ಬೆಂಗಳೂರು: ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ವಿಮಾನದಲ್ಲಿ ಪ್ರಯಾಣಿಸುವವರಿಗೆ ಸೆಪ್ಟೆಂಬರ್ 1, 2026ರಿಂದ ಶುಲ್ಕದ ಹೊರೆ ಕಡಿಮೆಯಾಗಲಿದೆ. ವಿಮಾನ ನಿಲ್ದಾಣದ ಯೂಸರ್ ಡೆವಲಪ್‌ಮೆಂಟ್ ಫೀ (UDF) ಅನ್ನು ಭಾರೀ ಪ್ರಮಾಣದಲ್ಲಿ ಇಳಿಸಲಾಗಿದ್ದು, ಹೊರಹೋಗುವ ಪ್ರಯಾಣಿಕರಿಗೆ ಇದು ಅನ್ವಯವಾಗಲಿದೆ. ಇದೇ ವೇಳೆ ಬೆಂಗಳೂರಿಗೆ ಆಗಮಿಸುವ ಪ್ರಯಾಣಿಕರಿಂದ ಮೊದಲ ಬಾರಿಗೆ UDF ವಸೂಲಿ ಮಾಡಲು ನಿರ್ಧರಿಸಲಾಗಿದೆ.
ವಿಮಾನ ನಿಲ್ದಾಣದ ಶುಲ್ಕಗಳನ್ನು ನಿಯಂತ್ರಿಸುವ ಏರ್‌ಪೋರ್ಟ್ಸ್ ಎಕನಾಮಿಕ್ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ (AERA), ಮಾರ್ಚ್ 31, 2031ಕ್ಕೆ ಅಂತ್ಯಗೊಳ್ಳುವ ಐದು ವರ್ಷಗಳ ನಿಯಂತ್ರಣ ಅವಧಿಗೆ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಹೊಸ ಶುಲ್ಕಗಳನ್ನು ನಿಗದಿಪಡಿಸಿದೆ.
ಹೊರಹೋಗುವ ಪ್ರಯಾಣಿಕರಿಗೆ ಎಷ್ಟು ಉಳಿತಾಯ?
ಬೆಂಗಳೂರಿನಿಂದ ಹೊರಡುವ ದೇಶೀಯ ವಿಮಾನ ಪ್ರಯಾಣಿಕರಿಗೆ UDF ₹550ರಿಂದ ₹300ಕ್ಕೆ ಇಳಿಯಲಿದೆ. ಅಂದರೆ ಪ್ರತಿ ಪ್ರಯಾಣಿಕರಿಗೆ ₹250 ಉಳಿತಾಯವಾಗಲಿದ್ದು, ಸುಮಾರು ಶೇ.45ರಷ್ಟು ಕಡಿತವಾಗಲಿದೆ.
ಅದೇ ರೀತಿ ಅಂತರಾಷ್ಟ್ರೀಯ ಪ್ರಯಾಣಿಕರ UDF ₹1,500ರಿಂದ ₹997ಕ್ಕೆ ಇಳಿಯಲಿದೆ. ಇದರಿಂದ ಪ್ರತಿ ಪ್ರಯಾಣಿಕರಿಗೆ ₹503 ಉಳಿತಾಯವಾಗಲಿದ್ದು, ಸುಮಾರು ಶೇ.34ರಷ್ಟು ಕಡಿತವಾಗಲಿದೆ.
ಈ ಹೊಸ ಶುಲ್ಕಗಳು ವಿಮಾನ ನಿಲ್ದಾಣ ನಿರ್ವಹಣಾ ಸಂಸ್ಥೆ BIAL ಕೋರಿದ್ದ ದರಕ್ಕಿಂತಲೂ ಕಡಿಮೆಯಾಗಿವೆ. BIAL ದೇಶೀಯ ಪ್ರಯಾಣಿಕರಿಗೆ ₹450 ಹಾಗೂ ಅಂತರಾಷ್ಟ್ರೀಯ ಪ್ರಯಾಣಿಕರಿಗೆ ₹1,215 UDF ನಿಗದಿಪಡಿಸುವಂತೆ ಪ್ರಸ್ತಾವಿಸಿತ್ತು.
