ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಯ ಮತ ಎಣಿಕೆ ಕಾರ್ಯಕ್ಕೆ ಕೇವಲ ಕೇಂದ್ರ ಸರ್ಕಾರ ಮತ್ತು ಸಾರ್ವಜನಿಕ ವಲಯದ ಉದ್ದಿಮೆಗಳ (PSU) ನೌಕರರನ್ನು ಎಣಿಕೆ ಮೇಲ್ವಿಚಾರಕರನ್ನಾಗಿ (Counting Supervisors) ನೇಮಿಸುವ ಚುನಾವಣಾ ಆಯೋಗದ ನಿರ್ಧಾರದಲ್ಲಿ ಹಸ್ತಕ್ಷೇಪ ಮಾಡಲು ಸುಪ್ರೀಂ ಕೋರ್ಟ್ ಶನಿವಾರ ನಿರಾಕರಿಸಿದೆ. ಮೇ 4 ರಂದು ಮತ ಎಣಿಕೆ ನಡೆಯಲಿದ್ದು, ಈ ಆದೇಶವು ತೃಣಮೂಲ ಕಾಂಗ್ರೆಸ್ (TMC) ಪಕ್ಷಕ್ಕೆ ಭಾರಿ ಹಿನ್ನಡೆ ತಂದಿದೆ.
ರಾಜ್ಯ ಸರ್ಕಾರದ ಸಿಬ್ಬಂದಿಯನ್ನು ಮತ ಎಣಿಕೆ ಮೇಲ್ವಿಚಾರಕರನ್ನಾಗಿ ನೇಮಿಸಬೇಕು ಎಂದು ಕೋರಿ ಟಿಎಂಸಿ ಶುಕ್ರವಾರ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿತ್ತು. ಕೇಂದ್ರ ಸರ್ಕಾರದ ಸಿಬ್ಬಂದಿಯು ಕೇಂದ್ರದಲ್ಲಿ ಅಧಿಕಾರದಲ್ಲಿರುವ ಪಕ್ಷದ ಪರವಾಗಿ ಪ್ರಭಾವಕ್ಕೊಳಗಾಗಬಹುದು, ಇದು ಮತ ಎಣಿಕೆಯ ಸಮಯದಲ್ಲಿ ಸಮಾನ ಅವಕಾಶವನ್ನು (Level Playing Field) ಕಸಿದುಕೊಳ್ಳುತ್ತದೆ ಎಂದು ಟಿಎಂಸಿ ವಾದಿಸಿತ್ತು.
ಸುಪ್ರೀಂಕೋರ್ಟ್‌ನ ತೀರ್ಪು ಏನು ?
ಚುನಾವಣಾ ಆಯೋಗಕ್ಕೆ ಸಂಪೂರ್ಣ ಹಕ್ಕು: ಚುನಾವಣಾ ಆಯೋಗವು ತನ್ನದೇ ಆದ ಅಧಿಕಾರಿಗಳನ್ನು ಆಯ್ಕೆ ಮಾಡಿಕೊಳ್ಳುವ ಹಕ್ಕನ್ನು ಹೊಂದಿದೆ ಮತ್ತು ಕೇಂದ್ರ ಸರ್ಕಾರದ ನೌಕರರನ್ನು ನೇಮಿಸುವ ಸುತ್ತೋಲೆಯನ್ನು ರದ್ದುಗೊಳಿಸಲು ಸಾಧ್ಯವಿಲ್ಲ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ.
ಸುತ್ತೋಲೆ ಪಾಲನೆಗೆ ಸೂಚನೆ: ಚುನಾವಣಾ ಆಯೋಗದ ಪರ ವಕೀಲರು ನೀಡಿದ ಹೇಳಿಕೆಯನ್ನು ದಾಖಲಿಸಿಕೊಂಡ ನ್ಯಾಯಾಲಯವು, ಏಪ್ರಿಲ್ 13 ರ ಸುತ್ತೋಲೆಯನ್ನು ಅದರ ಮೂಲ ಆಶಯದಂತೆಯೇ ಸಂಪೂರ್ಣವಾಗಿ ಜಾರಿಗೊಳಿಸಲಾಗುವುದು ಎಂದು ತಿಳಿಸಿದೆ.
ಪರಸ್ಪರ ಸಹಕಾರದ ವ್ಯವಸ್ಥೆ
ಚುನಾವಣಾ ಆಯೋಗವು ನ್ಯಾಯಾಲಯಕ್ಕೆ ತನ್ನ ನಿಲುವನ್ನು ಸ್ಪಷ್ಟಪಡಿಸಿದ್ದು, ತಾನು ಏಪ್ರಿಲ್ 13 ರ ಸುತ್ತೋಲೆಯನ್ನು ಕಟ್ಟುನಿಟ್ಟಾಗಿ ಪಾಲಿಸುತ್ತಿರುವುದಾಗಿ ತಿಳಿಸಿದೆ.”ಈ ವ್ಯವಸ್ಥೆಯು ಪರಸ್ಪರ ಸಹಕಾರದಿಂದ ಕೂಡಿದೆ. ಎಲ್ಲಿ ಎಣಿಕೆ ಮೇಲ್ವಿಚಾರಕರು ಕೇಂದ್ರ ಸರ್ಕಾರದಿಂದ ಇರುತ್ತಾರೋ, ಅಲ್ಲಿ ಎಣಿಕೆ ಸಹಾಯಕರು (Counting Assistants) ರಾಜ್ಯ ಸರ್ಕಾರದಿಂದ ಇರುತ್ತಾರೆ. ಇದರಿಂದಾಗಿ ಪ್ರತಿ ಎಣಿಕೆ ಟೇಬಲ್‌ನಲ್ಲಿ ಕನಿಷ್ಠ ಒಬ್ಬ ರಾಜ್ಯ ಸರ್ಕಾರದ ಅಧಿಕಾರಿ ಇರುವುದು ಖಚಿತವಾಗುತ್ತದೆ.” ಎಂದು ಆಯೋಗ ತಿಳಿಸಿದೆ. ಸುಪ್ರೀಂ ಕೋರ್ಟ್‌ನ ಈ ಮಹತ್ವದ ಅವಲೋಕನದ ನಂತರ, ಟಿಎಂಸಿ ತನ್ನ ನಿಲುವನ್ನು ಬದಲಾಯಿಸಿದ್ದು, ಚುನಾವಣಾ ಆಯೋಗದ ಸುತ್ತೋಲೆಯನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸುವಂತೆ ಮತ್ತು ಅದರ ಪ್ರಕಾರವೇ ರಾಜ್ಯ ಸರ್ಕಾರದ ನೌಕರರನ್ನು ನೇಮಕ ಮಾಡುವಂತೆ ಒತ್ತಾಯಿಸಿದೆ.
