ಇಂಡೋನೇಷ್ಯಾದ ಡೇ-ಕೇರ್ ಸೆಂಟರ್ ಒಂದರಲ್ಲಿ ಪುಟ್ಟ ಮಕ್ಕಳ ಮೇಲೆ ನಡೆದ ಭೀಕರ ದೌರ್ಜನ್ಯದ ಘಟನೆ ಇಡೀ ಜಗತ್ತನ್ನೇ ಬೆಚ್ಚಿಬೀಳಿಸಿದೆ. ನಂಬಿಕೆಯಿಂದ, ಭಾರಿ ಮೊತ್ತದ ಹಣ ಪಾವತಿಸಿ ಮಕ್ಕಳನ್ನು ಡೇ-ಕೇರ್ ಸೆಂಟರ್ಗೆ ಸೇರಿಸಿದರೆ, ಅಲ್ಲಿನ ಸಿಬ್ಬಂದಿ ಮಕ್ಕಳನ್ನು ಕ್ರೂರವಾಗಿ ಹಿಂಸಿಸಿರುವ ಘಟನೆ ಈಗ ಬೆಳಕಿಗೆ ಬಂದಿದೆ.
ಪುಟ್ಟ ಕಂದಮ್ಮಗಳ ಕೈಕಾಲುಗಳನ್ನು ಕಟ್ಟಿ ಹಾಕಿ ಅಮಾನವೀಯವಾಗಿ ಪೀಡಿಸುತ್ತಿದ್ದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಈಗಾಗಲೇ 13 ಮಂದಿಯನ್ನು ಬಂಧಿಸಿದ್ದಾರೆ.
ಘಟನೆಯ ವಿವರ:
ಜಾವಾ ದ್ವೀಪದ ಯೋಗ್ಯಕರ್ತಾದಲ್ಲಿರುವ ‘ಲಿಟಲ್ ಅರೇಷಾ’ (Little Aresha) ಎಂಬ ಡೇ-ಕೇರ್ ಸೆಂಟರ್ನಲ್ಲಿ ಎರಡು ವರ್ಷದೊಳಗಿನ ಮಕ್ಕಳು ಕೇವಲ ಡಯಾಪರ್ ಧರಿಸಿ ನೆಲದ ಮೇಲೆ ಮಲಗಿದ್ದರು. ಅವರ ಕೈ ಮತ್ತು ಕಾಲುಗಳನ್ನು ಹಳೆಯ ಬಟ್ಟೆಗಳಿಂದ ಕಟ್ಟಿ ಹಾಕಲಾಗಿತ್ತು. ಅಲ್ಲಿ ಕೆಲಸ ಮಾಡುತ್ತಿದ್ದ ಮಾಜಿ ಉದ್ಯೋಗಿಯೊಬ್ಬರು ದೂರು ನೀಡಿದ ನಂತರ ಈ ದೌರ್ಜನ್ಯ ಬಯಲಿಗೆ ಬಂದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಸಿಸಿಟಿವಿ ದೃಶ್ಯಾವಳಿಗಳು ಅಸಲಿ ಎಂದು ಪೊಲೀಸರು ದೃಢಪಡಿಸಿದ್ದಾರೆ. ಕಳೆದ ಶುಕ್ರವಾರ (ಏಪ್ರಿಲ್ 24, 2026) ಪೊಲೀಸರು ಈ ಕೇಂದ್ರದ ಮೇಲೆ ದಾಳಿ ನಡೆಸಿದ್ದಾರೆ.
ತನಿಖೆಯಲ್ಲಿ ಬಯಲಾದ ಭಯಾನಕ ಸತ್ಯಗಳು:
ಕೇವಲ 3 ಮೀಟರ್ ಉದ್ದ ಮತ್ತು 3 ಮೀಟರ್ ಅಗಲದ ಪುಟ್ಟ ಕೋಣೆಯಲ್ಲಿ ಸುಮಾರು 20 ಮಕ್ಕಳನ್ನು ಕೂಡಿ ಹಾಕಿರುವುದನ್ನು ಪೊಲೀಸರು ಪತ್ತೆಹಚ್ಚಿದ್ದಾರೆ. ಆ ಕೇಂದ್ರದಲ್ಲಿ ಒಟ್ಟು 100 ಮಕ್ಕಳಿದ್ದು, ಅವರಲ್ಲಿ ಅರ್ಧಕ್ಕಿಂತ ಹೆಚ್ಚು (50ಕ್ಕೂ ಹೆಚ್ಚು) ಮಕ್ಕಳು ದೌರ್ಜನ್ಯಕ್ಕೆ ಒಳಗಾಗಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ ಮಕ್ಕಳು ಒಬ್ಬರಿಗೊಬ್ಬರು ತೊಂದರೆ ಕೊಡಬಾರದು ಎಂಬ ಕಾರಣಕ್ಕೆ ಕೈಕಾಲು ಕಟ್ಟಿ ಹಾಕಿದ್ದೆವು. ಸಿಬ್ಬಂದಿ ಕೊರತೆಯಿಂದಾಗಿ ಮಕ್ಕಳಿಗೆ ಸ್ನಾನ ಮಾಡಿಸುವುದು ಮತ್ತು ಬಟ್ಟೆ ಹಾಕುವುದು ಕಷ್ಟವಾಗುತ್ತಿತ್ತು, ಅದಕ್ಕಾಗಿಯೇ ಹೀಗೆ ಮಾಡಿದೆವು” ಎಂದು ಆರೋಪಿಗಳು ಕುಂಟು ನೆಪಗಳನ್ನು ಹೇಳಿದ್ದಾರೆ.
