ಭಾರತೀಯ ಕ್ರಿಕೆಟ್ ತಂಡದ ಸ್ಟಾರ್ ಸ್ಪಿನ್ನರ್ ಕುಲ್ದೀಪ್ ಯಾದವ್ ಅವರು ತಮ್ಮ ಬಾಲ್ಯದ ಗೆಳತಿ ವಂಶಿಕಾ ಅವರೊಂದಿಗೆ ವೈವಾಹಿಕ ಜೀವನಕ್ಕೆ ಕಾಲಿರಿಸಲು ಸಜ್ಜಾಗಿದ್ದಾರೆ. ಹೌದು. ಐಸಿಸಿ ಟಿ20 ಪುರುಷರ ವಿಶ್ವಕಪ್ ಗೆಲುವಿನ ಸಂಭ್ರಮದಲ್ಲಿರುವ ಟೀಮ್ ಇಂಡಿಯಾದ ಸ್ಟಾರ್ ಸ್ಪಿನ್ನರ್ ಕುಲ್ ದೀಪ್ ಯಾದವ್, ಈಗ ವೈಯಕ್ತಿಕ ಜೀವನದ ಹೊಸ ಇನ್ನಿಂಗ್ಸ್ ಆರಂಭಿಸಲು ಸಜ್ಜಾಗಿದ್ದಾರೆ. ಅವರು ತಮ್ಮ ಬಾಲ್ಯದ ಗೆಳತಿ ವಂಶಿಕಾ ಅವರೊಂದಿಗೆ ಮಾರ್ಚ್14 ರಂದು ಮಸ್ಸೂರಿಯ ಗುಡ್ಡಗಾಡು ಪ್ರದೇಶದಲ್ಲಿ ವಿವಾಹವಾಗಲಿದ್ದಾರೆ.
ಉತ್ತರಾಖಂಡದ ಸುಂದರ ಗಿರಿಧಾಮವಾದ ಮಸ್ಸೂರಿಯಲ್ಲಿ ಮದುವೆ ಸಮಾರಂಭ ನಡೆಯಲಿದೆ. ಕುಟುಂಬ ಸದಸ್ಯರು ಮತ್ತು ಆಪ್ತರು ಮಾತ್ರ ಈ ಸಮಾರಂಭದಲ್ಲಿ ಭಾಗವಹಿಸಲಿದ್ದಾರೆ. ಮಾರ್ಚ್ 17 ರಂದು ಉತ್ತರ ಪ್ರದೇಶದ ಲಕ್ನೋದಲ್ಲಿ ಅದ್ಧೂರಿ ಆರತಕ್ಷತೆ ಕಾರ್ಯಕ್ರಮ ಆಯೋಜಿಸಲಾಗಿದೆ. ಲಕ್ನೋದ ಆರತಕ್ಷತೆಯಲ್ಲಿ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್, ಬಿಸಿಸಿಐ ಅಧಿಕಾರಿಗಳು, ಟೀಮ್ ಇಂಡಿಯಾ ಆಟಗಾರರು ಹಾಗೂ ರಾಜಕೀಯ ಗಣ್ಯರು ಭಾಗವಹಿಸುವ ನಿರೀಕ್ಷೆಯಿದೆ.
ವಾಸ್ತವವಾಗಿ ಕುಲ್ದೀಪ್ ಅವರ ಮದುವೆಯು ಕಳೆದ ವರ್ಷ ನವೆಂಬರ್ನಲ್ಲೇ ನಡೆಯಬೇಕಿತ್ತು. ಆದರೆ ಭಾರತ ತಂಡದ ಸತತ ಕ್ರಿಕೆಟ್ ಸರಣಿಗಳು ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯಗಳ ಕಾರಣದಿಂದಾಗಿ ಮದುವೆಯನ್ನು ಮಾರ್ಚ್ಗೆ ಮುಂದೂಡಲಾಗಿತ್ತು. ಇತ್ತೀಚೆಗಷ್ಟೇ ಟಿ20 ವಿಶ್ವಕಪ್ ಗೆದ್ದ ಸಂಭ್ರಮದಲ್ಲಿರುವ ಕುಲ್ದೀಪ್, ಈಗ ಜೀವನದ ಎರಡನೇ ಇನ್ನಿಂಗ್ಸ್ ಆರಂಭಿಸುತ್ತಿರುವುದು ಅವರ ಅಭಿಮಾನಿಗಳಲ್ಲಿ ಸಂತಸ ತಂದಿದೆ.
