ಅಮ್ರೋಹ: ಉತ್ತರ ಪ್ರದೇಶದ ಅಮ್ರೋಹ ಜಿಲ್ಲೆಯಲ್ಲಿ ಮಾದಕ ವ್ಯಸನಿ ಮಗನನ್ನು ಕೊಲೆ ಮಾಡಲು ಕುಟುಂಬವೊಂದು ಗುತ್ತಿಗೆ ಹಂತಕನನ್ನು ನೇಮಿಸಿಕೊಂಡಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೊಲೆಯಾದವನ ತಂದೆ ಮತ್ತು ಸಹೋದರನ ಬಂಧಿಸಲಾಗಿದೆ.
ಕೊಲೆ ಪ್ರಕರಣವು ನಿವಾಸಿಗಳನ್ನು ಬೆಚ್ಚಿಬೀಳಿಸಿದೆ. ಸ್ವಂತ ಮಗನ ಹಿಂಸಾತ್ಮಕ ನಡವಳಿಕೆ ಮತ್ತು ಮಾದಕ ವ್ಯಸನವನ್ನು ತಾಳಲಾರದೆ ಕುಟುಂಬವೊಂದು ಅವರ ಸ್ವಂತ ಮಗನನ್ನು ಕೊಲ್ಲಲು ಯೋಜಿಸಿತ್ತು ಎಂದು ಪೊಲೀಸರು ಹೇಳಿದ್ದಾರೆ.
ದಿಡೋಲಿ ಕೊಟ್ವಾಲಿ ಪೊಲೀಸ್ ಠಾಣೆ ವ್ಯಾಪ್ತಿಯ ಶ್ಯಾಂಪುರ್ ಗ್ರಾಮದ ಒಣಗಿದ ಕಾಲುವೆಯ ಬಳಿ ದುಷ್ಯಂತ್ ಎಂದು ಗುರುತಿಸಲಾದ ಯುವಕನ ಶವ ಪತ್ತೆಯಾದ ನಂತರ ಈ ಪ್ರಕರಣ ಬೆಳಕಿಗೆ ಬಂದಿದೆ. ಮೃತದೇಹದಲ್ಲಿ ರಕ್ತದ ಕಲೆಗಳಿದ್ದು, ಪೊಲೀಸರು ದುಷ್ಕೃತ್ಯದ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದಾರೆ.
ಮೊದಲು ಇದು ನಿಯಮಿತ ಕೊಲೆ ಎಂದು ತೋರುತ್ತಿದ್ದ ತನಿಖೆ ಶೀಘ್ರದಲ್ಲೇ ನಾಟಕೀಯ ತಿರುವು ಪಡೆದುಕೊಂಡಿತು. ವಿಚಾರಣೆ ಸಮಯದಲ್ಲಿ, ದುಷ್ಯಂತ್ ಅವರ ಸ್ವಂತ ಕುಟುಂಬದ ಸದಸ್ಯರು ಈ ಅಪರಾಧದಲ್ಲಿ ಭಾಗಿಯಾಗಿದ್ದಾರೆ ಎಂದು ಪೊಲೀಸರು ಕಂಡುಹಿಡಿದಿದ್ದಾರೆ.