ಬಂಧನ ಮತ್ತು ಕ್ರಮ
“ಈ ಪ್ರಕರಣದಲ್ಲಿ ಇದುವರೆಗೆ 13 ಮಂದಿಯನ್ನು ಶಂಕಿತರೆಂದು ಗುರುತಿಸಿ ಬಂಧಿಸಲಾಗಿದೆ,” ಎಂದು ನಗರ ಪೊಲೀಸ್ ಮುಖ್ಯಸ್ಥರಾದ ಈವಾ ಗುಣ ಪಾಂಡಿಯಾ ಸೋಮವಾರ ಯೋಗ್ಯಕರ್ತಾದಲ್ಲಿ ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಬಂಧಿತರಲ್ಲಿ 11 ಮಂದಿ ಮಕ್ಕಳ ಆರೈಕೆ ಸಿಬ್ಬಂದಿ, ಡೇ-ಕೇರ್ ಸೆಂಟರ್ನ ಮುಖ್ಯೋಪಾಧ್ಯಾಯ ಮತ್ತು ಆ ಸಂಸ್ಥೆಯನ್ನು ನಡೆಸುವ ಫೌಂಡೇಶನ್ ಮುಖ್ಯಸ್ಥರು ಸೇರಿದ್ದಾರೆ.
ಪೋಷಕರ ಆಕ್ರೋಶ ಮತ್ತು ಕಣ್ಣೀರು:
ಕಳೆದ ಶುಕ್ರವಾರ ತನ್ನ 2 ವರ್ಷದ ಮಗನನ್ನು ಕರೆದುಕೊಂಡು ಹೋಗುವಂತೆ ಇತರ ಪೋಷಕರಿಂದ ಕರೆ ಬಂದಾಗ ತಾನು ದಿಗ್ಭ್ರಮೆಗೊಂಡೆ ಎಂದು ತಂದೆ ನೂರ್ಮನ್ ವಿಂಡಾರ್ಟೊ (42) ಹೇಳಿದ್ದಾರೆ. “ನನ್ನ ಮಗನ ಕೈಕಾಲು ಕಟ್ಟಿ ಹಾಕಿ ಹಿಂಸಿಸಿರುವುದನ್ನು ಕೇಳಿ ನನ್ನ ಹೃದಯ ಚೂರಾಯಿತು. ನನ್ನ ಮಗು ಪದೇ ಪದೇ ನ್ಯುಮೋನಿಯಾದಿಂದ ಆಸ್ಪತ್ರೆಗೆ ದಾಖಲಾಗುತ್ತಿತ್ತು. ಬಟ್ಟೆ ಇಲ್ಲದೆ ತಣ್ಣನೆಯ ನೆಲದ ಮೇಲೆ ಮಲಗಿಸುತ್ತಿದ್ದ ಕಾರಣಕ್ಕಾಗಿಯೇ ಹೀಗಾಗಿರಬಹುದು,” ಎಂದು ಅವರು ಕಣ್ಣೀರು ಹಾಕಿದ್ದಾರೆ.
ಈ ಘಟನೆಯ ಕುರಿತು ಪ್ರಸ್ತುತ ಹೆಚ್ಚಿನ ತನಿಖೆ ನಡೆಯುತ್ತಿದೆ. ಅಲ್ಲಿ ಮಕ್ಕಳನ್ನು ಸೇರಿಸಿದ್ದ ಬಹುತೇಕ ಪೋಷಕರ ಪರಿಸ್ಥಿತಿ ಇದೇ ಆಗಿದೆ. ಆರೋಪಿಗಳಿಗೆ ಕಠಿಣ ಮರಣದಂಡನೆ ವಿಧಿಸಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ. ಇಂಡೋನೇಷ್ಯಾದ ಮಕ್ಕಳ ಸಂರಕ್ಷಣಾ ಕಾಯ್ದೆಯಡಿ ಆರೋಪಿಗಳಿಗೆ ಐದು ವರ್ಷಗಳವರೆಗೆ ಜೈಲು ಶಿಕ್ಷೆ ಮತ್ತು 100 ಮಿಲಿಯನ್ ರೂಪಾಯಿ ದಂಡ ವಿಧಿಸುವ ಸಾಧ್ಯತೆಯಿದೆ.
