ನೀವು ವ್ಯಾಪಾರಸ್ಥರೇ? ಗ್ರಾಹಕರು ಪಾವತಿ ಮಾಡಿದ ನಂತರ ಅವರ ಮೊಬೈಲ್ನಲ್ಲಿ ಬರುವ ‘ಸಕ್ಸಸ್’ (Success) ಮೆಸೇಜ್ ನೋಡಿ ಸಾಮಾನು ಕೊಡುತ್ತಿದ್ದೀರಾ? ಹಾಗಿದ್ದರೆ ನೀವು ಅಪಾಯದಲ್ಲಿದ್ದೀರಿ ಎಂದೇ ಅರ್ಥ! ಇತ್ತೀಚಿನ ದಿನಗಳಲ್ಲಿ ನಕಲಿ ಡಿಜಿಟಲ್ ಪಾವತಿ ಆ್ಯಪ್ಗಳನ್ನು ಬಳಸಿ ವ್ಯಾಪಾರಿಗಳನ್ನು ವಂಚಿಸುತ್ತಿರುವ ಖತರ್ನಾಕ್ ಜಾಲ ಸಕ್ರಿಯವಾಗಿದೆ.
ಹೌದು. ಇಂದಿನ ಡಿಜಿಟಲ್ ಯುಗದಲ್ಲಿ ನಗದು ರಹಿತ ವ್ಯವಹಾರಗಳು ಹೆಚ್ಚಾಗುತ್ತಿವೆ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಕಿಡಿಗೇಡಿಗಳು ಅಮಾಯಕ ವ್ಯಾಪಾರಿಗಳನ್ನು ಗುರಿಯಾಗಿಸಿಕೊಂಡು ವಂಚಿಸುತ್ತಿರುವ ಘಟನೆ ಆಂಧ್ರಪ್ರದೇಶದ ಪ್ರಕಾಶಂ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ.
ವಂಚನೆ ನಡೆಯುವುದು ಹೇಗೆ?
ಕಿಡಿಗೇಡಿಗಳು ತಮ್ಮ ಮೊಬೈಲ್ನಲ್ಲಿ ಅಸಲಿ ‘ಫೋನ್ ಪೇ’ (PhonePe) ಅಥವಾ ‘ಗೂಗಲ್ ಪೇ’ (Google Pay) ನಂತೆಯೇ ಕಾಣುವ ನಕಲಿ ಅಪ್ಲಿಕೇಶನ್ ಇಟ್ಟುಕೊಂಡಿರುತ್ತಾರೆ. ಪಾವತಿ ಮಾಡುವ ಸಮಯದಲ್ಲಿ ನಿಮ್ಮ ಮೊಬೈಲ್ ನಂಬರ್ ಅಥವಾ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿದಂತೆ ನಟಿಸಿ, ನಕಲಿ ಆ್ಯಪ್ನಲ್ಲಿ ಮೊತ್ತವನ್ನು ನಮೂದಿಸುತ್ತಾರೆ. ಆಗ ನಿಮ್ಮ ಮೊಬೈಲ್ಗೆ ಹಣ ಬರದಿದ್ದರೂ, ಅವರ ಮೊಬೈಲ್ನಲ್ಲಿ ‘ಪಾವತಿ ಯಶಸ್ವಿಯಾಗಿದೆ’ ಎಂಬ ನಕಲಿ ರಸೀದಿ ಕಾಣಿಸುತ್ತದೆ. ಇದನ್ನು ನಂಬುವ ವ್ಯಾಪಾರಿಗಳು ಲಕ್ಷಾಂತರ ರೂಪಾಯಿ ಮೌಲ್ಯದ ವಸ್ತುಗಳನ್ನು ನೀಡಿ ಮೋಸಹೋಗುತ್ತಿದ್ದಾರೆ.
