ಉತ್ತರ ಪ್ರದೇಶ: ಕಳೆದ 15 ವರ್ಷಗಳಿಂದ ಸ್ವಂತ ಅಣ್ಣನಂತೆ ಭಾವಿಸಿ ರಾಖಿ ಕಟ್ಟುತ್ತಿದ್ದ 22 ವರ್ಷದ ಯುವಕನನ್ನೇ 20 ವರ್ಷದ ಯುವತಿ ಪ್ರೀತಿಸಿ ಅಂತರ್ಜಾತಿ ವಿವಾಹವಾಗಿರುವ ಘಟನೆ ಉತ್ತರ ಪ್ರದೇಶದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.
ಬಾಲ್ಯದಿಂದಲೇ ಮನೆಗೆ ಬಂದು ಹೋಗುತ್ತಿದ್ದ ‘ಶಾಶ್ವತ್’ ಎಂಬ ಯುವಕನನ್ನು ಆಕೆ ತನ್ನ ಸ್ವಂತ ಅಣ್ಣನಂತೆ ಭಾವಿಸಿ ರಾಖಿ ಕಟ್ಟುತ್ತಿದ್ದಳು ಎನ್ನಲಾಗಿದೆ. ಆದರೆ ಕಾಲ ಕಳೆದಂತೆ ಇಬ್ಬರ ನಡುವೆ ಪ್ರೀತಿ ಮೂಡಿದ್ದು, ಕಳೆದ ಸೆಪ್ಟೆಂಬರ್ 20ರಂದು ಇಬ್ಬರೂ ಮನೆ ಬಿಟ್ಟು ತೆರಳಿ ವಿವಾಹವಾಗಿದ್ದಾರೆ ಎಂದು ವರದಿಯಾಗಿದೆ.
ತಮ್ಮ ಮಗಳು ತಾನು ರಾಖಿ ಕಟ್ಟುತ್ತಿದ್ದ ವ್ಯಕ್ತಿಯನ್ನೇ ವಿವಾಹವಾಗಿದ್ದಾಳೆ ಎಂಬ ವಿಚಾರ ತಿಳಿದು ಪೋಷಕರು ತೀವ್ರ ಆಘಾತಕ್ಕೊಳಗಾಗಿದ್ದಾರೆ. ಕೋಪಗೊಂಡ ಅವರು ಬದುಕಿರುವ ಮಗಳಿಗೇ ಅಂತ್ಯಕ್ರಿಯೆ ನೆರವೇರಿಸಿ, ಆಕೆಯ ಫೋಟೋಗೆ ‘ಸ್ವರ್ಗಸ್ಥರಾಗಿದ್ದಾರೆ’ ಎಂದು ಬರೆದು ಸಂಬಂಧವನ್ನು ಸಂಪೂರ್ಣವಾಗಿ ಕಡಿದುಕೊಂಡಿದ್ದಾರೆ ಎಂದು ವರದಿಯಾಗಿದೆ.
ಏನಿದು ಘಟನೆ
ನಂದಿನಿ ಪಾಂಡೆ ಎಂಬ ಯುವತಿ ತನ್ನದೇ ಗ್ರಾಮದ 22 ವರ್ಷದ ಶಾಶ್ವತ್ ಗುಪ್ತಾ ಎಂಬ ಯುವಕನನ್ನು ವಿವಾಹವಾಗಿದ್ದಾಳೆ. ಸೆಪ್ಟೆಂಬರ್ 20ರಂದು ಇಬ್ಬರೂ ತಮ್ಮ ಮನೆಗಳನ್ನು ತೊರೆದು ಬಳಿಕ ವಿವಾಹವಾಗಿದ್ದಾರೆ.ನಂದಿನಿಯ ಕುಟುಂಬದ ಪ್ರಕಾರ, ಶಾಶ್ವತ್ ಹಲವು ವರ್ಷಗಳಿಂದ ಅವರ ಮನೆಗೆ ಆಗಾಗ್ಗೆ ಬರುತ್ತಿದ್ದನು. ನಂದಿನಿ ಆತನನ್ನು ಅಣ್ಣನಂತೆ ಪರಿಗಣಿಸುತ್ತಿದ್ದಳು ಎಂದು ಕುಟುಂಬಸ್ಥರು ಹೇಳಿದ್ದಾರೆ. ನಂದಿನಿಯ ತಾಯಿ ಹೇಳುವಂತೆ, ಸುಮಾರು 15 ವರ್ಷಗಳಿಂದ ನಂದಿನಿ ಶಾಶ್ವತ್‌ಗೆ ರಾಖಿ ಕಟ್ಟುತ್ತಿದ್ದಳು. ಇಬ್ಬರ ನಡುವಿನ ಸಂಬಂಧ ಬದಲಾಗಿರುವುದು ತಮಗೆ ತಿಳಿದಿರಲಿಲ್ಲ. ಇಬ್ಬರೂ ಮನೆ ಬಿಟ್ಟು ಹೋಗಿ ಮದುವೆಯಾದ ಬಳಿಕವೇ ಈ ವಿಚಾರ ಗೊತ್ತಾಯಿತು ಎಂದು ಕುಟುಂಬ ಹೇಳಿದೆ.
