ಜಮ್ಮು ಮತ್ತು ಕಾಶ್ಮೀರ ಸರ್ಕಾರವು ಮೊದಲ ಬಾರಿಗೆ ಈ ವಿದೇಶಿ ತಳಿಯನ್ನು ತನ್ನ ಸರ್ಕಾರಿ ಸಾಂಸ್ಥಿಕ ರಚನೆಗೆ ಸೇರಿಸಿಕೊಂಡಿದೆ. ಈ ಮೇಕೆಗಳ ಮೂಲಕ ರಾಜ್ಯದಲ್ಲಿ ಹಾಲಿನ ಕ್ರಾಂತಿ ತರಲು ಮತ್ತು ಆ ಮೂಲಕ ರೈತರ ಆದಾಯವನ್ನು ದ್ವಿಗುಣಗೊಳಿಸುವ ಗುರಿಯನ್ನು ಸರ್ಕಾರ ಹೊಂದಿದೆ. ಕಾಶ್ಮೀರದ ಹವಾಮಾನವು ಈ ಮೇಕೆಗಳ ಬೆಳವಣಿಗೆಗೆ ಪೂರಕವಾಗಿರುವುದರಿಂದ ಇಲ್ಲಿನ ಡೈರಿ ಕ್ಷೇತ್ರದಲ್ಲಿ ಹೊಸ ಅಧ್ಯಾಯ ಆರಂಭವಾಗಲಿದೆ.
ವಿಶ್ವವಿಖ್ಯಾತ ‘ಸಾನೆನ್’ ಮೇಕೆಗಳು
ಜಮ್ಮು ಮತ್ತು ಕಾಶ್ಮೀರದ ರೈತರಿಗೆ ಇದೊಂದು ದೊಡ್ಡ ಶುಭಸುದ್ದಿ. ಅಲ್ಲಿನ ಡೈರಿ ಉದ್ಯಮದಲ್ಲಿ ಹೊಸ ಕ್ರಾಂತಿ ಆರಂಭವಾಗಲಿದೆ. ಸ್ವಿಟ್ಜರ್ಲೆಂಡ್ ಮೂಲದ ಜಗತ್ಪ್ರಸಿದ್ಧ ‘ಸಾನೆನ್’ (Saanen) ತಳಿಯ ಮೇಕೆಗಳು ಈಗ ಕಾಶ್ಮೀರದ ಮಣ್ಣಿಗೆ ಕಾಲಿಟ್ಟಿವೆ. ಅತ್ಯಧಿಕ ಹಾಲು ನೀಡುವಿಕೆಗೆ ಹೆಸರಾಗಿರುವ ಈ ಮೇಕೆಗಳು ಸ್ಥಳೀಯ ರೈತರ ಆರ್ಥಿಕ ಸ್ಥಿತಿಯನ್ನು ಬದಲಿಸಲಿವೆ ಎಂದು ತಜ್ಞರು ಭಾವಿಸಿದ್ದಾರೆ.
ಹಾಲಿನ ರಾಣಿ (Queen of Milk) ಸಾನೆನ್ ಮೇಕೆಗಳನ್ನು ಪ್ರಪಂಚದಾದ್ಯಂತ ‘ಹಾಲಿನ ರಾಣಿ’ ಎಂದು ಕರೆಯಲಾಗುತ್ತದೆ. ಸಾಮಾನ್ಯ ಮೇಕೆಗಳು ದಿನಕ್ಕೆ ಒಂದರಿಂದ ಎರಡು ಲೀಟರ್ ಹಾಲು ನೀಡಿದರೆ, ಈ ಸಾನೆನ್ ತಳಿಯ ಮೇಕೆಗಳು ದಿನಕ್ಕೆ ಸರಾಸರಿ 5 ರಿಂದ 7 ಲೀಟರ್ ವರೆಗೆ ಹಾಲು ನೀಡುತ್ತವೆ. ಇವುಗಳ ಹಾಲು ಉತ್ತಮ ಗುಣಮಟ್ಟದ ಮತ್ತು ಪೌಷ್ಟಿಕಾಂಶಗಳಿಂದ ಕೂಡಿರುವುದರಿಂದ ಮಾರುಕಟ್ಟೆಯಲ್ಲಿ ಹೆಚ್ಚಿನ ಬೇಡಿಕೆಯಿದೆ.
ಈ ತಳಿಯ ವಿಶೇಷತೆಗಳೇನು?
- ಹೆಚ್ಚಿನ ಆದಾಯ: ಕಡಿಮೆ ವೆಚ್ಚದಲ್ಲಿ ಸಾಕಬಹುದಾದ ಈ ಮೇಕೆಗಳಿಂದ ರೈತರ ಆದಾಯ ಹೆಚ್ಚಾಗಲಿದೆ.
- ಸ್ವಭಾವ: ಈ ಮೇಕೆಗಳು ಸಾಮಾನ್ಯವಾಗಿ ಬಿಳಿ ಬಣ್ಣ ಹೊಂದಿದ್ದು, ಬಹಳ ಶಾಂತ ಸ್ವಭಾವದವಾಗಿರುತ್ತವೆ.
- ಹವಾಮಾನ ಹೊಂದಾಣಿಕೆ: ಕಾಶ್ಮೀರದ ತಂಪಾದ ವವಾವರಣವು ಸ್ವಿಟ್ಜರ್ಲೆಂಡ್‌ನ ಹವಾಮಾನವನ್ನು ಹೋಲುತ್ತಿರುವುದರಿಂದ, ಇವು ಇಲ್ಲಿ ಚೆನ್ನಾಗಿ ಬೆಳೆಯುತ್ತವೆ ಎಂದು ನಿರೀಕ್ಷಿಸಲಾಗಿದೆ.
ಮುಂದಿನ ಯೋಜನೆ: ಜಮ್ಮು ಕಾಶ್ಮೀರದ ಪಶುಸಂಗೋಪನಾ ಇಲಾಖೆಯು ಮೊದಲ ಬಾರಿಗೆ ಈ ತಳಿಯನ್ನು ವಿದೇಶದಿಂದ ತರಿಸಿಕೊಂಡಿದ್ದು, ಇಲ್ಲಿನ ವಾತಾವರಣಕ್ಕೆ ಅವು ಹೇಗೆ ಹೊಂದಿಕೊಳ್ಳುತ್ತವೆ ಎಂಬುದರ ಕುರಿತು ಅಧ್ಯಯನ ನಡೆಸುತ್ತಿದೆ. ಈ ಯೋಜನೆ ಯಶಸ್ವಿಯಾದಲ್ಲಿ, ಸ್ಥಳೀಯ ಮೇಕೆಗಳೊಂದಿಗೆ ಇವುಗಳನ್ನು ಸಂಕರಿಸುವ (Cross-breeding) ಮೂಲಕ ಗರಿಷ್ಠ ಹಾಲು ನೀಡುವ ಹೊಸ ತಳಿಗಳನ್ನು ಅಭಿವೃದ್ಧಿಪಡಿಸಲು ಸರ್ಕಾರ ಉದ್ದೇಶಿಸಿದೆ.
