ನವದೆಹಲಿ: ಬಿಎಸ್ಎಫ್ ಕಾನ್ ಸ್ಟೆಬಲ್ ನೇಮಕಾತಿಯಲ್ಲಿ ಮಾಜಿ ಅಗ್ನಿವೀರರ ಕೋಟಾವನ್ನು ಕೇಂದ್ರ ಗೃಹ ಸಚಿವಾಲಯ ಶೇಕಡ 10 ರಿಂದ ಶೇಕಡ 50ಕ್ಕೆ ಹೆಚ್ಚಳ ಮಾಡಿದೆ.
ಗಡಿ ಭದ್ರತಾ ಪಡೆ, ಜನರಲ್ ಡ್ಯೂಟಿ ಕೇಡರ್(ನಾನ್ ಗೆಜೆಟೆಡ್) ನೇಮಕಾತಿ ನಿಯಮ 2015ಕ್ಕೆ ತಿದ್ದುಪಡಿ ತರುವ ಮೂಲಕ ಕೋಟಾ ಹೆಚ್ಚಳ ಮಾಡಲಾಗಿದೆ. ದೈಹಿಕ ಗುಣಮಟ್ಟ ಪರೀಕ್ಷೆ ಮತ್ತು ದೈಹಿಕ ದಕ್ಷತೆ ಪರೀಕ್ಷೆಯಿಂದ ವಿನಾಯಿತಿ ನೀಡಲಾಗುತ್ತದೆ.
17 ರಿಂದ 21 ವರ್ಷದ ಯುವಕರನ್ನು ಸೇನೆಗೆ ನೇಮಿಸಿಕೊಳ್ಳುವ ಅಗ್ನಿವೀರ್ ನೇಮಕಾತಿ ವ್ಯವಸ್ಥೆಯನ್ನು 2022 ರಲ್ಲಿ ಜಾರಿಗೆ ತರಲಾಗಿತ್ತು. ನಾಲ್ಕು ವರ್ಷದ ಸೇವಾ ಅವಧಿಯ ನಂತರ ಅಗ್ನಿವೀರರು ಬಿಡುಗಡೆ ಹೊಂದುತ್ತಾರೆ. ಇದೀಗ ಅವರಿಗೆ ಬಿಎಸ್ಎಫ್ ನೇಮಕಾತಿಯಲ್ಲಿ ಶೇಕಡ 50ರಷ್ಟು ಕೋಟಾ ಹೆಚ್ಚಳ ಮಾಡಲಾಗಿದೆ.
ಮಾಜಿ ಅಗ್ನಿವೀರರ ಮೊದಲ ತಂಡ 5 ವರ್ಷದವರೆಗೂ ವಯೋಮಿತಿ ವಿನಾಯಿತಿ ಪಡೆಯಲಿದೆ. ನಂತರ ಬರುವವರು ಮೂರು ವರ್ಷ ವಿನಾಯಿತಿ ಪಡೆಯಲಿದ್ದಾರೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
