ನವದೆಹಲಿ: ರೈಲು ಗಂಟೆಗಟ್ಟಲೆ ತಡವಾಗಿ ಪ್ರಯಾಣಿಕರಿಗೆ ತೊಂದರೆಯಾದರೆ, ಕೆಲವು ಸಂದರ್ಭಗಳಲ್ಲಿ ರೈಲ್ವೆ ವಿರುದ್ಧ ಪರಿಹಾರಕ್ಕಾಗಿ ದೂರು ನೀಡಬಹುದು ಎಂಬುದಕ್ಕೆ ಜಾರ್ಖಂಡ್‌ನ ಈ ಪ್ರಕರಣ ಉದಾಹರಣೆಯಾಗಿದೆ. ರೈಲು 8 ಗಂಟೆ 48 ನಿಮಿಷ ತಡವಾದ ಪ್ರಕರಣದಲ್ಲಿ ಪ್ರಯಾಣಿಕನಿಗೆ ಒಟ್ಟು ₹35 ಸಾವಿರ ಪರಿಹಾರ ನೀಡುವಂತೆ ಗ್ರಾಹಕ ಆಯೋಗ ರೈಲ್ವೆಗೆ ಆದೇಶಿಸಿದೆ.
ಸೆಪ್ಟೆಂಬರ್ 2024ರಲ್ಲಿ ಪ್ರಯಾಣಿಕರೊಬ್ಬರು ಟಾಟಾನಗರದಿಂದ ಸಂಬಲ್‌ಪುರಕ್ಕೆ ತೆರಳಲು ಇಸ್ಪಾತ್ ಎಕ್ಸ್‌ಪ್ರೆಸ್‌ನಲ್ಲಿ ಸ್ಲೀಪರ್ ಕ್ಲಾಸ್‌ನ ಎರಡು ಟಿಕೆಟ್‌ಗಳನ್ನು ಕಾಯ್ದಿರಿಸಿದ್ದರು. ನಿಗದಿತ ಸಮಯಕ್ಕೆ ಸಂಬಲ್‌ಪುರ ತಲುಪಬೇಕಿದ್ದ ರೈಲು ಬರೋಬ್ಬರಿ 8 ಗಂಟೆ 48 ನಿಮಿಷ ತಡವಾಗಿ ಗಮ್ಯಸ್ಥಾನ ತಲುಪಿತ್ತು.
ಈ ವಿಳಂಬದಿಂದ ದೈಹಿಕ, ಮಾನಸಿಕ ಹಾಗೂ ಆರ್ಥಿಕವಾಗಿ ತಮಗೆ ತೊಂದರೆಯಾಗಿದೆ ಎಂದು ಪ್ರಯಾಣಿಕರು ಆರೋಪಿಸಿದ್ದರು. ಬಳಿಕ ರೈಲ್ವೆಗೆ ಕಾನೂನು ನೋಟಿಸ್ ಕಳುಹಿಸಿ, ಗ್ರಾಹಕ ಆಯೋಗದಲ್ಲಿ ದೂರು ದಾಖಲಿಸಿದ್ದರು.
ವಿಚಾರಣೆ ವೇಳೆ ರೈಲ್ವೆ ತನ್ನದೇ ವಾದವನ್ನು ಮಂಡಿಸಿತ್ತು. ರೈಲು ಪ್ರಯಾಣಕ್ಕೆ ಸಂಬಂಧಿಸಿದ ಇಂತಹ ಪ್ರಕರಣಗಳನ್ನು ರೈಲ್ವೆ ಕ್ಲೇಮ್ಸ್ ಟ್ರಿಬ್ಯುನಲ್ (RCT) ವ್ಯಾಪ್ತಿಯಲ್ಲಿ ವಿಚಾರಿಸಬೇಕು. ಹೀಗಾಗಿ ಗ್ರಾಹಕ ಆಯೋಗದಲ್ಲಿ ಈ ದೂರನ್ನು ವಿಚಾರಿಸಲು ಸಾಧ್ಯವಿಲ್ಲ ಎಂದು ರೈಲ್ವೆ ತಿಳಿಸಿತ್ತು.