ಬೆಂಗಳೂರಿಗೆ ಬರುವ ಪ್ರಯಾಣಿಕರಿಗೂ ಇನ್ನು ಶುಲ್ಕ
ಹೊರಹೋಗುವ ಪ್ರಯಾಣಿಕರಿಗೆ ಶುಲ್ಕ ಕಡಿಮೆಯಾಗುತ್ತಿದ್ದರೂ, ಬೆಂಗಳೂರಿಗೆ ಆಗಮಿಸುವ ಪ್ರಯಾಣಿಕರಿಗೆ ಇದೇ ಮೊದಲ ಬಾರಿಗೆ UDF ವಿಧಿಸಲಾಗುತ್ತಿದೆ.
ಸೆಪ್ಟೆಂಬರ್ 1ರಿಂದ ದೇಶೀಯ ಆಗಮನಕ್ಕೆ ಪ್ರತಿ ಪ್ರಯಾಣಿಕರಿಗೆ ₹125 ಹಾಗೂ ಅಂತರಾಷ್ಟ್ರೀಯ ಆಗಮನಕ್ಕೆ ₹426 UDF ಪಾವತಿಸಬೇಕಾಗುತ್ತದೆ. ಸದ್ಯ ಆಗಮಿಸುವ ಪ್ರಯಾಣಿಕರಿಂದ ಯಾವುದೇ UDF ವಸೂಲಿ ಮಾಡಲಾಗುತ್ತಿಲ್ಲ.
ಬೆಂಗಳೂರಿನಿಂದ ಹೋಗಿ, ಬೆಂಗಳೂರಿಗೇ ಮರಳಿದರೆ ಎಷ್ಟು ಶುಲ್ಕ?
ಬೆಂಗಳೂರಿನಿಂದ ಪ್ರಯಾಣ ಆರಂಭಿಸಿ ಮತ್ತೆ ಬೆಂಗಳೂರಿಗೆ ಮರಳುವ ದೇಶೀಯ ರೌಂಡ್ ಟ್ರಿಪ್‌ಗೆ ಒಟ್ಟು UDF ₹425 ಆಗಲಿದೆ. ಹೊರಡುವಾಗ ₹300 ಹಾಗೂ ಮರಳುವಾಗ ₹125 ಪಾವತಿಸಬೇಕಾಗುತ್ತದೆ. ಸದ್ಯದ ₹550 ಹೊರಹೋಗುವ ಶುಲ್ಕಕ್ಕೆ ಹೋಲಿಸಿದರೆ ಒಟ್ಟು ₹125 ಕಡಿಮೆಯಾಗಲಿದೆ.
ಅದೇ ರೀತಿ ಅಂತರಾಷ್ಟ್ರೀಯ ರೌಂಡ್ ಟ್ರಿಪ್‌ಗೆ ಒಟ್ಟು UDF ₹1,423 ಆಗಲಿದೆ. ಹೊರಡುವಾಗ ₹997 ಮತ್ತು ಆಗಮಿಸುವಾಗ ₹426 ಪಾವತಿಸಬೇಕು. ಪ್ರಸ್ತುತ ಇರುವ ₹1,500 ಶುಲ್ಕಕ್ಕೆ ಹೋಲಿಸಿದರೆ ₹77 ಕಡಿಮೆಯಾಗಲಿದೆ.
ಟಿಕೆಟ್ ದರ ಕೂಡ ಕಡಿಮೆಯಾಗುತ್ತಾ?
