ಬೆಂಗಳೂರು: ಸಿಲಿಕಾನ್ ಸಿಟಿಯ ಬ್ಯುಸಿ ಲೈಫ್‌ನಲ್ಲಿ ಸಂಬಂಧಗಳು ಯಾಂತ್ರಿಕವಾಗುತ್ತಿವೆ ಎಂಬ ದೂರಿರುವಾಗಲೇ, ಇಲ್ಲೊಂದು ಹೃದಯಸ್ಪರ್ಶಿ ಘಟನೆ ಬೆಳಕಿಗೆ ಬಂದಿದೆ. ಮನೆಯ ಕೆಲಸದವರನ್ನು ಕೇವಲ ಕೆಲಸದವರು ಎಂದು ನೋಡದೆ ಅವರಲ್ಲಿ ದೈವತ್ವ ಮತ್ತು ಪ್ರೀತಿಯನ್ನು ಕಂಡ ದಂಪತಿಗಳ ವಿಡಿಯೋ ಈಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.
ನಡೆದಿದ್ದೇನು?
ಬೆಂಗಳೂರಿನ ನೇಹಾ ಹರ್ಚಂದಾನಿ ಎಂಬುವವರು ತಮ್ಮ ಮನೆಯಲ್ಲಿ ಕೆಲಸ ಮಾಡುವ ಮಹಿಳೆಯನ್ನು ಪ್ರೀತಿಯಿಂದ ದೀದಿ ಎಂದೇ ಕರೆಯುತ್ತಾರೆ. ಇತ್ತೀಚೆಗೆ ನೇಹಾ ಅವರು ತಮ್ಮ ವಿವಾಹ ವಾರ್ಷಿಕೋತ್ಸವದ ಬಗ್ಗೆ ದೀದಿಯ ಬಳಿ ಮಾತುಕತೆಯ ನಡುವೆ ಸುಮ್ಮನೆ ಪ್ರಸ್ತಾಪಿಸಿದ್ದರು. ಆದರೆ ಆ ಮಾತನ್ನು ಗಂಭೀರವಾಗಿ ತೆಗೆದುಕೊಂಡ ದೀದಿ, ದಂಪತಿಗಳಿಗೆ ಮರೆಯಲಾಗದ ಸರ್ಪ್ರೈಸ್ ನೀಡಿದ್ದಾರೆ.
ಆಕೆ ತನ್ನ ಪತಿಯ ಸಹಾಯದೊಂದಿಗೆ ಬ್ಲಿಂಕಿಟ್ (Blinkit) ಮೂಲಕ ಒಂದು ಗುಲಾಬಿ ಹೂವು ಮತ್ತು ಚಾಕೊಲೇಟ್ ಆರ್ಡರ್ ಮಾಡಿ ತರಿಸಿ ದಂಪತಿಗಳಿಗೆ ನೀಡಿ ಶುಭ ಹಾರೈಸಿದ್ದಾರೆ.
https://www.instagram.com/reel/DUduSg5E6cF/?utm_source=ig_web_copy_link
ಕಾಲು ಮುಟ್ಟಿ ನಮಸ್ಕರಿಸಿದ ದಂಪತಿ
ವಿಡಿಯೋದಲ್ಲಿ ಕಾಣುವಂತೆ ದೀದಿ ನಾಚಿಕೆಯಿಂದ ಉಡುಗೊರೆ ನೀಡಿದಾಗ ನೇಹಾ ಅವರು, ದೀದಿ ಇದನ್ನ ಯಾಕೆ ತಂದ್ರಿ? ನೀವು ಎಷ್ಟು ಕ್ಯೂಟ್ ಎಂದು ಭಾವುಕರಾಗುತ್ತಾರೆ. ಅಷ್ಟಕ್ಕೆ ನಿಲ್ಲದ ಈ ದಂಪತಿಗಳು, ಆಕೆಯ ಉದಾರಿ ಗುಣಕ್ಕೆ ಮೆಚ್ಚಿ ಆಕೆಯ ಪಾದ ಮುಟ್ಟಿ ನಮಸ್ಕರಿಸಿ ಆಶೀರ್ವಾದ ಪಡೆದಿದ್ದಾರೆ. ದೀದಿ ನಿಮ್ಮ ಆಶೀರ್ವಾದ ನಮ್ಮ ಮೇಲಿರಲಿ ಎಂದು ಅವರು ಹೇಳುವ ದೃಶ್ಯ ನೆಟ್ಟಿಗರ ಕಣ್ಣಾಲಿಗಳು ಒದ್ದೆಯಾಗುವಂತೆ ಮಾಡಿದೆ.
ನೆಟ್ಟಿಗರ ಮೆಚ್ಚುಗೆಯ ಸುರಿಮಳೆ:
ಇನ್‌ಸ್ಟಾಗ್ರಾಮ್‌ನಲ್ಲಿ ಈ ವಿಡಿಯೋ ಹಂಚಿಕೊಂಡ ಕೆಲವೇ ಕ್ಷಣಗಳಲ್ಲಿ ಸಾವಿರಾರು ಲೈಕ್ಸ್ ಮತ್ತು ಕಾಮೆಂಟ್‌ಗಳು ಹರಿದುಬಂದಿವೆ.
“ಇದು ನಿಜವಾದ ಶ್ರೀಮಂತಿಕೆ, ಮನಸ್ಸು ದೊಡ್ಡದಿರಬೇಕು ಅಷ್ಟೇ” ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ.
“ಇಂತಹ ವಿಡಿಯೋಗಳನ್ನು ನೋಡಲಿಕ್ಕಾಗಿಯೇ ನಾನು ಇಂಟರ್ನೆಟ್ ಬಿಲ್ ಕಟ್ಟೋದು” ಎಂದು ಮತ್ತೊಬ್ಬರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
“ಮಾನವೀಯತೆ ಇನ್ನೂ ಬದುಕಿದೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ” ಎಂಬ ಅಭಿಪ್ರಾಯಗಳು ಕೇಳಿಬರುತ್ತಿವೆ.
ಒಟ್ಟಿನಲ್ಲಿ, ಕೆಲಸದವರನ್ನು ಮನೆಯ ಸದಸ್ಯರಂತೆ ಕಾಣುವ ದಂಪತಿಗಳು ಮತ್ತು ಅಷ್ಟೇ ಪ್ರೀತಿಯಿಂದ ಸ್ಪಂದಿಸುವ ದೀದಿ – ಈ ಇಬ್ಬರ ಬಾಂಧವ್ಯ ಇಂದಿನ ದಿನಗಳಲ್ಲಿ ಎಲ್ಲರಿಗೂ ಒಂದು ಮಾದರಿಯಾಗಿದೆ.
