ಕಾಫಿ ಕೇವಲ ನಿದ್ರೆ ಓಡಿಸುವ ಪಾನೀಯವಲ್ಲ ಅದು ಮೆದುಳಿನ ಆರೋಗ್ಯವನ್ನು ಕಾಪಾಡುವ ಸಂಜೀವಿನಿಯೂ ಹೌದು.ಕಾಫಿ ಕುಡಿಯುವುದು ಆರೋಗ್ಯಕ್ಕೆ ಕೆಟ್ಟದು ಎಂದು ಯಾರಾದರೂ ಹೇಳಿದರೆ ಈಗ ನೀವು ಅವರಿಗೆ ಈ ಸಂಶೋಧನೆಯ ವರದಿಯನ್ನು ತೋರಿಸಬಹುದು. JAMA ಇತ್ತೀಚೆಗೆ ಪ್ರಕಟಿಸಿದ ವರದಿಯ ಪ್ರಕಾರ, ಕೆಫೀನ್ ಯುಕ್ತ ಕಾಫಿ ಸೇವನೆಯು ಮೆದುಳಿನ ಆರೋಗ್ಯವನ್ನು ಸುಧಾರಿಸುವುದಲ್ಲದೆ, ವಯಸ್ಸಾದಂತೆ ಕಾಡುವ ಮರೆಗುಳಿತನದ ಅಪಾಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ.
43 ವರ್ಷಗಳ ಸುದೀರ್ಘ ಸಂಶೋಧನೆ
ವಿಜ್ಞಾನಿ ಎರಿಕ್ ಟೋಪೋಲ್ ಅವರು ಹಂಚಿಕೊಂಡಿರುವ ಈ ಅಧ್ಯಯನವು ಸಾಮಾನ್ಯವಾದುದಲ್ಲ ವಿಜ್ಞಾನಿಗಳು ಸುಮಾರು 1,31,821 ವ್ಯಕ್ತಿಗಳನ್ನು 43 ವರ್ಷಗಳ ಕಾಲ ನಿರಂತರವಾಗಿ ಗಮನಿಸಿ ಈ ತೀರ್ಮಾನಕ್ಕೆ ಬಂದಿದ್ದಾರೆ.
ಪ್ರಮುಖ ಅಂಶ: ದಿನಕ್ಕೆ 2 ರಿಂದ 3 ಕಪ್ ಕಾಫಿ ಅಥವಾ 1 ರಿಂದ 2 ಕಪ್ ಚಹಾ ಕುಡಿಯುವವರಲ್ಲಿ ಬೌದ್ಧಿಕ ಸಾಮರ್ಥ್ಯ (Cognitive Ability) ಹೆಚ್ಚಿರುವುದು ಕಂಡುಬಂದಿದೆ.
ಡಿಕಾಫಿನೇಟೆಡ್ ಕಾಫಿ: ಕೆಫೀನ್ ಇಲ್ಲದ ಕಾಫಿ (Decaf) ಕುಡಿಯುವವರಲ್ಲಿ ಈ ಯಾವುದೇ ಪ್ರಯೋಜನಗಳು ಕಂಡುಬಂದಿಲ್ಲ. ಅಂದರೆ, ಮೆದುಳಿನ ರಕ್ಷಣೆಗೆ ‘ಕೆಫೀನ್’ ಅತ್ಯಗತ್ಯ.ಸುಮಾರು 37 ವರ್ಷಗಳ ಕಾಲ 1.3 ಲಕ್ಷ ಜನರ ಜೀವನಶೈಲಿಯನ್ನು ಅಭ್ಯಾಸ ಮಾಡಿ ಈ ವರದಿ ಸಿದ್ಧಪಡಿಸಲಾಗಿದೆ.
ಅಂಕಿಅಂಶಗಳು ಏನು ಹೇಳುತ್ತವೆ?
ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಹೆಲ್ತ್ (NIH) ಧನಸಹಾಯ ನೀಡಿದ ಈ ಅಧ್ಯಯನದಲ್ಲಿ ತಿಳಿದುಬಂದ ಆಘಾತಕಾರಿ ಮತ್ತು ಆಶಾದಾಯಕ ವಿಷಯಗಳೆಂದರೆ:
ಶೇ. 20ರಷ್ಟು ಕಡಿಮೆ ಅಪಾಯ: ದಿನಕ್ಕೆ 1 ರಿಂದ 5 ಕಪ್ ಕಾಫಿ ಕುಡಿಯುವವರಲ್ಲಿ ಮರೆಗುಳಿತನದ ಅಪಾಯ ಶೇ. 20ರಷ್ಟು ಕಡಿಮೆಯಿದೆ.
