ಪೊಲೀಸ್ ವರ್ಗಾವಣೆಯಲ್ಲಿ ಮಹತ್ವದ ಬದಲಾವಣೆ?, ಬರಲಿದೆ ಆನ್‌ಲೈನ್ ಕೌನ್ಸಿಲಿಂಗ್

ಕರ್ನಾಟಕದ ಪೊಲೀಸರ ವರ್ಗಾವಣೆ ವಿಚಾರದಲ್ಲಿ ಹಲವು ಆರೋಪ ಕೇಳಿ ಬರುತ್ತದೆ. ಆದ್ದರಿಂದ ಆನ್‌ಲೈನ್ ಕೌನ್ಸಿಲಿಂಗ್ ಮೂಲಕ ವರ್ಗಾವಣೆ ಮಾಡಬೇಕು ಎಂದು ಮಂಡ್ಯ ಜಿಲ್ಲೆಯ ಲೋಕಾಯುಕ್ತ ಪೊಲೀಸ್ ಇನ್ಸ್‌ಪೆಕ್ಟರ್ ಬ್ಯಾಟರಾಯಗೌಡ ಬಿ.ಪಿ. ಪತ್ರವನ್ನು ಬರೆದಿದ್ದಾರೆ.

ಮಾನ್ಯ ಅಧ್ಯಕ್ಷರು ಹಾಗೂ ಡಿಜಿ ಮತ್ತು ಐಜಿಪಿ, ಪೊಲೀಸ್ ಎಸ್ಟಾಬ್ಲಿಷ್‌ಮೆಂಟ್ ಬೋರ್ಡ್ ಕರ್ನಾಟಕ ಇವರಿಗೆ ಬರೆದಿರುವ ಪತ್ರ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಈ ಪತ್ರವು ಡಿಜಿಟಲ್ ವಿಧಾನದಲ್ಲಿ ಕೌನ್ಸಿಲಿಂಗ್ ಮುಖಾಂತರ ವರ್ಗಾವಣೆ ಮಾಡಲು ಕೋರಿ ಮನವಿ ಎಂಬ ವಿಷಯವನ್ನು ಒಳಗೊಂಡಿದೆ.

ಪತ್ರದ ವಿವರಗಳು: ಮೇಲಿನ ವಿಷಯಕ್ಕೆ ಸಂಬಂದಿಸಿದಂತೆ ತಮ್ಮಲ್ಲಿ ಮನವಿ ಮಾಡಿಕೊಳ್ಳುವುದೇನೆಂದರೆ, ಪೊಲೀಸ್ ಇಲಾಖೆಯಲ್ಲಿನ ಪೊಲೀಸ್ ಉಪ ಅಧೀಕ್ಷಕರ ಹುದ್ದೆಯಿಂದ ಪೊಲೀಸ್ ಕಾನ್ಸ್‌ಟೇಬಲ್ ಹುದ್ದೆಯವರೆಗೆ ವರ್ಗಾವಣೆಗಳನ್ನು ಅತ್ಯಂತ ಪಾರದರ್ಶಕವಾಗಿ ಮತ್ತು ರಾಜಕೀಯ ಹಸ್ತಕ್ಷೇಪವಿಲ್ಲದೆ ಮಾಡಲು ಗೌರವಾನ್ವಿತ ಸರ್ವೋಚ್ಚ ನ್ಯಾಯಾಲಯವು ಪ್ರಕರಣ ಸಂಖ್ಯೆ: (2006)8ಎಸ್‌ಸಿಸಿ 1 ಪ್ರಕಾಶ್ ಸಿಂಗ್ ಮತ್ತು ಇತರರು ವಿರುದ್ಧ ಕೇಂದ್ರ ಸರ್ಕಾರ ಮತ್ತು ಇತರರು ಪ್ರಕರಣದಲ್ಲಿ ಪೊಲೀಸ್‌ ಸ್ಥಾಪನಾ ಮಂಡಳಿಯ ಮೂಲಕ ವರ್ಗಾವಣೆ ಮಾಡಲು ಸೂಚಿಸಿದ್ದರ ಮೇರೆಗೆ ಕರ್ನಾಟಕ ಪೊಲೀಸ್ ಕಾಯ್ದೆ ಕಲಂ:20ಬಿ ದಂತೆ ಕರ್ನಾಟಕದಲ್ಲಿ ಪೊಲೀಸ್ ಸ್ಥಾಪನಾ ಮಂಡಳಿಯನ್ನು ರಚಿಸಿ ವರ್ಗಾವಣೆಯನ್ನು ಮಾಡಲಾಗುತ್ತಿರುವುದು ಸರಿಯಷ್ಟೆ.

