ಆಂಜಿಯೋಗ್ರಾಮ್ ಎಂಬುದು ಹೃದಯದ ರಕ್ತನಾಳಗಳಲ್ಲಿನ ಅಡೆತಡೆಗಳನ್ನು (ಬ್ಲಾಕ್) ನಿಖರವಾಗಿ ಪತ್ತೆಹಚ್ಚುವ ಒಂದು ಪರೀಕ್ಷೆಯಾಗಿದೆ. ಮಣಿಕಟ್ಟಿನ ಮೂಲಕ ಕ್ಯಾತಿಟರ್ ಎಂಬ ಸಣ್ಣ ನಳಿಕೆಯನ್ನು ಕಳುಹಿಸಿ, ವಿಶೇಷ ದ್ರವದ (ಇಂಕ್) ಸಹಾಯದಿಂದ ರಕ್ತನಾಳಗಳ ಚಲನೆಯನ್ನು ಎಕ್ಸ್-ರೇ ಮೂಲಕ ದಾಖಲಿಸಲಾಗುತ್ತದೆ. ಇದು ಹೃದಯಾಘಾತ ಮತ್ತು ಬ್ಲಾಕ್ಗಳ ತೀವ್ರತೆಯನ್ನು ಗುರುತಿಸಿ, ಹೃದಯದ ಆರೋಗ್ಯದ ಬಗ್ಗೆ ಪ್ರಮುಖ ಮಾಹಿತಿಯನ್ನು ನೀಡುತ್ತದೆ.
ಸಾಮಾನ್ಯವಾಗಿ ಎದೆನೋವು ಬಂದಾಗ ಅಥವಾ ಹೃದಯ ಸಂಬಂಧಿ ಸಮಸ್ಯೆಗಳಿದ್ದಾಗ ಆಸ್ಪತ್ರೆಗಳಲ್ಲಿ ‘ಆಂಜಿಯೋಗ್ರಾಮ್’ ಎಂಬ ಹೆಸರನ್ನು ನಾವು ಕೇಳುತ್ತಿರುತ್ತೇವೆ. ಹೃದಯಾಘಾತದ ಶಂಕೆ ಇದ್ದಾಗ ಅಥವಾ ಇಸಿಜಿ (ECG), ಇಕೋ (ECHO), ಟಿಎಂಟಿ (TMT), ಸಿಟಿ ಕರೋನರಿ ಆಂಜಿಯೋ ಅಥವಾ ಎಂಆರ್ಐ ಪರೀಕ್ಷೆಗಳಲ್ಲಿ ಬ್ಲಾಕ್ ಇರುವ ಸೂಚನೆ ಕಂಡುಬಂದಾಗ ಆಂಜಿಯೋಗ್ರಾಮ್ ಅಗತ್ಯವಿರುತ್ತದೆ. ಇತರ ಪರೀಕ್ಷೆಗಳು ಕೇವಲ ಸುಳಿವನ್ನು ನೀಡುತ್ತವೆ, ಆದರೆ ಬ್ಲಾಕ್ ಇದೆಯೇ ಅಥವಾ ಇಲ್ಲವೇ ಎಂಬುದನ್ನು ಖಚಿತವಾಗಿ ಪತ್ತೆಹಚ್ಚುವ ಏಕೈಕ ಪರೀಕ್ಷೆ ಆಂಜಿಯೋಗ್ರಾಮ್.
ಆಂಜಿಯೋಗ್ರಾಮ್ ಪ್ರಕ್ರಿಯೆ ಹೇಗೆ ನಡೆಯುತ್ತದೆ?
ಈ ಪ್ರಕ್ರಿಯೆಯಲ್ಲಿ, ಒಂದು ತೆಳುವಾದ ನಳಿಕೆಯನ್ನು (ಕ್ಯಾತಿಟರ್) ಹೃದಯದ ರಕ್ತನಾಳಗಳವರೆಗೆ ಕಳುಹಿಸಲಾಗುತ್ತದೆ. ಅದರ ಮೂಲಕ ಅಯೋಡಿನ್ ಮಿಶ್ರಿತ ವಿಶೇಷ ದ್ರವವನ್ನು (Contrast Dye) ಬಿಡಲಾಗುತ್ತದೆ. ಈ ದ್ರವವು ರಕ್ತನಾಳಗಳಲ್ಲಿ ಹರಿಯುವಾಗ ಎಕ್ಸ್-ರೇ ಯಂತ್ರದ ಮೂಲಕ ಅದರ ಚಲನೆಯನ್ನು ವೀಡಿಯೊದಂತೆ ರೆಕಾರ್ಡ್ ಮಾಡಲಾಗುತ್ತದೆ. ಇದನ್ನು “ಸಿನಿ” (Cine) ಎಂದು ಕರೆಯುತ್ತಾರೆ. ಪ್ರಸ್ತುತ ಈ ರೆಕಾರ್ಡಿಂಗ್ಗಳನ್ನು ಸಿಡಿ ಅಥವಾ ಪೆನ್ ಡ್ರೈವ್ಗಳಲ್ಲಿ ನೀಡಲಾಗುತ್ತದೆ.
