ಕಳೆದ ಕೆಲವು ತಿಂಗಳಿಂದ ಸಿನಿರಂಗದಲ್ಲಿ ಹರಿದಾಡುತ್ತಿದ್ದ ಸುದ್ದಿಗೆ ಈಗ ಅಧಿಕೃತ ಮುದ್ರೆ ಬಿದ್ದಿದೆ. ಟಾಲಿವುಡ್ನ ‘ಲೈಗರ್’ ವಿಜಯ್ ದೇವರಕೊಂಡ ಅವರು ತಮ್ಮ ಮುಂದಿನ ಚಿತ್ರಕ್ಕಾಗಿ ‘ಹಾಯ್ ನಾನ್ನ’ ಖ್ಯಾತಿಯ ಯುವ ನಿರ್ದೇಶಕ ಶೌರ್ಯುವ್ ಜೊತೆ ಕೈಜೋಡಿಸಿದ್ದಾರೆ. ಈ ಬಗ್ಗೆ ವಿಜಯ್ ದೇವರಕೊಂಡ ಅವರೇ ಸಾಮಾಜಿಕ ಜಾಲತಾಣಗಳಲ್ಲಿ ಅಧಿಕೃತವಾಗಿ ಘೋಷಣೆ ಮಾಡಿದ್ದು, ಸಿನಿಮಾ ಪ್ರೇಮಿಗಳಲ್ಲಿ ಭಾರಿ ಕುತೂಹಲ ಮೂಡಿಸಿದ್ದಾರೆ.
ವೈಲ್ಡ್ ಕಲ್ಪನೆಯ ‘ವಾರ್ ಡ್ರಾಮಾ’?
ಸಿನಿಮಾದ ಘೋಷಣೆಯ ಜೊತೆಗೆ ಹಂಚಿಕೊಂಡಿರುವ ಪೋಸ್ಟರ್ ಅತ್ಯಂತ ರೋಚಕವಾಗಿದೆ. ಇದರಲ್ಲಿ ವಿಜಯ್ ದೇವರಕೊಂಡ ಮತ್ತು ಚಿತ್ರತಂಡದ ಸದಸ್ಯರು ವಿಭಿನ್ನ ಅವತಾರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ವಿಜಯ್ ದೇವರಕೊಂಡ ಅವರು ಬೇಟೆ ನಾಯಿಗಳ ಗುಂಪಿನ ಹಿಂದೆ ಹೆಜ್ಜೆ ಹಾಕುತ್ತಿದ್ದರೆ, ನಿರ್ದೇಶಕ ಶೌರ್ಯುವ್ ಕುದುರೆಯೊಂದಿಗೆ ಹೆಗಲ ಮೇಲೆ ಕತ್ತಿ ಹೊತ್ತು ಸಾಗುತ್ತಿದ್ದಾರೆ. ಉಳಿದ ಚಿತ್ರತಂಡದ ಸದಸ್ಯರೂ ಕೂಡ ಯುದ್ಧದ ಶಸ್ತ್ರಾಸ್ತ್ರಗಳನ್ನು ಹಿಡಿದುಕೊಂಡಿದ್ದು, ಈ ಚಿತ್ರವು ಭರ್ಜರಿ ಆ್ಯಕ್ಷನ್ ಅಥವಾ ವಾರ್ ಡ್ರಾಮಾ ಆಗಿರಬಹುದು ಎಂಬ ಸುಳಿವು ನೀಡಿದೆ.
ಈ ಬಗ್ಗೆ ಬರೆದುಕೊಂಡಿರುವ ವಿಜಯ್, “ಶೌರ್ಯುವ್ ಅವರ ಅದ್ಭುತ ಕಲ್ಪನೆ ಮತ್ತು ತೀವ್ರವಾದ ಹೃದಯದೊಂದಿಗೆ ಈ ಸಿನಿಮಾವನ್ನು ಮಾಡುತ್ತಿರುವುದು ಖುಷಿ ತಂದಿದೆ. ಈ ಸಿನಿಮಾ ನಿರ್ಮಿಸುವ ಸವಾಲನ್ನು ಎದುರಿಸುತ್ತಿರುವ ತಂಡವನ್ನು ನಿಮಗೆ ಪರಿಚಯಿಸುತ್ತಿದ್ದೇನೆ. ನನ್ನ ಸಂಪೂರ್ಣ ಶ್ರಮವನ್ನು ಈ ಚಿತ್ರಕ್ಕಾಗಿ ನೀಡುತ್ತೇನೆ” ಎಂದು ಭಾವುಕರಾಗಿ ಪೋಸ್ಟ್ ಮಾಡಿದ್ದಾರೆ.
ಜಾಗತಿಕ ಮಟ್ಟದ ಚಿತ್ರತಂಡ
ಈ ಚಿತ್ರಕ್ಕೆ ಪ್ರಬಲವಾದ ತಾಂತ್ರಿಕ ತಂಡ ಸಾಥ್ ನೀಡುತ್ತಿದೆ. ಈ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ವೈರಾ ಎಂಟರ್ಟೈನ್ಮೆಂಟ್ಸ್ ಸಂಸ್ಥೆಯು ಅದ್ಧೂರಿಯಾಗಿ ನಿರ್ಮಾಣ ಮಾಡುತ್ತಿದೆ. ‘ಹಾಯ್ ನಾನ್ನ’ ಸಿನಿಮಾ ಮೂಲಕ ಭಾವನಾತ್ಮಕ ಕಥೆಯನ್ನು ತೆರೆಗೆ ತಂದಿದ್ದ ಶೌರ್ಯುವ್, ಈಗ ವಿಜಯ್ ದೇವರಕೊಂಡ ಅವರಿಗಾಗಿ ಸಂಪೂರ್ಣ ಆ್ಯಕ್ಷನ್ ಕಥೆಯನ್ನು ಸಿದ್ಧಪಡಿಸಿರುವಂತೆ ಕಾಣುತ್ತಿದೆ. ಈ ಪೋಸ್ಟರ್ ಕಂಡ ಅಭಿಮಾನಿಗಳು ‘ವಿಡಿ’ (VD) ಮತ್ತೆ ಹಳೆಯ ಫಾರ್ಮ್ಗೆ ಮರಳಲಿದ್ದಾರೆ ಎಂದು ಸಂಭ್ರಮಿಸುತ್ತಿದ್ದಾರೆ.