ಆದರೆ ಪೊಲೀಸ್ ವರ್ಗಾವಣೆಯು ಪಾರದರ್ಶಕವಾಗಿ, ರಾಜಕೀಯ ಹಸ್ತಕ್ಷೇಪವಿಲ್ಲದೆ ನಡೆಯುತ್ತಿಲ್ಲವೆಂಬುದು ಹಾಗೂ ಡಿಎಸ್‌ಪಿ, ಪಿಐ, ಪಿಎಸ್‌ಐ ದರ್ಜೆಯ ದರ್ಜೆಯ ಪೊಲೀಸ್ ಅಧಿಕಾರಿಗಳು ಆಯಕಟ್ಟಿನ ಸ್ಥಳಗಳಿಗೆ ವರ್ಗಾವಣೆ ಹೊಂದಲು ಲಕ್ಷಾಂತರ, ಕೋಟ್ಯಾಂತರ ರೂಪಾಯಿಗಳನ್ನು ಲಂಚವಾಗಿ ನೀಡಿ ಪೋಸ್ಟಿಂಗ್ ತೆಗೆದುಕೊಂಡು ಬಂದು ಪೊಸ್ಟಿಂಗ್‌ಗಳಿಗೆ ಖರ್ಚು ಮಾಡಿದ ಹಣ ಸಂಪಾದನೆ ಮಾಡುವ ಸಲುವಾಗಿ ಅಕ್ರಮ ಚಟುವಟಿಕೆಗಳನ್ನು ಮಾಡುತ್ತಿರುತ್ತಾರೆ ಹಾಗೂ ಸಾರ್ವಜನಿಕರಿಂದ ಹಣ ಸುಲಿಗೆ ಮಾಡುತ್ತಿದ್ದಾರೆಂದು ಸಾರ್ವಜನಿಕರು, ರಾಜಕೀಯ ಪ್ರತಿನಿದಿಗಳು ಸಾರ್ವಜನಿಕವಾಗಿ ಹಾಗೂ ಗೌರವಾನ್ವಿತ ವಿಧಾನಸಭೆ ಮತ್ತು ವಿಧಾನ ಪರಿಷತ್‌ನಲ್ಲಿ ನೇರವಾಗಿ ಭ್ರಷ್ಟಾಚಾರದ ಆರೋಪಗಳನ್ನು ಮಾಡಿರುತ್ತಾರೆ.

