ಬೆಂಗಳೂರು: ಸಾಮಾಜಿಕ ಜಾಲತಾಣಗಳಲ್ಲಿ ಒಮ್ಮೆ ಕಣ್ಣಾಡಿಸಿದರೆ ಸಾಕು, ಈ ಹುಡುಗನ ಮುಗ್ಧ ನಗುವಿನ ವಿಡಿಯೋ ಅಥವಾ ಮೀಮ್ ಕಣ್ಣಿಗೆ ಬಿದ್ದೇ ಇರುತ್ತದೆ. ಚಹ ಕುಡಿಯುತ್ತಾ ಆತ ನಗುವ ಆ 15 ಸೆಕೆಂಡಿನ ದೃಶ್ಯ ಕೋಟ್ಯಂತರ ಜನರ ಮೊಗದಲ್ಲಿ ನಗು ಮೂಡಿಸಿತ್ತು. ಆದರೆ, ಆ ನಗುವಿನ ಹಿಂದೆ ಅದೆಂತಹ ಬಡತನದ ನೋವಿತ್ತು ಎಂಬುದು ಯಾರಿಗೂ ತಿಳಿದಿರಲಿಲ್ಲ. ಇಂದು ಅದೇ ಹುಡುಗ ಅರುಣ್ ಕುಮಾರ್ ಕೇವಲ ನಗುವಿನಿಂದಲ್ಲ, ಬದಲಾಗಿ ತನ್ನ ಸಾಧನೆಯಿಂದ ಸುದ್ದಿಯಲ್ಲಿದ್ದಾನೆ.
ಬಡತನದಿಂದಾಗಿ ನಾಲ್ಕನೇ ತರಗತಿಗೆ ಶಾಲೆ ಬಿಟ್ಟಿದ್ದ ಬಾಲಕ ಕೇವಲ 10 ವರ್ಷದವನಿದ್ದಾಗಲೇ ಅರುಣ್ ಕುಮಾರ್ ಬಡತನದ ಕಾರಣಕ್ಕೆ ಓದು ನಿಲ್ಲಿಸಬೇಕಾಯಿತು. ಮನೆಯ ಪರಿಸ್ಥಿತಿ ಹದಗೆಟ್ಟಿದ್ದರಿಂದ ನಾಲ್ಕನೇ ತರಗತಿಯಲ್ಲೇ ಶಾಲೆಗೆ ವಿದಾಯ ಹೇಳಿ ಹೊಟ್ಟೆಪಾಡಿಗಾಗಿ ಕೆಲಸಕ್ಕೆ ಸೇರಿದ್ದ. ಲಾರಿ ಕ್ಲೀನರ್ ಆಗಿ ಕೆಲಸ ಮಾಡುತ್ತಿದ್ದ ಈ ಬಾಲಕನ ಬದುಕು ರಸ್ತೆಯ ಪಾಲಾಗಿತ್ತು. ಇಡೀ ಜಗತ್ತಿಗೆ ತನ್ನ ನಗುವಿನ ಮೂಲಕ ಪರಿಚಯವಾದ ಈತನಿಗೆ, ತನ್ನ ಬಗ್ಗೆ ಜನರು ಇಂಟರ್ನೆಟ್ನಲ್ಲಿ ಬರೆಯುತ್ತಿದ್ದ ಮೆಚ್ಚುಗೆಯ ಮಾತುಗಳನ್ನು ಓದಲು ಕೂಡ ಬರುತ್ತಿರಲಿಲ್ಲ ಎನ್ನುವುದೇ ದೊಡ್ಡ ವ್ಯಂಗ್ಯವಾಗಿತ್ತು.
