ವಯಸ್ಸಾದ ಮೇಲೆ ಮರೆಗುಳಿತನ ಬರುವುದು ಸಾಮಾನ್ಯ, ಆದರೆ ಇತ್ತೀಚಿನ ದಿನಗಳಲ್ಲಿ 30 ವರ್ಷದ ಆಸುಪಾಸಿನ ಯುವಜನತೆಯಲ್ಲೂ ಸಣ್ಣಪುಟ್ಟ ವಿಷಯಗಳನ್ನು ಮರೆಯುವ ಮತ್ತು ಆಲೋಚನಾ ಸಾಮರ್ಥ್ಯ ಕುಂಠಿತಗೊಳ್ಳುವ ಲಕ್ಷಣಗಳು ಕಂಡುಬರುತ್ತಿವೆ. ಇದನ್ನು ವೈದ್ಯಕೀಯ ಲೋಕದಲ್ಲಿ ‘ಬ್ರೈನ್ ಫಾಗ್’ (Brain Fog) ಎಂದು ಕರೆಯಲಾಗುತ್ತಿದ್ದು, ಇದು ಮೆದುಳಿನ ಆಯಾಸದ ಸಂಕೇತವಾಗಿದೆ.
ಅತಿಯಾದ ಕೆಲಸದ ಒತ್ತಡ, ಸರಿಯಾದ ನಿದ್ರೆಯಿಲ್ಲದಿರುವುದು ಮತ್ತು ಸ್ಮಾರ್ಟ್ಫೋನ್ಗಳ ಅತಿಯಾದ ಬಳಕೆಯಿಂದಾಗಿ ಮೆದುಳು ತನ್ನ ಸ್ಪಷ್ಟತೆಯನ್ನು ಕಳೆದುಕೊಳ್ಳುತ್ತಿದೆ. ಅಕಸ್ಮಾತ್ ನಿಮಗೂ ಕೆಲಸದಲ್ಲಿ ಏಕಾಗ್ರತೆ ಸಿಗದಿದ್ದರೆ ಅಥವಾ ಸಾಮಾನ್ಯ ಪದಗಳು ನೆನಪಿಗೆ ಬರದಿದ್ದರೆ, ಅದು ಕೇವಲ ಆಯಾಸವಲ್ಲ, ಮೆದುಳು ವಿಶ್ರಾಂತಿ ಕೇಳುತ್ತಿರುವ ಎಚ್ಚರಿಕೆಯ ಗಂಟೆಯಾಗಿರಬಹುದು!
ಸಾಮಾನ್ಯವಾಗಿ ವಯಸ್ಸಾದ ಮೇಲೆ ವಿಷಯಗಳನ್ನು ಮರೆಯುವುದು ಸಹಜ. ಆದರೆ ಇತ್ತೀಚಿನ ದಿನಗಳಲ್ಲಿ 30 ವರ್ಷದ ಆಸುಪಾಸಿನ ಯುವಜನತೆಯಲ್ಲೂ ಸಣ್ಣಪುಟ್ಟ ವಿಷಯಗಳನ್ನು ಮರೆಯುವುದು ಮತ್ತು ಆಲೋಚನಾ ಶಕ್ತಿ ಮಂದಗತಿಯಲ್ಲಿರುವುದು ಕಂಡುಬರುತ್ತಿದೆ. ವೈದ್ಯಕೀಯ ಲೋಕದಲ್ಲಿ ಇದನ್ನು ‘ಬ್ರೈನ್ ಫಾಗ್’ ಎಂದು ಕರೆಯಲಾಗುತ್ತದೆ.
‘ಬ್ರೈನ್ ಫಾಗ್’ ಎಂದರೇನು?
ವೈದ್ಯರ ಪ್ರಕಾರ, ಬ್ರೈನ್ ಫಾಗ್ ಎಂಬುದು ಡಿಮೆನ್ಶಿಯಾದಂತಹ ದೊಡ್ಡ ಕಾಯಿಲೆಯಲ್ಲ. ಆದರೆ ಇದು ಮಾನಸಿಕ ಆಯಾಸ ಮತ್ತು ಏಕಾಗ್ರತೆಯ ಕೊರತೆಯನ್ನು ಸೂಚಿಸುತ್ತದೆ.
