ಮಧ್ಯಮ ವರ್ಗದ ಮತ್ತು ಸಾಮಾನ್ಯ ಜನರಿಗೆ ಚಿನ್ನ ಎನ್ನುವುದು ಕೇವಲ ಆಭರಣವಲ್ಲ, ಅದೊಂದು ಭವಿಷ್ಯದ ಭದ್ರತೆ. ಆದರೆ ಇತ್ತೀಚಿನ ದಿನಗಳಲ್ಲಿ ಅದರ ಬೆಲೆ ಏರುತ್ತಿರುವ ರೀತಿ ನೋಡಿದರೆ, ಅದು ಸಾಮಾನ್ಯರ ಕೈಗೆ ಎಟುಕದ ಗಗನಕುಸುಮ’ವಾಗುತ್ತಿರುವುದು ಕಹಿ ಸತ್ಯ.
ಹೌದು, ಕಳೆದ ಕೆಲವು ಸಮಯದಿಂದ ಚಿನ್ನದ ಬೆಲೆ ಸಾಮಾನ್ಯ ಜನರಿಗೆ ಗಗನಕುಸುಮವಾಗಿದೆ. ಪ್ರಸ್ತುತ ಒಂದು ತುಲ (10 ಗ್ರಾಂ) ಚಿನ್ನದ ಬೆಲೆ ಸುಮಾರು ₹1.54 ಲಕ್ಷದಷ್ಟಿದೆ. ಆದರೆ, ಈ ಬೆಲೆ ಲಕ್ಷಕ್ಕಿಂತ ಕೆಳಕ್ಕೆ ಇಳಿಯುತ್ತದೆಯೇ? ಹಳೆಯ ಕಾಲದಂತೆ ₹70,000ಕ್ಕೆ ತಲುಪುತ್ತದೆಯೇ ಎಂಬ ಚರ್ಚೆ ಈಗ ಜೋರಾಗಿ ನಡೆಯುತ್ತಿದೆ. ಇದರ ಹಿಂದಿನ ಅಸಲಿ ಸಂಗತಿ ಇಲ್ಲಿದೆ.
ಅಂತರಾಷ್ಟ್ರೀಯ ಮಟ್ಟದಲ್ಲಿ ಚಿನ್ನದ ಬೆಲೆ ಇಳಿಕೆಯ ಮೇಲೆ ಒತ್ತಡ ಹೇರುತ್ತಿರುವ ಎರಡು ಮುಖ್ಯ ಕಾರಣಗಳು ಇಲ್ಲಿವೆ:
ಅಮೆರಿಕದ ಆರ್ಥಿಕ ನೀತಿಗಳು: ಅಮೆರಿಕದಲ್ಲಿ ಡೊನಾಲ್ಡ್ ಟ್ರಂಪ್ ಅವರ ಆರ್ಥಿಕ ನೀತಿಗಳಿಂದಾಗಿ ಡಾಲರ್ ಮೌಲ್ಯವು ಗಣನೀಯವಾಗಿ ಹೆಚ್ಚುತ್ತಿದೆ. ಸಾಮಾನ್ಯವಾಗಿ ಡಾಲರ್ ಬಲಗೊಂಡಾಗ ಚಿನ್ನದ ಬೆಲೆ ಇಳಿಯುತ್ತದೆ. ಹೂಡಿಕೆದಾರರು ಚಿನ್ನವನ್ನು ಬಿಟ್ಟು ಬೇರೆ ಆರ್ಥಿಕ ಮೂಲಗಳತ್ತ ಮುಖ ಮಾಡುತ್ತಿದ್ದಾರೆ.
ಯುದ್ಧದ ಭೀತಿ ಇಳಿಕೆ: ಈ ಹಿಂದೆ ರಷ್ಯಾ-ಉಕ್ರೇನ್ ಮತ್ತು ಮಧ್ಯಪ್ರಾಚ್ಯದ ಉದ್ವಿಗ್ನತೆಯಿಂದಾಗಿ ಚಿನ್ನದ ಬೆಲೆ ಏರಿತ್ತು. ಈಗ ಯುದ್ಧದ ಮೋಡಗಳು ತಿಳಿಯಾಗುತ್ತಿರುವುದರಿಂದ ಹೂಡಿಕೆದಾರರು ಚಿನ್ನದ ಮಾರುಕಟ್ಟೆಯಿಂದ ಹಣ ಹಿಂತೆಗೆದುಕೊಂಡು ಶೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುತ್ತಿದ್ದಾರೆ.
₹70,000 ಗಡಿ ಸಾಧ್ಯವೇ?:
ತಜ್ಞರ ಪ್ರಕಾರ, ಚಿನ್ನದ ಬೆಲೆ ₹70,000ಕ್ಕೆ ಇಳಿಯುವುದು ಅಸಾಧ್ಯವೇನಲ್ಲ. ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಔನ್ಸ್ ಚಿನ್ನದ ಬೆಲೆ ಪ್ರಮುಖ ಮಟ್ಟಕ್ಕಿಂತ ಕೆಳಕ್ಕೆ ಕುಸಿದರೆ ಅಥವಾ ಡಾಲರ್ ಎದುರು ರೂಪಾಯಿ ಮೌಲ್ಯ ಬಲಗೊಂಡರೆ ಆಮದು ವೆಚ್ಚ ಕಡಿಮೆಯಾಗುತ್ತದೆ. ಇದರ ಫಲವಾಗಿ ದೇಶೀಯ ಮಾರುಕಟ್ಟೆಯಲ್ಲಿ ಬೆಲೆ ಭಾರಿ ಇಳಿಕೆಯಾಗುವ ಸಾಧ್ಯತೆಯಿದೆ.
ಖರೀದಿದಾರರಿಗೆ ಸಲಹೆ: ಚಿನ್ನದ ಬೆಲೆ ಇಳಿಕೆಯು ಒಂದೇ ದಿನದಲ್ಲಿ ನಡೆಯುವ ಪ್ರಕ್ರಿಯೆಯಲ್ಲ, ಇದು ಹಂತಹಂತವಾಗಿ ನಡೆಯುತ್ತದೆ. ಆದ್ದರಿಂದ ಮದುವೆ ಸೀಸನ್ ಎಂದು ಗಾಬರಿಯಾಗಿ ಒಂದೇ ಬಾರಿಗೆ ಹೆಚ್ಚು ಚಿನ್ನ ಖರೀದಿಸಬೇಡಿ. ಬೆಲೆ ಇಳಿಕೆಯಾದಾಗ ಸ್ವಲ್ಪ ಸ್ವಲ್ಪವೇ ಖರೀದಿಸುವುದು ಉತ್ತಮ ಎಂದು ತಜ್ಞರು ಸಲಹೆ ನೀಡುತ್ತಾರೆ.
ಶೇರು ಮಾರುಕಟ್ಟೆ ಚೇತರಿಕೆ: ಭಾರತೀಯ ಶೇರು ಮಾರುಕಟ್ಟೆಯು ಪುಟಿದೇಳುತ್ತಿರುವುದರಿಂದ ಹೂಡಿಕೆದಾರರು ಭೌತಿಕ ಚಿನ್ನಕ್ಕಿಂತ ಹೆಚ್ಚಾಗಿ ಇಕ್ವಿಟಿ ಮತ್ತು ಮ್ಯೂಚುವಲ್ ಫಂಡ್ಗಳತ್ತ ಆಕರ್ಷಿತರಾಗುತ್ತಿದ್ದಾರೆ. ಇದು ಚಿನ್ನದ ಬೇಡಿಕೆಯನ್ನು ಕಡಿಮೆ ಮಾಡಬಹುದು.
