ಸ್ಯಾಂಡಲ್‌ವುಡ್‌ನಲ್ಲಿ ವಿಭಿನ್ನ ಶೀರ್ಷಿಕೆಯ ಮೂಲಕವೇ ಚಿತ್ರಪ್ರೇಮಿಗಳ ಗಮನ ಸೆಳೆದಿರುವ ಸಾಲಗಾರರ ಸಹಕಾರ ಸಂಘ ಸಿನಿಮಾದ ಹೊಸ ಹಾಡೊಂದು ಯೂಟ್ಯೂಬ್‌ನಲ್ಲಿ ಬಿಡುಗಡೆಯಾಗಿದೆ. ಚಿತ್ರದ ಕಾಸು ದುಡ್ಡು ಎಂಬ ಸಾಹಿತ್ಯವಿರುವ ಈ ಹಾಡು ಎ2 ಮ್ಯೂಸಿಕ್ ಯೂಟ್ಯೂಬ್ ಚಾನೆಲ್‌ನಲ್ಲಿ ಶ್ರೋತೃಗಳ ಮುಂದೆ ಬಂದಿದ್ದು, ಉತ್ತಮ ಪ್ರಶಂಸೆ ವ್ಯಕ್ತವಾಗುತ್ತಿದೆ.
ಖ್ಯಾತ ಸಂಗೀತ ನಿರ್ದೇಶಕ ಹಾಗೂ ಗಾಯಕ ವಿ ಹರಿಕೃಷ್ಣ ಅವರ ಗಂಭೀರ ಮತ್ತು ಮಾಗಿದ ಧ್ವನಿಯಲ್ಲಿ ಈ ಹಾಡು ಮೂಡಿಬಂದಿರುವುದು ವಿಶೇಷ. ಎಂ ಎಸ್ ತ್ಯಾಗರಾಜ ಅವರು ಈ ಹಾಡಿಗೆ ಸಂಗೀತ ಸಂಯೋಜನೆ ಮಾಡುವುದರ ಜೊತೆಗೆ ಸಾಹಿತ್ಯವನ್ನೂ ಬರೆದಿದ್ದಾರೆ. ಬಿ ಆರ್ ನವೀನ್ ಕುಮಾರ್ ಸೌಂಡ್ ಮಿಕ್ಸಿಂಗ್ ನಿರ್ವಹಿಸಿದ್ದರೆ, ಭರತ್ ರಾಮ್ ಲಿರಿಕಲ್ ವೀಡಿಯೋ ವಿನ್ಯಾಸ ಮಾಡಿದ್ದಾರೆ. ಹಣ ಮತ್ತು ಜೀವನದ ವಾಸ್ತವತೆಯನ್ನು ಸಾರುವ ಈ ಗೀತೆ ಪ್ರೇಕ್ಷಕರಿಗೆ ತಕ್ಷಣವೇ ಇಷ್ಟವಾಗುವಂತಿದೆ.
ವಿಕ್ರಮ್ ಧನಂಜಯ್ ಆರ್ ನಿರ್ದೇಶನದ ಈ ಚಿತ್ರದಲ್ಲಿ ಲೋಕೇಶ್ ಬಸ್ಕೋ, ಕೆಂಪೇಗೌಡ, ಪ್ರವೀಣ್ ಕುಮಾರ್ ಗಸ್ತಿ, ಜಾಲಿ ಜ್ಯಾಕ್ ಮತ್ತು ಪೂಜಾ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಎಸ್ ಎನ್ ಎಲ್ ಎನ್ ಎಸ್ ಎಂಟರ್‌ಟೈನರ್ಸ್ ಹಾಗೂ ಹವೀಶ್ ಸಿನೆ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ಕುಮರೇಶ್ ಎ ಮತ್ತು ಸುನಿಲ್ ಕುಮಾರ್ ಪಟ್ಟಣಗೆರೆ ಈ ಸಿನಿಮಾವನ್ನು ನಿರ್ಮಿಸಿದ್ದಾರೆ. ರಾಜಣ್ಣ ಪುಟ್ಟೇನಹಳ್ಳಿ, ವಿಕ್ರಮ್ ಧನಂಜಯ್ ಹಾಗೂ ಚಂದ್ರು ಶಿರಳಕೊಪ್ಪ ಸಹ ನಿರ್ಮಾಪಕರಾಗಿ ಸಾಥ್ ನೀಡಿದ್ದಾರೆ.
ಅನಿರುದ್ಧ ಅವರ ಛಾಯಾಗ್ರಹಣ ಹಾಗೂ ಗಣೇಶ್ ನಿರ್ಚಲ್ ಮತ್ತು ಶೇಷಾಚಲ ಕುಲಕರ್ಣಿ ಅವರ ಸಂಕಲನ ಈ ಚಿತ್ರಕ್ಕಿದ್ದು, ರುಕ್ಮಾಂಗದನ್ ಡಿಟಿಎಸ್ ಕೆಲಸ ನಿರ್ವಹಿಸಿದ್ದಾರೆ. ಭರತ್ ರಾಮ್ ಅವರ ಪೋಸ್ಟರ್ ವಿನ್ಯಾಸ ಮತ್ತು ಚಂದ್ರಶೇಖರ್ ಅವರ ಮಾಧ್ಯಮ ಪ್ರಚಾರ ನಿರ್ವಹಣೆ ಚಿತ್ರಕ್ಕಿದೆ. ಬಿಡುಗಡೆಯಾಗಿರುವ ಕಾಸು ದುಡ್ಡು ಹಾಡು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಸದ್ದು ಮಾಡುತ್ತಿದ್ದು, ಸಿನಿಮಾದ ಮೇಲಿನ ನಿರೀಕ್ಷೆಯನ್ನು ಹೆಚ್ಚಿಸಿದೆ.
