ನವದೆಹಲಿ- ಕಾಶ್ಮೀರದಲ್ಲಿ 1990ರ ದಶಕದಲ್ಲಿ ನಡೆದ ಭೀಕರ ಭಯೋತ್ಪಾದಕ ಕೃತ್ಯಗಳು ಮತ್ತು ನರ್ಸ್ ಸರಳಾ ಭಟ್ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜೆಕೆಎಲ್ಎಫ್ (JKLF) ಮುಖ್ಯಸ್ಥ ಯಾಸಿನ್ ಮಲಿಕ್ ಶ್ರೀನಗರ ನ್ಯಾಯಾಲಯಕ್ಕೆ ಸಲ್ಲಿಸಿರುವ ಅಫಿಡವಿಟ್ ಈಗ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ಮರಣದಂಡನೆಗೆ ಸಂತ್ರಸ್ತರ ಕುಟುಂಬಗಳ ಆಗ್ರಹ
ತನ್ನ ಪತ್ನಿ ಮುಶಾಲ್ ಹುಸೇನ್ ಮಲ್ಲಿಕ್ ಅವರಿಂದ ವಿಚ್ಛೇದನ ಘೋಷಿಸಿರುವ ಮಲಿಕ್, ಈ ಪ್ರಕರಣದಲ್ಲಿ ತನಗೆ ಮರಣದಂಡನೆ ವಿಧಿಸುವಂತೆ ನ್ಯಾಯಾಲಯದ ಮುಂದೆ ಸ್ವಯಂ ಒಪ್ಪಿಗೆ ಸೂಚಿಸಿರುವುದನ್ನು ಭಯೋತ್ಪಾದನಾ ಸಂತ್ರಸ್ತರ ಕುಟುಂಬಗಳು ಕಟುವಾಗಿ ಖಂಡಿಸಿವೆ. ಈ ನಡೆ ಕೇವಲ “ಸಹಾನುಭೂತಿ ಗಳಿಸುವ ಪ್ರಚಾರದ ತಂತ್ರ” ಎಂದು ಸಂತ್ರಸ್ತರು ಕಿಡಿಕಾರಿದ್ದಾರೆ.
ಸ್ಕ್ವಾಡ್ರನ್ ಲೀಡರ್ ರವಿ ಖನ್ನಾ ಅವರ ಪತ್ನಿ ನಿರ್ಮಲ್ ಖನ್ನಾ ಸೇರಿದಂತೆ ಹಲವು ಸಂತ್ರಸ್ತ ಕುಟುಂಬಗಳು ಯಾಸಿನ್ ಮಲಿಕ್ ಗಲ್ಲು ಶಿಕ್ಷೆಗೆ ಮಾತ್ರ ಅರ್ಹ ಎಂದು ಒತ್ತಾಯಿಸಿದ್ದಾರೆ.
ತನ್ನ ಹೆಂಡತಿಗೆ ವಿಧವೆಯ ಜೀವನ ಬೇಡ ಎಂದು ಹೇಳುವ ಮಲಿಕ್, ತಾನು ಮತ್ತು ತನ್ನ ಗ್ಯಾಂಗ್ ವಿಧವೆಯರನ್ನಾಗಿ ಮಾಡಿದ ನೂರಾರು ಮಹಿಳೆಯರ ಸಂಕಷ್ಟಕ್ಕೆ ಏನು ಉತ್ತರ ನೀಡುತ್ತಾನೆ ಎಂದು ಸಂತ್ರಸ್ತರು ತರಾಟೆಗೆ ತೆಗೆದುಕೊಂಡಿದ್ದಾರೆ.
ಘಟನೆ ನಡೆದು ಮೂರು ದಶಕಗಳಿಗೂ ಅಧಿಕ ಕಾಲ ಕಳೆದಿದ್ದರೂ ಇನ್ನೂ ಸಂಪೂರ್ಣ ನ್ಯಾಯ ದೊರೆಯದಿರುವ ಬಗ್ಗೆ ಕುಟುಂಬಗಳು ನ್ಯಾಯಾಂಗ ಮತ್ತು ಸರ್ಕಾರದ ಕಾರ್ಯವೈಖರಿಯನ್ನು ಪ್ರಶ್ನಿಸಿವೆ.
