ನವದೆಹಲಿ: ಕೇಂದ್ರ ಸರ್ಕಾರ ಶನಿವಾರ ಡೀಸೆಲ್ ಮೇಲಿನ ರಫ್ತು ಸುಂಕ ಅಥವಾ ಆಕಸ್ಮಿಕ ತೆರಿಗೆ(Windfall tax)ಯನ್ನು ಲೀಟರ್ಗೆ 55.5 ರೂ.ಗಳಿಗೆ ಮತ್ತು ವಿಮಾನ ಇಂಧನ ಎಟಿಎಫ್ ಮೇಲಿನ ರಫ್ತು ಸುಂಕವನ್ನು ಲೀಟರ್ಗೆ 42 ರೂ.ಗಳಿಗೆ ಹೆಚ್ಚಿಸಿದೆ. ಸುಂಕ ಹೆಚ್ಚಳವು ತಕ್ಷಣದಿಂದ ಜಾರಿಗೆ ಬರುವಂತೆ ಅನ್ವಯವಾಗುತ್ತದೆ ಎಂದು ಹಣಕಾಸು ಸಚಿವಾಲಯ ಅಧಿಸೂಚನೆಯಲ್ಲಿ ತಿಳಿಸಿದೆ.
ಡೀಸೆಲ್ ರಫ್ತಿನ ಮೇಲಿನ ಸುಂಕವನ್ನು ಲೀಟರ್ ಗೆ 21.5 ರೂ.ಗಳಿಂದ ಹೆಚ್ಚಳ
ಡೀಸೆಲ್ ರಫ್ತಿನ ಮೇಲಿನ ಸುಂಕವನ್ನು ಲೀಟರ್ಗೆ 21.5 ರೂ.ಗಳಿಂದ 55.5 ರೂ.ಗಳಿಗೆ ಹೆಚ್ಚಿಸಲಾಗಿದೆ. ಎಟಿಎಫ್(ಏವಿಯೇಷನ್ ಟರ್ಬೈನ್ ಇಂಧನ) ಮೇಲಿನ ಸುಂಕವನ್ನು ಲೀಟರ್ಗೆ 29.5 ರೂ.ಗಳಿಂದ 42 ರೂ.ಗಳಿಗೆ ಹೆಚ್ಚಿಸಲಾಗಿದೆ. ಪೆಟ್ರೋಲ್ ಮೇಲಿನ ರಫ್ತು ಸುಂಕವು ಶೂನ್ಯವಾಗಿಯೇ ಮುಂದುವರೆದಿದೆ ಎಂದು ಹಣಕಾಸು ಸಚಿವಾಲಯ ಹೇಳಿಕೆಯಲ್ಲಿ ತಿಳಿಸಿದೆ.
ಮಾರ್ಚ್ 26 ರಂದು ಸರ್ಕಾರವು ಡೀಸೆಲ್ ಮೇಲೆ ಲೀಟರ್ಗೆ 21.50 ರೂ. ಮತ್ತು ಏವಿಯೇಷನ್ ಟರ್ಬೈನ್ ಇಂಧನ(ATF) ಮೇಲೆ ಲೀಟರ್ಗೆ 29.5 ರೂ. ರಫ್ತು ಸುಂಕವನ್ನು ವಿಧಿಸಿತ್ತು. ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಮಧ್ಯೆ ಇಂಧನದ ದೇಶೀಯ ಲಭ್ಯತೆಯನ್ನು ಹೆಚ್ಚಿಸಲು ಈ ಸುಂಕಗಳನ್ನು ವಿಧಿಸಲಾಯಿತು.
ಇರಾನ್ ಯುದ್ಧದ ಆರಂಭದಿಂದಲೂ ಜಾಗತಿಕ ಕಚ್ಚಾ ತೈಲ ಬೆಲೆಗಳು ಏರಿಕೆಯಾಗಿವೆ. ಹಾರ್ಮುಜ್ ಜಲಸಂಧಿಯ ಸುತ್ತಲಿನ ಸಂಘರ್ಷ ಮತ್ತು ಅಡಚಣೆಗೆ ಸಂಬಂಧಿಸಿದ ಪೂರೈಕೆ ನಿರ್ಬಂಧಗಳು ಮಾರುಕಟ್ಟೆಯ ಒತ್ತಡವನ್ನು ಹೆಚ್ಚಿಸಿವೆ.
