ಮುಂಬೈನ ಐತಿಹಾಸಿಕ ಪಾರ್ಲೆ-ಜಿ ಫ್ಯಾಕ್ಟರಿ ಈಗ ಇತಿಹಾಸದ ಪುಟ ಸೇರಲು ಸಿದ್ಧವಾಗಿದೆ. ದಶಕಗಳ ಕಾಲ ಸವಿಯಾದ ಬಿಸ್ಕತ್ತುಗಳ ಸುಹಾಸನೆಯನ್ನು ಬೀರುತ್ತಿದ್ದ ವಿಲೆ ಪಾರ್ಲೆಯ ಈ ಬೃಹತ್ ಕಾರ್ಖಾನೆಯ ಜಾಗದಲ್ಲಿ ಶೀಘ್ರದಲ್ಲೇ ವಾಣಿಜ್ಯ ಸಂಕೀರ್ಣ ತಲೆಯೆತ್ತಲಿದೆ. ಈ ಸುದ್ದಿಯ ಬೆನ್ನಲ್ಲೇ ಪಾರ್ಲೆ-ಜಿ ಬಿಸ್ಕತ್ತು ಪ್ಯಾಕೆಟ್ ಮೇಲಿರುವ ಆ ಪುಟಾಣಿ ಮಗುವಿನ ಗುರುತಿನ ಬಗ್ಗೆಯೂ ದೊಡ್ಡ ಚರ್ಚೆ ಶುರುವಾಗಿದೆ.
ಸುಮಾರು 1929 ರಲ್ಲಿ ಮೋಹನ್ ಲಾಲ್ ದಯಾಳ್ ಚೌಹಾಣ್ ಅವರಿಂದ ಆರಂಭವಾದ ಈ ಕಾರ್ಖಾನೆ ಮೊದಲು ಮಿಠಾಯಿಗಳನ್ನು ತಯಾರಿಸುತ್ತಿತ್ತು. ನಂತರ 1939 ರಲ್ಲಿ ಬಿಸ್ಕತ್ತು ತಯಾರಿಕೆಯನ್ನು ಆರಂಭಿಸಿತು. ಇಲ್ಲಿಂದ ಆರಂಭವಾದ ಪಾರ್ಲೆ-ಜಿ ಪಯಣ ಭಾರತದ ಪ್ರತಿ ಮನೆಮನಗಳಿಗೂ ತಲುಪಿತು. ಆದರೆ 2016 ರಿಂದಲೇ ಇಲ್ಲಿ ಉತ್ಪಾದನೆ ಸ್ಥಗಿತಗೊಂಡಿತ್ತು. ಈಗ ಮಹಾರಾಷ್ಟ್ರ ರಾಜ್ಯ ಪರಿಸರ ಪ್ರಭಾವ ಮೌಲ್ಯಮಾಪನ ಪ್ರಾಧಿಕಾರವು ಈ 13.5 ಎಕರೆ ಪ್ರದೇಶದಲ್ಲಿ ವಾಣಿಜ್ಯ ಅಭಿವೃದ್ಧಿಗೆ ಅನುಮತಿ ನೀಡಿದ್ದು, ಹಳೆಯ ಕಟ್ಟಡಗಳ ತೆರವು ಕಾರ್ಯಾಚರಣೆ ನಡೆಯಲಿದೆ.
ಇನ್ನು ಪಾರ್ಲೆ-ಜಿ ಪ್ಯಾಕೆಟ್ ಮೇಲಿರುವ ಆ ಪುಟ್ಟ ಮಗು ಯಾರು ಎನ್ನುವ ಕುತೂಹಲಕ್ಕೆ ಕಂಪನಿಯೇ ತೆರೆ ಎಳೆದಿದೆ. ಹಲವು ವರ್ಷಗಳಿಂದ ಈ ಮಗು ಸುಧಾ ಮೂರ್ತಿ ಅಥವಾ ನೀರೂ ದೇಶಪಾಂಡೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಸುದ್ದಿಯಾಗಿತ್ತು. ಆದರೆ ಕಂಪನಿಯ ಉಪಾಧ್ಯಕ್ಷರು ನೀಡಿರುವ ಮಾಹಿತಿಯ ಪ್ರಕಾರ, ಆ ಮಗು ಯಾವುದೇ ಜೀವಂತ ವ್ಯಕ್ತಿಯಲ್ಲ. ಅದು 1960 ರ ದಶಕದಲ್ಲಿ ಮಗನ್ ಲಾಲ್ ದಹಿಯಾ ಎಂಬ ಕಲಾವಿದ ಬಿಡಿಸಿದ ಕಲ್ಪನಾ ಚಿತ್ರವಾಗಿದೆ. ಮುಗ್ಧತೆ ಮತ್ತು ಕುಟುಂಬದ ಬಾಂಧವ್ಯವನ್ನು ಪ್ರತಿನಿಧಿಸಲು ಈ ಚಿತ್ರವನ್ನು ಸಿದ್ಧಪಡಿಸಲಾಗಿತ್ತು.
ಮುಂಬೈನ ಈ ಕಾರ್ಖಾನೆ ಮುಚ್ಚುತ್ತಿರುವುದು ಹಲವರಿಗೆ ಬಾಲ್ಯದ ನೆನಪುಗಳನ್ನು ಮರುಕಳಿಸುವಂತೆ ಮಾಡಿದೆ. ಬಿಸಿ ಚಹಾದೊಂದಿಗೆ ಪಾರ್ಲೆ-ಜಿ ಬಿಸ್ಕತ್ತನ್ನು ಅದ್ದಿ ತಿನ್ನುವ ಸಂಪ್ರದಾಯ ಇಂದಿಗೂ ಭಾರತೀಯ ಸಂಸ್ಕೃತಿಯ ಅವಿಭಾಜ್ಯ ಅಂಗವಾಗಿದೆ. ಕಾರ್ಖಾನೆ ಕಟ್ಟಡ ಮರೆಯಾದರೂ ಜನರ ಮನಸ್ಸಿನಲ್ಲಿ ಪಾರ್ಲೆ-ಜಿ ಬ್ರ್ಯಾಂಡ್ ಸದಾ ಜೀವಂತವಾಗಿರುತ್ತದೆ ಎನ್ನುವುದು ಅಭಿಮಾನಿಗಳ ಮಾತು.
