ನಮ್ಮ ಬದಲಾದ ಜೀವನಶೈಲಿ ಮತ್ತು ಆಹಾರ ಪದ್ಧತಿಯಿಂದಾಗಿ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಇತ್ತೀಚಿನ ವರದಿಗಳ ಪ್ರಕಾರ, ‘ಸೈಲೆಂಟ್ ಮಯೋಕಾರ್ಡಿಯಲ್ ಇನ್ಫಾರ್ಕ್ಷನ್’ (Silent Myocardial Infarction) ಅಥವಾ ಸದ್ದಿಲ್ಲದ ಹೃದಯಾಘಾತದಿಂದ ಸಾವನ್ನಪ್ಪುವವರ ಸಂಖ್ಯೆ ಏರಿಕೆಯಾಗುತ್ತಿದೆ. ಹೃದಯದ ಸ್ನಾಯುಗಳಿಗೆ ರಕ್ತದ ಹರಿವು ಸ್ಥಗಿತಗೊಂಡಾಗ ಇದು ಸಂಭವಿಸುತ್ತದೆ, ಆದರೆ ಯಾವುದೇ ಪ್ರಮುಖ ಲಕ್ಷಣಗಳು ಕಾಣಿಸಿಕೊಳ್ಳದಿರುವುದು ಇದರ ವಿಶೇಷತೆ.
ಹಾಗಿದ್ದರೆ, ಈ ಸೈಲೆಂಟ್ ಹಾರ್ಟ್ ಅಟ್ಯಾಕ್‌ನ ಮುನ್ನೆಚ್ಚರಿಕಾ ಲಕ್ಷಣಗಳು ಯಾವುವು? ಇಲ್ಲಿದೆ ಕಂಪ್ಲೀಟ್ ಡಿಟೇಲ್ಸ್.
ದವಡೆ ನೋವು (Jaw Pain)
ದವಡೆಯಲ್ಲಿ ಕಾಣಿಸಿಕೊಳ್ಳುವ ನೋವನ್ನು ಅನೇಕರು ಹಲ್ಲು ನೋವು ಅಥವಾ ಒತ್ತಡ ಎಂದು ತಪ್ಪಾಗಿ ಭಾವಿಸುತ್ತಾರೆ. ಆದರೆ, ಅಮೇರಿಕನ್ ಹಾರ್ಟ್ ಅಸೋಸಿಯೇಷನ್ ಪ್ರಕಾರ, ದವಡೆ ನೋವು ಹೃದಯಾಘಾತದ ಪ್ರಮುಖ ಲಕ್ಷಣವಾಗಿದೆ, ವಿಶೇಷವಾಗಿ ಮಹಿಳೆಯರಲ್ಲಿ. ಮುಖದ ಎಡಭಾಗದಲ್ಲಿ ಈ ರೀತಿಯ ಅಸ್ವಸ್ಥತೆ ಹೆಚ್ಚಾಗಿ ಕಂಡುಬರುತ್ತದೆ.
ವಿಪರೀತ ಸುಸ್ತು ಮತ್ತು ಆಯಾಸ (Unusual Fatigue)
ಯಾವುದೇ ಕೆಲಸ ಮಾಡದಿದ್ದರೂ ಅತಿಯಾದ ಸುಸ್ತು ಅಥವಾ ಆಯಾಸವಾಗುತ್ತಿದ್ದರೆ ಅದು ಹೃದಯಾಘಾತದ ಮುನ್ಸೂಚನೆಯಾಗಿರಬಹುದು. ಮಹಿಳೆಯರು ಹೆಚ್ಚಾಗಿ ಇದನ್ನು ಕೆಲಸದ ಒತ್ತಡ ಅಥವಾ ನಿದ್ರೆಯ ಕೊರತೆ ಎಂದು ನಿರ್ಲಕ್ಷಿಸುತ್ತಾರೆ. ಆದರೆ ಹಾರ್ವರ್ಡ್ ಹೆಲ್ತ್ ಪ್ರಕಾರ, ಹಠಾತ್ ಕಾಣಿಸಿಕೊಳ್ಳುವ ಅಸಾಮಾನ್ಯ ಆಯಾಸವು ಹೃದಯದ ಸಮಸ್ಯೆಯ ಸಂಕೇತವಾಗಿದೆ.