ಆದರೆ ರೈಲ್ವೆಯ ಈ ವಾದವನ್ನು ಆಯೋಗ ಒಪ್ಪಲಿಲ್ಲ. ಅಧ್ಯಕ್ಷ ಸುನಿಲ್ ಕುಮಾರ್ ಸಿಂಗ್ ಹಾಗೂ ಸದಸ್ಯರು ಪ್ರಕರಣವನ್ನು ಪರಿಶೀಲಿಸಿ, ರೈಲ್ವೆ ಸೇವೆಯಲ್ಲಿ ಕೊರತೆಯಾಗಿದೆ ಎಂದು ಪರಿಗಣಿಸಿದ್ದಾರೆ.
ಪ್ರಯಾಣಿಕರಿಗೆ ₹30 ಸಾವಿರ ಪರಿಹಾರ ಹಾಗೂ ₹5 ಸಾವಿರ ಪ್ರಕರಣದ ವೆಚ್ಚ ನೀಡುವಂತೆ ರೈಲ್ವೆಗೆ ಆದೇಶಿಸಲಾಗಿದೆ. ಈ ಮೊತ್ತವನ್ನು 45 ದಿನಗಳೊಳಗೆ ಪಾವತಿಸಬೇಕು ಎಂದು ಸೂಚಿಸಲಾಗಿದೆ. ಹೀಗಾಗಿ ರೈಲ್ವೆ ಒಟ್ಟು ₹35 ಸಾವಿರ ಪಾವತಿಸಬೇಕಾಗಿದೆ.
ರೈಲು 3 ಗಂಟೆಗೂ ಹೆಚ್ಚು ತಡವಾದರೆ ಟಿಕೆಟ್ ಹಣ ವಾಪಸ್ ಪಡೆಯಬಹುದೇ?
ರೈಲು 3 ಗಂಟೆಗೂ ಹೆಚ್ಚು ತಡವಾಗಿದ್ದು, ಪ್ರಯಾಣಿಕರು ರೈಲಿನಲ್ಲಿ ಪ್ರಯಾಣಿಸದಿದ್ದರೆ ಟಿಕೆಟ್ ಹಣ ಮರುಪಾವತಿಗಾಗಿ TDR ಸಲ್ಲಿಸಬಹುದು.
ಆನ್‌ಲೈನ್‌ನಲ್ಲಿ ಟಿಕೆಟ್ ಕಾಯ್ದಿರಿಸಿದ್ದರೆ IRCTC ವೆಬ್‌ಸೈಟ್ ಅಥವಾ ಆ್ಯಪ್‌ಗೆ ಲಾಗಿನ್ ಮಾಡಿ ‘My Bookings’ ವಿಭಾಗಕ್ಕೆ ಹೋಗಬೇಕು. ಅಲ್ಲಿ ಸಂಬಂಧಿತ ಟಿಕೆಟ್ ಆಯ್ಕೆ ಮಾಡಿಕೊಂಡು ‘File TDR’ ಮೇಲೆ ಕ್ಲಿಕ್ ಮಾಡಬೇಕು. ನಂತರ ರೈಲು ಮೂರು ಗಂಟೆಗೂ ಹೆಚ್ಚು ತಡವಾಗಿದ್ದು, ಪ್ರಯಾಣಿಕರು ಪ್ರಯಾಣಿಸಿಲ್ಲ ಎಂಬ ಕಾರಣವನ್ನು ಆಯ್ಕೆ ಮಾಡಿ TDR ಸಲ್ಲಿಸಬಹುದು.
ಇಲ್ಲಿ ಒಂದು ವಿಷಯ ಗಮನದಲ್ಲಿಟ್ಟುಕೊಳ್ಳಬೇಕು. ರೈಲು ವಾಸ್ತವವಾಗಿ ಹೊರಡುವ ಸಮಯಕ್ಕಿಂತ ಮುಂಚೆಯೇ TDR ಸಲ್ಲಿಸಬೇಕು.
ಕೌಂಟರ್ ಟಿಕೆಟ್ ಪಡೆದಿದ್ದರೆ?
ನಿಲ್ದಾಣದ ಟಿಕೆಟ್ ಕೌಂಟರ್‌ನಲ್ಲಿ ಪೇಪರ್ ಟಿಕೆಟ್ ಪಡೆದಿದ್ದರೆ, ರೈಲು ಮೂರು ಗಂಟೆಗೂ ಹೆಚ್ಚು ತಡವಾದ ಸಂದರ್ಭದಲ್ಲಿ ನಿಗದಿತ ಹೊರಡುವ ಸಮಯಕ್ಕೂ ಮುನ್ನ ಟಿಕೆಟ್ ಕೌಂಟರ್‌ಗೆ ತೆರಳಿ ಟಿಕೆಟ್ ಸರಂಡರ್ ಮಾಡಬೇಕು. ನಿಯಮಗಳ ಪ್ರಕಾರ ಟಿಕೆಟ್ ಹಣ ಮರುಪಾವತಿಯಾಗಬಹುದು.
