ಆರತಕ್ಷತೆಗೆ ತೆರಳುವಾಗ ವರನಿಗೆ ಚಾಕು ಇರಿತ ಕೇಸ್ ಗೆ ಟ್ವಿಸ್ಟ್: ವಧು ಸೇರಿ ಮೂವರು ಅರೆಸ್ಟ್

ಚಾಮರಾಜನಗರ: ಚಾಮರಾಜನಗರ ಜಿಲ್ಲೆ ಕೊಳ್ಳೇಗಾಲದಲ್ಲಿ ಕಲ್ಯಾಣ ಮಂದಿರಕ್ಕೆ ತೆರಳುತ್ತಿದ್ದ ವರ ರವೀಶ್ ಗೆ ಚಾಕು ಇರಿದ ಪ್ರಕರಣಕ್ಕೆ ಟ್ವಿಸ್ಟ್ ಸಿಕ್ಕಿದೆ.

ರವೀಶ್ ನನ್ನು ಮದುವೆಯಾಗಬೇಕಿದ್ದ ವಧು ನಯನಾ, ಪ್ರಿಯಕರ ದರ್ಶನ್ ಮತ್ತು ಓರ್ವ ಅಪ್ರಾಪ್ತನನ್ನು ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಚಾಕು ಇರಿದ ರಹಸ್ಯ ಬೆಳಕಿಗೆ ಬಂದಿದೆ. ರವೀಶ್ ಜತೆಗಿನ ಮದುವೆಯ ನಿಲ್ಲಿಸಲು ಪ್ರಿಯಕರನೊಂದಿಗೆ ಸೇರಿ ನಯನಾ ಈ ರೀತಿ ಪ್ಲಾನ್ ಮಾಡಿದ್ದಾಳೆ ಎನ್ನುವುದು ಕೊಳ್ಳೇಗಾಲ ಪೊಲೀಸರ ತನಿಖೆಯಲ್ಲಿ ಗೊತ್ತಾಗಿದೆ.

ತಮಟೆ ಹೊಡೆಯುವ ಕೆಲಸ ಮಾಡುತ್ತಿರುವ ದರ್ಶನ್ ನನ್ನು ನಯನ ಪ್ರೀತಿಸುತ್ತಿದ್ದಳು. ಆದರೆ ಮನೆಯಲ್ಲಿ ವಿಷಯ ಹೇಳಲು ಭಯಪಟ್ಟಿದ್ದಳು. ರವೀಶ್ ಜೊತೆಗಿನ ಮದುವೆಯನ್ನು ನೀನೇ ನಿಲ್ಲಿಸು ಎಂದು ಪ್ರಿಯಕರನಿಗೆ ಹೇಳಿದ್ದಳು. ಜನವರಿ 27ರಂದು ರವೀಶ್ ಕೊಳ್ಳೇಗಾಲ ಕಲ್ಯಾಣ ಮಂಟಪಕ್ಕೆ ತೆರಳುವಾಗ ಮಾರ್ಗ ಮಧ್ಯೆ ಕಾರ್ ಅಡ್ಡಗಟ್ಟಿದ ದರ್ಶನ್ ಗ್ಯಾಂಗ್ ಡ್ರ್ಯಾಗರ್, ಚಾಕುವಿನಿಂದ ಹಲ್ಲೆ ಮಾಡಿ ಪರಾರಿಯಾಗಿತ್ತು. ನಂತರ ರವೀಶ್ ದಾಖಲಾಗಿದ್ದ ಆಸ್ಪತ್ರೆಗೆ ಬಂದ ನಯನಾ ಮದುವೆಯಾಗುವಂತೆ ನಾಟಕ ಮಾಡಿದ್ದಳು. ರವೀಶ್ ಗೂ ಕೂಡ ಆಕೆ ಮೇಲೆ ಅನುಮಾನ ಬಂದಿದ್ದರಿಂದ ಮದುವೆಯಾಗಲು ನಿರಾಕರಿಸಿದ್ದ. ಪೊಲೀಸರ ತನಿಖೆಯಲ್ಲಿ ನಯನಾ ಕೊಲೆಗೆ ಪ್ಲಾನ್ ಮಾಡಿರುವುದು ಗೊತ್ತಾಗಿದೆ. ಪೊಲೀಸರು ಮೂವರನ್ನು ಬಂಧಿಸಿದ್ದಾರೆ.