ನವದೆಹಲಿ: ಕೇಂದ್ರ ಸರ್ಕಾರಿ ನೌಕರರು ಮತ್ತು ಪೆನ್ಷನರ್ಗಳ ಬಹುದಿನಗಳ ನಿರೀಕ್ಷೆಯಾದ 8ನೇ ವೇತನ ಆಯೋಗದ (8th Pay Commission) ಪ್ರಕ್ರಿಯೆ ವೇಗ ಪಡೆದುಕೊಂಡಿದೆ. ನೌಕರರ ಒಕ್ಕೂಟವಾದ NCJCM ಇತ್ತೀಚೆಗೆ ಆಯೋಗಕ್ಕೆ ವಿಸ್ತಾರವಾದ ಮನವಿಯನ್ನು ಸಲ್ಲಿಸಿದ್ದು, ವೇತನ ಮತ್ತು ಸೌಲಭ್ಯಗಳಲ್ಲಿ ಭಾರಿ ಬದಲಾವಣೆ ತರಲು ಒತ್ತಾಯಿಸಿದೆ.ಬೆಲೆ ಏರಿಕೆ ಮತ್ತು ಜೀವನಮಟ್ಟವನ್ನು ಗಮನದಲ್ಲಿಟ್ಟುಕೊಂಡು ಮಂಡಿಸಲಾದ 7 ಪ್ರಮುಖ ಬೇಡಿಕೆಗಳು ಇಲ್ಲಿವೆ:
1.ಕನಿಷ್ಠ ಸಂಬಳ ₹69,000ಕ್ಕೆ ಫಿಕ್ಸ್
7ನೇ ವೇತನ ಆಯೋಗದಲ್ಲಿ ಕೇವಲ ₹18,000 ಇದ್ದ ಕನಿಷ್ಠ ಮೂಲ ವೇತನವನ್ನು, ಈಗಿನ ಹಣದುಬ್ಬರಕ್ಕೆ ಅನುಗುಣವಾಗಿ ಬರೋಬ್ಬರಿ ₹69,000ಕ್ಕೆ ನಿಗದಿಪಡಿಸಬೇಕು ಎಂಬುದು ಅತಿ ದೊಡ್ಡ ಬೇಡಿಕೆ. ಇದು ಜಾರಿಯಾದಲ್ಲಿ ಕೆಳಹಂತದ ನೌಕರರ ವೇತನದಲ್ಲೂ ಭಾರಿ ಏರಿಕೆ ಕಂಡುಬರಲಿದೆ.
2.ವಾರ್ಷಿಕ ಇಂಕ್ರಿಮೆಂಟ್ ಶೇ. 6ಕ್ಕೆ ಹೆಚ್ಚಳ
ಪ್ರಸ್ತುತ ವರ್ಷಕ್ಕೆ ಶೇ. 3ರಷ್ಟು ಇರುವ ವಾರ್ಷಿಕ ವೇತನ ಏರಿಕೆಯನ್ನು (Increment) ಶೇ. 6ಕ್ಕೆ ಹೆಚ್ಚಿಸಬೇಕು ಎಂದು ಒತ್ತಾಯಿಸಲಾಗಿದೆ. ಇದರಿಂದ ನೌಕರರ ವೇತನದ ಬೆಳವಣಿಗೆ ಡಬಲ್ ವೇಗದಲ್ಲಿ ನಡೆಯಲಿದೆ
3.ಫಿಟ್ಮೆಂಟ್ ಫ್ಯಾಕ್ಟರ್ 3.833ಕ್ಕೆ ಏರಿಕೆ
ಸಂಬಳ ಮತ್ತು ಪೆನ್ಷನ್ ಪರಿಷ್ಕರಣೆಗಾಗಿ 3.833 ಫಿಟ್ಮೆಂಟ್ ಫ್ಯಾಕ್ಟರ್ ಅನ್ವಯಿಸಬೇಕು ಎಂಬುದು ಎರಡನೇ ದೊಡ್ಡ ಬೇಡಿಕೆ. ಇದರಿಂದ ನೌಕರರ ಕೈಗೆ ಸಿಗುವ ಸಂಬಳ ಗಣನೀಯವಾಗಿ ಹೆಚ್ಚಾಗಲಿದೆ
4.ಪೇ-ಲೆವೆಲ್ ವಿಲೀನ ಮತ್ತು ಸರಳೀಕರಣ
ಹಲವು ಹಂತದ ವೇತನ ಶ್ರೇಣಿಗಳನ್ನು ವಿಲೀನಗೊಳಿಸಿ ಸರಳಗೊಳಿಸಲು ಸೂಚಿಸಲಾಗಿದೆ. ಉದಾಹರಣೆಗೆ:
ಲೆವೆಲ್ 2 ಮತ್ತು 3 ಅನ್ನು ವಿಲೀನಗೊಳಿಸಿ ಲೆವೆಲ್ 3 ಮಾಡುವುದು.