ಘಟನೆ 1: ಮಿನಿ ಸೂಪರ್ ಮಾರ್ಕೆಟ್ನಲ್ಲಿ ವಂಚನೆ
ಯರಗೊಂಡಪಾಲೆಂನ ಮಿನಿ ಸೂಪರ್ ಮಾರ್ಕೆಟ್ಗೆ ಕಾರಿನಲ್ಲಿ ಬಂದ ಇಬ್ಬರು ವ್ಯಕ್ತಿಗಳು, ತಾವು ಹೊಸ ಹೋಟೆಲ್ ಪ್ರಾರಂಭಿಸುತ್ತಿದ್ದೇವೆ ಎಂದು ನಂಬಿಸಿ ಸುಮಾರು 25,000 ರೂ. ಮೌಲ್ಯದ ಅಡುಗೆ ಎಣ್ಣೆಯನ್ನು ಖರೀದಿಸಿದರು. ಹಣ ಪಾವತಿಸುವಾಗ ನಗದು ಇಲ್ಲವೆಂದು ಹೇಳಿ ‘ಫೋನ್ ಪೇ’ (PhonePe) ಮಾಡುವುದಾಗಿ ತಿಳಿಸಿದರು. ನಂತರ ತಮ್ಮ ಮೊಬೈಲ್ನಲ್ಲಿ ‘ಪೇಮೆಂಟ್ ಸಕ್ಸಸ್’ ಎಂಬ ನಕಲಿ ರಸೀದಿಯನ್ನು ತೋರಿಸಿ ಸಾಮಾನಿನೊಂದಿಗೆ ಪರಾರಿಯಾದರು. ಮರುದಿನ ಬ್ಯಾಂಕ್ ಖಾತೆ ಪರಿಶೀಲಿಸಿದಾಗ ಹಣ ಜಮೆಯಾಗದಿರುವುದು ಕಂಡುಬಂದಿದೆ.
ಘಟನೆ 2: ಕಿರಾಣಿ ಅಂಗಡಿಯಲ್ಲಿ 21 ಸಾವಿರ ಲೂಟಿ
ಇದೇ ಮಾದರಿಯ ವಂಚನೆ ದೊಡ್ಡಾರವೀಡು ಮಂಡಲದ ಮತ್ತೊಂದು ಕಿರಾಣಿ ಅಂಗಡಿಯಲ್ಲೂ ನಡೆದಿದೆ. ಇಲ್ಲಿಯೂ ಸಹ ವಂಚಕರು ನಕಲಿ ಆ್ಯಪ್ ಬಳಸಿ 21,000 ರೂ. ವಂಚಿಸಿರುವುದು ವರದಿಯಾಗಿದೆ.
ಘಟನೆ 3: ತ್ರಿಪುರಾಂತಕಂನಲ್ಲಿ ಅಕೌಂಟ್ ಫ್ರೀಜ್ ವಂಚನೆ
ತ್ರಿಪುರಾಂತಕಂನಲ್ಲಿ ವಂಚನೆಯ ಮತ್ತೊಂದು ಹೊಸ ರೂಪ ಕಂಡುಬಂದಿದೆ. ಕಾರಿನಲ್ಲಿ ಬಂದ ಇಬ್ಬರು ವ್ಯಕ್ತಿಗಳು ನಗದು ಬೇಕೆಂದು ಕೇಳಿ ವ್ಯಾಪಾರಿಯೊಬ್ಬರಿಗೆ ಫೋನ್ ಪೇ ಮೂಲಕ 70,000 ರೂ. ವರ್ಗಾಯಿಸಿದರು. ವ್ಯಾಪಾರಿ ತನ್ನ ಖಾತೆ ಪರಿಶೀಲಿಸಿದಾಗ ಹಣ ಜಮೆಯಾದಂತೆ ತೋರಿಸಿತ್ತು, ಹಾಗಾಗಿ ಅವರು ನಗದು ನೀಡಿದರು. ಆದರೆ ಅರ್ಧ ಗಂಟೆಯ ನಂತರ “ತಪ್ಪಾದ ಖಾತೆಗೆ ಹಣ ಕಳುಹಿಸಿದ್ದೇವೆ” ಎಂದು ವಂಚಕರು ಕರೆ ಮಾಡಿದರು. ಸ್ವಲ್ಪ ಸಮಯದಲ್ಲೇ ವ್ಯಾಪಾರಿಯ ಬ್ಯಾಂಕ್ ಖಾತೆ ಫ್ರೀಜ್ (Freeze) ಆಗಿದ್ದು, ತಾನು ವಂಚನೆಗೆ ಒಳಗಾಗಿರುವುದು ಅವರಿಗೆ ತಡವಾಗಿ ತಿಳಿದುಬಂದಿದೆ.
