ಐಟಿ ಹಬ್ ಬೆಂಗಳೂರಿನಲ್ಲಿ ಟ್ರಾಫಿಕ್ ಕಿರಿಕಿರಿಯ ನಡುವೆ ಕ್ಯಾಬ್ ಓಡಿಸುವುದು ಎಂದರೆ ಅದೊಂದು ದೊಡ್ಡ ಸವಾಲು ಎಂದೇ ಹೆಚ್ಚಿನವರು ಭಾವಿಸುತ್ತಾರೆ. ಆದರೆ, ಅದೇ ಸಿಲಿಕಾನ್ ಸಿಟಿಯಲ್ಲಿ ಉಬರ್ ಬ್ಲ್ಯಾಕ್ (Uber Black) ಕ್ಯಾಬ್ ಓಡಿಸುವ ಮೂಲಕ ಕೇವಲ ಒಂದೇ ವಾರದಲ್ಲಿ ಬರೋಬ್ಬರಿ ₹46,000 ಕ್ಕೂ ಹೆಚ್ಚು ಆದಾಯ ಗಳಿಸಬಹುದು ಎಂಬುದನ್ನು ಯುವಕನೊಬ್ಬ ಸಾಬೀತುಪಡಿಸಿದ್ದು, ಈತನ ಲೈಫ್‌ಸ್ಟೈಲ್ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಮೂಡಿಸಿದೆ.
ಯೆನೆಪೋಯ ವಿಶ್ವವಿದ್ಯಾಲಯದಿಂದ ಬಿ.ಕಾಂ ಪದವಿ ಪಡೆದಿರುವ ಹ್ಯಾಮ್ತೋರ್ ಡೆಬ್ಬರ್ಮಾ (Hamtor Debbarma) ಎಂಬ ಯುವಕ, ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ‘ಒನ್ ನಾರ್ಮಲ್ ಡೇ ಇನ್ ಮೈ ಲೈಫ್’ (ನನ್ನ ದಿನಚರಿಯ ಒಂದು ಸಾಮಾನ್ಯ ದಿನ) ಎಂಬ ವಿಡಿಯೋ ಇದೀಗ ನೆಟ್ಟಿಗರ ಹುಬ್ಬೇರಿಸಿದೆ.
ಶಿಸ್ತುಬದ್ಧ ದಿನಚರಿ, ವೈಟ್ ಅಂಡ್ ಬ್ಲ್ಯಾಕ್ ಯೂನಿಫಾರ್ಮ್:
ವಿಡಿಯೋದಲ್ಲಿ ಹ್ಯಾಮ್ತೋರ್ ತಮ್ಮ ಮುಂಜಾನೆಯ ಶಿಸ್ತುಬದ್ಧ ಜೀವನಶೈಲಿಯನ್ನು ತೋರಿಸಿದ್ದಾರೆ. ಬೆಳಗ್ಗೆ ಎದ್ದು ಹಲ್ಲುಜ್ಜಿ, ಸ್ನಾನ ಮಾಡಿ, ಸ್ವತಃ ಪೌಷ್ಟಿಕ ಉಪಹಾರ ತಯಾರಿಸಿ, ತಮ್ಮ ಬಟ್ಟೆಗಳನ್ನು ತಾವೇ ಇಸ್ತ್ರಿ ಮಾಡಿಕೊಳ್ಳುತ್ತಾರೆ. ಮನೆಯಲ್ಲೇ ಇರುವ ತಮ್ಮ ಕಂಪ್ಯೂಟರ್ ವರ್ಕ್‌ಸ್ಪೇಸ್ ತೋರಿಸಿದ ಬಳಿಕ, ಉಬರ್ ಬ್ಲ್ಯಾಕ್ ಚಾಲಕರಿಗೆ ನಿಗದಿತವಾಗಿರುವ ಬಿಳಿ ಶರ್ಟ್ ಮತ್ತು ಕಪ್ಪು ಪ್ಯಾಂಟ್ ಧರಿಸಿ ಸಿದ್ಧರಾಗುತ್ತಾರೆ.
ನಂತರ ರಸ್ತೆಗೆ ಇಳಿಯುವ ಮುನ್ನ ಕಾರನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ, ಬೆಂಗಳೂರಿನ ರಸ್ತೆಗಳಲ್ಲಿ ಗ್ರಾಹಕರಿಗೆ ಪ್ರೀಮಿಯಂ ಸೇವೆ ನೀಡಲು ಹೊರಡುತ್ತಾರೆ. ದಿನವಿಡೀ ಗ್ರಾಹಕರನ್ನು ಕರೆದೊಯ್ಯುವುದು, ಮಧ್ಯಾಹ್ನ ಸ್ನೇಹಿತನೊಂದಿಗೆ ಉತ್ತಮ ಹೋಟೆಲ್‌ನಲ್ಲಿ ಊಟ ಮಾಡುವುದನ್ನು ಅವರು ವಿಡಿಯೋದಲ್ಲಿ ಸೆರೆಹಿಡಿದಿದ್ದಾರೆ.
ವಾರದ ಗಳಿಕೆ ನೋಡಿ ದಂಗಾದ ನೆಟ್ಟಿಗರು !