ಈ ಆರೋಪಗಳಿಗೆ ಪೂರಕವೆಂಬಂತೆ ಇತ್ತಿಚಿನ ದಿನಗಳಲ್ಲಿ ಹಲವಾರು ಕೆಟ್ಟ ಘಟನಾವಳಿಗಳನ್ನು ದಿನಪತ್ರಿಕೆಗಳು, ದೃಶ್ಯಮಾದ್ಯಗಳು ಹಾಗೂ ಸಾಮಾಜಿಕ ಮಾಧ್ಯಮಗಳಲ್ಲಿ ವೈಭವೀಕರಿಸಿ ಪೊಲೀಸ್ ಇಲಾಖೆಯ ಘನತೆಗೆ ಕುಂದುಂಟಾಗುವಂತೆ, ಇಲಾಖೆಯಲ್ಲಿ ಪ್ರಾಮಾಣಿಕವಾಗಿ ಕರ್ತವ್ಯ ನಿರ್ವಹಿಸುವ ಅಧಿಕಾರಿಗಳ ಘನತೆಗೆ ದಕ್ಕೆ ಬರುವಂತೆ, ಸಮಾಜದ ದೃಷ್ಟಿಯಲ್ಲಿ ಇಲಾಖೆಯ ಬಗ್ಗೆ ಕೀಳರಿಮೆ ಬರುವಂತೆ ಪ್ರಸಾರಮಾಡುತ್ತಿರುತ್ತಾರೆ. ಈ ಘಟನೆಗಳು ನಿಷ್ಟವಂತ ಪೊಲೀಸ್‌ ಅಧಿಕಾರಿಗಳ ಆತ್ಮಸ್ಥೆರ್ಯವನ್ನು ಕುಗ್ಗಿಸುತ್ತಿದೆ.

ಇದೇ ರೀತಿ ಭ್ರಷ್ಟಾಚಾರದ ಆರೋಪಗಳನ್ನು ಅಬಕಾರಿ ಇಲಾಖೆಯ ಬಗ್ಗೆ ಸಾರ್ವಜನಿಕರು ಹಾಗೂ ಜನಪ್ರತಿನಿದಿಗಳು ಮಾಡಿದಾಗ ಸರ್ಕಾರವು ದಿ: 14/05/2025 ರಂದು ಸರ್ಕಾರಿ ಅದೇಶ ಸಂಖ್ಯೆ:ಆಇ 10 ಪಿಇಎಸ್ 2024 ರಲ್ಲಿ ಇಲಾಖೆಯಲ್ಲಿನ ಎಲ್ಲಾ ಗ್ರೂಪ್-ಎಬಿ.ಸಿ ಹುದ್ದೆಗಳ ವರ್ಗಾವಣೆಯನ್ನು ಡಿಜಿಟಲ್ ವಿದಾನದಲ್ಲಿ ಕೌನ್ಸಿಲಿಂಗ್ ಮೂಲಕ ವರ್ಗಾವಣೆ ಮಾಡಲು ಅಧಿಸೂಚನೆ ಹೊರಡಿಸಿ ವರ್ಗಾವಣೆಗಳನ್ನು ಮಾಡಲಾಗುತ್ತಿರುತ್ತದೆ.

ಗ್ರಾಮೀಣ ಮತ್ತು ಪಂಚಾಯತ್ ರಾಜ್ ಇಲಾಖೆಯಲ್ಲಿನ ಪಿಡಿಒ ಹುದ್ದೆಗಳನ್ನು ಸಹ ಡಿಜಿಟಲ್ ವಿಧಾನದಲ್ಲಿ ಕೌನ್ಸಿಲಿಂಗ್ ಮೂಲಕ ವರ್ಗಾವಣೆ ಮಾಡಲಾಗುತ್ತಿರುತ್ತದೆ. ಸಾರ್ವಜನಿಕರು, ಜನಪ್ರತಿನಿದಿಗಳು ಹಾಗೂ ಇಲಾಖೆಯ ಅಧಿಕಾರಿಗಳಿಂದ ಪ್ರಸಂಶೆ ವ್ಯಕ್ತವಾಗಿರುತ್ತದೆ.

ಎಲ್ಲಾ ವಿದ್ಯಮಾನಗಳನ್ನು ಅವಲೋಕಿಸಿದಾಗ ಪೊಲೀಸ್‌ ವರ್ಗಾವಣೆಯನ್ನು ಡಿಜಿಟಲ್ ವಿದಾನದಲ್ಲಿ ಕೌನ್ಸಿಲಿಂಗ್ ಮೂಲಕ ಮಾಡಿದರೆ ಪೊಲೀಸ್ ಇಲಾಖೆಯ ಬಗ್ಗೆ ಸಾರ್ವಜನಿಕರು ಹಾಗೂ ಜನಪ್ರತಿನಿದಿಗಳು ಇತ್ತೀಚಿಗೆ ಇಲಾಖೆಯ ಮೇಲೆ ಮಾಡುತ್ತಿರುವ ಭ್ರಷ್ಟಾಚಾರದ ಆರೋಪಗಳಿಂದ ಮುಕ್ತವಾಗಿಡಬಹುದಾಗಿರುತ್ತದೆ.