ಆದರೆ ನಂದಿನಿ ಈ ಬಗ್ಗೆ ಸಂಪೂರ್ಣ ಭಿನ್ನವಾದ ಹೇಳಿಕೆ ನೀಡಿದ್ದಾಳೆ. ಮದುವೆಯ ಬಳಿಕ ಬಿಡುಗಡೆ ಮಾಡಿದ ವಿಡಿಯೋದಲ್ಲಿ, ತಾನು ಮತ್ತು ಶಾಶ್ವತ್ ಪರಸ್ಪರ ಪ್ರೀತಿಸುತ್ತಿದ್ದೆವು ಹಾಗೂ ಇಬ್ಬರ ಒಪ್ಪಿಗೆಯಿಂದಲೇ ವಿವಾಹವಾಗಿದ್ದೇವೆ ಎಂದು ಆಕೆ ಹೇಳಿದ್ದಾಳೆ.
ಅಲ್ಲದೆ, ತಮ್ಮನ್ನು ಹಾಗೂ ಪತಿಯನ್ನು ಯಾರೂ ಕಿರುಕುಳ ನೀಡಬಾರದು ಎಂದು ಕುಟುಂಬಸ್ಥರು ಹಾಗೂ ಇತರರಲ್ಲಿ ನಂದಿನಿ ಮನವಿ ಮಾಡಿದ್ದಾಳೆ. ತಾನು ಪತಿಯೊಂದಿಗೆ ಸಂತೋಷವಾಗಿದ್ದು, ಸದ್ಯ ಆತನೊಂದಿಗೇ ವಾಸಿಸುತ್ತಿರುವುದಾಗಿ ತಿಳಿಸಿದ್ದಾಳೆ.
ತನ್ನ ತಂದೆ ದೈಹಿಕ ಹಾಗೂ ಮಾನಸಿಕವಾಗಿ ಕಿರುಕುಳ ನೀಡುತ್ತಿದ್ದರು ಎಂದು ನಂದಿನಿ ಆರೋಪಿಸಿದ್ದಾಳೆ. ತಾನು ಬಹಳ ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದರೂ ಸೂಕ್ತ ಚಿಕಿತ್ಸೆ ಕೊಡಿಸಿರಲಿಲ್ಲ ಎಂದು ಹೇಳಿದ್ದಾಳೆ. ಮದುವೆಯಾದ ಬಳಿಕ ತನ್ನ ಪತಿ ಹಾಗೂ ಅತ್ತೆ-ಮಾವಂದಿರು ತನ್ನನ್ನು ಚೆನ್ನಾಗಿ ನೋಡಿಕೊಳ್ಳುತ್ತಿದ್ದು, ಚಿಕಿತ್ಸೆ ಕೊಡಿಸುತ್ತಿದ್ದಾರೆ ಎಂದು ತಿಳಿಸಿದ್ದಾಳೆ.
ಮನೆ ಬಿಟ್ಟು ಹೋಗುವಾಗ ₹2 ಲಕ್ಷ ಹಣ ತೆಗೆದುಕೊಂಡು ಹೋಗಿದ್ದಾಳೆ ಎಂಬ ಕುಟುಂಬದ ಆರೋಪವನ್ನೂ ನಂದಿನಿ ನಿರಾಕರಿಸಿದ್ದಾಳೆ. ತನ್ನ ಕುಟುಂಬದ ಬಳಿ ಅಷ್ಟು ದೊಡ್ಡ ಮೊತ್ತದ ಹಣವೇ ಇರಲಿಲ್ಲ ಎಂದು ಆಕೆ ಹೇಳಿದ್ದಾಳೆ.
ಈ ನಡುವೆ, ನಂದಿನಿಯ ತಂದೆಗೆ ಸೆಪ್ಟೆಂಬರ್ 21ರಂದು ಮಗಳ ಮದುವೆಯ ವಿಚಾರ ತಿಳಿದುಬಂದಿದೆ. ಬಳಿಕ ಕುಟುಂಬಸ್ಥರು ನಂದಿನಿ ಮೃತಪಟ್ಟಿದ್ದಾಳೆ ಎಂಬಂತೆ ಸಾಂಕೇತಿಕ ಅಂತ್ಯಕ್ರಿಯೆ ವಿಧಿಗಳನ್ನು ನೆರವೇರಿಸಿದ್ದಾರೆ ಎಂದು ವರದಿಯಾಗಿದೆ.