UDF ಅನ್ನು ವಿಮಾನ ಟಿಕೆಟ್‌ನಲ್ಲೇ ಪ್ರಯಾಣಿಕರಿಂದ ವಸೂಲಿ ಮಾಡಲಾಗುತ್ತದೆ. ಹೀಗಾಗಿ ಸೆಪ್ಟೆಂಬರ್ 1 ಅಥವಾ ಅದಾದ ಬಳಿಕ ಬುಕ್ ಮಾಡುವ ಟಿಕೆಟ್‌ಗಳ ದರದ ವಿವರದಲ್ಲಿ ಹೊಸ ಶುಲ್ಕಗಳು ಕಾಣಿಸಿಕೊಳ್ಳಲಿವೆ.
ಆದರೆ UDF ಕಡಿಮೆಯಾದಷ್ಟು ಒಟ್ಟಾರೆ ವಿಮಾನ ಟಿಕೆಟ್ ದರ ನೇರವಾಗಿ ಕಡಿಮೆಯಾಗುತ್ತದೆ ಎಂದು ಹೇಳಲಾಗುವುದಿಲ್ಲ. ವಿಮಾನ ದರಗಳು ಪ್ರಯಾಣಿಕರ ಬೇಡಿಕೆ, ಸೀಟುಗಳ ಲಭ್ಯತೆ, ಮಾರ್ಗ, ಪ್ರಯಾಣದ ದಿನಾಂಕ ಹಾಗೂ ವಿಮಾನಯಾನ ಸಂಸ್ಥೆಯ ದರ ನಿಗದಿ ಸೇರಿದಂತೆ ಹಲವು ಅಂಶಗಳ ಮೇಲೆ ಅವಲಂಬಿತವಾಗಿರುತ್ತವೆ.
ಹೀಗಾಗಿ ಟಿಕೆಟ್ ಬುಕ್ ಮಾಡುವ ಮುನ್ನ ಫೇರ್ ಬ್ರೇಕ್‌ಡೌನ್ ಪರಿಶೀಲಿಸುವುದು ಉತ್ತಮ.
UDF ಎಂದರೇನು?
UDF ಅಂದರೆ ಯೂಸರ್ ಡೆವಲಪ್‌ಮೆಂಟ್ ಫೀ. ವಿಮಾನ ನಿಲ್ದಾಣದ ಮೂಲಸೌಕರ್ಯ ಅಭಿವೃದ್ಧಿ ಮತ್ತು ನಿರ್ವಹಣೆಗೆ ಬೇಕಾದ ವೆಚ್ಚವನ್ನು ಭರಿಸಲು ಪ್ರಯಾಣಿಕರಿಂದ ಈ ಶುಲ್ಕವನ್ನು ವಸೂಲಿ ಮಾಡಲಾಗುತ್ತದೆ. ವಿಮಾನಯಾನ ಸಂಸ್ಥೆಗಳು ಟಿಕೆಟ್ ದರದ ಭಾಗವಾಗಿ ಈ ಶುಲ್ಕವನ್ನು ಪ್ರಯಾಣಿಕರಿಂದ ಸಂಗ್ರಹಿಸಿ ವಿಮಾನ ನಿಲ್ದಾಣ ನಿರ್ವಹಣಾ ಸಂಸ್ಥೆಗೆ ಪಾವತಿಸುತ್ತವೆ.
ಬೆಂಗಳೂರಿನ ವಿಮಾನ ನಿಲ್ದಾಣದ ಒಟ್ಟು ಪ್ರಯಾಣಿಕರ ಸಂಚಾರದಲ್ಲಿ ದೇಶೀಯ ಪ್ರಯಾಣಿಕರ ಪಾಲು ಸುಮಾರು 84% ಇದೆ. ದೇಶೀಯ ವಿಮಾನ ಪ್ರಯಾಣವನ್ನು ಹೆಚ್ಚು ಕೈಗೆಟುಕುವಂತೆ ಮಾಡುವ ಉದ್ದೇಶದಿಂದ ಹೊರಹೋಗುವ ದೇಶೀಯ UDF ಅನ್ನು ₹300ಕ್ಕೆ ನಿಗದಿಪಡಿಸಲಾಗಿದೆ ಎಂದು AERA ತಿಳಿಸಿದೆ.
