ಖ್ಯಾತ ಯೂಟ್ಯೂಬರ್ ಹಾಗೂ ಬಿಗ್ ಬಾಸ್ 17 ಖ್ಯಾತಿಯ ಅನುರಾಗ್ ಡೋಬಾಲ್ ಭೀಕರ ಕಾರು ಅಪಘಾತದ ನಂತರ ಚೇತರಿಸಿಕೊಳ್ಳುತ್ತಿದ್ದು, ಸೋಶಿಯಲ್ ಮೀಡಿಯಾದಲ್ಲಿ ತಮ್ಮ ಗಾಯದ ಗುರುತುಗಳನ್ನು ಹಂಚಿಕೊಳ್ಳುವ ಮೂಲಕ ಅಭಿಮಾನಿಗಳ ಗಮನ ಸೆಳೆದಿದ್ದಾರೆ. ಈ ಹಿಂದೆ ಆತ್ಮಹತ್ಯೆಗೆ ಯತ್ನಿಸಿ ಅನಾಹುತ ಮಾಡಿಕೊಂಡಿದ್ದ ಅನುರಾಗ್, ಈಗ ಸಾವಿನ ದವಡೆಯಿಂದ ಮರಳಿ ಬಂದಿದ್ದು, ಹೊಸ ಜೀವನದ ಆರಂಭದ ಬಗ್ಗೆ ಸುಳಿವು ನೀಡಿದ್ದಾರೆ.
ಘಟನೆಯ ಹಿನ್ನೆಲೆ ಮತ್ತು ಕೌಟುಂಬಿಕ ಕಲಹ ಮಾರ್ಚ್ ಮೊದಲ ವಾರದಲ್ಲಿ ಅನುರಾಗ್ ಡೋಬಾಲ್ ಒಂದು ವಿಡಿಯೋ ಹಂಚಿಕೊಂಡು, ತಮ್ಮ ಅಂತರಧರ್ಮೀಯ ವಿವಾಹದ ವಿಚಾರವಾಗಿ ಪೋಷಕರು ಮತ್ತು ಸಹೋದರ ಮಾನಸಿಕ ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿದ್ದರು. ಪತ್ನಿ ರಿತಿಕಾ ಅವರನ್ನು ಮನೆಗೆ ಸೇರಿಸಿಕೊಳ್ಳುತ್ತಿಲ್ಲ ಎಂದು ಅವರು ದೂರಿದ್ದರು. ಆದರೆ, ಅವರ ಸಹೋದರ ಕಲಾಂ ಈ ಆರೋಪಗಳನ್ನು ಅಲ್ಲಗಳೆದು, ಅನುರಾಗ್ ಕೇವಲ ವೀಕ್ಷಣೆಗಾಗಿ (views) ಈ ರೀತಿ ಮಾಡುತ್ತಿದ್ದಾರೆ ಎಂದು ಕಿಡಿಕಾರಿದ್ದರು.
ಲೈವ್‌ನಲ್ಲೇ ಕಾರು ಅಪಘಾತ ಈ ಕೌಟುಂಬಿಕ ಕಲಹದ ಬೆನ್ನಲ್ಲೇ ಮಾರ್ಚ್ 7 ರಂದು ಅನುರಾಗ್ ಇನ್‌ಸ್ಟಾಗ್ರಾಮ್ ಲೈವ್ ಮಾಡುತ್ತಾ ದೆಹಲಿ-ಮೀರಟ್ ಎಕ್ಸ್‌ಪ್ರೆಸ್‌ವೇನಲ್ಲಿ ಗಂಟೆಗೆ 140-150 ಕಿ.ಮೀ ವೇಗದಲ್ಲಿ ಫಾರ್ಚೂನರ್ ಕಾರು ಚಲಾಯಿಸಿದ್ದರು. “ನನಗೆ ಫೋನ್ ಮಾಡಲು ಯಾರೂ ಉಳಿದಿಲ್ಲ, ಇದು ನನ್ನ ಕೊನೆಯ ಪಯಣ” ಎನ್ನುತ್ತಲೇ ಕಾರನ್ನು ಅಪಘಾತಕ್ಕೀಡು ಮಾಡಿದ್ದರು. ತಕ್ಷಣವೇ ಅವರನ್ನು ಐಸಿಯುಗೆ ದಾಖಲಿಸಲಾಗಿತ್ತು.
ಗಾಯದ ಗುರುತು ಮತ್ತು ಅಭಿಮಾನಿಗಳ ಸಲಹೆ ಗುರುವಾರ ಇನ್‌ಸ್ಟಾಗ್ರಾಮ್‌ನಲ್ಲಿ ಫೋಟೋ ಹಂಚಿಕೊಂಡಿರುವ ಅನುರಾಗ್, ತಮ್ಮ ಸೊಂಟದ ಭಾಗಕ್ಕಾದ ಗಾಯ ಮತ್ತು ಹೊಲಿಗೆಯ ಗುರುತುಗಳನ್ನು ತೋರಿಸಿದ್ದಾರೆ. “ನಾನು ಬದುಕಿ ಬರುತ್ತೇನೆ ಎಂದು ಅಂದುಕೊಂಡಿರಲಿಲ್ಲ, ಇದು ಒಂದು ಪವಾಡ” ಎಂದು ಅವರು ಬರೆದುಕೊಂಡಿದ್ದಾರೆ. ಇದರೊಂದಿಗೆ “ನನ್ನ ಹೊಸ ಜೀವನದ ಆರಂಭವನ್ನು ನೋಡುತ್ತೀರಾ?” ಎಂಬ ಪೋಲ್ (Poll) ಒಂದನ್ನು ಸೃಷ್ಟಿಸಿ, ತಾವು ಮತ್ತೆ ಯೂಟ್ಯೂಬ್ ವ್ಲಾಗ್‌ಗಳನ್ನು ಮಾಡಬೇಕೇ ಎಂದು ಅಭಿಮಾನಿಗಳ ಸಲಹೆ ಕೇಳಿದ್ದಾರೆ.
ಸದ್ಯ ಆಸ್ಪತ್ರೆಯಿಂದ ಬಿಡುಗಡೆಯಾಗಿ ಮನೆಯಲ್ಲಿ ವಿಶ್ರಾಂತಿ ಪಡೆಯುತ್ತಿರುವ ಅನುರಾಗ್, ದೇವರು ತನಗೊಂದು ಹೊಸ ಜನ್ಮ ನೀಡಿದ್ದಾನೆ, ಮುಂದೆ ಏನೋ ಒಳ್ಳೆಯದನ್ನು ಯೋಚಿಸಿರುತ್ತಾನೆ ಎಂಬ ಭರವಸೆಯ ಮಾತುಗಳನ್ನಾಡಿದ್ದಾರೆ.