ಆದ್ದರಿಂದ ಪಾರದರ್ಶಕ ಹಾಗೂ ರಾಜಕೀಯ ಹಸ್ತಕ್ಷೇಪವಿಲ್ಲದೆ ಡಿಜಿಟಲ್ ವಿಧಾನದಲ್ಲಿ ಕೌನ್ಸಿಲಿಂಗ್ ಮೂಲಕ ವರ್ಗಾವಣೆಯನ್ನು ಈ ಕೆಳಕಂಡ ನಿಬಂದನೆಗಳೊಂದಿಗೆ ಮಾಡಲು ಮನವಿ ಮಾಡುತ್ತೇನೆ.

* ಒಂದು ಕಾರ್ಯನಿರ್ವಾಹಕ ಹಾಗೂ ಕಾರ್ಯನಿರ್ವಾಹಕೇತರ ಹುದ್ದೆಯ ಗರಿಷ್ಠ ಅವಧಿ 2 ವರ್ಷಕ್ಕೆ ಸೀಮಿತಗೊಳಿಸುವುದು.

* ಒಬ್ಬ ಅಧಿಕಾರಿ ತನ್ನ ಸೇವಾ ಅವಧಿಯಲ್ಲಿ 1/3 ನೇ ಭಾಗ ಕಡ್ಡಾಯವಾಗಿ ಕಾರ್ಯನಿರ್ವಾಹಕೇತರ ಹುದ್ದೆಗಳಲ್ಲಿ ಸೇವೆ ಸಲ್ಲಿಸಲೇ ಬೇಕೆಂದು ನಿಯಮಿಸುವುದು. ಉದಾರಹಣೆಗೆ ಒಬ್ಬ ಅಧಿಕಾರಿ ಪಿಎಸ್‌ಐಆಗಿ ನಿಯೋಜನೆಗೊಂಡು ಡಿವೈಎಸ್ ಪಿ/ ಎಸ್ ಪಿ(ನಾನ್ ಐಪಿಎಸ್) ಹುದ್ದೆಯವರೆಗೆ ಬಡ್ತಿ ಹೊಂದಿದಲ್ಲಿ ಆತನ ಸೇವಾ ಅವಧಿ 30 ವರ್ಷ ಇದಲ್ಲಿ ಕಡ್ಡಾಯವಾಗಿ 10 ವರ್ಷಗಳು ಕಾರ್ಯ ನಿರ್ವಾಹಕೇತರ ಹುದ್ದೆಗಳಲ್ಲಿ ಸೇವೆ ಸಲ್ಲಿಸುವುದನ್ನು ಕಡ್ಡಾಯ ಮಾಡುವುದು.

* ಸತತ 2 ಕಾರ್ಯನಿರ್ವಾಹಕ ಹುದ್ದೆಯಲ್ಲಿ (ಒಟ್ಟು 4 ವರ್ಷ) ಕಾರ್ಯನಿರ್ವಹಿಸಿದಲ್ಲಿ ಕಡ್ಡಾಯವಾಗಿ ಕನಿಷ್ಟ 2 ವರ್ಷ ಕಾರ್ಯನಿರ್ವಾಹಕೇತರ ಹುದ್ದೆಯಲ್ಲಿ ಕರ್ತವ್ಯ ನಿರ್ವಹಿಸುವುದನ್ನು ಕಡ್ಡಾಯ ಮಾಡುವುದು.

