ಮಹಿಳಾ ಪ್ರೀಮಿಯರ್ ಲೀಗ್ 2026ರ ಮಹತ್ವದ ಫೈನಲ್ ಪಂದ್ಯಕ್ಕೆ ವೇದಿಕೆ ಸಿದ್ಧವಾಗಿದೆ. ಗುರುವಾರ ವಡೋದರಾದ ಕೋಟಂಬಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಈ ಹೈವೋಲ್ಟೇಜ್ ಪಂದ್ಯದಲ್ಲಿ ಸ್ಮೃತಿ ಮಂಧಾನ ನೇತೃತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಜೆಮಿಮಾ ರೋಡ್ರಿಗಸ್ ಸಾರಥ್ಯದ ಡೆಲ್ಲಿ ಕ್ಯಾಪಿಟಲ್ಸ್ ಮುಖಾಮುಖಿಯಾಗುತ್ತಿವೆ. ವಿಶೇಷವೆಂದರೆ ಮೈದಾನದ ಹೊರಗೆ ಆಪ್ತ ಗೆಳತಿಯರಾಗಿರುವ ಸ್ಮೃತಿ ಮತ್ತು ಜೆಮಿಮಾ ಈಗ ಟ್ರೋಫಿಗಾಗಿ ಮೈದಾನದಲ್ಲಿ ಪರಸ್ಪರ ಸೆಣಸಲಿದ್ದಾರೆ.
ಫೈನಲ್ ಶಾಪ ವಿಮೋಚನೆಯ ಹಾದಿಯಲ್ಲಿ ದೆಹಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಇದು ಸತತ ನಾಲ್ಕನೇ ಫೈನಲ್ ಪ್ರವೇಶ. ಆದರೆ ಕಳೆದ ಮೂರು ಫೈನಲ್‌ಗಳಲ್ಲಿ ದೆಹಲಿ ಸೋಲನ್ನೇ ಕಂಡಿದೆ. ಈ ಬಾರಿ ದೆಹಲಿಯ ಹಾದಿ ಸುಲಭವಾಗಿರಲಿಲ್ಲ. ಲೀಗ್ ಹಂತದಲ್ಲಿ ಹೊರಬೀಳುವ ಹಂತದಲ್ಲಿದ್ದ ದೆಹಲಿ, ಎಲಿಮಿನೇಟರ್ ಪಂದ್ಯದಲ್ಲಿ ಗುಜರಾತ್ ಜೈಂಟ್ಸ್ ತಂಡವನ್ನು ಮಣಿಸಿ ಫೈನಲ್ ತಲುಪಿದೆ. 2024ರ ಫೈನಲ್‌ನಲ್ಲಿ ಬೆಂಗಳೂರು ವಿರುದ್ಧ ಅನುಭವಿಸಿದ ಸೋಲಿಗೆ ಸೇಡು ತೀರಿಸಿಕೊಳ್ಳಲು ದೆಹಲಿಗೆ ಈಗ ಸುವರ್ಣ ಅವಕಾಶ ಲಭಿಸಿದೆ.
ಟೇಬಲ್ ಟಾಪರ್ಸ್ ಶಾಪ ಬೆಂಗಳೂರನ್ನು ಕಾಡುವುದೇ? ಈ ಬಾರಿಯ ಲೀಗ್ ಹಂತದಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಆರ್ ಸಿ ಬಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದು ನೇರವಾಗಿ ಫೈನಲ್ ಪ್ರವೇಶಿಸಿದೆ. ಆದರೆ ಡಬ್ಲ್ಯೂಪಿಎಲ್ ಇತಿಹಾಸದಲ್ಲಿ ಅಂಕಪಟ್ಟಿಯ ಅಗ್ರಸ್ಥಾನಿಗಳು ಫೈನಲ್‌ನಲ್ಲಿ ಗೆಲ್ಲುವುದು ಕಷ್ಟ ಎಂಬ ಮಾತು ಚಾಲ್ತಿಯಲ್ಲಿದೆ. ಈಗಾಗಲೇ ಒಂದು ಬಾರಿ ಚಾಂಪಿಯನ್ ಆಗಿರುವ ಬೆಂಗಳೂರು ತಂಡ, ಈ ಶಾಪವನ್ನು ಮೆಟ್ಟಿ ನಿಂತು ಎರಡನೇ ಬಾರಿಗೆ ಪ್ರಶಸ್ತಿ ಎತ್ತಿ ಹಿಡಿಯುವ ಆತ್ಮವಿಶ್ವಾಸದಲ್ಲಿದೆ. ಸ್ಮೃತಿ ಮಂಧಾನ ಪಡೆ ಕಳೆದ ಒಂದು ವಾರದಿಂದ ವಿಶ್ರಾಂತಿಯಲ್ಲಿದ್ದು, ಆ ವೇಗವನ್ನು ಫೈನಲ್‌ನಲ್ಲಿ ಹೇಗೆ ಮುಂದುವರಿಸಲಿದೆ ಎಂಬುದು ಕುತೂಹಲಕಾರಿಯಾಗಿದೆ.
ಮುಖಾಮುಖಿ ಲೆಕ್ಕಾಚಾರ ಮತ್ತು ಪಿಚ್ ವರದಿ ಇದುವರೆಗೆ ಈ ಎರಡು ತಂಡಗಳ ನಡುವೆ ನಡೆದ 9 ಪಂದ್ಯಗಳಲ್ಲಿ ದೆಹಲಿ 6 ಮತ್ತು ಬೆಂಗಳೂರು 3 ಪಂದ್ಯಗಳನ್ನು ಗೆದ್ದಿವೆ. ವಡೋದರಾದ ಪಿಚ್ ಬ್ಯಾಟಿಂಗ್‌ಗೆ ಹೆಚ್ಚಿನ ನೆರವು ನೀಡಲಿದ್ದು, ಇಲ್ಲಿನ ಸರಾಸರಿ ಮೊತ್ತ 159 ರನ್ ಆಗಿದೆ. ಇಂತಹ ಒತ್ತಡದ ಪಂದ್ಯದಲ್ಲಿ ಟಾಸ್ ಗೆದ್ದ ತಂಡ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ. ಸಂಜೆ 7 ಗಂಟೆಗೆ ಪಂದ್ಯ ಆರಂಭವಾಗಲಿದ್ದು, ಮಳೆಯ ಆತಂಕವಿಲ್ಲದೆ ಪೂರ್ಣ ಪ್ರಮಾಣದ ಪಂದ್ಯವನ್ನು ಅಭಿಮಾನಿಗಳು ನಿರೀಕ್ಷಿಸಬಹುದು.
ಬೆಂಗಳೂರು ತನ್ನ ಪ್ರಾಬಲ್ಯ ಮುಂದುವರಿಸುತ್ತದೆಯೇ ಅಥವಾ ದೆಹಲಿ ಮೊದಲ ಬಾರಿಗೆ ಚಾಂಪಿಯನ್ ಪಟ್ಟಕ್ಕೇರುತ್ತದೆಯೇ ಎಂಬ ಪ್ರಶ್ನೆಗೆ ಗುರುವಾರ ರಾತ್ರಿ ಉತ್ತರ ಸಿಗಲಿದೆ.
