ಮೂರು ವರ್ಷಗಳ ಹಿಂದೆ ಅಮೆರಿಕದ ಸಿಯಾಟಲ್‌ನಲ್ಲಿ ಭಾರತೀಯ ವಿದ್ಯಾರ್ಥಿನಿ ಜಾನ್ವಿ ಕಂಡೂಲ ಅವರ ದುರದೃಷ್ಟಕರ ಸಾವು ಸಂಭವಿಸಿತ್ತು. ಈಗ ಸಿಯಾಟಲ್ ಆಡಳಿತವು ಅವರ ಕುಟುಂಬಕ್ಕೆ 2.9 ಕೋಟಿ ಡಾಲರ್ (ಸುಮಾರು 262 ಕೋಟಿ ರೂಪಾಯಿ) ಪರಿಹಾರ ನೀಡಲು ಒಪ್ಪಿಕೊಂಡಿದೆ.
ಹೌದು. 2023ರಲ್ಲಿ ಅತಿ ವೇಗವಾಗಿ ಬಂದ ಪೊಲೀಸ್ ವಾಹನ ಡಿಕ್ಕಿಯಾಗಿ ನಡೆದ ಈ ಘಟನೆಯು ಭಾರತ ಮತ್ತು ಅಮೆರಿಕ ನಡುವಿನ ರಾಜತಾಂತ್ರಿಕ ಸಂಬಂಧಗಳಲ್ಲಿ ಉದ್ವಿಗ್ನತೆ ಮೂಡಿಸಿದ್ದಲ್ಲದೆ, ಅಮೆರಿಕನ್ ಪೊಲೀಸರ ಅಮಾನವೀಯ ವರ್ತನೆಯನ್ನು ಜಗತ್ತಿನ ಮುಂದೆ ಅನಾವರಣಗೊಳಿಸಿತ್ತು.
ಈ ಬಗ್ಗೆ ಸಿಯಾಟಲ್ ನಗರದ ಅಟಾರ್ನಿ ಎರಿಕಾ ಇವಾನ್ಸ್ ಬುಧವಾರ ಹೇಳಿಕೆ ನೀಡಿ, “ಜಾನ್ವಿ ಅವರ ಜೀವ ಅಮೂಲ್ಯವಾಗಿತ್ತು. ಅವರು ತಮ್ಮ ಕುಟುಂಬ, ಸ್ನೇಹಿತರು ಮತ್ತು ನಮ್ಮ ಸಮುದಾಯಕ್ಕೆ ಪ್ರಮುಖರಾಗಿದ್ದರು” ಎಂದು ತಿಳಿಸಿದ್ದಾರೆ. ಆದರೆ, ಈ ಪ್ರಕರಣದ ಮುಖ್ಯ ಆರೋಪಿ ಅಧಿಕಾರಿ ಕೆವಿನ್ ಡೇವ್ ಮೇಲೆ ಯಾವುದೇ ಗಂಭೀರ ಕ್ರಿಮಿನಲ್ ಮೊಕದ್ದಮೆ ಹೂಡಲು ಸಾಧ್ಯವಾಗಲಿಲ್ಲ. ಏಕೆಂದರೆ ಆತ ಉದ್ದೇಶಪೂರ್ವಕವಾಗಿ ಹಾನಿ ಮಾಡಲು ಗಾಡಿ ಚಲಾಯಿಸಿದ್ದ ಎಂದು ಸಾಬೀತುಪಡಿಸಲು ಪ್ರಾಸಿಕ್ಯೂಟರ್‌ಗಳಿಗೆ ಸಾಧ್ಯವಾಗಲಿಲ್ಲ. ಅಂತಿಮವಾಗಿ, ನಿರ್ಲಕ್ಷ್ಯದ ಚಾಲನೆಗಾಗಿ ಡೇವ್ ಅವರನ್ನು ಸೇವೆಯಿಂದ ವಜಾಗೊಳಿಸಿ, 5,000 ಡಾಲರ್ ದಂಡ ವಿಧಿಸಲಾಯಿತು.
ಜಾನ್ವಿ ಪ್ರಾಣ ಹಿಂಡಿದ ಅತಿ ವೇಗ
ಜಾನ್ವಿ ಕಂಡೂಲ ಅವರು ನಾರ್ತ್ ಈಸ್ಟರ್ನ್ ವಿಶ್ವವಿದ್ಯಾಲಯದ ವಿದ್ಯಾರ್ಥಿನಿಯಾಗಿದ್ದು, ಸ್ನಾತಕೋತ್ತರ ಪದವಿ ವ್ಯಾಸಂಗ ಮಾಡುತ್ತಿದ್ದರು. ಜನವರಿ 2023 ರಲ್ಲಿ ಅವರು ರಸ್ತೆ ದಾಟುತ್ತಿದ್ದಾಗ, ಅಧಿಕಾರಿ ಕೆವಿನ್ ಡೇವ್ ಅವರ ಪೊಲೀಸ್ ವಾಹನ ಜೋರಾಗಿ ಡಿಕ್ಕಿ ಹೊಡೆದಿತ್ತು. ತನಿಖೆಯ ವೇಳೆ, ಕೇವಲ 25 ಮೈಲಿ ವೇಗದ ಮಿತಿ ಇದ್ದ ರಸ್ತೆಯಲ್ಲಿ ಡೇವ್ ಅವರು ಬರೋಬ್ಬರಿ 74 ಮೈಲಿ ವೇಗದಲ್ಲಿ ಕಾರು ಚಲಾಯಿಸುತ್ತಿದ್ದರು ಎಂಬುದು ತಿಳಿದುಬಂದಿದೆ. ಡಿಕ್ಕಿಯ ತೀವ್ರತೆಗೆ 23 ವರ್ಷದ ಜಾನ್ವಿ ಸ್ಥಳದಲ್ಲೇ ಮೃತಪಟ್ಟಿದ್ದರು.