4) ಕಮೀಷನರೇಟ್ ನಲ್ಲಿರುವ ಠಾಣೆಗಳನ್ನು ‘ಎ’ ವರ್ಗದ ಠಾಣೆಗಳೆಂದು, ಜಿಲ್ಲಾ ಕೇಂದ್ರದ ಠಾಣೆಗಳನ್ನು ‘ಬಿ’ ವರ್ಗದ ಠಾಣೆಗಳೆಂದು, ತಾಲೂಕು & ಹೋಬಳಿ ಠಾಣೆಗಳನ್ನು ‘ಸಿ’ವರ್ಗದ ಠಾಣೆಗಳೆಂದು. ಉಳಿದ ಎಲ್ಲಾ ಠಾಣೆಗಳನ್ನು “ಡಿ” ವರ್ಗದ ಠಾಣೆಗಳೆಂದು ವಿಂಗಡಿಸಿ ರೋಟೇಷನ್ ಆಧಾರದ ಮೇಲೆ ವರ್ಗಾವಣೆ ನಡೆಸುವುದು.

* ಬೆಂಗಳೂರು ನಗರ ಮತ್ತು ಇತರೆ ಕಮಿಷನರೇಟ್ ಪೊಲೀಸ್ ಠಾಣೆಗಳಲ್ಲಿ ಗರಿಷ್ಠ 6 ವರ್ಷದ ವರೆಗೆ (ಒಂದು ಹುದ್ದೆಗೆ ಸೀಮಿತವಾಗಿ) ಮಾತ್ರ ಕರ್ತವ್ಯ ನಿರ್ವಹಿಸತಕ್ಕದ್ದು.

* ಒಂದು ಜಿಲ್ಲೆಯಲ್ಲಿ ಗರಿಷ್ಟ 6 ವರ್ಷದ (ಒಂದು ಹುದ್ದೆಗೆ ಸೀಮಿತವಾಗಿ) ವರೆಗೆ ಮಾತ್ರ ಕರ್ತವ್ಯ ನಿರ್ವಹಿಸತಕ್ಕದ್ದು ಎಂಬುದಾಗಿ ನಿಯಮ ಮಾಡುವುದು.

* ಒಂದು ಪೊಲೀಸ್ ಠಾಣೆ ವೃತ್ತ ಉಪವಿಭಾಗಕ್ಕೆ ಒಂದಕ್ಕಿಂತ ಹೆಚ್ಚು ವರ್ಗಾವಣೆ ಕೋರಿಕೆ ಅರ್ಜಿಗಳು ಸಲ್ಲಿಕೆಯಾದಾಗ ಅರ್ಜಿಸಲ್ಲಿಸಿದ ಅಧಿಕಾರಿಗಳಲ್ಲಿ ಸೇವಾಹಿರಿತನವನ್ನು ನಿರ್ದರಿಸಿ, ಆ ಸ್ಥಳಕ್ಕೆ ವರ್ಗಾವಣೆ ಮಾಡುವುದು.

* ಪಿಎಸ್‌ಐ ಹುದ್ದೆಯಿಂದ ಪಿಐ ಹುದ್ದೆಗೆ, ಪಿಐ ಹುದ್ದೆಯಿಂದ ಡಿಎಸ್‌ಪಿ ಹುದ್ದೆಗಳಿಗೆ ಪದೋನ್ನತಿ ಹೊಂದಿದ ನಂತರ ಎರಡು ವರ್ಷಗಳ ಕಾರ್ಯನಿರ್ವಾಹಕೇತರ ಹುದ್ದೆಯಲ್ಲಿ ಕರ್ತನ ನಿರ್ವಹಿಸಿದ ನಂತರ ಕನಿಷ್ಟ 2 ವರ್ಷ ಕಾರ್ಯನಿರ್ವಾಹಕ ಹುದ್ದೆಯನ್ನು ಹೊರ ಜಿಲ್ಲೆಯಲ್ಲಿ ನಿರ್ವಹಿಸಿದ ಪಿಐ/ ಡಿಎಸ್‌ಪಿ ರವರುಗಳಿಗೆ ಬೆಂಗಳೂರು ನಗರ ಹಾಗೂ ಇತರೆ ಕಮೀಷನರೇಟ್ ವ್ಯಾಪ್ತಿಯ ಪೊಲೀಸ್ ಠಾಣೆಗಳಲ್ಲಿ ಕರ್ತವ್ಯ ನಿರ್ವಹಿಸುವಂತೆ ಮಾಡುವುದು.