ಲಾರಿ ಚಾಲಕನ ಮನ ಬದಲಿಸಿದ ಆ ಒಂದು ವಿಡಿಯೋ ಅರುಣ್ ಕುಮಾರ್ ಕೆಲಸ ಮಾಡುತ್ತಿದ್ದ ಲಾರಿಯ ಚಾಲಕ ನೆಹರು ಎಂಬುವವರು ಒಮ್ಮೆ ತಮಾಷೆಗಾಗಿ ಈತನ ನಗುವಿನ ವಿಡಿಯೋ ಮಾಡಿ ಹಂಚಿಕೊಂಡಿದ್ದರು. ಅದು ನೋಡನೋಡುತ್ತಿದ್ದಂತೆ ಜಗತ್ತಿನಾದ್ಯಂತ ವೈರಲ್ ಆಯಿತು. ಈ ಜನಪ್ರಿಯತೆಯನ್ನು ಕಂಡ ನೆಹರು ಅವರಿಗೆ ಒಂದು ವಿಷಯ ಗಾಢವಾಗಿ ತಟ್ಟಿತು. ಕೋಟ್ಯಂತರ ಜನರ ಪ್ರೀತಿ ಗಳಿಸುತ್ತಿರುವ ಈ ಹುಡುಗ ಅಕ್ಷರ ಕಲಿಯದೆ ಜೀವನವಿಡೀ ಕ್ಲೀನರ್ ಆಗಿಯೇ ಇರಬಾರದು ಎಂದು ನಿರ್ಧರಿಸಿದರು. ತಾವೂ ಕೂಡ ಬಡತನದಿಂದಾಗಿ ಕಾಲೇಜು ಶಿಕ್ಷಣ ಅರ್ಧಕ್ಕೆ ನಿಲ್ಲಿಸಿದ್ದ ನೆಹರು, ಅರುಣ್ ಬದುಕನ್ನು ಬದಲಿಸಲು ಮುಂದಾದರು.
ಲಾರಿಯೇ ಆಯಿತು ಪಾಠಶಾಲೆ ಲಾರಿ ಚಾಲಕ ನೆಹರು ಕೇವಲ ಯಜಮಾನನಾಗಷ್ಟೇ ಇರದೆ ಅರುಣ್ ಪಾಲಿಗೆ ಗುರುವಾದರು. ಲಾರಿಯಲ್ಲೇ ಪುಸ್ತಕಗಳನ್ನು ತಂದಿಟ್ಟುಕೊಂಡು ಓಡಾಟದ ನಡುವೆ ಸಿಗುವ ಬಿಡುವಿನ ವೇಳೆಯಲ್ಲಿ ಅರುಣ್ಗೆ ಅಕ್ಷರ ಕಲಿಸಲು ಶುರು ಮಾಡಿದರು. ಲಾರಿ ಪ್ರಯಾಣದ ನಡುವಿನ ಟೀ ಬ್ರೇಕ್ಗಳು ಪಾಠದ ಸಮಯಗಳಾದವು. ದಣಿವರಿಯದ ಶ್ರಮದ ಫಲವಾಗಿ ಅರುಣ್ ಈ ವರ್ಷ ಎಸ್ಎಸ್ಎಲ್ಸಿ ಪರೀಕ್ಷೆಯನ್ನು ಖಾಸಗಿ ಅಭ್ಯರ್ಥಿಯಾಗಿ ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾನೆ.
ಕೇವಲ 15 ಸೆಕೆಂಡಿನ ನಗುವಿನ ಮೂಲಕ ಇಂಟರ್ನೆಟ್ನಲ್ಲಿ ಮಿಂಚಿದ್ದ ಹುಡುಗ, ಇಂದು ಶಿಕ್ಷಣ ಪಡೆಯುವ ಮೂಲಕ ತನ್ನ ಬದುಕಿನ ಹೊಸ ಅಧ್ಯಾಯ ಆರಂಭಿಸಿದ್ದಾನೆ. ಲಾರಿ ಚಾಲಕ ನೆಹರು ಅವರ ಸಕಾಲಿಕ ಸಹಾಯ ಮತ್ತು ಅರುಣ್ ಕುಮಾರ್ ಅವರ ಛಲ ಈಗ ಅನೇಕರಿಗೆ ಸ್ಫೂರ್ತಿಯಾಗಿದೆ.