ದೇಹದೊಳಗೆ ಪ್ರವೇಶ: ವೈದ್ಯರ ಪ್ರಕಾರ, ದೇಹದ ಯಾವುದೇ ರಕ್ತನಾಳದ ಮೂಲಕ ಪ್ರವೇಶಿಸಿದರೂ ಅದು ಅಂತಿಮವಾಗಿ ಹೃದಯವನ್ನೇ ತಲುಪುತ್ತದೆ. ಸಾಮಾನ್ಯವಾಗಿ, ಮಣಿಕಟ್ಟಿನ “ರೇಡಿಯಲ್ ಆರ್ಟರಿ” (Radial Artery) ಮೂಲಕ ಇದನ್ನು ಮಾಡಲಾಗುತ್ತದೆ. ಇಲ್ಲಿ ನಾಡಿಮಿಡಿತ ಸ್ಪಷ್ಟವಾಗಿ ತಿಳಿಯುವುದರಿಂದ ವೈದ್ಯರಿಗೆ ಇದು ಅನುಕೂಲಕರ. ಅಲ್ಲಿಂದ ಸುಮಾರು ಒಂದು ಮೀಟರ್ ಉದ್ದದ ಕ್ಯಾತಿಟರ್ ಅನ್ನು ಮಣಿಕಟ್ಟು, ಮೊಣಕೈ ಮತ್ತು ಭುಜದ ಮೂಲಕ ಸಾಗಿಸಿ ಹೃದಯಕ್ಕೆ ತಲುಪಿಸಲಾಗುತ್ತದೆ.
ಬ್ಲಾಕ್ಗಳ ಪರಿಶೀಲನೆ: ಕ್ಯಾತಿಟರ್ ಹೃದಯವನ್ನು ತಲುಪಿದ ನಂತರ, ದ್ರವವನ್ನು ಬಿಟ್ಟು ಎಕ್ಸ್-ರೇ ಯಂತ್ರದ ಮೂಲಕ ಹೃದಯದ ಎಡ ಮತ್ತು ಬಲ ರಕ್ತನಾಳಗಳನ್ನು ವಿವಿಧ ಕೋನಗಳಿಂದ (ಮೇಲೆ, ಕೆಳಗೆ, ಎಡ, ಬಲ) ಪರಿಶೀಲಿಸಲಾಗುತ್ತದೆ. ಇದರಿಂದ ರಕ್ತನಾಳದ ಯಾವುದೇ ಭಾಗದಲ್ಲಿ ಅಡೆತಡೆಗಳಿದ್ದರೂ ಸ್ಪಷ್ಟವಾಗಿ ಕಾಣಿಸುತ್ತದೆ.
ಬ್ಲಾಕ್ಗಳನ್ನು ಹೇಗೆ ಗುರುತಿಸುತ್ತಾರೆ ?
ಪರೀಕ್ಷೆಯ ನಂತರ ವೀಡಿಯೊಗಳನ್ನು ವಿಶ್ಲೇಷಿಸಲಾಗುತ್ತದೆ. ಹೃದಯದ ಎಡಭಾಗದಲ್ಲಿರುವ ಮುಖ್ಯ ಧಮನಿಯನ್ನು “ಲೆಫ್ಟ್ ಮೇನ್” ಎನ್ನಲಾಗುತ್ತದೆ. ಇದು ಹೃದಯಕ್ಕೆ ಸುಮಾರು ಶೇ. 60-65 ರಷ್ಟು ರಕ್ತವನ್ನು ಪೂರೈಸುವುದರಿಂದ ಅತ್ಯಂತ ಪ್ರಮುಖವಾದುದು.
- ಸಾಮಾನ್ಯ ರಕ್ತನಾಳವು ಒಂದೇ ಸಮನಾದ ಗಾತ್ರದಲ್ಲಿರುತ್ತದೆ.
- ಬ್ಲಾಕ್ ಇದ್ದಾಗ ಅಥವಾ ಹೃದಯಾಘಾತ ಸಂಭವಿಸಿದಾಗ ರಕ್ತನಾಳವು ಸಿರಿದಾಗಿ (Snarrow) ಕಾಣಿಸುತ್ತದೆ.
- ಕೆಲವೊಮ್ಮೆ ರಕ್ತ ಹೆಪ್ಪುಗಟ್ಟಿದ ಭಾಗವು ಬಿಳಿಯಾಗಿ ಕಾಣಿಸಬಹುದು. ರಕ್ತನಾಳ ಸಂಪೂರ್ಣವಾಗಿ ಮುಚ್ಚಿಹೋಗಿದ್ದರೆ ಅದನ್ನು ‘ಮೇಜರ್ ಹಾರ್ಟ್ ಎಟಾಕ್’ ಎಂದು ಪರಿಗಣಿಸಲಾಗುತ್ತದೆ.
ಹೃದಯದ ಆರೋಗ್ಯದ ಮಹತ್ವ
ಹೃದಯವು ಮಗು ತಾಯಿಯ ಗರ್ಭದಲ್ಲಿರುವ 28ನೇ ದಿನದಿಂದಲೇ ಬಡಿಯಲು ಆರಂಭಿಸುತ್ತದೆ ಮತ್ತು ಮನುಷ್ಯನ ಕೊನೆಯ ಕ್ಷಣದವರೆಗೂ ವಿಶ್ರಾಂತಿ ಇಲ್ಲದೆ ಕೆಲಸ ಮಾಡುತ್ತದೆ. ಅದು ಸರಿಯಾಗಿ ಕೆಲಸ ಮಾಡಲು ರಕ್ತ ಪೂರೈಸುವ ರಕ್ತನಾಳಗಳು ಅಡೆತಡೆ ಇಲ್ಲದೆ ಇರಬೇಕು. ಆಂಜಿಯೋಗ್ರಾಮ್ ಮೂಲಕ ಬ್ಲಾಕ್ಗಳಿಲ್ಲ ಎಂದು ತಿಳಿದುಬಂದರೆ, ಆ ವ್ಯಕ್ತಿಗೆ ಹೃದಯಾಘಾತದ ಅಪಾಯ ಕಡಿಮೆ ಇರುತ್ತದೆ ಎಂದು ಹೇಳಬಹುದು.
