ಬದಲಾದ ಜೀವನಶೈಲಿ ಮತ್ತು ಕೆಲಸದ ಒತ್ತಡದಿಂದಾಗಿ ಇಂದು ಬಹುತೇಕರು ಎದುರಿಸುತ್ತಿರುವ ಅತಿದೊಡ್ಡ ಸಮಸ್ಯೆ ಎಂದರೆ ‘ನಿದ್ರಾಹೀನತೆ’. ವಿಶ್ವ ಆರೋಗ್ಯ ದಿನದ ಅಂಗವಾಗಿ ತಜ್ಞರು ನೀಡಿರುವ ಎಚ್ಚರಿಕೆಯ ಪ್ರಕಾರ, ದಿನಕ್ಕೆ ಕನಿಷ್ಠ 7 ರಿಂದ 8 ಗಂಟೆಗಳ ಕಾಲ ಗಾಢ ನಿದ್ದೆ ಮಾಡದಿದ್ದರೆ ಅದು ಕೇವಲ ಆಯಾಸಕ್ಕೆ ಮಾತ್ರವಲ್ಲದೆ, ಗಂಭೀರ ಮಾನಸಿಕ ಮತ್ತು ಶಾರೀರಿಕ ಕಾಯಿಲೆಗಳಿಗೆ ದಾರಿಯಾಗುತ್ತದೆ. ನಿಮ್ಮ ರಾತ್ರಿಯ ನಿದ್ದೆಯನ್ನು ಸುಧಾರಿಸಿ, ಮರುದಿನವನ್ನು ಉತ್ಸಾಹಭರಿತವಾಗಿಸಲು ಪಾಲಿಸಬೇಕಾದ 7 ಸರಳ ಹಾಗೂ ಪರಿಣಾಮಕಾರಿ ಟಿಪ್ಸ್‌ಗಳು ಇಲ್ಲಿವೆ.
ರಾತ್ರಿ ಪ್ರಶಾಂತವಾಗಿ ನಿದ್ದೆ ಮಾಡಿ ಎದ್ದರೆ ಮಾತ್ರ ಮರುದಿನ ನಾವು ಚುರುಕಾಗಿರಲು ಸಾಧ್ಯ. ನಿದ್ದೆ ಸರಿಯಾಗಿ ಆಗದಿದ್ದರೆ ಮರುದಿನ ಅಶಾಂತಿ ಉಂಟಾಗುತ್ತದೆ ಮತ್ತು ಯಾವುದೇ ಕೆಲಸದ ಮೇಲೆ ಗಮನಹರಿಸಲು ಸಾಧ್ಯವಾಗುವುದಿಲ್ಲ. ಒಬ್ಬ ವ್ಯಕ್ತಿಗೆ ದಿನಕ್ಕೆ ಕನಿಷ್ಠ 7 ರಿಂದ 8 ಗಂಟೆಗಳ ಕಾಲ ಗಾಢ ನಿದ್ದೆಯ ಅಗತ್ಯವಿರುತ್ತದೆ. ಪ್ರಶಾಂತವಾದ ನಿದ್ದೆಯಿಂದ ಮಾತ್ರ ಮಾನಸಿಕ ಮತ್ತು ಶಾರೀರಿಕ ಆರೋಗ್ಯ ಉತ್ತಮವಾಗಿರುತ್ತದೆ. ಜೀವನವನ್ನು ಸುಗಮವಾಗಿ ಸಾಗಿಸಲು ಉತ್ತಮ ನಿದ್ದೆ ಅತ್ಯಗತ್ಯ.
ಒಂದು ವೇಳೆ ನಿಮಗೆ ರಾತ್ರಿ ಸರಿಯಾಗಿ ನಿದ್ದೆ ಬರುತ್ತಿಲ್ಲವೆಂದರೆ, ನಿಮ್ಮ ದಿನಚರಿಯಲ್ಲಿ ಈ ಕೆಳಗಿನ 7 ಸರಳ ಬದಲಾವಣೆಗಳನ್ನು ಮಾಡಿಕೊಳ್ಳಿ:
ಉತ್ತಮ ನಿದ್ದೆಗಾಗಿ 7 ಸರಳ ಟಿಪ್ಸ್:
- ನಿದ್ದೆಗೆ ನಿರ್ದಿಷ್ಟ ಸಮಯ ನಿಗದಿಪಡಿಸಿ: ಮಲಗಲು ಮತ್ತು ಏಳಲು ಒಂದು ನಿಖರವಾದ ಸಮಯವನ್ನು ಇಟ್ಟುಕೊಳ್ಳಿ. ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವುದು ಮತ್ತು ಏಳುವುದರಿಂದ ದೇಹದ ಜೈವಿಕ ಗಡಿಯಾರ ಸರಿಯಾಗಿ ಕೆಲಸ ಮಾಡುತ್ತದೆ.
