ಬೆಂಗಳೂರು : ಬಹುನಿರೀಕ್ಷಿತ ಹಾಗೂ ಬಿಡುಗಡೆಗೂ ಮುನ್ನವೇ ವಿವಾದದ ಕಿಚ್ಚು ಹಚ್ಚಿರುವ ‘ದಿ ಕೇರಳ ಸ್ಟೋರಿ 2: ಗೋಸ್ ಬಿಯಾಂಡ್’ ಚಿತ್ರಕ್ಕೆ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (CBFC) ಭಾರಿ ಕತ್ತರಿ ಹಾಕಿದೆ.
ಹೌದು, ‘ದಿ ಕೇರಳ ಸ್ಟೋರಿ 2: ಗೋಸ್ ಬಿಯಾಂಡ್’ ಚಿತ್ರಕ್ಕೆ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (CBFC) ಕೆಲವು ಪ್ರಮುಖ ಬದಲಾವಣೆಗಳೊಂದಿಗೆ ‘U/A 16+’ ಪ್ರಮಾಣಪತ್ರ ನೀಡಿದೆ. ಚಿತ್ರದ ಬಿಡುಗಡೆಗೆ ತಡೆ ಕೋರಿ ನ್ಯಾಯಾಲಯದಲ್ಲಿ ಅರ್ಜಿಗಳು ಸಲ್ಲಿಕೆಯಾಗುತ್ತಿರುವ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ.
ಸೆನ್ಸಾರ್ ಮಂಡಳಿಯ ಪ್ರಮುಖ ಸೂಚನೆಗಳು:
ದೃಶ್ಯಗಳಿಗೆ ಕತ್ತರಿ: ಸುಮಾರು 16 ಬದಲಾವಣೆಗಳನ್ನು ಸೂಚಿಸಿರುವ ಮಂಡಳಿಯು, ಲೈಂಗಿಕ ದೌರ್ಜನ್ಯ ಮತ್ತು ಅತಿ ಆಪ್ತ ದೃಶ್ಯಗಳನ್ನು 50% ರಷ್ಟು ಕಡಿತಗೊಳಿಸಲು ಆದೇಶಿಸಿದೆ.
ಏಳು ಸೆಕೆಂಡ್ಗಳ ಕಾಲವಿದ್ದ ಚುಂಬನದ (Lip-lock) ದೃಶ್ಯವನ್ನು ಟ್ರಿಮ್ ಮಾಡಲಾಗಿದೆ.ಅತ್ಯಾಚಾರದ ದೃಶ್ಯಗಳನ್ನು 20 ಸೆಕೆಂಡ್ಗಳಷ್ಟು ಕಡಿತಗೊಳಿಸಲಾಗಿದೆ.ಮಹಿಳೆಯ ಮೇಲೆ ಹಲ್ಲೆ ಮಾಡುವ ಮತ್ತು ತಲೆಗೆ ಹೊಡೆಯುವ ದೃಶ್ಯಗಳಲ್ಲಿ ತಲಾ ಎರಡು ಸೆಕೆಂಡ್ ಕಡಿತಗೊಳಿಸಲಾಗಿದೆ.
ಬುಲ್ಡೋಜರ್ ದೃಶ್ಯ: ಆರೋಪಿಯೊಬ್ಬನ ಮನೆಯನ್ನು ಬುಲ್ಡೋಜರ್ ಮೂಲಕ ನೆಲಸಮ ಮಾಡುವ ದೃಶ್ಯದಲ್ಲಿ ಬದಲಾವಣೆ ಮಾಡಲು ಸೂಚಿಸಲಾಗಿದೆ.ಸಂವಾದಗಳು: ಚಿತ್ರದ ಮೂರು ಸಂಭಾಷಣೆಗಳನ್ನು ಬದಲಿಸಲಾಗಿದ್ದು, ಒಂದು ಪದವನ್ನು ‘ಮ್ಯೂಟ್’ ಮಾಡಲಾಗಿದೆ.
ಡಿಸ್ಕ್ಲೈಮರ್ (ಹೇಳಿಕೆ): ಈ ಚಿತ್ರವು ನೈಜ ಘಟನೆಗಳನ್ನು ಆಧರಿಸಿದೆ ಎಂಬ ಡಿಸ್ಕ್ಲೈಮರ್ ಅನ್ನು ಕನಿಷ್ಠ 2 ನಿಮಿಷ 3 ಸೆಕೆಂಡ್ಗಳ ಕಾಲ ಧ್ವನಿ (Voice-over) ಸಮೇತ ಪರದೆಯ ಮೇಲೆ ಪ್ರದರ್ಶಿಸಬೇಕು ಎಂದು ಮಂಡಳಿ ಕಡ್ಡಾಯಗೊಳಿಸಿದೆ.
ದಾಖಲೆಗಳ ಸಲ್ಲಿಕೆ: ಚಿತ್ರದ ಕಥೆಯು ನೈಜ ಘಟನೆಗಳನ್ನು ಆಧರಿಸಿದೆ ಎಂಬುದಕ್ಕೆ ಪೂರಕ ದಾಖಲೆಗಳನ್ನು ಮತ್ತು ಸಂಪೂರ್ಣ ಚಿತ್ರಕಥೆಯನ್ನು ಸಲ್ಲಿಸುವಂತೆ ನಿರ್ಮಾಪಕರಿಗೆ ಸೂಚಿಸಲಾಗಿದೆ.
ಚಿತ್ರದ ಅವಧಿ ಮತ್ತು ಬಿಡುಗಡೆ: ಎಲ್ಲಾ ಬದಲಾವಣೆಗಳ ನಂತರ ಚಿತ್ರದ ಒಟ್ಟು ಅವಧಿ 2 ಗಂಟೆ 11 ನಿಮಿಷ 24 ಸೆಕೆಂಡ್ ಆಗಿದೆ. ಫೆಬ್ರವರಿ 16 ರಂದು ಪ್ರಮಾಣಪತ್ರ ಪಡೆದಿರುವ ಈ ಚಿತ್ರವು ಫೆಬ್ರವರಿ 27, 2026 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
ಕಾನೂನು ಸಂಕಷ್ಟ: ಚಿತ್ರದ ಬಿಡುಗಡೆಗೆ ತಡೆ ನೀಡಬೇಕೆಂದು ಸಲ್ಲಿಸಲಾದ ಅರ್ಜಿಗಳ ವಿಚಾರಣೆ ನಡೆಯುತ್ತಿದೆ. ಕೇರಳ ಹೈಕೋರ್ಟ್ ಈ ಚಿತ್ರವನ್ನು ವೀಕ್ಷಿಸಿದ ನಂತರ ತನ್ನ ಅಂತಿಮ ತೀರ್ಪನ್ನು ನೀಡುವ ಸಾಧ್ಯತೆಯಿದೆ.
