ವಿಶ್ವದ ಅಗ್ರ ಕುಬೇರ ಎಲೋನ್ ಮಸ್ಕ್ ಮತ್ತೊಂದು ಸಂಚಲನಕ್ಕೆ ಸಿದ್ಧರಾಗಿದ್ದಾರೆ. ಸಾಮಾಜಿಕ ಮಾಧ್ಯಮ ದೈತ್ಯ ‘X’ (ಹಳೆಯ ಟ್ವಿಟ್ಟರ್) ನಿಂದ ಅತ್ಯಾಧುನಿಕ ಮೆಸೇಜಿಂಗ್ ಆ್ಯಪ್ ‘XChat’ ಅನ್ನು ಏಪ್ರಿಲ್ 17 ರಂದು ಬಿಡುಗಡೆ ಮಾಡಲು ಮಸ್ಕ್ ನಿರ್ಧರಿಸಿದ್ದಾರೆ.
ಗೌಪ್ಯತೆಗೆ (Privacy) ಹೆಚ್ಚಿನ ಆದ್ಯತೆ ನೀಡಿರುವ ಈ ಆ್ಯಪ್, ವಾಟ್ಸಾಪ್‌ಗೆ ಪ್ರಬಲ ಸ್ಪರ್ಧೆ ನೀಡುವಂತೆ ವಿನ್ಯಾಸಗೊಳಿಸಲಾಗಿದೆ. ಆರಂಭದಲ್ಲಿ ಇದು ಕೇವಲ ಐಫೋನ್ ಮತ್ತು ಐಪ್ಯಾಡ್ (iOS) ಬಳಕೆದಾರರಿಗೆ ಮಾತ್ರ ಲಭ್ಯವಿರಲಿದ್ದು, ಆ್ಯಂಡ್ರಾಯ್ಡ್ ಆವೃತ್ತಿಯ ಬಗ್ಗೆ ಸದ್ಯಕ್ಕೆ ಯಾವುದೇ ಅಧಿಕೃತ ಘೋಷಣೆಯಾಗಿಲ್ಲ. ಆಪಲ್ ಆ್ಯಪ್ ಸ್ಟೋರ್‌ನಲ್ಲಿ ಈಗಾಗಲೇ ಈ ಆ್ಯಪ್ ಲಿಸ್ಟ್ ಆಗಿದ್ದು, ಆಸಕ್ತರು ಮುಂಗಡ ನೋಂದಣಿ (Pre-register) ಮಾಡಿಕೊಳ್ಳಬಹುದು. ಇದರ ಇಂಟರ್‌ಫೇಸ್ ಆಪಲ್‌ನ ‘iMessage’ ನಂತೆಯೇ ಸರಳ ಮತ್ತು ಆಕರ್ಷಕವಾಗಿರಲಿದೆ.
XChat ನ ವಿಶೇಷತೆಗಳೇನು?
- ಫೋನ್ ನಂಬರ್ ಅಗತ್ಯವಿಲ್ಲ: ಈ ಆ್ಯಪ್ ಬಳಸಲು ನಿಮ್ಮ ಫೋನ್ ನಂಬರ್ ನೀಡುವ ಅಗತ್ಯವಿಲ್ಲ. ನಿಮ್ಮ ‘X’ ಖಾತೆಯ ಮೂಲಕವೇ ನೇರವಾಗಿ ಲಾಗಿನ್ ಆಗಬಹುದು.
- ನಿಜವಾದ ಗೌಪ್ಯತೆ: ಇದರಲ್ಲಿ ‘ಎಂಡ್-ಟು-ಎಂಡ್ ಎನ್‌ಕ್ರಿಪ್ಶನ್’ ಸೌಲಭ್ಯವಿರಲಿದೆ. ನಿಮ್ಮ ಡೇಟಾವನ್ನು ಟ್ರ್ಯಾಕ್ ಮಾಡಲಾಗುವುದಿಲ್ಲ ಮತ್ತು ಯಾವುದೇ ಜಾಹೀರಾತುಗಳು ಇರುವುದಿಲ್ಲ.
- ಸ್ಕ್ರೀನ್‌ಶಾಟ್ ಬ್ಲಾಕಿಂಗ್: ಎದುರಿಗಿನ ವ್ಯಕ್ತಿ ನಿಮ್ಮ ಚಾಟ್ ಅನ್ನು ಸ್ಕ್ರೀನ್‌ಶಾಟ್ ತೆಗೆದುಕೊಳ್ಳದಂತೆ ತಡೆಯುವ ವಿಶೇಷ ಫೀಚರ್ ಇಲ್ಲಿದೆ.
