ಗ್ರಾಹಕರೇ ಗಮನಿಸಿ : ‘MRP’ ಗಿಂತ ಹೆಚ್ಚಿನ ಬೆಲೆಗೆ ವಸ್ತು ಮಾರಾಟ ಮಾಡಿದ್ರೆ ಜಸ್ಟ್ ಹೀಗೆ ದೂರು ನೀಡಿ!
ಕೆಲವು ಅಂಗಡಿಗಳಲ್ಲಿ ವಸ್ತುಗಳನ್ನು ಎಂಆರ್‌ಪಿಗಿಂತ ಹೆಚ್ಚಿನ ಬೆಲೆಗೆ ಮಾರಾಟ ಮಾಡಲಾಗುತ್ತದೆ. ಗ್ರಾಹಕರು ಅನಿವಾರ್ಯವಾಗಿ ಹೆಚ್ಚಿನ ಹಣ ನೀಡಿ ವಸ್ತುಗಳನ್ನು ಖರೀದಿಸುತ್ತಾರೆ. ಆದರೆ ಎಂಆರ್‌ಪಿಗಿಂತ ಒಂದು ರೂಪಾಯಿ ಕೂಡ ಹೆಚ್ಚು ಪಡೆಯುವುದು ಕಾನೂನುಬಾಹಿರ ಎಂಬುದು ನಿಮಗೆ ತಿಳಿದಿದೆಯೇ? ನಿಮ್ಮ ಹಕ್ಕುಗಳನ್ನು ತಿಳಿಯಿರಿ ಮತ್ತು ಅಧಿಕ ಬೆಲೆಯ ವಿರುದ್ಧ ಹೋರಾಡಿ.
ನೀವು ರೈಲ್ವೆ ನಿಲ್ದಾಣ, ಬಸ್ ನಿಲ್ದಾಣ ಅಥವಾ ಯಾವುದೋ ಹೋಟೆಲ್‌ಗಳಲ್ಲಿ ವಸ್ತುಗಳನ್ನು ಖರೀದಿಸುವಾಗ ಎಂಆರ್‌ಪಿ (MRP) ಗಿಂತ 5 ಅಥವಾ 10 ರೂಪಾಯಿ ಹೆಚ್ಚಿನ ಹಣ ನೀಡುತ್ತಿದ್ದೀರಾ? ಕೂಲ್ ಡ್ರಿಂಕ್ಸ್ ಅಥವಾ ವಾಟರ್ ಬಾಟಲ್ ಮೇಲೆ ‘ಕೂಲಿಂಗ್ ಚಾರ್ಜಸ್’ ಹೆಸರಲ್ಲಿ ಲೂಟಿ ಮಾಡುತ್ತಿದ್ದಾರೆಯೇ? ಹಾಗಿದ್ದಲ್ಲಿ ಎಚ್ಚರ! ಇದು ಕೇವಲ ನಿಮ್ಮ ಜೇಬಿಗೆ ಕತ್ತರಿ ಬೀಳುವ ವಿಷಯವಲ್ಲ, ಇದು ಶಿಕ್ಷಾರ್ಹ ಅಪರಾಧವೂ ಹೌದು.
ಕಾನೂನು ಏನು ಹೇಳುತ್ತದೆ?
ಲಿಗಲ್ ಮೆಟ್ರೋಲಜಿ ಆಕ್ಟ್ (Legal Metrology Act) ಪ್ರಕಾರ, ಯಾವುದೇ ಅಂಗಡಿಕಾರರು ರೈಲ್ವೆ ನಿಲ್ದಾಣ, ವಿಮಾನ ನಿಲ್ದಾಣ, ಮಾಲ್‌ಗಳು ಅಥವಾ ರಸ್ತೆಬದಿಯ ಅಂಗಡಿಗಳಲ್ಲಿ ವಸ್ತುವಿನ ಮೇಲೆ ನಮೂದಿಸಲಾದ ಗರಿಷ್ಠ ಚಿಲ್ಲರೆ ಮಾರಾಟ ಬೆಲೆ (MRP) ಗಿಂತ ಹೆಚ್ಚಿನ ಹಣವನ್ನು ವಸೂಲಿ ಮಾಡುವಂತಿಲ್ಲ. ಇದು ಶಿಕ್ಷಾರ್ಹ ಅಪರಾಧವಾಗಿದೆ.