ವಿಡಿಯೋದ ಕೊನೆಯಲ್ಲಿ ಹ್ಯಾಮ್ತೋರ್ ತಮ್ಮ ಮೊಬೈಲ್ ಸ್ಕ್ರೀನ್‌ನಲ್ಲಿ ವಾರದ ಒಟ್ಟು ಗಳಿಕೆಯನ್ನು ತೋರಿಸಿದ್ದು, ಅದು ಬರೋಬ್ಬರಿ ₹46,022.30 ರೂಪಾಯಿಗಳಾಗಿತ್ತು! ಕೇವಲ ಒಂದೇ ವಾರದಲ್ಲಿ ಇಷ್ಟೊಂದು ದೊಡ್ಡ ಮೊತ್ತವನ್ನು ಕ್ಯಾಬ್ ಸೇವೆಯಿಂದ ಗಳಿಸಿರುವುದನ್ನು ಕಂಡು ಸೋಷಿಯಲ್ ಮೀಡಿಯಾ ಬಳಕೆದಾರರು ಆಶ್ಚರ್ಯಚಕಿತರಾಗಿದ್ದಾರೆ.
ಕ್ರಿಪ್ಟೋ ಮತ್ತು ಫಾರೆಕ್ಸ್ ಟ್ರೇಡಿಂಗ್‌ನಲ್ಲಿ ತೊಡಗಿಸಿಕೊಂಡಿರುವ ಇವರು, ಬಿಡುವಿನ ವೇಳೆಯ ಸೈಡ್ ಹಸಲ್ (Side Hustle) ಆಗಿ ಈ ಪ್ರೀಮಿಯಂ ಕ್ಯಾಬ್ ಓಡಿಸುತ್ತಿದ್ದಾರೆ. “ಯಾವ ಸ್ಥಾನವೂ ಶಾಶ್ವತವಲ್ಲ, ಸದಾ ವಿನಮ್ರರಾಗಿರಿ” ಎಂಬ ಸಂದೇಶದೊಂದಿಗೆ ವಿಡಿಯೋ ಮುಕ್ತಾಯಗೊಳಿಸಿದ್ದಾರೆ.
ಕಾರ್ಪೊರೇಟ್ ಮಂದಿಯ ತಮಾಷೆ ಕಮೆಂಟ್‌ಗಳು:
ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸಾವಿರಾರು ಜನ ಪ್ರತಿಕ್ರಿಯಿಸಿದ್ದು, ವಿಶೇಷವಾಗಿ ಐಟಿ ಮತ್ತು ಕಾರ್ಪೊರೇಟ್ ಉದ್ಯೋಗಿಗಳು ತಮಾಷೆಯ ಕಮೆಂಟ್‌ಗಳನ್ನು ಮಾಡಿದ್ದಾರೆ:
“ನಮಗೆ ಬೆಳಗ್ಗೆ 9 ರಿಂದ ಸಂಜೆ 5 ರವರೆಗೆ ಕಾರ್ಪೊರೇಟ್ ಆಫೀಸ್‌ನಲ್ಲಿ ಬೆವರಿಳಿಸಿದರೂ ಇಷ್ಟೊಂದು ಸಂಬಳ ಸಿಗುವುದಿಲ್ಲ!” ಎಂದು ಒಬ್ಬರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
“ಈ ಸಹೋದರನ ಜೀವನಶೈಲಿ ನನಗಿಂತಲೂ ಐಷಾರಾಮಿಯಾಗಿದೆ,” ಎಂದು ಮತ್ತೊಬ್ಬರು ಕಮೆಂಟ್ ಮಾಡಿದ್ದಾರೆ.
“ಬೆಂಗಳೂರಿನ ಐಟಿ ಮಂದಿಗೆ ನೀವು ಹೊಸ ಭರವಸೆ ಮೂಡಿಸುತ್ತಿದ್ದೀರಿ,” ಎಂದು ಹಲವರು ತಮಾಷೆ ಮಾಡಿದ್ದಾರೆ.
“ಶ್ರಮಕ್ಕೆ ಯಾವುದೇ ಕೀಳರಿಮೆ ಇಲ್ಲ. ಯಾವುದೇ ಕ್ಷೇತ್ರದಲ್ಲಿ ವಿದ್ಯಾವಂತ, ಸಭ್ಯ ಯುವಕರು ಇಂತಹ ಕೆಲಸಗಳನ್ನು ಹೆಮ್ಮೆಯಿಂದ ಮಾಡುವುದು ಇತರರಿಗೆ ಸ್ಪೂರ್ತಿ,” ಎಂದು ಹಿರಿಯ ನೆಟ್ಟಿಗರೊಬ್ಬರು ಪ್ರಶಂಸಿಸಿದ್ದಾರೆ.
ಯಾವುದೇ ಕೆಲಸವಾದರೂ ಪ್ರಾಮಾಣಿಕತೆ, ಶಿಸ್ತು ಮತ್ತು ಸಮಯಪ್ರಜ್ಞೆ ಇದ್ದರೆ ಉತ್ತಮ ಆದಾಯ ಗಳಿಸಬಹುದು ಎಂಬುದಕ್ಕೆ ಬೆಂಗಳೂರಿನ ಈ ಯುವಕನ ಜೀವನವೇ ಸಾಕ್ಷಿಯಾಗಿದೆ.