- ದೊಡ್ಡ ಗ್ರೂಪ್‌ಗಳು: ಒಂದು ಗ್ರೂಪ್‌ನಲ್ಲಿ ಗರಿಷ್ಠ 481 ಸದಸ್ಯರೊಂದಿಗೆ ಚಾಟ್ ಮಾಡಬಹುದು. ಸಂದೇಶಗಳನ್ನು ಎಡಿಟ್ ಮಾಡುವ ಅಥವಾ ಡಿಲೀಟ್ ಮಾಡುವ ಸೌಲಭ್ಯವೂ ಇದೆ.
- ಕಣ್ಮರೆಯಾಗುವ ಸಂದೇಶಗಳು: ನಿಗದಿತ ಸಮಯದ ನಂತರ ಸಂದೇಶಗಳು ತಾವಾಗಿಯೇ ಡಿಲೀಟ್ ಆಗುವಂತೆ ಸೆಟ್ ಮಾಡಬಹುದು. ಹೀಬ್ರೂ ಸೇರಿದಂತೆ 46 ಭಾಷೆಗಳಲ್ಲಿ ಇದು ಲಭ್ಯವಿರಲಿದೆ.
ವಿವಾದದಲ್ಲಿ ವಾಟ್ಸಾಪ್.. ಮಸ್ಕ್ ಟೀಕೆ
ಮತ್ತೊಂದೆಡೆ, ವಾಟ್ಸಾಪ್ ಅಮೆರಿಕಾದ ನ್ಯಾಯಾಲಯದಲ್ಲಿ ಗಂಭೀರ ಆರೋಪಗಳನ್ನು ಎದುರಿಸುತ್ತಿದೆ. ಮೆಟಾ ಸಂಸ್ಥೆಯು ಬಳಕೆದಾರರ ಸಂದೇಶಗಳನ್ನು ಗುಟ್ಟಾಗಿ ಮೂರನೇ ವ್ಯಕ್ತಿಗಳೊಂದಿಗೆ ಹಂಚಿಕೊಳ್ಳುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಈ ಬೆನ್ನಲ್ಲೇ ಮಸ್ಕ್ ಅವರು “ಮೆಟಾವನ್ನು ನಂಬಲು ಸಾಧ್ಯವಿಲ್ಲ” ಎಂದು ಕಿಡಿಕಾರಿದ್ದಾರೆ. ಟೆಲಿಗ್ರಾಮ್ ಮುಖ್ಯಸ್ಥ ಪಾವೆಲ್ ಡುರೊವ್ ಕೂಡ ವಾಟ್ಸಾಪ್ ಸುರಕ್ಷತೆಯ ಬಗ್ಗೆ ಈ ಹಿಂದೆ ಸಂಶಯ ವ್ಯಕ್ತಪಡಿಸಿದ್ದರು.
ಮಸ್ಕ್ ಅವರ ‘ಸೂಪರ್ ಆ್ಯಪ್’ ಕನಸು
‘X’ ಅನ್ನು ಕೇವಲ ಸೋಶಿಯಲ್ ಮೀಡಿಯಾ ಪ್ಲಾಟ್‌ಫಾರ್ಮ್ ಆಗಿ ಮಾತ್ರವಲ್ಲದೆ, ಎಲ್ಲಾ ಸೇವೆಗಳನ್ನು ಒದಗಿಸುವ ಏಕೈಕ ‘ಸೂಪರ್ ಆ್ಯಪ್’ ಆಗಿ ಬದಲಾಯಿಸುವುದು ಮಸ್ಕ್ ಗುರಿ. ಅದರ ಭಾಗವಾಗಿಯೇ ಈಗ ಮೆಸೇಜಿಂಗ್ ಆ್ಯಪ್ ತರುತ್ತಿದ್ದಾರೆ. ಭವಿಷ್ಯದಲ್ಲಿ ಈ ಆ್ಯಪ್ ಮೂಲಕ ಹಣ ವರ್ಗಾವಣೆ (P2P ಪೇಮೆಂಟ್ಸ್) ಸೌಲಭ್ಯವನ್ನೂ ತರುವ ಸೂಚನೆ ನೀಡಿದ್ದಾರೆ. ವಾಟ್ಸಾಪ್ ಸುರಕ್ಷತೆಯ ಬಗ್ಗೆ ಅನುಮಾನಗಳು ಕಾಡುತ್ತಿರುವ ಈ ಸಮಯದಲ್ಲಿ, ಮಸ್ಕ್ ಅವರ ‘XChat’ ಎಷ್ಟು ಯಶಸ್ವಿಯಾಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
