ಬೆಂಗಳೂರು : ಬೆಂಗಳೂರಿನ ಜೀವನಾಡಿ ಎನಿಸಿಕೊಂಡಿರುವ ‘ನಮ್ಮ ಮೆಟ್ರೋ’ (BMRCL) ಪ್ರಯಾಣ ದರವನ್ನು ಏರಿಕೆ ಮಾಡಿ ಅಧಿಕೃತ ಆದೇಶ ಹೊರಡಿಸಿದೆ. ಹೌದು, ಮೆಟ್ರೋ ರೈಲುಗಳಲ್ಲಿ ಪ್ರತಿದಿನ ಸಂಚರಿಸುವ ಸಾವಿರಾರು ಪ್ರಯಾಣಿಕರಿಗೆ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ದರ ಏರಿಕೆಯ ಶಾಕ್ ನೀಡಿದೆ. ಫೆಬ್ರವರಿ 9, 2026 ರಿಂದ ಜಾರಿಗೆ ಬರುವಂತೆ ಮೆಟ್ರೋ ಟಿಕೆಟ್ ದರಗಳನ್ನು ಪರಿಷ್ಕರಿಸಿ ಅಧಿಕೃತ ಆದೇಶ ಹೊರಡಿಸಲಾಗಿದೆ.
ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ಮೆಟ್ರೋ ರೈಲ್ವೇಸ್ (ಕಾರ್ಯಾಚರಣೆ ಮತ್ತು ನಿರ್ವಹಣೆ) ಕಾಯ್ದೆ 2002ರ ಅಡಿಯಲ್ಲಿ ರಚಿತವಾದ ಮೊದಲ ದರ ನಿಗದಿ ಸಮಿತಿ (FFC) ಪ್ರಕಾರ ವಾರ್ಷಿಕ ದರ ಪರಿಷ್ಕರಣೆ ಪ್ರಕಟಿಸಿದೆ.
ದರ ನಿಗದಿ ಸಮಿತಿ (FFC) ಪ್ರಕಾರ BMRCLಗೆ 7.5 ವರ್ಷಗಳ ನಂತರ ಪರಿಷ್ಕೃತ ದರ ರಚನೆಯನ್ನು ಮತ್ತು 29 ರಿಂದ 10 ರವರೆಗಿನ ದರದ ವಲಯಗಳನ್ನು ಶಿಫಾರಸು ಮಾಡುವಾಗ ದರ ಪರಿಷ್ಕರಣೆ ಸರಾಸರಿ ಶೇ 51.55 ರಷ್ಟು ಹೆಚ್ಚಳಕ್ಕೆ ಕಾರಣವಾಯಿತು. ಭವಿಷ್ಯದಲ್ಲಿ ಇಂತಹ ದರ ಹೆಚ್ಚಳದ ಪರಿಸ್ಥಿತಿಯನ್ನು ತಪ್ಪಿಸುವ ದೃಷ್ಟಿಯೊಂದಿಗೆ, ಸಮಿತಿಯು ತನ್ನ ವರದಿಯಲ್ಲಿ ಪಾರದರ್ಶಕ ವಾರ್ಷಿಕ ಸ್ವಯಂಚಾಲಿತ ದರ ಪರಿಷ್ಕರಣೆ ಸೂತ್ರವನ್ನು, ವಾರ್ಷಿಕ ಕಾರ್ಯಾಚರಣೆ ಮತ್ತು ನಿರ್ವಹಣೆಯ ಶೇಕಡಾವಾರು ವೆಚ್ಚ ಅಥವಾ ವಾರ್ಷಿಕ ಶೇ 5 ಯಾವುದು ಕಡಿಮೆಯೋ ಮತ್ತು ಮುಂದಿನ ಒಂದು ರೂಪಾಯಿಗೆ ಪೂರ್ಣಾಂಕಗೊಳಿಸಿ ದರವನ್ನು ಪರಿಷ್ಕರಿಸಲು ಶಿಫಾರಸು ಮಾಡಿದೆ. ಈ ಕಾರ್ಯವಿಧಾನವು, ವಾರ್ಷಿಕವಾಗಿ ಅಲ್ಪ ದರ ಹೆಚ್ಚಳಕ್ಕೆ ಸಹಾಯ ಮಾಡುತ್ತದೆ.
BMRCL ಮೇಲೆ ಬದ್ಧವಾಗಿರುವ FFC ಯ ಶಿಫಾರಸುಗಳನ್ನು ಗಮನದಲ್ಲಿಟ್ಟುಕೊಂಡು, BMRCL ನಿಂದ FFC ಶಿಫಾರಸು ಮಾಡಲಾದ ದರಗಳನ್ನು ಜಾರಿಗೆ ತಂದ ದಿನಾಂಕದಿಂದ 1 ವರ್ಷ (9 ಫೆಬ್ರವರಿ 2025) ಮುಕ್ತಾಯಗೊಂಡ ನಂತರ, ಫೆಬ್ರವರಿ 9, 2026 ರಿಂದ ಜಾರಿಗೆ ಬರುವಂತೆ ವಾರ್ಷಿಕ ಸ್ವಯಂಚಾಲಿತ ದರ ಪರಿಷ್ಕರಣೆಯನ್ನು ಜಾರಿಗೆ ತರಲಾಗುವುದು ಎಂದು ಈ ಮೂಲಕ ತಿಳಿಸಲಾಗಿದೆ. 96.10 ಕಿಮೀಗಳ ಸಂಪೂರ್ಣ ಜಾಲದಲ್ಲಿರುವ 10 ದರ ವಲಯಗಳಲ್ಲಿ ಕನಿಷ್ಠ ರೂ.1 ಮತ್ತು ಗರಿಷ್ಠ ರೂ.5 ರಷ್ಟು ಅಲ್ಪ ಹೆಚ್ಚಳವಾಗಿದೆ.
