ಬಾಲಿವುಡ್ ಸೂಪರ್ ಸ್ಟಾರ್ ರಣವೀರ್ ಸಿಂಗ್ ನಟನೆಯ ‘ಧುರಂಧರ್ 2’ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ದಾಖಲೆಗಳ ಮೇಲೆ ದಾಖಲೆ ಬರೆಯುತ್ತಿದೆ. ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ 1300 ಕೋಟಿ ರೂಪಾಯಿಗೂ ಅಧಿಕ ಮೊತ್ತವನ್ನು ಬಾಚಿಕೊಂಡಿರುವ ಈ ಚಿತ್ರದ ಒಟಿಟಿ ಪ್ರಸಾರದ ಹಕ್ಕುಗಳು ಬರೋಬ್ಬರಿ 150 ಕೋಟಿ ರೂಪಾಯಿಗೆ ಮಾರಾಟವಾಗಿವೆ ಎಂದು ವರದಿಯಾಗಿದೆ.
ನೆಟ್‌ಫ್ಲಿಕ್ಸ್ ಕೈತಪ್ಪಿದ ಡೀಲ್ ಧುರಂಧರ್ ಮೊದಲ ಭಾಗ ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮ್ ಆಗಿತ್ತು. ಹೀಗಾಗಿ ಎರಡನೇ ಭಾಗವೂ ಅದೇ ಪ್ಲಾಟ್‌ಫಾರ್ಮ್‌ಗೆ ಹೋಗಬಹುದು ಎಂದು ಅಂದಾಜಿಸಲಾಗಿತ್ತು. ಆದರೆ ಲಭ್ಯವಿರುವ ಮಾಹಿತಿಯ ಪ್ರಕಾರ, ಜಿಯೋ ಸ್ಟುಡಿಯೋಸ್ ಈ ಬಾರಿ ಜಿಯೋ-ಹಾಟ್‌ಸ್ಟಾರ್ (JioHotstar) ಜೊತೆ ಬೃಹತ್ ಒಪ್ಪಂದ ಮಾಡಿಕೊಂಡಿದೆ. ಮೊದಲ ಭಾಗದ ಡಿಜಿಟಲ್ ಹಕ್ಕುಗಳು 85 ಕೋಟಿಗೆ ಮಾರಾಟವಾಗಿದ್ದರೆ, ಎರಡನೇ ಭಾಗವು ಅದಕ್ಕಿಂತ ಸುಮಾರು ಎರಡು ಪಟ್ಟು ಅಂದರೆ 150 ಕೋಟಿ ರೂಪಾಯಿಗಳ ಬೃಹತ್ ಮೊತ್ತಕ್ಕೆ ಸೇಲ್ ಆಗಿದೆ.
ಬಾಕ್ಸ್ ಆಫೀಸ್‌ನಲ್ಲಿ ಐತಿಹಾಸಿಕ ಸಾಧನೆ ಮಾರ್ಚ್ 30, 2026 ರ ವೇಳೆಗೆ ‘ಧುರಂಧರ್ 2: ದಿ ರಿವೆಂಜ್’ ವಿಶ್ವಾದ್ಯಂತ ಸುಮಾರು 1,365 ಕೋಟಿ ರೂಪಾಯಿ ಗಳಿಸಿದೆ. ಈ ಮೂಲಕ ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಎರಡು ಸಿನಿಮಾಗಳು ತಲಾ 1,000 ಕೋಟಿಗೂ ಅಧಿಕ ಗಳಿಕೆ ಮಾಡಿದ ಮೊದಲ ಫ್ರಾಂಚೈಸಿ ಎಂಬ ಹೆಗ್ಗಳಿಕೆಗೆ ಈ ಚಿತ್ರ ಪಾತ್ರವಾಗಿದೆ. ಬಾಹುಬಲಿ ಚಿತ್ರದ ದಾಖಲೆಯನ್ನೂ ಹಿಂದಿಕ್ಕಿರುವ ಈ ಸಿನಿಮಾ ಸದ್ಯ ಭಾರತದ ನಂಬರ್ 1 ಫ್ರಾಂಚೈಸಿ ಎನಿಸಿಕೊಂಡಿದೆ.
ಚಿತ್ರದ ಕಥೆ ಮತ್ತು ತಾರಾಗಣ ಅಂಡರ್ ಕವರ್ ಏಜೆಂಟ್ ಜಸ್ಕೀರತ್ ಸಿಂಗ್ ರಂಗಿ (ಹಮ್ಜಾ ಅಲಿ ಮಜಾರಿ) ಪಾತ್ರದಲ್ಲಿ ರಣವೀರ್ ಸಿಂಗ್ ಕಾಣಿಸಿಕೊಂಡಿದ್ದಾರೆ. ಕರಾಚಿಯ ಭಯೋತ್ಪಾದಕ ಜಾಲವನ್ನು ಬೇಧಿಸುವ ರೋಚಕ ಕಥೆ ಈ ಚಿತ್ರದಲ್ಲಿದೆ. ಚಿತ್ರದಲ್ಲಿ ರಣವೀರ್ ಜೊತೆಗೆ ಸಂಜಯ್ ದತ್, ಅರ್ಜುನ್ ರಾಂಪಾಲ್, ಆರ್. ಮಾಧವನ್ ಮತ್ತು ಸಾರಾ ಅರ್ಜುನ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಭೂಗತ ಲೋಕದ ಡಾನ್ ದಾವೂದ್ ಇಬ್ರಾಹಿಂ ಪಾತ್ರವನ್ನು ಆಧರಿಸಿದ ‘ಬಡೆ ಸಾಬ್’ ಪಾತ್ರದಲ್ಲಿ ಡ್ಯಾನಿಶ್ ಇಕ್ಬಾಲ್ ಮಿಂಚಿದ್ದಾರೆ.
ಒಟ್ಟಿನಲ್ಲಿ ಥಿಯೇಟರ್‌ಗಳಲ್ಲಿ ಧೂಳೆಬ್ಬಿಸುತ್ತಿರುವ ‘ಧುರಂಧರ್ 2’ ಶೀಘ್ರದಲ್ಲೇ ಒಟಿಟಿ ವೀಕ್ಷಕರಿಗೂ ರಸದೌತಣ ನೀಡಲು ಸಜ್ಜಾಗುತ್ತಿದೆ. ನಿರ್ಮಾಪಕರು ಸದ್ಯದಲ್ಲೇ ಅಧಿಕೃತ ಸ್ಟ್ರೀಮಿಂಗ್ ದಿನಾಂಕವನ್ನು ಘೋಷಿಸುವ ಸಾಧ್ಯತೆಯಿದೆ.
