗೂ ಹೆಚ್ಚು ಜನರಿಗೆ ಉದ್ಯೋಗ ನೀಡಿದೆ. ಪ್ರಧಾನಿಯವರ ಈ ಕರೆ ಉದ್ಯೋಗದ ಮೇಲೆ ದೊಡ್ಡ ಪ್ರಶ್ನಾರ್ಥಕ ಚಿಹ್ನೆ ಮೂಡಿಸಬಹುದು ಎಂದು ಮಂಡಳಿಯ ಅಧ್ಯಕ್ಷ ರಾಜೇಶ್ ರೊಕ್ಡೆ ಹೇಳಿದ್ದಾರೆ.ಭಾರತದ ಜಿಡಿಪಿಗೆ ಆಭರಣ ಉದ್ಯಮವು ಸುಮಾರು ಶೇ. 7 ರಷ್ಟು ಕೊಡುಗೆ ನೀಡುತ್ತಿದೆ. ಬ್ಯಾಂಕಿಂಗ್, ವಿಮೆ, ಪೀಠೋಪಕರಣ ಮತ್ತು ಲಾಜಿಸ್ಟಿಕ್ಸ್ನಂತಹ ಅನೇಕ ಕ್ಷೇತ್ರಗಳು ಈ ಉದ್ಯಮವನ್ನೇ ಅವಲಂಬಿಸಿವೆ.ಧಾನಿಯವರ ಕರೆ ರಾಷ್ಟ್ರಪ್ರೇಮ ಮತ್ತು ಆರ್ಥಿಕ ಹಿತದೃಷ್ಟಿಯಿಂದ ಸರಿಯಾಗಿದೆ. ಆದರೆ ಮದುವೆ ಹಾಗೂ ಸಂಪ್ರದಾಯಗಳಿಗೆ ಸಂಬಂಧಿಸಿದ ಆಭರಣ ಖರೀದಿಗೆ ನಿರ್ಬಂಧ ಹೇರುವುದು ಆರ್ಥಿಕ ಚಟುವಟಿಕೆಗೆ ಹಿನ್ನಡೆಯಾಗಬಹುದು ಎಂಬುದು ಮಂಡಳಿಯ ವಾದ.
ಚಿನ್ನದ ಮುದ್ರೀಕರಣ ಯೋಜನೆ(Gold Monetisation): ಭಾರತೀಯರ ಬಳಿ ಅಂದಾಜು 40 ರಿಂದ 50 ಸಾವಿರ ಟನ್ ಚಿನ್ನವಿದೆ. ಇದರಲ್ಲಿ ಶೇ. 10-20 ರಷ್ಟು ಚಿನ್ನವನ್ನು ಮುದ್ರೀಕರಣಗೊಳಿಸಿದರೆ, ಮುಂದಿನ 10 ವರ್ಷಗಳ ಕಾಲ ಭಾರತ ಚಿನ್ನವನ್ನು ಆಮದು ಮಾಡಿಕೊಳ್ಳುವ ಅಗತ್ಯವಿರುವುದಿಲ್ಲ ಎಂದು ಮಂಡಳಿ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ.
ಪ್ರಧಾನಿಯವರ ಈ ಹೇಳಿಕೆಯ ಬೆನ್ನಲ್ಲೇ ಸೋಮವಾರ ಷೇರು ಮಾರುಕಟ್ಟೆಯಲ್ಲಿ ಆಭರಣ ಕಂಪನಿಗಳ ಷೇರುಗಳು ಭಾರೀ ಕುಸಿತ ಕಂಡಿವೆ:
- ಕಲ್ಯಾಣ್ ಜ್ಯುವೆಲ್ಲರ್ಸ್: ಶೇ. 8 ಕುಸಿತ
- ಪಿಎನ್ಜಿ ಜ್ಯುವೆಲ್ಲರ್ಸ್: ಶೇ. 8 ಕುಸಿತ
- ಟೈಟಾನ್ ಕಂಪನಿ: ಶೇ. 6 ಕುಸಿತ
- ತಂಗಮಯಿಲ್ ಜ್ಯುವೆಲ್ಲರಿ: ಶೇ. 4 ಕುಸಿತ
ಜಾಗತಿಕ ಉದ್ವಿಗ್ನತೆಯಿಂದಾಗಿ ಕಚ್ಚಾ ತೈಲ ಬೆಲೆ ಬ್ಯಾರೆಲ್ಗೆ 105 ಡಾಲರ್ಗೆ ಏರಿಕೆಯಾಗಿದೆ. ವಿದೇಶಿ ವಿನಿಮಯವನ್ನು ಉಳಿಸುವ ಉದ್ದೇಶದಿಂದ ಪ್ರಧಾನಿ ಮೋದಿ ಅವರು ಹೈದರಾಬಾದ್ನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಇಂಧನ ಉಳಿತಾಯ ಮತ್ತು ಚಿನ್ನದ ಖರೀದಿ ಕಡಿಮೆ ಮಾಡುವಂತೆ ಜನರಲ್ಲಿ ಮನವಿ ಮಾಡಿದ್ದರು.