* ಪದೋನ್ನತಿ ಹೊಂದಿದ ಅಧಿಕಾರಿಗಳು “ಪದೋನ್ನತಿ ನಂತರದ ತರಭೇತಿ” (Post Promotional Course) ಪಡೆದ ನಂತರ ಕಾರ್ಯಕಾರಣಿ ಹುದ್ದೆಯನ್ನು ನೀಡುವುದು. ತರಬೇತಿ ಪಡೆಯದ ಅಧಿಕಾರಿಗಳನ್ನು ಕಡ್ಡಾಯವಾಗಿ ಕಾರ್ಯಕಾರಣಿ ಹುದ್ದೆಗೆ ಪರಿಗಣಿಸಬಾರದು.

* ಯಾವುದೇ ಕರ್ತವ್ಯ ಲೋಪದ ಮೇಲೆ/ ಕ್ರಿಮಿನಲ್ ಪ್ರಕರಣಗಳ ಸಂಬಂದ ಅಮಾನತ್ತುಗೊಂಡಲ್ಲಿ ಆರೋಪಗಳ ವಿಚಾರಣೆ ಮುಗಿಯುವ ವರೆಗೆ ಕಡ್ಡಾಯವಾಗಿ ಕಾರ್ಯನಿರ್ವಾಹಕೇತರ ಹುದ್ದೆಯಲ್ಲಿ ಕರ್ತವ್ಯ ನಿರ್ವಹಿಸುವುದು.

* ವರ್ಗಾವಣೆ ಸಂಬಂದ ಯಾವುದೇ ವ್ಯಕ್ತಿಗಳಿಂದ ಆಮಿಷ ಒತ್ತಡ ಶಿಫಾರಸ್ಸು ಪತ್ರಗಳನ್ನು ನೀಡಿದಲ್ಲಿ ಆ ಸಂಬಂದಿಸಿದ ಅಧಿಕಾರಿಗೆ ಇಲಾಖಾ ಶಿಸ್ತುಕ್ರಮ ಕೈಗೊಳ್ಳಲು ಕೈಗೊಳ್ಳುವುದು.

* ವಿಶೇಷ ಪ್ರಕರಣಗಳಾದ ಗಂಡ-ಹೆಂಡತಿ ಪ್ರಕರಣಗಳಲ್ಲಿಯೂ ಸಹ ಮೇಲಿನ ಕ್ರಮ-1 ರಿಂದ 10 ರವರೆಗೆನ ನಿಬಂಧನೆಗಳಿಗೆ ಅಡ್ಡಿಯಾಗದಂತೆ ವರ್ಗಾವಣೆ ಮಾಡುವುದು.

ಈ ಮೇಲಿನ ನಿಬಂಧನೆಗಳೊಂದಿಗೆ ಡಿಜಿಟಲ್ ವಿಧಾನದಲ್ಲಿ ಕೌನ್ಸಿಲಿಂಗ್ ಮೂಲಕ ವರ್ಗಾವಣೆ ಮಾಡಿದಲ್ಲಿ ಪಾರದರ್ಶಕ, ರಾಜಕೀಯ ಹಸ್ತಕ್ಷೇಪ ರಹಿತ, ಭ್ರಷ್ಟಾಚಾರ ರಹಿತ ವ್ಯವಸ್ಥೆ ಮಾಡಿದಂತೆ ಆಗುತ್ತದೆ. ಈ ಮೂಲಕ ವರ್ಗಾವಣೆ ಮಾಡಲು ಮನವಿ ಮಾಡುತ್ತೇನೆ ಎಂದು ಹೇಳಿದ್ದಾರೆ.