ಭಾರತೀಯ ಮಾರುಕಟ್ಟೆಯಲ್ಲಿ ಅದರಲ್ಲೂ ವಿಶೇಷವಾಗಿ 80 ಮತ್ತು 90ರ ದಶಕದಲ್ಲಿ ‘ವಿಮಲ್’ ಎಂಬ ಹೆಸರು ಮನೆಮಾತಾಗಿತ್ತು. ಟೆಲಿವಿಷನ್ ಜಾಹೀರಾತುಗಳಿಂದ ಹಿಡಿದು ಅಂತರಾಷ್ಟ್ರೀಯ ಕ್ರಿಕೆಟ್ ಮೈದಾನಗಳವರೆಗೆ ‘ಓನ್ಲಿ ವಿಮಲ್’ ಎಂಬ ಟ್ಯಾಗ್ ಲೈನ್ ಒಂದು ಸಂಚಲನವನ್ನೇ ಸೃಷ್ಟಿಸಿತ್ತು. ಆದರೆ ಈ ಐಕಾನಿಕ್ ಬ್ರ್ಯಾಂಡ್ ಆ ಹೆಸರನ್ನು ಪಡೆದಿದ್ದು ಯಾರಿಂದ ಮತ್ತು ಆ ವ್ಯಕ್ತಿ ಇಂದು ಏನು ಮಾಡುತ್ತಿದ್ದಾರೆ ಎಂಬ ಕುತೂಹಲಕಾರಿ ಮಾಹಿತಿ ಇಲ್ಲಿದೆ.
ಧೀರೂಭಾಯಿ ಅಂಬಾನಿ ಮತ್ತು ವಿಮಲ್ ಬ್ರ್ಯಾಂಡ್ ಉದಯ ಧೀರೂಭಾಯಿ ಅಂಬಾನಿ ಅವರು 1958ರಲ್ಲಿ ವಿದೇಶದಿಂದ ಭಾರತಕ್ಕೆ ಮರಳಿದಾಗ ಚಂಪಕಲಾಲ್ ದಮಾನಿ ಅವರೊಂದಿಗೆ ಸೇರಿ ಮಜಿನ್ ಎಂಬ ಕಂಪನಿಯನ್ನು ಆರಂಭಿಸಿದ್ದರು. ನಂತರ 1965ರಲ್ಲಿ ಈ ಪಾಲುದಾರಿಕೆಯಿಂದ ಹೊರಬಂದ ಧೀರೂಭಾಯಿ ಅವರು ಸ್ವಂತವಾಗಿ ರಿಲಯನ್ಸ್ ಟೆಕ್ಸ್ ಟೈಲ್ಸ್ ಸಂಸ್ಥೆಯನ್ನು ಸ್ಥಾಪಿಸಿದರು. ಈ ವೇಳೆ ಅವರು ತಮ್ಮ ಮೊದಲ ಟೆಕ್ಸ್ ಟೈಲ್ ಬ್ರ್ಯಾಂಡ್ ಗೆ ‘ವಿಮಲ್ ಸ್ಯೂಟಿಂಗ್ಸ್’ ಎಂದು ಹೆಸರಿಟ್ಟರು. ಈ ಹೆಸರಿನ ಹಿಂದೆ ಒಂದು ದೊಡ್ಡ ಕೌಟುಂಬಿಕ ಪ್ರೀತಿಯಿತ್ತು.
ಯಾರು ಈ ವಿಮಲ್ ಅಂಬಾನಿ? ಧೀರೂಭಾಯಿ ಅಂಬಾನಿ ಅವರ ಹಿರಿಯ ಸಹೋದರ ರಮಣಿಕಲಾಲ್ ಅಂಬಾನಿ ಅವರ ಏಕೈಕ ಪುತ್ರನೇ ವಿಮಲ್ ಅಂಬಾನಿ. ತಮ್ಮ ಅಣ್ಣನ ಮೇಲಿದ್ದ ಗೌರವ ಮತ್ತು ಕುಟುಂಬದ ಮೇಲಿನ ಪ್ರೀತಿಗಾಗಿ ಧೀರೂಭಾಯಿ ಅವರು ಈ ಬ್ರ್ಯಾಂಡ್ ಗೆ ತಮ್ಮ ಸೋದರಸಂಬಂಧಿಯ ಹೆಸರನ್ನೇ ಇಟ್ಟಿದ್ದರು. 1987ರ ಕ್ರಿಕೆಟ್ ವಿಶ್ವಕಪ್ ಸಮಯದಲ್ಲಿ ಈ ಬ್ರ್ಯಾಂಡ್ ಅತ್ಯಂತ ವೇಗವಾಗಿ ಜನಪ್ರಿಯತೆ ಗಳಿಸಿತು. ಆ ಕಾಲದ ಖ್ಯಾತ ಕ್ರಿಕೆಟಿಗರು ವಿಮಲ್ ಸ್ಯೂಟ್ ಗಳನ್ನು ಧರಿಸಿ ಮಿಂಚುತ್ತಿದ್ದರು.
