ಬೆಂಗಳೂರು: ಪರಿಶಿಷ್ಟ ಜಾತಿ ಒಳ ಮೀಸಲಾತಿ ಜಾರಿ ಬಗ್ಗೆ ಸರ್ಕಾರ ಅಧಿಕೃತ ಆದೇಶ ಹೊರಡಿಸಿದೆ. ಹೈಕೋರ್ಟ್ ಮಧ್ಯಂತರ ಆದೇಶದ ಹಿನ್ನೆಲೆ ಮೀಸಲಾತಿ ಹಂಚಿಕೆಯನ್ನು ಪರಿಷ್ಕರಣೆ ಮಾಡಲಾಗಿದೆ.
ಪರಿಶಿಷ್ಟ ಜಾತಿ ಮೀಸಲಾತಿ ಪ್ರಮಾಣ ತಾತ್ಕಾಲಿಕವಾಗಿ ಶೇಕಡ 17 ರಿಂದ ಶೇಕಡ 15ಕ್ಕೆ ಸೀಮಿತವಾಗಿದೆ. ಒಟ್ಟಾರೆ ಮೀಸಲಾತಿ ಪ್ರಮಾಣ ಶೇಕಡ 50ರ ಮಿತಿಯೊಳಗೆ ಕಾಯ್ದುಕೊಳ್ಳಲು ಕ್ರಮ ಕೈಗೊಳ್ಳಲಾಗಿದೆ. ಪರಿಶಿಷ್ಟ ಜಾತಿಯ ಪ್ರವರ್ಗ ಎ ಮತ್ತು ಬಿ ಗೆ ತಲಾ ಶೇಕಡ 5.25, ಪ್ರವರ್ಗ ಸಿ ಗೆ ಶೇ. 4.5ರಷ್ಟು ಹಂಚಿಕೆ ಮಾಡಲಾಗಿದೆ. ಅಲೆಮಾರಿ ಜಾತಿಗಳಿಗೆ ಪ್ರವರ್ಗ ಸಿ ಅಡಿಯಲ್ಲಿ ಶೇಕಡ 20ರಷ್ಟು ವಿಶೇಷ ಮೀಸಲು ನೀಡಲಾಗಿದೆ. ನೇಮಕಾತಿಯಲ್ಲಿ 400 ಬಿಂದುಗಳ ರೋಸ್ಟರ್ ಚಕ್ರ ಕಡ್ಡಾಯ ಅನುಸರಿಸಲು ಸೂಚನೆ ನೀಡಲಾಗಿದೆ.
ಹಳೆಯ ಮೀಸಲಾತಿಯ ಅಧಿಸೂಚನೆಗಳು ರದ್ದಾಗಲಿವೆ. ಹೊಸ ನಿಯಮದಡಿ ಪರಿಷ್ಕೃತ ಅಧಿಸೂಚನೆಗೆ ಆದೇಶಿಸಲಾಗಿದೆ. ಭವಿಷ್ಯದ ತೀರ್ಪು ಆಧರಿಸಿ ಬಾಕಿ ಶೇಕಡ 60 ಹುದ್ದೆಗಳನ್ನು ಬ್ಯಾಕ್ ಲಾಗ್ ಎಂದು ಪರಿಗಣಿಸಲು ರಾಜ್ಯ ಸರ್ಕಾರ ನಿರ್ಧರಿಸಿದೆ. 56,432 ಹುದ್ದೆಗಳ ನೇರ ನೇಮಕಾತಿಗೆ ತುರ್ತು ಕ್ರಮ ಕೈಗೊಳ್ಳುವಂತೆ ಸೂಚನೆ ನೀಡಲಾಗಿದೆ. ಸರ್ಕಾರದ ಈ ಹೊಸ ಮೀಸಲಾತಿ ಆದೇಶ ಹೈಕೋರ್ಟ್ ನ ಅಂತಿಮ ತೀರ್ಪಿಗೆ ಅನ್ವಯವಾಗಲಿದೆ ಎಂದು ಹೇಳಲಾಗಿದೆ.