ಯೋಜನೆ ಪೂರ್ಣಗೊಂಡ ಬಳಿಕವೇ ಶುಲ್ಕ ವಸೂಲಿ
ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಮೊದಲ ಬಾರಿಗೆ Incremental Average Revenue Requirement ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದೆ.ಈ ವ್ಯವಸ್ಥೆಯಡಿ ಪ್ರಮುಖ ಮೂಲಸೌಕರ್ಯ ಯೋಜನೆಗಳು ಪೂರ್ಣಗೊಂಡು, ಕಾರ್ಯಾರಂಭ ಮಾಡಿ ಪ್ರಯಾಣಿಕರಿಗೆ ಬಳಕೆಗೆ ಲಭ್ಯವಾದ ಬಳಿಕವೇ ಅವುಗಳ ವೆಚ್ಚವನ್ನು ವಿಮಾನ ನಿಲ್ದಾಣದ ಶುಲ್ಕಗಳ ಮೂಲಕ ವಸೂಲಿ ಮಾಡಲಾಗುತ್ತದೆ.
ಈಸ್ಟ್‌ರ್ನ್ ಕಾರ್ಗೋ ಟರ್ಮಿನಲ್, ಟರ್ಮಿನಲ್-2ರ ಫೇಸ್-2 ಹಾಗೂ T2ರ ಫೇಸ್-2 ಏಪ್ರನ್ ಯೋಜನೆಗಳು ಇದರ ವ್ಯಾಪ್ತಿಗೆ ಬರುತ್ತವೆ. ಈ ಯೋಜನೆಗಳಿಗಾಗಿ ಹೆಚ್ಚುವರಿ ಶುಲ್ಕ ವಸೂಲಿ 2029-30ರಿಂದ ಆರಂಭವಾಗುವ ನಿರೀಕ್ಷೆಯಿದೆ.
ಈ ವ್ಯವಸ್ಥೆಯಿಂದ ಇನ್ನೂ ಕಾರ್ಯಾರಂಭವಾಗದ ಯೋಜನೆಗಳಿಗೆ ಪ್ರಯಾಣಿಕರು ಮತ್ತು ವಿಮಾನಯಾನ ಸಂಸ್ಥೆಗಳು ಮುಂಚಿತವಾಗಿಯೇ ಹಣ ಪಾವತಿಸುವ ಪರಿಸ್ಥಿತಿ ತಪ್ಪಲಿದೆ. ಯೋಜನೆಗಳು ವಿಳಂಬವಾಗುವುದು ಅಥವಾ ಕೈಬಿಡುವ ಸಂದರ್ಭದಲ್ಲೂ ಹೆಚ್ಚುವರಿ ಶುಲ್ಕ ವಸೂಲಿ ಮಾಡುವ ಅಪಾಯ ಕಡಿಮೆಯಾಗಲಿದೆ.
ಇದಲ್ಲದೆ, ನಿಯಂತ್ರಣ ಅವಧಿಯಲ್ಲಿ ದೇಶೀಯ ವಿಮಾನಗಳಿಗೆ ಪ್ರತಿ ಮೆಟ್ರಿಕ್ ಟನ್‌ಗೆ ₹442 ಹಾಗೂ ಅಂತರಾಷ್ಟ್ರೀಯ ವಿಮಾನಗಳಿಗೆ ಪ್ರತಿ ಮೆಟ್ರಿಕ್ ಟನ್‌ಗೆ ₹652 ಲ್ಯಾಂಡಿಂಗ್ ಶುಲ್ಕವನ್ನು AERA ನಿಗದಿಪಡಿಸಿದೆ. ಈ ಶುಲ್ಕವನ್ನು ಪ್ರಯಾಣಿಕರು ನೇರವಾಗಿ ಪಾವತಿಸುವುದಿಲ್ಲ; ವಿಮಾನಯಾನ ಸಂಸ್ಥೆಗಳೇ ಪಾವತಿಸುತ್ತವೆ.