‘ಲಿಮಿಟೆಡ್ ವ್ಯಾಲ್ಯೂ’ ಹೇಳಿಕೆಯಿಂದ ಭುಗಿಲೆದ್ದ ಆಕ್ರೋಶ ಜಾನ್ವಿ ಸಾವಿನ ನಂತರ ಮತ್ತೊಬ್ಬ ಪೊಲೀಸ್ ಅಧಿಕಾರಿ ಡೇನಿಯಲ್ ಆಡರರ್ ಅವರ ಬಾಡಿ-ಕ್ಯಾಮೆರಾ ಫೂಟೇಜ್ ಹೊರಬಂದಾಗ ಜಗತ್ತಿನಾದ್ಯಂತ ಆಕ್ರೋಶ ವ್ಯಕ್ತವಾಗಿತ್ತು. ಆ ವಿಡಿಯೋದಲ್ಲಿ ಆಡರರ್ ಅವರು ಜಾನ್ವಿ ಸಾವಿನ ಬಗ್ಗೆ ನಗುತ್ತಾ ಅಮಾನವೀಯವಾಗಿ ಮಾತನಾಡಿದ್ದರು. ಜಾನ್ವಿ ಜೀವನಕ್ಕೆ “ಸೀಮಿತ ಮೌಲ್ಯ” (Limited Value) ಇದೆ ಮತ್ತು ನಗರ ಆಡಳಿತವು “ಕೇವಲ ಒಂದು ಚೆಕ್ ಬರೆದು” ಪ್ರಕರಣವನ್ನು ಮುಕ್ತಾಯಗೊಳಿಸಬೇಕು ಎಂದು ಅವರು ಹೇಳಿದ್ದರು. ಈ ಹೇಳಿಕೆಯ ನಂತರ ಭಾರತ ಸರ್ಕಾರ ಮತ್ತು ಅಲ್ಲಿನ ಅನಿವಾಸಿ ಭಾರತೀಯರು ತೀವ್ರ ಪ್ರತಿಭಟನೆ ನಡೆಸಿದ್ದರು, ಇದರ ಪರಿಣಾಮವಾಗಿ ಆಡರರ್ ಅವರನ್ನು ಕೆಲಸದಿಂದ ವಜಾಗೊಳಿಸಲಾಯಿತು.
ಹಣದಿಂದ ನೋವು ಮರೆಯಾಗುವುದೇ? ಒಪ್ಪಂದದ ಪ್ರಕಾರ ನೀಡಲಾಗುವ 29 ಮಿಲಿಯನ್ ಡಾಲರ್‌ಗಳಲ್ಲಿ ಸುಮಾರು 20 ಮಿಲಿಯನ್ ಡಾಲರ್ ಮೊತ್ತವನ್ನು ವಿಮಾ ಕಂಪನಿಯು ಪಾವತಿಸಲಿದೆ. ಈ ಆರ್ಥಿಕ ಒಪ್ಪಂದವು ಕಂಡೂಲ ಕುಟುಂಬಕ್ಕೆ ದೊಡ್ಡ ಪರಿಹಾರವಾಗಿದ್ದರೂ, ಅಮೆರಿಕದ ಪೊಲೀಸ್ ವ್ಯವಸ್ಥೆಯಲ್ಲಿ ಸುಧಾರಣೆಯ ಅಗತ್ಯವಿದೆ ಎಂಬುದನ್ನು ಈ ಪ್ರಕರಣ ಎತ್ತಿ ತೋರಿಸುತ್ತದೆ ಎಂದು ಮಾನವ ಹಕ್ಕುಗಳ ಕಾರ್ಯಕರ್ತರು ಅಭಿಪ್ರಾಯಪಟ್ಟಿದ್ದಾರೆ. ಜಾನ್ವಿ ಕುಟುಂಬದ ಪರ ವಕೀಲರು ಈ ಒಪ್ಪಂದದ ಬಗ್ಗೆ ಸದ್ಯಕ್ಕೆ ಯಾವುದೇ ಬಹಿರಂಗ ಪ್ರತಿಕ್ರಿಯೆ ನೀಡಿಲ್ಲ.