ವಿವಾಹದ ಕಾರ್ಯಕ್ರಮಗಳ ವಿವರ
ಪ್ರಮುಖ ದಿನಾಂಕಗಳು: ಮಾರ್ಚ್ 12: ಮಸ್ಸೂರಿಗೆ ಪ್ರಯಾಣ.
ಮಾರ್ಚ್ 13: ಹಳದಿ ಶಾಸ್ತ್ರ ಮತ್ತು ಮದುವೆಯ ಪೂರ್ವ ವಿಧಿವಿಧಾನಗಳು.
ಮಾರ್ಚ್ 14: ವಿವಾಹ ಮಹೋತ್ಸವ.
ಮಾರ್ಚ್ 17: ಲಕ್ನೋದ ‘ದಿ ಸೆಂಟ್ರಮ್’ (The Centrum) ಹೋಟೆಲ್ನಲ್ಲಿ ಅದ್ಧೂರಿ ಆರತಕ್ಷತೆ.
ಕೋಚ್ ಕಪಿಲ್ ಪಾಂಡೆ ಹೇಳಿಕೆ
ಕುಲ್ದೀಪ್ ಅವರ ಬಾಲ್ಯದ ತರಬೇತುದಾರ ಕಪಿಲ್ ಪಾಂಡೆ ಈ ಸುದ್ದಿಯನ್ನು ಖಚಿತಪಡಿಸಿದ್ದಾರೆ. “ವಿಶ್ವಕಪ್ ಗೆಲುವಿನ ನಂತರ ಮದುವೆ ನಡೆಯುತ್ತಿರುವುದು ‘ಬಂಗಾರಕ್ಕೆ ಸುಗಂಧ ಬೀರಿದಂತೆ’ (Sone pe suhaga). ನವೆಂಬರ್ನಲ್ಲಿ ನಡೆಯಬೇಕಿದ್ದ ಮದುವೆಯು ಕ್ರಿಕೆಟ್ ವೇಳಾಪಟ್ಟಿಯಿಂದಾಗಿ ಮುಂದೂಡಲ್ಪಟ್ಟಿತ್ತು, ಈಗ ಸರಿಯಾದ ಸಮಯಕ್ಕೆ ನಡೆಯುತ್ತಿದೆ,” ಎಂದು ಅವರು ತಿಳಿಸಿದ್ದಾರೆ.
ವಂಶಿಕಾ ಬಗ್ಗೆ ಮಾಹಿತಿ
ವಂಶಿಕಾ ಮತ್ತು ಕುಲ್ದೀಪ್ ಬಾಲ್ಯದಿಂದಲೂ ಪರಿಚಿತರು. ಕುಲ್ದೀಪ್ ಅವರ ಅಂಡರ್-19 ದಿನಗಳ ನಂತರ ಇವರ ಸ್ನೇಹ ಗಟ್ಟಿಯಾಯಿತು.ವಂಶಿಕಾ ಉನ್ನತ ವ್ಯಾಸಂಗಕ್ಕಾಗಿ ಆಸ್ಟ್ರೇಲಿಯಾದ ಮೆಲ್ಬೋರ್ನ್ನಲ್ಲಿದ್ದರು.ಅವರ ತಂದೆ ಯೋಗೇಂದ್ರ ಸಿಂಗ್ ಎಲ್ಐಸಿ (LIC) ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಎರಡೂ ಕುಟುಂಬಗಳು ಕಾನ್ಪುರ ಮೂಲದವರಾಗಿದ್ದಾರೆ.
ಗಣ್ಯರ ಉಪಸ್ಥಿತಿ
ಮದುವೆ ಮತ್ತು ಆರತಕ್ಷತೆಯಲ್ಲಿ ಬಿಸಿಸಿಐ (BCCI) ಅಧಿಕಾರಿಗಳು, ರಾಜಕಾರಣಿಗಳು, ಬಾಲಿವುಡ್ ತಾರೆಯರು ಮತ್ತು ಟೀಮ್ ಇಂಡಿಯಾದ ಸಹ ಆಟಗಾರರು ಭಾಗವಹಿಸುವ ನಿರೀಕ್ಷೆಯಿದೆ. ಈಗಾಗಲೇ ಹೋಟೆಲ್ನಲ್ಲಿ 35ಕ್ಕೂ ಹೆಚ್ಚು ರೂಮ್ಗಳನ್ನು ಕಾಯ್ದಿರಿಸಲಾಗಿದ್ದು, ಈ ಸಂಖ್ಯೆ ಹೆಚ್ಚಾಗುವ ಸಾಧ್ಯತೆಯಿದೆ.