ಈಗ ವಿಮಲ್ ಅಂಬಾನಿ ಎಲ್ಲಿದ್ದಾರೆ ಮತ್ತು ಏನು ಮಾಡುತ್ತಿದ್ದಾರೆ? ಅಂಬಾನಿ ಕುಟುಂಬದ ಇತರ ಸದಸ್ಯರಂತೆ ವಿಮಲ್ ಅಂಬಾನಿ ಅವರು ಮಾಧ್ಯಮಗಳ ಮುಂದೆ ಅಷ್ಟಾಗಿ ಕಾಣಿಸಿಕೊಳ್ಳುವುದಿಲ್ಲ. ಅವರು ರಿಲಯನ್ಸ್ ಇಂಡಸ್ಟ್ರೀಸ್ ನ ದೈನಂದಿನ ವ್ಯವಹಾರಗಳಲ್ಲಿ ತೊಡಗಿಸಿಕೊಂಡಿಲ್ಲ. ಪ್ರಸ್ತುತ ವಿಮಲ್ ಅಂಬಾನಿ ಅವರು ಅಹಮದಾಬಾದ್ ನಲ್ಲಿ ನೆಲೆಸಿದ್ದು, ಟವರ್ ಓವರ್ ಸೀಸ್ ಲಿಮಿಟೆಡ್ ಎಂಬ ಕಂಪನಿಯಲ್ಲಿ ಸಿಇಒ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇವರ ಕಂಪನಿಯು ಸೈನೇಜ್ ಇಂಡಸ್ಟ್ರಿಯಲ್ಲಿ ಬಳಸುವ ವಿಶಿಷ್ಟ ಮಾದರಿಯ ಇಂಕ್ ಮತ್ತು ದ್ರಾವಣಗಳ ತಯಾರಿಕೆಯಲ್ಲಿ ಹೆಸರು ಮಾಡಿದೆ.
ವಿಮಲ್ ಅಂಬಾನಿ ಅವರು ಕೇವಲ ಉದ್ಯಮಿಯಷ್ಟೇ ಅಲ್ಲದೆ, ಸಾಮಾಜಿಕ ಕೆಲಸಗಳಲ್ಲಿಯೂ ಗುರುತಿಸಿಕೊಂಡಿದ್ದಾರೆ. ಅಹಮದಾಬಾದ್ ನ ಉದ್ಯಮ ವಲಯದಲ್ಲಿ ಸಕ್ರಿಯರಾಗಿರುವ ಇವರು ಸಿಐಐ ಗುಜರಾತ್ ಕೌನ್ಸಿಲ್ ನ ಅಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದ್ದಾರೆ. ರಮಣಿಕಲಾಲ್ ಅಂಬಾನಿ ಅವರು ರಿಲಯನ್ಸ್ ಉದ್ಯಮದ ಸ್ಥಾಪನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು ಮತ್ತು ನರೋಡಾದಲ್ಲಿ ಟೆಕ್ಸ್ ಟೈಲ್ ಘಟಕ ಸ್ಥಾಪನೆಯಲ್ಲಿ ಅವರ ಶ್ರಮ ದೊಡ್ಡದಿದೆ. ಅವರು 2020ರಲ್ಲಿ ನಿಧನರಾದರು.
ಇಂದು ‘ಓನ್ಲಿ ವಿಮಲ್’ ಬ್ರ್ಯಾಂಡ್ ಹಳೆಯ ನೆನಪಾಗಿದ್ದರೂ, ಆ ಹೆಸರಿನ ಹಿಂದಿರುವ ವಿಮಲ್ ಅಂಬಾನಿ ಅವರು ಪ್ರಚಾರದಿಂದ ದೂರವಿದ್ದುಕೊಂಡು ತಮ್ಮದೇ ಆದ ಸ್ವತಂತ್ರ ಉದ್ಯಮ ಕ್ಷೇತ್ರದಲ್ಲಿ ಯಶಸ್ಸು ಕಾಣುತ್ತಿದ್ದಾರೆ.