ಶೇ. 15ರಷ್ಟು ಕಡಿಮೆ ಅಪಾಯ: ದಿನಕ್ಕೆ ಕೇವಲ 1 ಕಪ್ ಕಾಫಿ ಕುಡಿಯುವವರಲ್ಲಿಯೂ ಶೇ. 15ರಷ್ಟು ಅಪಾಯ ಕಡಿಮೆಯಿರುತ್ತದೆ.
ಅಲ್ಝೈಮರ್ಸ್ ರಕ್ಷಣೆ: ವಂಶವಾಹಿಯಾಗಿ ಮರೆಗುಳಿತನ ಅಥವಾ ಅಲ್ಝೈಮರ್ಸ್ ಬರುವ ಸಾಧ್ಯತೆ ಇರುವವರಲ್ಲೂ ಕೆಫೀನ್ ರಕ್ಷಣಾ ಕವಚವಾಗಿ ಕೆಲಸ ಮಾಡುತ್ತದೆ.
ಎಷ್ಟು ಕುಡಿಯುವುದು ಸೂಕ್ತ?
ಹೆಚ್ಚು ಕುಡಿದರೆ ಹೆಚ್ಚು ಲಾಭ ಎಂದು ಭಾವಿಸಬೇಡಿ.
ಮಿತಿ: ದಿನಕ್ಕೆ 2 ರಿಂದ 2.5 ಕಪ್ ನಂತರ ಕಾಫಿಯ ಪ್ರಯೋಜನಗಳು ಸ್ಥಿರವಾಗುತ್ತವೆ. ಅಂದರೆ ಅದಕ್ಕಿಂತ ಹೆಚ್ಚು ಕುಡಿದರೆ ಮೆದುಳಿಗೆ ಯಾವುದೇ ಹೆಚ್ಚುವರಿ ಲಾಭ ಸಿಗುವುದಿಲ್ಲ.
ತಜ್ಞರ ಪ್ರಕಾರ, ಕಾಫಿಯಲ್ಲಿರುವ ‘ಬಯೋಆಕ್ಟಿವ್’ ಸಂಯುಕ್ತಗಳನ್ನು ಅತಿಯಾದ ಪ್ರಮಾಣದಲ್ಲಿ ಜೀರ್ಣಿಸಿಕೊಳ್ಳುವ ಸಾಮರ್ಥ್ಯ ಮಾನವ ದೇಹಕ್ಕಿಲ್ಲ.ಡಿಸೆಂಬರ್ 2023ರಲ್ಲಿ ಪ್ರಕಟವಾದ ಮತ್ತೊಂದು ವರದಿಯ ಪ್ರಕಾರ, ಮಿತವಾಗಿ ಚಹಾ ಮತ್ತು ಕಾಫಿ ಕುಡಿಯುವುದು (ದಿನಕ್ಕೆ 1-3 ಕಪ್) ಹೃದಯಾಘಾತ ಮತ್ತು ರಕ್ತನಾಳಗಳ ಬ್ಲಾಕೇಜ್ ತಡೆಯಲು ಸಹಾಯ ಮಾಡುತ್ತದೆ
ಈ ಸಂಶೋಧನೆಯು ಕೆಫೀನ್ ಮತ್ತು ಮೆದುಳಿನ ಆರೋಗ್ಯದ ನಡುವಿನ ಸಂಬಂಧವನ್ನು ಸಾಬೀತುಪಡಿಸಿದೆಯಾದರೂ, ಯಾವ ರೀತಿಯ ಕಾಫಿ (ಲೆಟೆ, ಅಮೆರಿಕಾನೊ ಅಥವಾ ಕ್ಯಾಪುಚಿನೊ) ಉತ್ತಮ ಎಂದು ಸ್ಪಷ್ಟಪಡಿಸಿಲ್ಲ. ಹಾಗಾಗಿ, ಸಕ್ಕರೆ ಮತ್ತು ಕೆನೆ ಕಡಿಮೆ ಇರುವ ಕಾಫಿ ಸೇವಿಸುವುದು ಆರೋಗ್ಯದ ದೃಷ್ಟಿಯಿಂದ ಉತ್ತಮ