ಉಸಿರಾಟದ ತೊಂದರೆ (Shortness of Breath)
ಮೆಟ್ಟಿಲು ಹತ್ತುವಾಗ ಉಸಿರುಕಟ್ಟುವಿಕೆ ಸಾಮಾನ್ಯ. ಆದರೆ, ನೀವು ವಿಶ್ರಾಂತಿ ಪಡೆಯುತ್ತಿರುವಾಗಲೂ ಉಸಿರಾಡಲು ಕಷ್ಟವಾಗುತ್ತಿದ್ದರೆ ಅಥವಾ ಗಾಳಿಗಾಗಿ ತಡಬಡಾಯಿಸುತ್ತಿದ್ದರೆ ಎಚ್ಚೆತ್ತುಕೊಳ್ಳಿ. ಇದನ್ನು ಕೇವಲ ಆತಂಕ ಅಥವಾ ಸ್ಟ್ರೆಸ್ ಎಂದು ತಳ್ಳಿಹಾಕಬೇಡಿ.
ಎದೆನೋವು ಇಲ್ಲದೆಯೇ ಬೆವರುವಿಕೆ (Cold Sweats)
ಯಾವುದೇ ದೈಹಿಕ ಶ್ರಮವಿಲ್ಲದೆ ದಿಢೀರನೆ ಮೈ ಬೆವರುತ್ತಿದ್ದರೆ, ಅದರಲ್ಲೂ ತಣ್ಣನೆಯ ಬೆವರಿನೊಂದಿಗೆ ವಾಕರಿಕೆ ಅಥವಾ ತಲೆಸುತ್ತು ಕಾಣಿಸಿಕೊಂಡರೆ ಅದು ನಿಮ್ಮ ಹೃದಯ ಅಪಾಯದಲ್ಲಿದೆ ಎಂಬುದರ ಸ್ಪಷ್ಟ ಸಂಕೇತ.
ಪದೇ ಪದೇ ತಲೆಸುತ್ತು (Frequent Dizziness)
ಹೃದಯಕ್ಕೆ ಸರಿಯಾಗಿ ರಕ್ತ ಸಂಚಾರವಾಗದಿದ್ದಾಗ ತಲೆ ಹಗುರವಾದಂತೆ ಅನಿಸುವುದು ಅಥವಾ ತಲೆಸುತ್ತು ಬರುವುದು ಸಾಮಾನ್ಯ. ನೀವು ಆಗಾಗ್ಗೆ ಇಂತಹ ಸ್ಥಿತಿಯನ್ನು ಅನುಭವಿಸುತ್ತಿದ್ದರೆ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
ಅಪಾಯಕಾರಿ ಅಂಶಗಳು ಯಾರಲ್ಲಿ ಹೆಚ್ಚು?
ಸಾಮಾನ್ಯ ಹೃದಯಾಘಾತದಂತೆ ಇಲ್ಲೂ ಕೂಡ ಈ ಕೆಳಗಿನ ಅಂಶಗಳು ಕಾರಣವಾಗುತ್ತವೆ:
ಕುಟುಂಬದಲ್ಲಿ ಹೃದಯ ಕಾಯಿಲೆಯ ಇತಿಹಾಸ.
ಧೂಮಪಾನ ಮತ್ತು ಅಧಿಕ ಕೊಲೆಸ್ಟ್ರಾಲ್.
ಅಧಿಕ ರಕ್ತದೊತ್ತಡ (BP) ಮತ್ತು ಮಧುಮೇಹ.
ವ್ಯಾಯಾಮದ ಕೊರತೆ ಮತ್ತು ಅತಿಯಾದ ದೈಹಿಕ ತೂಕ.