ಪ್ರೀತಿಪೂರ್ವಕ ಮತ್ತು ಭಯೋತ್ಪಾದಕ ತತ್ವಗಳು
1990ರ ಜನವರಿ 25ರಂದು ಶ್ರೀನಗರದ ಬಸ್ ನಿಲ್ದಾಣದಲ್ಲಿ ಜೆಕೆಎಲ್ಎಫ್ ಉಗ್ರರ ಗುಂಡೇಟಿಗೆ ಬಲಿಯಾದ ಸ್ಕ್ವಾಡ್ರನ್ ಲೀಡರ್ ರವಿ ಖನ್ನಾ ಅವರ ಪತ್ನಿ ನಿರ್ಮಲ್ ಖನ್ನಾ ಈ ಕುರಿತು ಮಾತನಾಡಿ, “ಅವನು ನನ್ನ ನಿರಾಯುಧ ಗಂಡನ ದೇಹಕ್ಕೆ 28 ಗುಂಡುಗಳನ್ನು ಹಾರಿಸಿ ಕೊಂದನು. ಇಂದು ಮೇಸ್ಸೀಯನಂತೆ ನಟಿಸಿ ಮೊಸಳೆ ಕಣ್ಣೀರು ಸುರಿಸುತ್ತಿದ್ದಾನೆ. ಅವನ ಬಗ್ಗೆ ಯಾವುದೇ ಸಹಾನುಭೂತಿ ಇರಬಾರದು” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಅದೇ ರೀತಿ, 1990ರಲ್ಲಿ ಜೆಕೆಎಲ್ಎಫ್ ಉಗ್ರರಿಂದ ಹತ್ಯೆಗೀಡಾದ ಇನ್ಸ್ಪೆಕ್ಟರ್ ಚುನಿ ಲಾಲ್ ಶಲ್ಲಾ ಅವರ ಪುತ್ರಿ ಡಾ. ಸುಷ್ಮಾ ಶಲ್ಲಾ ಪ್ರತಿಕ್ರಿಯಿಸಿ, “ಯಾಸಿನ್ ಮಲಿಕ್ ತನ್ನ ಪಾಪಗಳಿಗೆ ಶಿಕ್ಷೆ ಅನುಭವಿಸುತ್ತಿರುವುದು ನನಗೆ ತೃಪ್ತಿ ತಂದಿದೆ. ನಿಮ್ಮಿಂದಾಗಿ ನಮ್ಮ ತಾಯಂದಿರು ವಿಧವೆಯರಾಗಿ ನರಕಯಾತನೆ ಅನುಭವಿಸಿದ್ದಾರೆ. ಆ ನೋವು ನಿಮಗೆ ಗೊತ್ತೇ?” ಎಂದು ಪ್ರಶ್ನಿಸಿದ್ದಾರೆ.
ಪಾಕಿಸ್ತಾನಿ ಪತ್ನಿಯಿಂದ ವಿಚ್ಛೇದನ ಪಡೆದು ತಾನೇ ಗಲ್ಲು ಶಿಕ್ಷೆಗೆ ಮುಂದಾಗಿದ್ದೇನೆ ಎಂದು ಬಿಂಬಿಸಿಕೊಳ್ಳುತ್ತಿರುವ ಯಾಸಿನ್ ಮಲಿಕ್ ಅವರ ಈ ನಾಟಕೀಯ ನಡೆಯು ಕಾಶ್ಮೀರಿ ಪಂಡಿತರು ಮತ್ತು ಭಯೋತ್ಪಾದನೆಯಿಂದ ಸರ್ವಸ್ವ ಕಳೆದುಕೊಂಡ ಕುಟುಂಬಗಳಲ್ಲಿ ಮತ್ತೊಮ್ಮೆ ಆಕ್ರೋಶದ ಕಿಚ್ಚು ಹೊತ್ತಿಸಿದೆ. ಕಾನೂನು ಪ್ರಕ್ರಿಯೆಗಳು ತ್ವರಿತಗತಿಯಲ್ಲಿ ನಡೆದು ಅಪರಾಧಿಗೆ ತಕ್ಕ ಶಿಕ್ಷೆಯಾಗಬೇಕು ಎಂಬುದು ಸಂತ್ರಸ್ತರ ದೃಢವಾದ ಒತ್ತಾಯವಾಗಿದೆ.
