ರಿತೇಶ್ ದೇಶ್ಮುಖ್ ನಟಿಸಿ, ನಿರ್ದೇಶಿಸಿರುವ ಮಹತ್ವಾಕಾಂಕ್ಷೆಯ ಸಿನಿಮಾ ‘ರಾಜ ಶಿವಾಜಿ’ ಭಾರತದಾದ್ಯಂತ ಮೊದಲ ದಿನವೇ ಸುಮಾರು 13.75 ರಿಂದ 14 ಕೋಟಿ ರೂಪಾಯಿ ಗಳಿಸಿದೆ. ಇದರಲ್ಲಿ ಮರಾಠಿ ಅವತರಣಿಕೆಯಿಂದ 10 ಕೋಟಿ ರೂಪಾಯಿ ಹಾಗೂ ಹಿಂದಿ ಅವತರಣಿಕೆಯಿಂದ 4 ಕೋಟಿ ರೂಪಾಯಿ ಸಂಗ್ರಹವಾಗಿದೆ. ಕೇವಲ ಮಹಾರಾಷ್ಟ್ರ ರಾಜ್ಯವೊಂದರಲ್ಲೇ ಈ ಸಿನಿಮಾ 11 ಕೋಟಿ ರೂಪಾಯಿ ಬಾಚಿಕೊಂಡಿರುವುದು ಚಿತ್ರದ ಕ್ರೇಜ್ಗೆ ಸಾಕ್ಷಿಯಾಗಿದೆ.
ಸೈರಾತ್ ದಾಖಲೆ ಧೂಳಿಪಟ ಈ ಹಿಂದೆ 2016 ರಲ್ಲಿ ಬಿಡುಗಡೆಯಾಗಿದ್ದ ‘ಸೈರಾತ್’ ಸಿನಿಮಾ ಮೊದಲ ದಿನ 3.60 ಕೋಟಿ ರೂಪಾಯಿ ಗಳಿಸಿದ್ದು ಮರಾಠಿ ಚಿತ್ರರಂಗದ ಇದುವರೆಗಿನ ಗರಿಷ್ಠ ದಾಖಲೆಯಾಗಿತ್ತು. ಆದರೆ ಈಗ ‘ರಾಜ ಶಿವಾಜಿ’ ಸಿನಿಮಾ ಆ ದಾಖಲೆಯನ್ನು ಸುಲಭವಾಗಿ ಮೀರಿ ನಿಂತಿದೆ. ಕೇವಲ ಮರಾಠಿ ಚಿತ್ರಗಳಷ್ಟೇ ಅಲ್ಲದೆ, ಮಹಾರಾಷ್ಟ್ರದಲ್ಲಿ ಬಿಡುಗಡೆಯಾದ ದೊಡ್ಡ ಬಜೆಟ್ನ ಪ್ಯಾನ್ ಇಂಡಿಯಾ ಸಿನಿಮಾಗಳಿಗೂ ಈ ಚಿತ್ರ ಭರ್ಜರಿ ಪೈಪೋಟಿ ನೀಡುತ್ತಿದೆ.
ದೊಡ್ಡ ಸಿನಿಮಾಗಳ ಸಾಲಿನಲ್ಲಿ ‘ರಾಜ ಶಿವಾಜಿ’ ಮಹಾರಾಷ್ಟ್ರದ ಬಾಕ್ಸ್ ಆಫೀಸ್ ಇತಿಹಾಸದಲ್ಲಿ ಮೊದಲ ದಿನ ಅತಿ ಹೆಚ್ಚು ಗಳಿಕೆ ಕಂಡ ಚಿತ್ರಗಳ ಪಟ್ಟಿಯಲ್ಲಿ ‘ಧುರಂಧರ್: ದಿ ರಿವೆಂಜ್’ (22 ಕೋಟಿ ರೂ.), ‘ಪುಷ್ಪ 2’ (18 ಕೋಟಿ ರೂ.) ಮತ್ತು ‘ಛಾವಾ’ (17 ಕೋಟಿ ರೂ.) ಅಗ್ರಸ್ಥಾನದಲ್ಲಿವೆ. ಈಗ ‘ರಾಜ ಶಿವಾಜಿ’ ಕೂಡ 11 ಕೋಟಿ ಗಳಿಸುವ ಮೂಲಕ ಈ ಸಾಲಿಗೆ ಸೇರ್ಪಡೆಯಾಗಿದೆ. ಮುಂಬೈ ನಗರಕ್ಕಿಂತಲೂ ಮಹಾರಾಷ್ಟ್ರದ ಒಳಗಿನ ಜಿಲ್ಲೆಗಳಲ್ಲಿ ಮರಾಠಿ ಸಿನಿಮಾಗಳಿಗೆ ಹೆಚ್ಚಿನ ಬೆಂಬಲ ವ್ಯಕ್ತವಾಗುತ್ತಿರುವುದು ಚಿತ್ರದ ಯಶಸ್ಸಿಗೆ ಪ್ರಮುಖ ಕಾರಣವಾಗಿದೆ.
100 ಕೋಟಿ ಕ್ಲಬ್ ಕಡೆಗೆ ಪಯಣ ಸದ್ಯದ ಟ್ರೆಂಡ್ ನೋಡಿದರೆ ‘ರಾಜ ಶಿವಾಜಿ’ ಸಿನಿಮಾ ಮರಾಠಿ ಚಿತ್ರರಂಗದ ಅತಿ ಹೆಚ್ಚು ಗಳಿಕೆಯ ಚಿತ್ರ ಎನಿಸಿಕೊಂಡಿರುವ ‘ಸೈರಾತ್’ (100 ಕೋಟಿ ರೂ.) ದಾಖಲೆಯನ್ನು ಶೀಘ್ರದಲ್ಲೇ ಮುರಿಯುವ ಸಾಧ್ಯತೆ ಇದೆ. ಮಹಾರಾಷ್ಟ್ರದಲ್ಲಿ ಸದ್ಯ ‘ಛಾವಾ’ ಸಿನಿಮಾ 300 ಕೋಟಿಗೂ ಅಧಿಕ ಗಳಿಸಿ ಅಗ್ರಸ್ಥಾನದಲ್ಲಿದೆ. ‘ರಾಜ ಶಿವಾಜಿ’ ಕೂಡ ಅದೇ ಹಾದಿಯಲ್ಲಿ ಸಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಯಾವ ರೀತಿ ಕಲೆಕ್ಷನ್ ಮಾಡಲಿದೆ ಎಂಬುದು ಕುತೂಹಲ ಮೂಡಿಸಿದೆ.