- ಸ್ಕ್ರೀನ್ ಸಮಯ ಕಡಿಮೆ ಮಾಡಿ: ಮಲಗುವ ಮುನ್ನ ಮೊಬೈಲ್ ಫೋನ್, ಟಿವಿ ಅಥವಾ ಲ್ಯಾಪ್‌ಟಾಪ್ ಬಳಸಬೇಡಿ. ಇವುಗಳಿಂದ ಹೊರಬರುವ ‘ಬ್ಲೂ ಲೈಟ್’ ನಿದ್ದೆಯ ಹಾರ್ಮೋನ್‌ಗಳ ಮೇಲೆ ಪ್ರಭಾವ ಬೀರುತ್ತದೆ. ಬದಲಿಗೆ ಪುಸ್ತಕ ಓದುವ ಅಭ್ಯಾಸ ಮಾಡಿಕೊಳ್ಳಿ.
- ಪ್ರಶಾಂತ ವಾತಾವರಣವಿರಲಿ: ಮಲಗುವ ಕೋಣೆಯಲ್ಲಿ ಕಡಿಮೆ ಬೆಳಕಿರಲಿ. ಸುವಾಸಿತ ಮೇಣದಬತ್ತಿಗಳು ಅಥವಾ ಮಂದವಾದ ಸಂಗೀತವನ್ನು ಕೇಳುವುದರಿಂದ ಮನಸ್ಸು ರಿಲ್ಯಾಕ್ಸ್ ಆಗಿ ಬೇಗ ನಿದ್ದೆ ಹತ್ತುತ್ತದೆ.
- ಹಗಲು ಹೊತ್ತು ನಿದ್ದೆ ಮಾಡಬೇಡಿ: ಹಗಲಿನಲ್ಲಿ ನಿದ್ದೆ ಮಾಡುವುದರಿಂದ ರಾತ್ರಿಯ ನಿದ್ದೆಗೆ ತೊಂದರೆಯಾಗುತ್ತದೆ. ಆದ್ದರಿಂದ ಹಗಲು ನಿದ್ದೆಯನ್ನು ಆದಷ್ಟು ತಪ್ಪಿಸಿ.
- ದಿನಚರಿಯನ್ನು ಗಮನಿಸಿ: ನಿಮ್ಮ ಆಹಾರ ಪದ್ಧತಿ ಮತ್ತು ಮಾನಸಿಕ ಸ್ಥಿತಿ ನಿದ್ದೆಯ ಮೇಲೆ ಹೇಗೆ ಪ್ರಭಾವ ಬೀರುತ್ತಿದೆ ಎಂಬುದನ್ನು ಗಮನಿಸಿ ಅದಕ್ಕೆ ತಕ್ಕಂತೆ ಬದಲಾವಣೆ ಮಾಡಿಕೊಳ್ಳಿ.
- ಕೆಫಿನ್‌ನಿಂದ ದೂರವಿರಿ: ಕಾಫಿ, ಟೀ ಅಥವಾ ಎನರ್ಜಿ ಡ್ರಿಂಕ್ಸ್‌ಗಳಲ್ಲಿರುವ ಕೆಫಿನ್ ಅಂಶವು ನಿದ್ದೆಯನ್ನು ಓಡಿಸುತ್ತದೆ. ಮಲಗುವ ಕನಿಷ್ಠ 6 ರಿಂದ 8 ಗಂಟೆಗಳ ಮೊದಲು ಇವುಗಳನ್ನು ಸೇವಿಸಬೇಡಿ.
- ಪ್ರಾಣಾಯಾಮ ಮಾಡಿ: ದಿನವಿಡೀ ಕೆಲಸದ ಒತ್ತಡದ ನಂತರ, ಮಲಗುವ ಮುನ್ನ ಮೆಡಿಟೇಶನ್ (ಧ್ಯಾನ) ಅಥವಾ ಪ್ರಾಣಾಯಾಮ ಮಾಡುವುದರಿಂದ ಮನಸ್ಸು ಶಾಂತವಾಗಿ ಗಾಢ ನಿದ್ದೆ ಬರುತ್ತದೆ.
