ಆರೋಗ್ಯಕರ ಆಹಾರ ಸೇವನೆ ಎಂದರೆ ಗಂಟೆಗಟ್ಟಲೆ ಅಡುಗೆ ಮನೆಯಲ್ಲಿ ಕಳೆಯಬೇಕು ಎಂಬ ಕಾಲ ಈಗ ದೂರವಾಗಿದೆ. ಜಗತ್ಪ್ರಸಿದ್ಧ ಮಿಚೆಲಿನ್ ಸ್ಟಾರ್ ಶೆಫ್ ವಿಕಾಸ್ ಖನ್ನಾ ಅವರು ಇತ್ತೀಚೆಗೆ ಪರಿಚಯಿಸಿದ ‘1-ನಿಮಿಷದ ಹೈ-ಪ್ರೋಟೀನ್’ ಗ್ರೇವಿ ರೆಸಿಪಿ ಈಗ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ಯಾವುದೇ ಮಸಾಲೆಗಳ ಅಬ್ಬರವಿಲ್ಲದೆ, ಅತೀ ಕಡಿಮೆ ಪದಾರ್ಥಗಳನ್ನು ಬಳಸಿ ಪೌಷ್ಟಿಕಯುಕ್ತ ರುಚಿಕರ ಊಟ ಸಿದ್ಧಪಡಿಸುವುದು ಹೇಗೆ ಎಂಬ ಗುಟ್ಟನ್ನು ಅವರು ಬಿಟ್ಟುಕೊಟ್ಟಿದ್ದಾರೆ.
ಸಾಮಾನ್ಯವಾಗಿ ಭಾರತೀಯ ಶೈಲಿಯ ಗ್ರೇವಿ ತಯಾರಿಸಲು ಈರುಳ್ಳಿ, ಟೊಮೆಟೊಗಳನ್ನು ದೀರ್ಘಕಾಲ ಹುರಿಯಬೇಕಾಗುತ್ತದೆ. ಆದರೆ ವಿಕಾಸ್ ಖನ್ನಾ ಅವರ ಈ ರೆಸಿಪಿಯಲ್ಲಿ ಮೊಸರನ್ನು ಮುಖ್ಯ ಆಧಾರವಾಗಿ ಬಳಸಲಾಗಿದ್ದು, ಇದು ಪ್ರೋಟೀನ್ ಜೊತೆಗೆ ದೇಹಕ್ಕೆ ಅಗತ್ಯವಾದ ಪ್ರೊಬಯಾಟಿಕ್ ಅಂಶಗಳನ್ನು ಒದಗಿಸುತ್ತದೆ. ಕೇವಲ ಐದು ಪ್ರಮುಖ ಪದಾರ್ಥಗಳಿದ್ದರೆ ಸಾಕು, ಹೋಟೆಲ್ ಶೈಲಿಯ ರಿಚ್ ಗ್ರೇವಿ ನಿಮ್ಮ ಮನೆಯಲ್ಲೇ ಸಿದ್ಧವಾಗುತ್ತದೆ.
ಬೇಕಾಗುವ ಪದಾರ್ಥಗಳು: ಈ ಗ್ರೇವಿ ತಯಾರಿಸಲು 170 ಗ್ರಾಂ ಗ್ರೀಕ್ ಯೋಗರ್ಟ್ (ಗಟ್ಟಿ ಮೊಸರು), ಸ್ವಲ್ಪ ಅರಿಶಿನ, ಒಂದು ಚಮಚ ಎಣ್ಣೆ, ಒಂದು ನಿಂಬೆ ಹಣ್ಣು ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಸಕ್ಕರೆ ಬೇಕಾಗುತ್ತದೆ. ಅರಿಶಿನವು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿದರೆ, ಮೊಸರು ದೇಹಕ್ಕೆ ಬೇಕಾದ ಪ್ರೋಟೀನ್ ನೀಡುತ್ತದೆ.
ತಯಾರಿಸುವ ವಿಧಾನ: ಮೊದಲು ಒಂದು ಸಣ್ಣ ಪಾತ್ರೆಯಲ್ಲಿ ಎಣ್ಣೆಯನ್ನು ಬಿಸಿ ಮಾಡಿ ಅದಕ್ಕೆ ಅರಿಶಿನ ಸೇರಿಸಿ ಕೇವಲ 10 ಸೆಕೆಂಡ್ ಹುರಿಯಿರಿ. ನಂತರ ಉರಿಯನ್ನು ಆರಿಸಿ ಎಣ್ಣೆಯನ್ನು ಸ್ವಲ್ಪ ತಣ್ಣಗಾಗಲು ಬಿಡಿ. ಎಣ್ಣೆ ಅತಿಯಾಗಿ ಬಿಸಿಯಾಗಿದ್ದಾಗ ಮೊಸರು ಸೇರಿಸಿದರೆ ಅದು ಒಡೆಯುವ ಸಾಧ್ಯತೆ ಇರುತ್ತದೆ. ಎಣ್ಣೆ ಉಗುರು ಬೆಚ್ಚಗಾದಾಗ ಗಟ್ಟಿ ಮೊಸರನ್ನು ಸೇರಿಸಿ ಚೆನ್ನಾಗಿ ಕಲಸಿ. ನಂತರ ಇದಕ್ಕೆ ನಿಂಬೆ ರಸ, ಉಪ್ಪು ಮತ್ತು ಸ್ವಲ್ಪ ಸಕ್ಕರೆ ಸೇರಿಸಿ. ಸಕ್ಕರೆಯು ನಿಂಬೆ ಮತ್ತು ಮೊಸರಿನ ಅತಿಯಾದ ಹುಳಿಯನ್ನು ಸಮತೋಲನಗೊಳಿಸಲು ಸಹಾಯ ಮಾಡುತ್ತದೆ.
ಗ್ರೇವಿ ಸಿದ್ಧವಾದ ನಂತರ ಅದಕ್ಕೆ ಮೊದಲೇ ಬೇಯಿಸಿಟ್ಟುಕೊಂಡ ಪನೀರ್, ಟೋಫು, ಚಿಕನ್ ಅಥವಾ ತರಕಾರಿಗಳನ್ನು ಸೇರಿಸಬಹುದು. ನೆನಪಿರಲಿ, ಮೊಸರು ಸೇರಿಸಿದ ಮೇಲೆ ಗ್ರೇವಿಯನ್ನು ಮತ್ತೆ ಕುದಿಸಬಾರದು. ಪಾತ್ರೆಯ ಬಿಸಿಯೇ ಆಹಾರವನ್ನು ಬಿಸಿ ಮಾಡಲು ಸಾಕಾಗುತ್ತದೆ. ಅತಿಯಾಗಿ ಕುದಿಸುವುದರಿಂದ ಮೊಸರಿನಲ್ಲಿರುವ ಒಳ್ಳೆಯ ಬ್ಯಾಕ್ಟೀರಿಯಾಗಳು ನಾಶವಾಗುತ್ತವೆ. ಕೆಲಸದ ಒತ್ತಡದಲ್ಲಿರುವವರಿಗೆ ಮತ್ತು ಜಿಮ್ಗೆ ಹೋಗುವವರಿಗೆ ಈ 1-ನಿಮಿಷದ ಗ್ರೇವಿ ರೆಸಿಪಿ 2026ರ ಅತ್ಯುತ್ತಮ ಕಿಚನ್ ಹ್ಯಾಕ್ ಎನಿಸಿಕೊಳ್ಳುವುದರಲ್ಲಿ ಸಂಶಯವಿಲ್ಲ.