2024-25 (31 ಮಾರ್ಚ್ 2025) ಹಣಕಾಸು ವರ್ಷದ ಅಂಕಿ ಅಂಶಗಳನ್ನು, ಹಣಕಾಸು ವರ್ಷ 2023-24 (31 ಮಾರ್ಚ್ 2024) ರ ಅಂಕಿ ಅಂಶಗಳಿಗೆ ಹೋಲಿಸಿದರೆ, ಸೂತ್ರ-ಆಧಾರಿತ ದರ ಪರಿಷ್ಕರಣೆ ಶೇ 10.20ರಷ್ಟು ವೆಚ್ಚ ಹೆಚ್ಚಳವನ್ನು ಸೂಚಿಸುತ್ತದೆ. ಆದಾಗ್ಯೂ, FFC ನಿಬಂಧನೆಗೆ ಅನುಗುಣವಾಗಿ ದರ ಪರಿಷ್ಕರಣೆಯನ್ನು ಕೇವಲ ಶೇ 5% ಕ್ಕೆ ಸೀಮಿತಗೊಳಿಸಲಾಗಿದೆ.
ದಿನಾಂಕ 09.02.2026 ರಿಂದ ಅನ್ವಯವಾಗುವ ವಲಯವಾರು ಅಸ್ತಿತ್ವದಲ್ಲಿರುವ ಮತ್ತು ಪರಿಷ್ಕೃತ ದರಗಳು ಈ ಕೆಳಕಂಡಂತಿವೆ.
| ವಲಯ | ಅಂತರ (ಕಿ.ಮೀ) | ಪ್ರಸ್ತುತ ದರ (ರೂ.) | ಪರಿಷ್ಕೃತ ದರ (ರೂ.) | ಏರಿಕೆ |
| F1 | 0-2 | 10.00 | 11.00 | +1 ರೂ |
| F3 | 2-4 | 20.00 | 21.00 | +1 ರೂ |
| F4 | 4-6 | 30.00 | 32.00 | +2 ರೂ |
| F5 | 6-8 | 40.00 | 42.00 | +2 ರೂ |
| F6 | 8-10 | 50.00 | 53.00 | +3 ರೂ |
| F7 | 10-15 | 60.00 | 63.00 | +3 ರೂ |
| F8 | 15-20 | 70.00 | 74.00 | +4 ರೂ |
| F9 | 20-25 | 80.00 | 84.00 | +4 ರೂ |
| F10 | 25-30 | 90.00 | 95.00 | +5 ರೂ |
ರಿಯಾಯಿತಿಗಳ ವಿವರ
ಸ್ಮಾರ್ಟ್ ಕಾರ್ಡ್ ಹಾಗೂ NCMC ಕಾರ್ಡ್ ಬಳಸುವವರಿಗೆ ಈ ಕೆಳಗಿನ ರಿಯಾಯಿತಿಗಳು ಲಭ್ಯವಿರಲಿವೆ:
• ಪೀಕ್ ಅವರ್ಸ್ (ದಟ್ಟಣೆಯ ಸಮಯ): ಶೇ 5 ರಷ್ಟು ರಿಯಾಯಿತಿ.
• ನಾನ್-ಪೀಕ್ ಅವರ್ಸ್ (ದಟ್ಟಣೆ ಇಲ್ಲದ ಸಮಯ): ಶೇ 10 ರಷ್ಟು ರಿಯಾಯಿತಿ.
• ವಿಶೇಷ ರಿಯಾಯಿತಿ: ಭಾನುವಾರಗಳು ಮತ್ತು ಮೂರು ರಾಷ್ಟ್ರೀಯ ರಜಾದಿನಗಳಲ್ಲಿ ಶೇ 10 ರಷ್ಟು ರಿಯಾಯಿತಿ ಮುಂದುವರಿಯಲಿದೆ.
ಪ್ರವಾಸಿ ಕಾರ್ಡ್ (Day Pass) ದರಗಳ ಪರಿಷ್ಕರಣೆ
ಪ್ರವಾಸಿಗರಿಗೆ ಮತ್ತು ನಿಯಮಿತವಾಗಿ ಸಂಚರಿಸುವವರಿಗೆ ನೀಡಲಾಗುವ ದಿನದ ಪಾಸ್ಗಳ ದರದಲ್ಲೂ ಶೇ 5 ರಷ್ಟು ಏರಿಕೆ ಮಾಡಲಾಗಿದೆ. ಪರಿಷ್ಕೃತ ದರ ಪಟ್ಟಿ ಹೀಗಿದೆ:
| ಮಾನ್ಯತೆ | ಕಾರ್ಡ್ (ಪ್ರಸ್ತುತ) | ಕಾರ್ಡ್ (ಪರಿಷ್ಕೃತ) | ಕ್ಯೂ ಆರ್ (ಪ್ರಸ್ತುತ) | ಕ್ಯೂ ಆರ್ (ಪರಿಷ್ಕೃತ) |
| ಒಂದು ದಿನ | ರೂ. 300 | ರೂ. 313 | ರೂ. 250 | ರೂ. 263 |
| ಮೂರು ದಿನಗಳು | ರೂ. 600 | ರೂ. 628 | ರೂ. 550 | ರೂ. 578 |
| ಐದು ದಿನಗಳು | ರೂ. 900 | ರೂ. 943 | ರೂ. 850 | ರೂ. 893 |