ನಂದಿನಿಯೊಂದಿಗೆ ಎಲ್ಲಾ ಸಂಬಂಧಗಳನ್ನು ಕಡಿದುಕೊಂಡಿರುವುದಾಗಿ ಆಕೆಯ ತಾಯಿ ಹೇಳಿದ್ದಾರೆ. ಇದೇ ವೇಳೆ, ಈ ಮದುವೆಯ ಮುಂದಿನ ಭವಿಷ್ಯ ಹಾಗೂ ನಂದಿನಿಯ ಸುರಕ್ಷತೆ ಬಗ್ಗೆಯೂ ಕುಟುಂಬಸ್ಥರು ಆತಂಕ ವ್ಯಕ್ತಪಡಿಸಿದ್ದಾರೆ.
ಶಾಶ್ವತ್ ನಂದಿನಿಯನ್ನು ಪ್ರಲೋಭನೆ ನೀಡಿ ಕರೆದುಕೊಂಡು ಹೋಗಿದ್ದಾನೆ ಎಂದು ಕುಟುಂಬ ಆರೋಪಿಸಿದೆ. ಆದರೆ ನಂದಿನಿ ತಾನು ಸ್ವಯಂಪ್ರೇರಿತವಾಗಿ ಮನೆ ತೊರೆದು, ತನ್ನ ಇಚ್ಛೆಯಂತೆ ಶಾಶ್ವತ್‌ನನ್ನು ಮದುವೆಯಾಗಿದ್ದೇನೆ ಎಂದು ಹೇಳಿದ್ದಾಳೆ.
ಹೀಗಾಗಿ ಮದುವೆಗೆ ಕಾರಣವಾದ ಘಟನೆಗಳ ಬಗ್ಗೆ ನಂದಿನಿ ಹಾಗೂ ಆಕೆಯ ಕುಟುಂಬದಿಂದ ಪರಸ್ಪರ ಭಿನ್ನ ಹೇಳಿಕೆಗಳು ಹೊರಬಂದಿವೆ. ಇಬ್ಬರ ಸಂಬಂಧ ಮತ್ತು ವಿವಾಹದ ನೈಜ ಪರಿಸ್ಥಿತಿ ಸದ್ಯ ವಿವಾದದಲ್ಲಿದ್ದು, ಅಧಿಕೃತ ಮಾಹಿತಿ ಹಾಗೂ ಪೊಲೀಸ್ ತನಿಖೆಯಿಂದ ಮುಂದಿನ ದಿನಗಳಲ್ಲಿ ಹೆಚ್ಚಿನ ಸ್ಪಷ್ಟತೆ ಸಿಗುವ ನಿರೀಕ್ಷೆಯಿದೆ.
ಯುವತಿ ಈ ಕುರಿತು ವಿಡಿಯೋವೊಂದನ್ನು ಬಿಡುಗಡೆ ಮಾಡಿ ತನ್ನದೇ ವಿವರಣೆ ನೀಡಿದ್ದಾಳೆ. “ನನ್ನ ಪೋಷಕರು ನನಗೆ ಹೊಡೆದು ಹಿಂಸೆ ನೀಡುತ್ತಿದ್ದರು. ನಾನು ಅನಾರೋಗ್ಯಕ್ಕೆ ಒಳಗಾದಾಗ ಕನಿಷ್ಠ ಚಿಕಿತ್ಸೆ ಕೊಡಿಸಲಿಲ್ಲ. ಈಗ ನನ್ನ ಪತಿಯೇ ನನ್ನನ್ನು ಚೆನ್ನಾಗಿ ನೋಡಿಕೊಳ್ಳುತ್ತಿದ್ದಾರೆ. ನಾವಿಬ್ಬರೂ ನಮ್ಮ ಸ್ವಂತ ಇಚ್ಛೆಯಿಂದಲೇ ಮದುವೆಯಾಗಿದ್ದೇವೆ” ಎಂದು ಆಕೆ ಹೇಳಿದ್ದಾಳೆ.ಇದೇ ವೇಳೆ ಮನೆ ಬಿಟ್ಟು ತೆರಳುವಾಗ ₹2 ಲಕ್ಷ ಹಣ ತೆಗೆದುಕೊಂಡು ಹೋಗಿದ್ದಾಳೆ ಎಂಬ ಪೋಷಕರ ಆರೋಪವನ್ನೂ ಯುವತಿ ತಳ್ಳಿಹಾಕಿದ್ದಾಳೆ.
