ನೀವು ಕಟ್ಟುವ ಹೋಮ್ ಲೋನ್ ಇಎಂಐನಲ್ಲಿ ಲಕ್ಷಾಂತರ ರೂಪಾಯಿ ಉಳಿಸಲು ಸಾಧ್ಯವಿದೆ ಎಂಬುದು ನಿಮಗೆ ತಿಳಿದಿದೆಯೇ? ಕೇವಲ ಒಂದು ಹೆಚ್ಚುವರಿ ಕಂತು ಪಾವತಿಸುವ ಮೂಲಕ ಅಥವಾ ಪ್ರತಿ ವರ್ಷ ಇಎಂಐ ಮೊತ್ತವನ್ನು ಸ್ವಲ್ಪವೇ ಹೆಚ್ಚಿಸುವ ಮೂಲಕ ನೀವು 20 ವರ್ಷಗಳ ಸಾಲದ ಹೊಣೆಯನ್ನು ಕೇವಲ 12 ವರ್ಷಗಳಲ್ಲೇ ಇಳಿಸಬಹುದು. ಬ್ಯಾಂಕುಗಳು ನಿಮಗೆ ಹೇಳದ ಈ ಸೀಕ್ರೆಟ್ ಹಣಕಾಸು ಸೂತ್ರದ ಪೂರ್ಣ ವಿವರ ಇಲ್ಲಿದೆ.
ಹೌದು. ಸ್ವಂತ ಮನೆ ಎಂಬುದು ಪ್ರತಿಯೊಬ್ಬರ ಕನಸು. ಆದರೆ ಆ ಮನೆಗಾಗಿ ಪಡೆದ ಸಾಲವನ್ನು (Home Loan) ತೀರಿಸುವುದು ಅಷ್ಟೇ ದೊಡ್ಡ ಸವಾಲು. ಅನೇಕರು ಕೇವಲ ಪ್ರತಿ ತಿಂಗಳ ಇಎಂಐ (EMI) ಕಟ್ಟುತ್ತಾ ಸುಮ್ಮನಾಗುತ್ತಾರೆ. ಆದರೆ ನೀವು ಸ್ವಲ್ಪ ಜಾಣ್ಮೆ ಪ್ರದರ್ಶಿಸಿದರೆ 20 ವರ್ಷಗಳ ಸಾಲದ ಅವಧಿಯನ್ನು ಕೇವಲ 12 ವರ್ಷಕ್ಕೆ ಇಳಿಸಬಹುದು ಮತ್ತು ಸುಮಾರು 30 ಲಕ್ಷ ರೂಪಾಯಿವರೆಗೆ ಬಡ್ಡಿಯನ್ನು ಉಳಿಸಬಹುದು! ಅದು ಹೇಗೆ? ಇಲ್ಲಿದೆ ನೋಡಿ ಸಿಂಪಲ್ ಟಿಪ್ಸ್.
ವರ್ಷಕ್ಕೆ ಒಂದು ಹೆಚ್ಚುವರಿ ಕಂತು (Extra EMI)
ಸಾಮಾನ್ಯವಾಗಿ ನಾವು ವರ್ಷಕ್ಕೆ 12 ಕಂತುಗಳನ್ನು ಪಾವತಿಸುತ್ತೇವೆ. ಆದರೆ ವರ್ಷಕ್ಕೆ ಕೇವಲ ಒಂದು ಹೆಚ್ಚುವರಿ ಕಂತನ್ನು (ಅಂದರೆ ಒಟ್ಟು 13 ಕಂತು) ಪಾವತಿಸಿ ನೋಡಿ. ಈ ಒಂದು ಹೆಚ್ಚುವರಿ ಪಾವತಿಯು ನೇರವಾಗಿ ನಿಮ್ಮ ಅಸಲು (Principal) ಮೊತ್ತದಿಂದ ಕಳೆಯಲ್ಪಡುತ್ತದೆ. ಹೀಗೆ ಮಾಡುವುದರಿಂದ 20 ವರ್ಷದ ಸಾಲವನ್ನು ಕೇವಲ 15 ವರ್ಷಗಳಲ್ಲೇ ಮುಗಿಸಬಹುದು.
ಪ್ರತಿ ವರ್ಷ ಶೇ. 5 ರಷ್ಟು ಇಎಂಐ ಹೆಚ್ಚಿಸಿ
ನಿಮ್ಮ ವೃತ್ತಿಜೀವನ ಬೆಳೆದಂತೆ ಸಂಬಳವೂ ಹೆಚ್ಚಾಗುತ್ತದೆ. ಅದೇ ರೀತಿ ನಿಮ್ಮ ಹೋಮ್ ಲೋನ್ ಇಎಂಐ ಅನ್ನು ಪ್ರತಿ ವರ್ಷ ಕೇವಲ ಶೇ. 5 ರಷ್ಟು ಹೆಚ್ಚಿಸುತ್ತಾ ಹೋಗಿ.
• ಉದಾಹರಣೆಗೆ: ನೀವು 50 ಲಕ್ಷ ರೂ. ಸಾಲವನ್ನು ಶೇ. 9 ರ ಬಡ್ಡಿದರದಲ್ಲಿ 20 ವರ್ಷಕ್ಕೆ ಪಡೆದಿದ್ದೀರಿ ಎಂದು ಭಾವಿಸೋಣ. ಪ್ರತಿ ವರ್ಷ ನಿಮ್ಮ ಇಎಂಐ ಮೊತ್ತವನ್ನು ಕೇವಲ ಶೇ. 5 ರಷ್ಟು ಹೆಚ್ಚಿಸಿದರೆ, ಆ ಸಾಲವು ಕೇವಲ 12 ವರ್ಷಗಳಲ್ಲೇ ತೀರಿಹೋಗುತ್ತದೆ! ಇದರಿಂದ ನೀವು ಬ್ಯಾಂಕಿಗೆ ಕಟ್ಟಬೇಕಿದ್ದ ಸುಮಾರು 30 ಲಕ್ಷ ರೂ. ಬಡ್ಡಿಯನ್ನು ಉಳಿಸಬಹುದು.
ಬ್ಯಾಂಕುಗಳ ಗುಟ್ಟು ಏನು?:
ನೀವು ಎಷ್ಟು ಹೆಚ್ಚು ಕಾಲ ಸಾಲವನ್ನು ಇಟ್ಟುಕೊಳ್ಳುತ್ತೀರೋ ಬ್ಯಾಂಕುಗಳಿಗೆ ಅಷ್ಟು ಹೆಚ್ಚು ಲಾಭ. ಸಾಲದ ಆರಂಭಿಕ ವರ್ಷಗಳಲ್ಲಿ ನೀವು ಕಟ್ಟುವ ಇಎಂಐನಲ್ಲಿ ಹೆಚ್ಚಿನ ಭಾಗ ಬಡ್ಡಿಗೇ ಹೋಗುತ್ತದೆ, ಅಸಲು ಮೊತ್ತ ತುಂಬಾ ನಿಧಾನವಾಗಿ ಕಡಿಮೆಯಾಗುತ್ತದೆ. ಆದ್ದರಿಂದ ಮೇಲೆ ಹೇಳಿದ ‘ಪ್ರೀ-ಪೇಮೆಂಟ್’ ವಿಧಾನಗಳನ್ನು ಅನುಸರಿಸುವುದರಿಂದ ಬಡ್ಡಿಯ ಭಾರ ಗಣನೀಯವಾಗಿ ತಗ್ಗುತ್ತದೆ.