ಪೊಲೀಸ್ ಅಧಿಕಾರಿಗಳ ಪ್ರಕಾರ, ದುಷ್ಯಂತ್ ದೀರ್ಘಕಾಲದವರೆಗೆ ಮಾದಕ ವ್ಯಸನದಿಂದ ಬಳಲುತ್ತಿದ್ದ. ಆಗಾಗ್ಗೆ ಸಂಬಂಧಿಕರನ್ನು ನಿಂದಿಸಿ ಹಲ್ಲೆ ನಡೆಸುತ್ತಿದ್ದ, ಮನೆಯಲ್ಲಿ ನಿರಂತರ ಭಯ ಮತ್ತು ಉದ್ವಿಗ್ನತೆಯನ್ನು ಸೃಷ್ಟಿಸುತ್ತಿದ್ದ ಎಂದು ಅವರ ಕುಟುಂಬ ಹೇಳಿಕೊಂಡಿದೆ. ಆತನ ಕಾಟ ಸಹಿಸಿಕೊಳ್ಳಲು ಪೋಷಕರು ಸಹೋದರರಿಗೆ ಅಸಹನೀಯವಾಗಿತ್ತು. ಕೊನೆಗೆ ಕುಟುಂಬವು ಗುತ್ತಿಗೆ ಕೊಲೆಗಾರನನ್ನು ನೇಮಿಸಿಕೊಳ್ಳುವ ಮೂಲಕ ಅವನನ್ನು ಕೊಲೆ ಮಾಡಲು ನಿರ್ಧರಿಸಿತು ಎಂದು ಪೊಲೀಸರು ತಿಳಿಸಿದ್ದಾರೆ.
“ಜಾಲಿ” ಎಂದು ಕರೆಯಲ್ಪಡುವ ಸ್ಥಳೀಯ ಅಪರಾಧಿಯನ್ನು ಸಂಪರ್ಕಿಸಿ ಕೊಲೆಗೆ 5 ಲಕ್ಷ ರೂ.ಗಳನ್ನು ನೀಡಲು ಒಪ್ಪಿಕೊಂಡಿದ್ದಾರೆ. ಈ ಒಪ್ಪಂದಕ್ಕೆ ಹಣ ಹೊಂದಿಸಲು ದುಶ್ಯಂತ್‌ನ ತಾಯಿ ತನ್ನ ಚಿನ್ನಾಭರಣಗಳನ್ನು ಅಡವಿಟ್ಟಿದ್ದಾಳೆ. ಅಪರಾಧ ನಡೆಯುವ ಮೊದಲು ಬಾಡಿಗೆ ಕೊಲೆಗಾರನಿಗೆ 55,000 ರೂ.ಗಳ ಮುಂಗಡ ಪಾವತಿಸಲಾಗಿದೆ.
ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಅಖಿಲೇಶ್ ಭಡೋರಿಯಾ ಅವರು ಪ್ರಕರಣ ದಾಖಲಿಸಲಾಗಿದ್ದು, ದುಶ್ಯಂತ್‌ನ ತಂದೆ, ಸಹೋದರನ ಬಂಧಿಸಲಾಗಿದೆ, ತಲೆಮರೆಸಿಕೊಂಡಿರುವ ಆರೋಪಿ ಜಾಲಿ ಬಂಧನಕ್ಕೆ ಹುಡುಕಾಟ ನಡೆದಿದೆ ಎಂದು ತಿಳಿಸಿದ್ದಾರೆ.
ವಿಚಾರಣೆಯ ಸಮಯದಲ್ಲಿ, ಬಲಿಪಶುವಿನ ತಂದೆ ಮತ್ತು ಸಹೋದರ ಪಿತೂರಿಯಲ್ಲಿ ಭಾಗಿಯಾಗಿರುವುದಾಗಿ ಒಪ್ಪಿಕೊಂಡಿದ್ದಾರೆ. ಇಬ್ಬರೂ ಈಗ ಬಂಧನದಲ್ಲಿದ್ದಾರೆ ಮತ್ತು ಕೊಲೆ ಮತ್ತು ಕ್ರಿಮಿನಲ್ ಪಿತೂರಿಯ ಆರೋಪಗಳನ್ನು ಎದುರಿಸುತ್ತಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಗುತ್ತಿಗೆ ಕೊಲೆಗಾರನನ್ನು ಪತ್ತೆಹಚ್ಚುವ ಪ್ರಯತ್ನಗಳು ಮುಂದುವರೆದಿದ್ದು, ಪ್ರಕರಣದ ಕುರಿತು ಹೆಚ್ಚಿನ ತನಿಖೆ ನಡೆಯುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