ಆದರೆ ರೈಲು ವಿಳಂಬದಿಂದ ಟಿಕೆಟ್ ಹಣಕ್ಕಿಂತ ಹೆಚ್ಚಿನ ಆರ್ಥಿಕ ನಷ್ಟವಾಗಿದ್ದರೆ, ವಿಷಯ ಸ್ವಲ್ಪ ಭಿನ್ನವಾಗಿರುತ್ತದೆ. ಉದಾಹರಣೆಗೆ, ರೈಲು ತಡವಾದ ಕಾರಣ ಫ್ಲೈಟ್ ತಪ್ಪುವುದು, ಉದ್ಯೋಗ ಸಂದರ್ಶನಕ್ಕೆ ಹಾಜರಾಗಲು ಸಾಧ್ಯವಾಗದಿರುವುದು ಅಥವಾ ಹೆಚ್ಚುವರಿ ಹಣ ಖರ್ಚಾಗುವುದು ಮುಂತಾದ ಸಂದರ್ಭಗಳಲ್ಲಿ ಸೂಕ್ತ ದಾಖಲೆಗಳೊಂದಿಗೆ ಪರಿಹಾರಕ್ಕಾಗಿ ದೂರು ನೀಡಬಹುದು.
ರೈಲು ತಡವಾದರೆ ಈ ದಾಖಲೆಗಳನ್ನು ಇಟ್ಟುಕೊಳ್ಳಿ
ರೈಲು ವಿಳಂಬದಿಂದ ನಷ್ಟ ಉಂಟಾದರೆ, ನಂತರ ದೂರು ನೀಡುವ ಸಂದರ್ಭದಲ್ಲಿ ಪುರಾವೆಗಳು ಮುಖ್ಯವಾಗುತ್ತವೆ. ಆದ್ದರಿಂದ ರೈಲು ಎಷ್ಟು ತಡವಾಗಿತ್ತು ಎಂಬುದಕ್ಕೆ ಸಂಬಂಧಿಸಿದ ದಾಖಲೆ ಅಥವಾ ಸ್ಕ್ರೀನ್‌ಶಾಟ್‌ಗಳನ್ನು ಉಳಿಸಿಕೊಳ್ಳುವುದು ಒಳ್ಳೆಯದು.
NTES (National Train Enquiry System)ನಲ್ಲಿ ರೈಲಿನ ಸಂಚಾರ ಮತ್ತು ವಿಳಂಬದ ಮಾಹಿತಿಯನ್ನು ಪರಿಶೀಲಿಸಿ ಅದರ ಸ್ಕ್ರೀನ್‌ಶಾಟ್ ತೆಗೆದುಕೊಳ್ಳಬಹುದು. ಇದರ ಜೊತೆಗೆ ಫ್ಲೈಟ್ ಟಿಕೆಟ್, ಹೋಟೆಲ್ ಬುಕ್ಕಿಂಗ್, ಸಂದರ್ಶನಕ್ಕೆ ಸಂಬಂಧಿಸಿದ ದಾಖಲೆಗಳು, ಹೆಚ್ಚುವರಿ ಖರ್ಚಿನ ಬಿಲ್‌ಗಳು ಸೇರಿದಂತೆ ನಷ್ಟವನ್ನು ತೋರಿಸುವ ದಾಖಲೆಗಳನ್ನು ಸಂಗ್ರಹಿಸಿಟ್ಟುಕೊಳ್ಳಬೇಕು.
ಗ್ರಾಹಕ ದೂರುಗಳಿಗೆ 1915 ಸಂಖ್ಯೆಯನ್ನು ಸಂಪರ್ಕಿಸಬಹುದು. ಗ್ರಾಹಕ ವ್ಯವಹಾರಗಳ ಸಚಿವಾಲಯದ e-Daakhil ಪೋರ್ಟಲ್ ಮೂಲಕವೂ ಆನ್‌ಲೈನ್‌ನಲ್ಲಿ ದೂರು ಸಲ್ಲಿಸುವ ಅವಕಾಶವಿದೆ.