ಪೊಲೀಸ್ ತನಿಖೆ ಮತ್ತು ಎಚ್ಚರಿಕೆ
ಈ ಸರಣಿ ವಂಚನೆಗಳನ್ನು ಗಂಭೀರವಾಗಿ ಪರಿಗಣಿಸಿರುವ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.ತಾಂತ್ರಿಕ ತನಿಖೆ: ಟೋಲ್ ಪ್ಲಾಜಾಗಳ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ನಂಬರ್ ಪ್ಲೇಟ್ ಇಲ್ಲದ ಕಾರೊಂದು ಪದೇ ಪದೇ ಓಡಾಡುತ್ತಿರುವುದು ಪತ್ತೆಯಾಗಿದೆ.
ಎಚ್ಚರಿಕೆ: “ಡಿಜಿಟಲ್ ವ್ಯವಹಾರ ಮಾಡುವಾಗ ಕೇವಲ ಗ್ರಾಹಕರು ತೋರಿಸುವ ಸ್ಕ್ರೀನ್ ಶಾಟ್ ನಂಬಬೇಡಿ. ನಿಮ್ಮ ಬ್ಯಾಂಕ್ನಿಂದ ಬರುವ ಅಧಿಕೃತ ಎಸ್ಎಂಎಸ್ ಅಥವಾ ಬ್ಯಾಂಕ್ ಆ್ಯಪ್ ನೋಡಿ ಖಚಿತಪಡಿಸಿಕೊಳ್ಳಿ”ಗ್ರಾಹಕರು ಪಾವತಿ ಮಾಡಿದ್ದೇವೆ ಎಂದು ತೋರಿಸುವ ಅವರ ಮೊಬೈಲ್ ಸ್ಕ್ರೀನ್ ನೋಡಿ ಯಾವತ್ತೂ ನಂಬಬೇಡಿ. ನಿಮ್ಮ ಫೋನ್ನಲ್ಲಿರುವ ‘PhonePe Business’ ಅಥವಾ ನಿಮ್ಮ ಬ್ಯಾಂಕ್ನ ಅಧಿಕೃತ SMS ಅನ್ನು ಮಾತ್ರ ನಂಬಿ ಸಾಮಾನು ನೀಡಿ.
ವ್ಯಾಪಾರಿಗಳ ಗಮನಕ್ಕೆ ಕೆಲವು ಮುನ್ನೆಚ್ಚರಿಕೆಗಳು:
• ಕೇವಲ ಪಾವತಿ ಯಶಸ್ವಿಯಾದ ಧ್ವನಿ (Soundbox) ಅಥವಾ ನಿಮ್ಮ ಖಾತೆಗೆ ಹಣ ಬಂದ ಅಧಿಕೃತ ಸಂದೇಶ ಬರುವವರೆಗೆ ಕಾಯಿರಿ.
• ನಕಲಿ ‘ಫೋನ್ ಪೇ’ ಆ್ಯಪ್ಗಳು ಮಾರುಕಟ್ಟೆಯಲ್ಲಿವೆ, ಅವುಗಳ ಬಗ್ಗೆ ಎಚ್ಚರವಿರಲಿ.
• ಅಪರಿಚಿತರಿಂದ ನಗದು ಪಡೆದು ನಿಮ್ಮ ಖಾತೆಯಿಂದ ಹಣ ವರ್ಗಾಯಿಸುವ ಮೊದಲು ಎಚ್ಚರವಹಿಸಿ