ಲೆವೆಲ್ 4 ಮತ್ತು 5 ಅನ್ನು ವಿಲೀನಗೊಳಿಸಿ ಲೆವೆಲ್ 5 ಮಾಡುವುದು.
ಲೆವೆಲ್ 5 ನೌಕರರಿಗೆ ಒಂದೇ ಬಾರಿಗೆ ಲೆವೆಲ್ 6 ಗೆ ಬಡ್ತಿ ನೀಡುವುದು.
ಪೌಷ್ಟಿಕಾಂಶ ಆಧಾರಿತ ವೇತನ ಲೆಕ್ಕಾಚಾರ
ನೌಕರರ ಆರೋಗ್ಯದ ದೃಷ್ಟಿಯಿಂದ ICMR ಶಿಫಾರಸು ಮಾಡಿರುವ 3,490 kcal ದೈನಂದಿನ ಕ್ಯಾಲೊರಿ ಅಗತ್ಯತೆಯನ್ನು ಆಧರಿಸಿ ಸಂಬಳ ನಿಗದಿಪಡಿಸಬೇಕು. ಇದರಲ್ಲಿ ಪ್ರೋಟೀನ್, ಹಣ್ಣು, ತರಕಾರಿ ಮತ್ತು ಹಾಲಿನ ವೆಚ್ಚವೂ ಸೇರಿರಲಿದೆ.
5.ಮನೆ ಬಾಡಿಗೆ ಮತ್ತು ಜೀವನ ನಿರ್ವಹಣೆ ಭತ್ಯೆ
ವೇತನ ಹಂಚಿಕೆಯಲ್ಲಿ ಈ ಕೆಳಗಿನಂತೆ ಸ್ಪಷ್ಟ ವಿಂಗಡಣೆ ಇರಬೇಕೆಂದು ಕೋರಲಾಗಿದೆ:
ಮನೆ ಬಾಡಿಗೆ: 7.5%
ಇಂಧನ, ನೀರು, ವಿದ್ಯುತ್: 20%
ಕೌಶಲ ಅಭಿವೃದ್ಧಿ: 25%
ಜೀವನಶೈಲಿ ಮತ್ತು ಇತರೆ: 25%
6.ವೇತನ ಪರಿಷ್ಕರಣೆಗೆ 10 ವರ್ಷ ಕಾಯುವಂತಿಲ್ಲ
ಇನ್ಮುಂದೆ ವೇತನ ಪರಿಷ್ಕರಣೆಗಾಗಿ 10 ವರ್ಷ ಕಾಯುವ ಸಂಪ್ರದಾಯ ಬೇಡ. ತುಟ್ಟಿಭತ್ಯೆ (DA) ಶೇ. 50 ದಾಟಿದಾಗ ಅಥವಾ ಮಾರುಕಟ್ಟೆ ಬೆಲೆ ಏರಿಕೆಗನುಗುಣವಾಗಿ ವೇತನ ಸ್ವಯಂಚಾಲಿತವಾಗಿ ಪರಿಷ್ಕರಣೆಯಾಗುವ ವ್ಯವಸ್ಥೆ ಬರಬೇಕು ಎಂದು ಆಗ್ರಹಿಸಲಾಗಿದೆ.
7.ನಿವೃತ್ತರಿಗೂ ಒಂದು ಶ್ರೇಣಿ ಒಂದು ಪಿಂಚಣಿ
ಸೇವೆಯಲ್ಲಿರುವ ನೌಕರರ ವೇತನ ಹೆಚ್ಚಳವಾದಂತೆ, ಅದೇ ಅನುಪಾತದಲ್ಲಿ ನಿವೃತ್ತ ನೌಕರರ ಪಿಂಚಣಿಯೂ ಸಹ ಪರಿಷ್ಕರಣೆಯಾಗಬೇಕು ಎಂದು ಸಮಾನ ಪಿಂಚಣಿ (Pension Parity) ಮಾದರಿಯ ಬೇಡಿಕೆ ಇಡಲಾಗಿದೆ
