ಪ್ರೋಟೀನ್ ಪೌಡರ್ ಎಂದರೆ ಅದು ಕೇವಲ ಜಿಮ್‌ಗೆ ಹೋಗುವ ಬಾಡಿ ಬಿಲ್ಡರ್‌ಗಳಿಗೆ ಮಾತ್ರ ಎಂಬ ತಪ್ಪು ಕಲ್ಪನೆ ಅನೇಕರಲ್ಲಿದೆ. ಆದರೆ, ಪ್ರೋಟೀನ್ ಎನ್ನುವುದು ಲಿಂಗಭೇದವಿಲ್ಲದೆ ಪ್ರತಿಯೊಬ್ಬರಿಗೂ ಅಗತ್ಯವಿರುವ ಮುಖ್ಯ ಪೋಷಕಾಂಶವಾಗಿದೆ. ಪೌಷ್ಟಿಕತಜ್ಞೆ ಡಾ. ಅನಾಮಿಕಾ ರಘುವಂಶಿ ಅವರ ಪ್ರಕಾರ, “ಹೆಚ್ಚಿನ ಮಹಿಳೆಯರಿಗೆ ತೂಕದ ಸಮಸ್ಯೆ ಇರುವುದಿಲ್ಲ, ಬದಲಾಗಿ ಅವರಲ್ಲಿ ಪ್ರೋಟೀನ್ ಕೊರತೆ ಇರುತ್ತದೆ.”
ಮಹಿಳೆಯರು ತಮ್ಮ ದೈನಂದಿನ ಆಹಾರದಲ್ಲಿ ಪ್ರೋಟೀನ್ ಪೌಡರ್ ಅನ್ನು ಏಕೆ ಮತ್ತು ಹೇಗೆ ಬಳಸಬೇಕು ಎಂಬುದರ ಕುರಿತು ಇಲ್ಲಿದೆ ಸಂಪೂರ್ಣ ಮಾಹಿತಿ.
ಮಹಿಳೆಯರು ಪ್ರೋಟೀನ್ ಪೌಡರ್ ಏಕೆ ಸೇವಿಸಬೇಕು? ಆಹಾರದ ಮೂಲಕ ನಿಗದಿತ ಪ್ರಮಾಣದ ಪ್ರೋಟೀನ್ ಸಿಗದಿದ್ದಾಗ ಸಪ್ಲಿಮೆಂಟ್‌ಗಳ ಮೊರೆ ಹೋಗುವುದು ಉತ್ತಮ. ವಿಶೇಷವಾಗಿ ಈ ಕೆಳಗಿನ ಲಕ್ಷಣಗಳಿದ್ದರೆ ಪ್ರೋಟೀನ್ ಅವಶ್ಯಕತೆ ಹೆಚ್ಚಿದೆ ಎಂದರ್ಥ:
- ಅತಿಯಾದ ಕೂದಲು ಉದುರುವಿಕೆ ಮತ್ತು ಉಗುರುಗಳು ದುರ್ಬಲವಾಗುವುದು.
- ಸಕ್ಕರೆ ಅಥವಾ ಸಿಹಿ ಪದಾರ್ಥಗಳ ಅತಿಯಾದ ಹಂಬಲ (Sugar cravings).
- ಜಿಮ್ ಅಥವಾ ವ್ಯಾಯಾಮ ಮಾಡಿದರೂ ತೂಕ ಇಳಿಕೆಯಾಗದಿರುವುದು.
- ಸದಾ ಸುಸ್ತು ಮತ್ತು ಆಲಸ್ಯ ಅನುಭವಿಸುವುದು.
- ಪಿಸಿಓಎಸ್ (PCOS) ಮತ್ತು ಇನ್ಸುಲಿನ್ ರೆಸಿಸ್ಟೆನ್ಸ್ ಸಮಸ್ಯೆ ಇರುವುದು.
ಯಾರು ಸೇವಿಸಬೇಕು? ದಿನಕ್ಕೆ 60-70 ಗ್ರಾಂ ಪ್ರೋಟೀನ್ ಸೇವಿಸಲು ಸಾಧ್ಯವಾಗದವರು, ಸಸ್ಯಹಾರಿಗಳು, ವಾರಕ್ಕೆ 3-5 ಬಾರಿ ವ್ಯಾಯಾಮ ಮಾಡುವವರು ಮತ್ತು ಸ್ನಾಯುಗಳ ಬದಲಿಗೆ ಕೇವಲ ಕೊಬ್ಬನ್ನು ಕರಗಿಸಲು ಬಯಸುವ ಮಹಿಳೆಯರಿಗೆ ಇದು ಅತ್ಯಗತ್ಯ.
ಸೇವಿಸುವ ಸರಿಯಾದ ಕ್ರಮ ಮತ್ತು ಸಮಯ:
- ಯಾವಾಗ?: ವ್ಯಾಯಾಮದ ನಂತರ (Post-workout) ಸೇವಿಸುವುದು ಅತ್ಯಂತ ಸೂಕ್ತ. ಬೆಳಿಗ್ಗೆ ವ್ಯಾಯಾಮ ಮಾಡುವವರು ಉಪಹಾರದ ಬದಲಿಗೆ ಇದನ್ನು ಸೇವಿಸಬಹುದು.
- ಹೇಗೆ?: ಒಂದು ಸ್ಕೂಪ್ (20-25 ಗ್ರಾಂ) ಪ್ರೋಟೀನ್ ಪೌಡರ್ ಅನ್ನು ನೀರು, ಬಾದಾಮಿ ಹಾಲು ಅಥವಾ ತೆಂಗಿನ ಹಾಲಿನೊಂದಿಗೆ ಬೆರೆಸಿ ಕುಡಿಯಿರಿ. ಇದಕ್ಕೆ ಚಿಯಾ ಬೀಜಗಳನ್ನು ಸೇರಿಸುವುದರಿಂದ ಪೌಷ್ಟಿಕಾಂಶ ಹೆಚ್ಚುತ್ತದೆ.
- ಪ್ರಮಾಣ: ಮಹಿಳೆಯರು ತಮ್ಮ ದೇಹದ ಪ್ರತಿ ಕೆಜಿ ತೂಕಕ್ಕೆ 1-1.2 ಗ್ರಾಂ ಪ್ರೋಟೀನ್ ಸೇವಿಸಬೇಕು. ಅತಿ ಹೆಚ್ಚು ಆ್ಯಕ್ಟಿವ್ ಆಗಿರುವವರು 1.6 ಗ್ರಾಂವರೆಗೆ ಸೇವಿಸಬಹುದು.
ಖರೀದಿಸುವಾಗ ನೆನಪಿಡಿ: ಯಾವುದೋ ಜಾಹೀರಾತು ನೋಡಿ ಪ್ರೋಟೀನ್ ಪೌಡರ್ ಖರೀದಿಸಬೇಡಿ. ಒಂದು ಸ್ಕೂಪ್‌ನಲ್ಲಿ ಕನಿಷ್ಠ 20 ಗ್ರಾಂ ಪ್ರೋಟೀನ್ ಇರಲಿ. ಅದರಲ್ಲಿ ಸಕ್ಕರೆ, ಕೃತಕ ಸಿಹಿ (Artificial sweeteners) ಅಥವಾ ಮಾಲ್ಟೋಡೆಕ್ಸ್ಟ್ರಿನ್‌ನಂತಹ ಪದಾರ್ಥಗಳು ಇಲ್ಲದಿರುವುದನ್ನು ಖಚಿತಪಡಿಸಿಕೊಳ್ಳಿ.
