ಪ್ರತಿಯೊಬ್ಬರಿಗೂ ತಮ್ಮ ಬಾಲ್ಯದಲ್ಲಿ ಒಬ್ಬ ಆರಾಧ್ಯ ದೈವ ಅಥವಾ ಹೀರೋ ಇರುತ್ತಾರೆ. ಅವರನ್ನು ಒಮ್ಮೆಯಾದರೂ ಭೇಟಿ ಮಾಡಬೇಕು ಎಂಬುದು ಅನೇಕರ ‘ಬಕೆಟ್ ಲಿಸ್ಟ್’ನಲ್ಲಿರುವ ದೊಡ್ಡ ಆಸೆ. ಇಂತಹದ್ದೇ ಒಂದು ಅಪರೂಪದ ಕನಸನ್ನು ಮಗನೊಬ್ಬ ತನ್ನ ತಾಯಿಗಾಗಿ ನನಸು ಮಾಡಿಕೊಟ್ಟಿದ್ದಾನೆ. ತನ್ನ 15ನೇ ವಯಸ್ಸಿನಿಂದಲೂ ಅತೀವವಾಗಿ ಆರಾಧಿಸುತ್ತಿದ್ದ ಕ್ರಿಕೆಟ್ ದಿಗ್ಗಜನನ್ನು ಅಮ್ಮನಿಗೆ ಪರಿಚಯಿಸಿದ ಮಗನ ಸಾಹಸ ಈಗ ಇಂಟರ್ನೆಟ್‌ನಲ್ಲಿ ಎಲ್ಲರ ಕಣ್ಣಾಲಿಗಳು ಒದ್ದೆಯಾಗುವಂತೆ ಮಾಡಿದೆ.
ಹರ್ಷಿತ್ ಎಂಬ ಯುವಕ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ಈ ವಿಡಿಯೋ ಜಿಮ್‌ವೊಂದರಲ್ಲಿ ಆರಂಭವಾಗುತ್ತದೆ. ಹರ್ಷಿತ್ ತನ್ನ ತಾಯಿಯನ್ನು ಏನೂ ತಿಳಿಯದಂತೆ ಜಿಮ್‌ ಒಳಗೆ ಕರೆದುಕೊಂಡು ಹೋಗುತ್ತಾನೆ. ಅಲ್ಲಿ ದಕ್ಷಿಣ ಆಫ್ರಿಕಾದ ಮಾಜಿ ಕ್ರಿಕೆಟಿಗ, ಫೀಲ್ಡಿಂಗ್ ಮಾಂತ್ರಿಕ ಜಾಂಟಿ ರೋಡ್ಸ್ ಇದ್ದಕ್ಕಿದ್ದಂತೆ ಪ್ರತ್ಯಕ್ಷವಾಗುತ್ತಾರೆ. ಜಾಂಟಿ ರೋಡ್ಸ್ ಅವರನ್ನು ಕಂಡ ತಕ್ಷಣ ಆಕೆ ಒಂದು ಕ್ಷಣ ಸ್ತಬ್ಧರಾಗುತ್ತಾರೆ. ನಂಬಲಾಗದ ದೃಷ್ಟಿಯಿಂದ ಮಗನತ್ತ ತಿರುಗಿ “ನನ್ನ ಹೀರೋ” ಎಂದು ಕೂಗುತ್ತಾ ಸಂಭ್ರಮಿಸುತ್ತಾರೆ.
ಜಾಂಟಿ ರೋಡ್ಸ್ ಅವರು ಅತ್ಯಂತ ಪ್ರೀತಿಯಿಂದ ಆಕೆಯನ್ನು ಅಪ್ಪಿಕೊಂಡಾಗ, ಆಕೆಯ ಮುಖದಲ್ಲಿ ಮೂಡಿದ ನಗು ಹದಿಹರೆಯದ ಹುಡುಗಿಯ ಉತ್ಸಾಹವನ್ನು ನೆನಪಿಸುವಂತಿತ್ತು. “ನನಗೆ 15 ವರ್ಷ ಇದ್ದಾಗಿನಿಂದಲೂ ನೀವಂದ್ರೆ ತುಂಬ ಇಷ್ಟ” ಎಂದು ಆಕೆ ತನ್ನ ದಶಕಗಳ ಅಭಿಮಾನವನ್ನು ವ್ಯಕ್ತಪಡಿಸಿದರು. ಜಾಂಟಿ ರೋಡ್ಸ್ ಕೂಡ ಅಷ್ಟೇ ವಿನಯದಿಂದ ಆಕೆಯ ಮಾತುಗಳನ್ನು ಆಲಿಸಿ, ಆಕೆ ತಂದಿದ್ದ ಜೆರ್ಸಿಯ ಮೇಲೆ ಸಹಿ ಹಾಕಿ ಹಸ್ತಾಂತರಿಸಿದರು.
“ಅಮ್ಮನ ಬಕೆಟ್ ಲಿಸ್ಟ್‌ನಲ್ಲಿರುವ ಆಸೆಗಳನ್ನು ಪೂರೈಸಲು ವಿಡಿಯೋ ಮಾಡುತ್ತಿದ್ದೇನೆ” ಎಂಬ ಶೀರ್ಷಿಕೆಯೊಂದಿಗೆ ಹಂಚಿಕೊಳ್ಳಲಾದ ಈ ವಿಡಿಯೋಗೆ ನೆಟ್ಟಿಗರಿಂದ ಭಾರಿ ಪ್ರತಿಕ್ರಿಯೆ ವ್ಯಕ್ತವಾಗಿದೆ. “ಆಕೆಯ ಒಳಗಿರುವ ಪುಟ್ಟ ಹುಡುಗಿ ಈಗ ಅತೀವ ಸಂತೋಷದಲ್ಲಿದ್ದಾಳೆ”, “ಯಾಕೋ ಗೊತ್ತಿಲ್ಲ ಈ ವಿಡಿಯೋ ನೋಡುತ್ತಿದ್ದರೆ ನನ್ನ ಕಣ್ಣಲ್ಲಿ ನೀರು ಬರುತ್ತಿದೆ” ಎಂದು ಬಳಕೆದಾರರು ಭಾವುಕರಾಗಿ ಕಾಮೆಂಟ್ ಮಾಡಿದ್ದಾರೆ. ತಾಯಿಯ ಸಂತೋಷಕ್ಕಾಗಿ ಮಗ ಮಾಡಿದ ಈ ಸರ್ಪ್ರೈಸ್ ಈಗ ಸೋಷಿಯಲ್ ಮೀಡಿಯಾದಲ್ಲಿ ‘ಕ್ಯೂಟೆಸ್ಟ್ ವಿಡಿಯೋ’ ಆಗಿ ಹೊರಹೊಮ್ಮಿದೆ.