ದೂರು ನೀಡುವುದು ಹೇಗೆ?
ಯಾರಾದರೂ ಎಂಆರ್‌ಪಿಗಿಂತ ಹೆಚ್ಚಿನ ಬೆಲೆಗೆ ವಸ್ತುವನ್ನು ಮಾರಾಟ ಮಾಡಲು ಪ್ರಯತ್ನಿಸಿದರೆ, ನೀವು ತಕ್ಷಣ ಈ ಕೆಳಗಿನಂತೆ ದೂರು ನೀಡಬಹುದು:
- ರೈಲ್ವೆ ನಿಲ್ದಾಣಗಳಲ್ಲಿ: ಸಹಾಯವಾಣಿ ಸಂಖ್ಯೆ 139 ಕ್ಕೆ ಕರೆ ಮಾಡಿ ಅಥವಾ ‘ರೈಲ್ ಮದದ್’ (Rail Madad) ಮೊಬೈಲ್ ಆ್ಯಪ್ ಮೂಲಕ ಸುಲಭವಾಗಿ ದೂರು ದಾಖಲಿಸಬಹುದು.
- ಗ್ರಾಹಕ ವೇದಿಕೆ: ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ ಸಂಖ್ಯೆ 1915 ಕ್ಕೆ ಕರೆ ಮಾಡಿ ಅಥವಾ ಗ್ರಾಹಕ ವ್ಯವಹಾರಗಳ ಇಲಾಖೆಯ ಪೋರ್ಟಲ್‌ನಲ್ಲಿ ದೂರು ನೀಡಬಹುದು.
ಶಿಕ್ಷೆ ಮತ್ತು ದಂಡದ ವಿವರ:
ಅಧಿಕ ಬೆಲೆ ವಸೂಲಿ ಮಾಡುವ ಅಂಗಡಿಕಾರರಿಗೆ ಕಠಿಣ ದಂಡ ವಿಧಿಸಲಾಗುತ್ತದೆ:
- ಮೊದಲ ಬಾರಿ: ₹25,000 ದಂಡ.
- ಎರಡನೇ ಬಾರಿ: ₹50,000 ದಂಡ.
- ಮೂರನೇ ಬಾರಿ: ₹1,00,000 ವರೆಗೆ ಭಾರಿ ದಂಡದ ಜೊತೆಗೆ ಒಂದು ವರ್ಷದವರೆಗೆ ಜೈಲು ಶಿಕ್ಷೆಯೂ ಆಗಬಹುದು. ಕೆಲವು ಸಂದರ್ಭಗಳಲ್ಲಿ ದಂಡ ಮತ್ತು ಜೈಲು ಶಿಕ್ಷೆ ಎರಡನ್ನೂ ವಿಧಿಸಲಾಗುತ್ತದೆ.
ಗಮನಿಸಿ: ಪ್ರತಿಯೊಬ್ಬ ಗ್ರಾಹಕರು ತಮ್ಮ ಹಕ್ಕುಗಳನ್ನು ಚಲಾಯಿಸಬೇಕು. ಎಂಆರ್‌ಪಿಗಿಂತ ಹೆಚ್ಚಿನ ಹಣ ಕೇಳಿದರೆ ಧೈರ್ಯವಾಗಿ ಪ್ರಶ್ನಿಸಿ ಮತ್ತು ದೂರು ನೀಡಿ. ಈ ಮೂಲಕ ಅಕ್ರಮ ವ್ಯಾಪಾರವನ್ನು ತಡೆಗಟ್ಟಿ ನ್ಯಾಯಯುತ ಮಾರುಕಟ್ಟೆ ನಿರ್ಮಿಸಲು ಸಹಕರಿಸಿ.