ಪ್ರಮುಖ ಲಕ್ಷಣಗಳು:
- ಮಾನಸಿಕ ಆಯಾಸ ಮತ್ತು ಆಲೋಚನೆಗಳಲ್ಲಿ ಸ್ಪಷ್ಟತೆ ಇಲ್ಲದಿರುವುದು.
- ಕೆಲಸ ಅಥವಾ ಸಭೆಗಳಲ್ಲಿ ಏಕಾಗ್ರತೆ ವಹಿಸಲು ಸಾಧ್ಯವಾಗದಿರುವುದು.
- ಮಾತನಾಡುವಾಗ ಸಾಮಾನ್ಯ ಪದಗಳೂ ನೆನಪಿಗೆ ಬಾರದಿರುವುದು.
- ಮೊದಲು ಸುಲಭವಾಗಿ ಮಾಡುತ್ತಿದ್ದ ಕೆಲಸಗಳು ಈಗ ಕಷ್ಟವೆನಿಸುವುದು.
ಈ ಸಮಸ್ಯೆ ಏಕೆ ಬರುತ್ತದೆ?
ನಿರಂತರ ಮಾನಸಿಕ ಒತ್ತಡ (Stress), ನಿದ್ರೆಯ ಕೊರತೆ, ಪೌಷ್ಟಿಕಾಂಶದ ಕೊರತೆ ಮತ್ತು ಅತಿಯಾದ ಮೊಬೈಲ್ ಅಥವಾ ಕಂಪ್ಯೂಟರ್ ಬಳಕೆ ಇದರ ಪ್ರಮುಖ ಕಾರಣಗಳಾಗಿವೆ. ಇದು ಮೆದುಳು ಕೆಲಸ ಮಾಡುವುದನ್ನು ನಿಲ್ಲಿಸಿದೆ ಎಂದರ್ಥವಲ್ಲ, ಬದಲಿಗೆ ಮೆದುಳಿಗೆ ವಿಶ್ರಾಂತಿಯ ಅಗತ್ಯವಿದೆ ಎಂಬುದರ ಸಂಕೇತವಾಗಿದೆ.
ಪರಿಹಾರ ಮತ್ತು ಮುನ್ನೆಚ್ಚರಿಕೆ ಕ್ರಮಗಳು:
ಕೆಲವೊಮ್ಮೆ ವಿಟಮಿನ್ B12, ವಿಟಮಿನ್ D3 ಮತ್ತು ಕಬ್ಬಿಣಾಂಶದ (Iron) ಕೊರತೆಯಿಂದಲೂ ಈ ಸಮಸ್ಯೆ ಉಂಟಾಗಬಹುದು. ಇದನ್ನು ತಡೆಗಟ್ಟಲು ಈ ಕೆಳಗಿನ ಬದಲಾವಣೆಗಳನ್ನು ಮಾಡಿಕೊಳ್ಳಿ:
- ನಿದ್ರೆ: ದಿನಕ್ಕೆ ಕನಿಷ್ಠ 7 ರಿಂದ 8 ಗಂಟೆಗಳ ಕಾಲ ಉತ್ತಮ ನಿದ್ರೆ ಮಾಡಿ.
- ವ್ಯಾಯಾಮ: ಪ್ರತಿದಿನ 30 ನಿಮಿಷಗಳ ಕಾಲ ದೈಹಿಕ ವ್ಯಾಯಾಮ ಅಗತ್ಯ.
- ಪೌಷ್ಟಿಕ ಆಹಾರ: ಸಮತೋಲಿತ ಆಹಾರ ಸೇವಿಸಿ ಮತ್ತು ಸಾಕಷ್ಟು ನೀರು ಕುಡಿಯಿರಿ.
- ಸ್ಕ್ರೀನ್ ಟೈಮ್: ಮೊಬೈಲ್ ಮತ್ತು ಲ್ಯಾಪ್ಟಾಪ್ ಬಳಕೆಯನ್ನು ಮಿತಿಗೊಳಿಸಿ.
